WAS I STAP!
6 Milion Manmeri i Dai Long Sik COVID—Baibel i Tok Wanem?
Lain Wol Helt Oganaisesen (WHO) i tok, i kam inap long Me 23, 2022, inap 6.27 milion manmeri i dai long sik COVID-19. Tasol long wanpela nius ripot i kamap long Me 5, 2022, lain WHO i tok namba bilong ol manmeri i dai i go antap moa winim dispela namba. Em i tok insait long 2020 na 2021 “ol man i dai long sik COVID-19 long dispela haptaim bilong pendemik . . . em klostu inap 14.9 milion.” Yu ting Baibel i mekim sampela tok long kain hevi we i bagarapim tru bel bilong yumi?
Baibel i tok profet long ol sik nogut bai kilim i dai planti man
Jisas i tok profet olsem bai i gat ol bikpela sik, o ol epidemik bilong “ol sik nogut tru,” long haptaim em Baibel i kolim olsem “taim bilong las de.”—Luk 21:11, Contemporary English Version; 2 Timoti 3:1.
Tok profet bilong Jisas i kamap tru long nau. Bilong kisim sampela save moa, ritim atikol “What Is the Sign of ‘the Last Days,’ o ‘End Times’?”
Baibel i gat gutpela tok bilong mekim gut bel
“God bilong mekim isi bel bilong ol man long olgeta kain taim. Long olgeta hevi i kamap long yumi, em i save mekim isi bel bilong yumi.”—2 Korin 1:3, 4.
Ol tok bilong Baibel i bin mekim isi bel bilong planti manmeri em wanpela long famili bilong ol i dai. Kisim sampela save moa long rot bilong ritim ol atikol “Karim Hevi Bilong Krai Sori—Samting Yu Ken Mekim Long Nau” na “Nambawan Helpim Bilong Ol Man i Krai Sori.”
Baibel i tokaut long rot bilong pinisim ol dispela hevi olgeta
“Kingdom bilong yu i mas i kam. Laik bilong yu i mas kamap long graun olsem em i save kamap long heven.”—Matyu 6:10.
Klostu nau, “Kingdom Bilong God” bai pinisim tru olgeta kain sik na “i no gat wanpela man i stap long dispela ples bai tok: ‘Mi sik.’” (Mak 1:14, 15; Aisaia 33:24) Lukim vidio Kingdom Bilong God Em Wanem Samting? bilong kisim save long dispela gavman bilong heven na wok em bai mekim.
Mipela i laik invaitim yu long kisim sampela save moa long ol tok Baibel i mekim na bai ol gutpela edvais na ol promis bilong Baibel i ken helpim yu na famili bilong yu.