Yu Ting Ol Kantri Inap Bung Wantaim na Stretim Hevi Bilong Klaimet?—Baibel i Tok Wanem?

Long Sande, Novemba 20, 2022, bung bilong COP27 United Nations Climate Change Conference i pinis. Maski ol i mekim wanpela agrimen long helpim ol kantri i sot long mani long karim ol hevi bilong klaimet, planti man i luksave olsem dispela i no inap stretim as tru bilong hevi.

Long Novemba 19, 2022, António Guterres em sekreteri-jeneral bilong Yunaitet Nesen, em i tok: “Mi amamas olsem mipela i wanbel long redim mani bilong helpim ol lain i karim hevi bilong klaimet. Tasol i klia tru olsem dispela em no inap . . . Graun bilong yumi i bagarap tru na em hatwok long stretim.”
“I no longtaim bikpela senis bai kamap long klaimet na dispela bai kamapim bikpela hevi tru long olgeta man.”—Mary Robinson, bipo presiden bilong Aialan na UN High Commissioner bilong Human Rights, Novemba 20, 2022.

Moa yet ol yangpela i wari long samting bai painim graun bilong yumi long bihain. Tasol yu ting ol kantri inap wok bung wantaim na inapim promis ol i mekim long stretim hevi bilong klaimet senis? Baibel i tok wanem?

Ol kantri bai bung wantaim na kamapim gutpela samting?

Baibel i kamapim klia olsem maski ol kantri i givim bel na ol i wok strong tru, ol senis ol i mekim bilong stretim ol hevi bilong klaimet em i no inap. Skelim 2-pela risen:

“Samting i krungut, man i no inap stretim.”—Eklisiastis 1:15.

Mining: Ol gavman i no inap long mekim olgeta samting ol i laik mekim bikos God i no wokim ol man bilong bosim ol yet. (Jeremaia 10:23) Maski ol kantri i wok bung wantaim na ol i wok strong tru, ol i no inap long stretim olgeta hevi bilong graun.
“Ol man bai laikim ol yet tasol, ol bai laikim tumas mani, . . . ol bai i no laik kamap wanbel.”—2 Timoti 3:2, 3.

Mining: Baibel i bin tok profet olsem planti man long taim bilong yumi bai tingim ol yet tasol na ol bai i no redi long wok bung wantaim bilong kamapim gutpela samting.

Risen na yumi ken bilip na wet

Maski ol gavman bilong graun i mekim ol tok promis long stretim graun bilong yumi, ol i no inap tru long mekim. God i bin makim wanpela King, em Jisas Krais, husat inap tru long stretim graun na olgeta hevi bilong en. Baibel i tok long em olsem:

“Gavman bai stap long solda bilong em. Ol bai kolim nem bilong em, Man Bilong Givim Gutpela Tingting Tru, God i Gat Strong, Papa Bilong Oltaim Oltaim, na Prins Bilong Bel Isi.”—Aisaia 9:6, futnot.

Jisas em i King bilong Kingdom Bilong God, em gavman i stap long heven. (Matyu 6:10) Em i gat strong, savetingting, na laik long lukautim graun bilong yumi na ol manmeri i stap long en. (Buk Song 72:12, 16) Aninit long wok king bilong em, dispela gavman long heven bai pinisim ol man em ol i “bagarapim graun” na em bai stretim bek envaironmen bilong graun.—Revelesen 11:18; Aisaia 35:1, 7.

Bilong kisim sampela save moa long nambawan gutpela rot bilong stretim ol hevi bilong klaimet senis, ritim atikol “Klaimet Senis na Bihain Bilong Yumi—Tok Baibel i Mekim.”