Left: Hurricane Ian, Florida, USA, September 2022 (Sean Rayford/Getty Images); center: Mother evacuating with her son, Donetsk, Ukraine, July 2022 (Alex Chan Tsz Yuk/SOPA Images/LightRocket via Getty Images); right: Mass COVID testing, Beijing, China, April 2022 (Kevin Frayer/Getty Images)
WAS I STAP!
2022: Em Yia Bilong Tingting Planti na Wari—Baibel i Tok Wanem?
Long 2022, yumi harim planti ripot long woa, hevi bilong mani, na ol disasta i bagarapim envaironmen. Baibel i stori long risen na ol dispela samting i kamap.
Risen na ol dispela samting i kamap long 2022
Ol samting i kamap long 2022 em evidens olsem yumi stap long haptaim em Baibel i kolim olsem “taim bilong las de.” (2 Timoti 3:1) Dispela haptaim i kirap long yia 1914. Skelim olsem wanem ol samting i kamap long 2022 i stret wantaim tok profet Baibel i mekim long ol samting bai kamap long taim bilong yumi:
“Ol woa.”—Matyu 24:6.
“2022 Em Yia Bilong Yurop Long Lukim Gen Ol Hevi Bilong Woa.”a
Lukim atikol “Rasia i Go Pait Long Yukren.”
“Ol bikpela hangre.”—Matyu 24:7.
“2022: Yia Bilong Bikpela Hangre.”b
Lukim atikol “Woa Long Yukren i Mekim Kaikai i Sot Long Olgeta Hap.”
“Ol bikpela sik.”—Luk 21:11.
“Sik polio i kam bek, monki-poks i kamapim bikpela hevi, na COVID-19 i wok long kilim i dai planti manmeri. Dispela i soim olsem ol sik i save kalap long ol man em samting i nogutim helt bilong man na em isi tru long ol man i kisim sik.”c
Lukim atikol “6 Milion Manmeri i Dai Long Sik Covid.”
“Ol manmeri bai lukim ol samting i mekim ol i pret.”—Luk 21:11.
“Weda i hot nogut tru, taim bilong traipela san, ol bikpela paia, na ol tait wara. Ol man bai tingim sama bilong 2022 olsem haptaim we i gat ol hevi bilong weda we i kamapim bikpela bagarap na kilim i dai planti handret tausen manmeri, na mekim na planti milion manmeri long graun olgeta i lusim ples bilong ol na go sindaun long narapela hap.”d
Lukim atikol “Ol Ples i Kamap Hot Tru Long Graun Olgeta.”
“Kain kain trabel nabaut.”—Luk 21:9.
“Ol manmeri i belhat nogut tru olsem i gat hevi bilong mani, na moa yet long prais bilong ol samting i go antap moa, olsem na planti man i protes long ol gavman long 2022.”e
Lukim atikol “Prais Bilong Ol Samting i Go Antap Tru Long Graun Olgeta.”
Wanem samting bai kamap long neks yia?
Yumi no save long wanem samting bai kamap long 2023. Tasol yumi save olsem Kingdom Bilong God, em wanpela gavman long heven, bai kamapim ol bikpela senis long graun olgeta. (Daniel 2:44) Dispela gavman bai pinisim olgeta samting i kamapim pen na hevi long ol man, na laik bilong God bai kamap long graun long rot bilong dispela gavman.—Matyu 6:9, 10.
Mipela i laik kirapim yu long bihainim edvais bilong Jisas Krais long “was i stap” na lukim olsem wanem ol samting i kamap long graun i truim tok profet bilong Baibel. (Mak 13:37) Plis kontektim mipela bilong kisim save moa long hau Baibel i ken helpim yu long nau na hau em i ken helpim yu na famili bilong yu long bilip na wet long gutpela taim bai kamap klostu nau.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.