EKSODA

1 Lawa i mavito ya vana va Israyele lava nga ta na Yakobo eEgipta, wanuna un’wana ni un’wana loyi a nga ta ni ndyangu wakwe:+ 2 I Rhuveni, Simiyoni, Levhi na Yuda;+ 3 Isakara, Zebuloni na Benjamini; 4 Dani na Neftali; Gadi na Axere.+ 5 Vana ni vatukulu hinkwavo lava tswaleriweke Yakobo* a va ri 70, kambe Yosefa se a a ri eEgipta.+ 6 Eku heteleleni Yosefa ni vamakwavo hinkwavo va fa,+ ku katsa ni vanhu hinkwavo lava hanyeke hi nkarhi wakwe. 7 Vaisrayele va sungula ku tala, va ya emahlweni va engeteleka ni ku va ni matimba hi ku hatlisa, lerova va tata tiko hinkwaro.+

8 Hi ku famba ka nkarhi, ku ve ni hosi leyintshwa eEgipta leyi a yi nga n’wi tivi Yosefa. 9 Hiloko yi byela vanhu va yona yi ku: “Vonani! Vaisrayele va tele ngopfu naswona va ni matimba ku hi tlula.+ 10 A hi va tlhariheleni. Handle ka swona va ta ya emahlweni va tala, kutani loko ko tshuka ku va ni nyimpi, va ta yima ni valala va hina va lwa na hina naswona va ta baleka etikweni.”

11 Kutani va va vekela tindhuna ta mahlonga leswaku ti va tshikilela hi ku va nyika mitirho yo tika+ naswona va ake muti wa Pitomu na Ramsese+ laha Faro a a veka nhundzu yakwe kona. 12 Kambe loko va ya emahlweni va va tshikilela, Vaisrayele a va ya va andza swinene va tala etikweni, lerova Vaegipta a va va chava swinene Vaisrayele.+ 13 Hikwalaho Vaegipta va sindzisa Vaisrayele ku endla mitirho yo tika va va endla mahlonga.+ 14 Va va tikisele vutomi hi ku va tirhisa mitirho yo tika, va va sindzisa ku pfuva vumba byo aka ha byona, ku baka* switina ni ku endla mitirho yo hambanahambana emasin’wini. Hakunene a va va khome hi ndlela yo biha ni ku va tirhisa mitirho hinkwayo ya vuhlonga.+

15 Hi ku famba ka nkarhi, hosi ya Egipta yi byela tisungukati* ta Vaheveru, leti mavito ya tona a ku ri Xifira na Puwa, 16 yi ku: “Loko mi pfuna vavasati va Vaheveru ku veleka+ kutani mi va vona va ri exitulwini xo velekela eka xona, loko ku ri n’wana wa jaha mi fanele mi n’wi dlaya; kambe loko ku ri n’wana wa nhwanyana u fanele a tshikiwa a hanya.” 17 Leswi tisungukati* a ti chava Xikwembu xa ntiyiso, a ti swi endlanga leswi ti byeriweke swona hi hosi ya Egipta. Ematshan’weni ya sweswo, ti tshike vana va xinuna va hanya.+ 18 Hi ku famba ka nkarhi, hosi ya Egipta yi vitana tisungukati* yi ku eka tona: “Hikwalaho ka yini mi tshike vana va xinuna va hanya?” 19 Hiloko tisungukati* ti ku eka Faro: “Vavasati va Vaheveru a va fani ni vavasati va Vaegipta. Va ni matimba naswona loko sungukati* yi fika eka vona yi kuma va velekile.”

20 Hikwalaho Xikwembu xi katekise tisungukati,* naswona vanhu va ye va tala va va ni matimba ngopfu. 21 Kutani leswi tisungukati* a ti chava Xikwembu xa ntiyiso, hi ku famba ka nkarhi xi ti nyike mindyangu. 22 Eku heteleleni Faro a lerisa vanhu vakwe hinkwavo a ku: “Vana va majaha lava nga ta velekiwa hi Vaheveru mi fanele mi va cukumeta eNambyeni wa Nayili, kambe vana va vanhwanyana mi nga va dlayi.”+

2 Hi ku famba ka nkarhi, wanuna un’wana wa rixaka ra Levhi a teka n’wana wa Levhi.+ 2 Kutani wansati loyi a tika, a veleka n’wana wa jaha. Loko a vona ndlela leyi a a saseke ha yona, a n’wi tumbeta tin’hweti tinharhu.+ 3 Loko a vona leswaku a nga ha swi koti ku n’wi tumbeta,+ a teka basikiti leyi endliweke hi tinhlanga ta papirasi a yi tota xikontiri kutani a hoxa n’wana endzeni ka yona, a yi veka exikarhi ka tinhlanga eribuweni ra Nambu wa Nayili. 4 Kutani sesi wa n’wana loyi+ a yimela hi le kulenyana ku vona leswi nga ta endleka eka yena.

5 Loko n’wana wa Faro wa nhwanyana a ta eku hlambeni eNambyeni wa Nayili, vatirhi vakwe va xisati a va fambafamba etlhelo ka Nayili. Hiloko a vona basikiti exikarhi ka tinhlanga. Hi ku hatlisa a rhuma hlonga rakwe ra xisati leswaku ri ya yi teka.+ 6 Loko a yi pfula, a vona n’wana wa mufana a ri karhi a rila. Hiloko a n’wi twela vusiwana, kambe a ku: “Loyi i wun’wana wa vana va Vaheveru.” 7 Kutani makwavo wa n’wana a byela n’wana wa Faro a ku: “Xana ndzi nga ku vitanela wansati un’wana wa Muheveru leswaku a ta ku mamisela yena?” 8 N’wana wa Faro a ku eka yena: “Famba!” Hiloko nhwanyana a famba a ya vitana mana wa n’wana loyi.+ 9 Kutani n’wana wa Faro a ku eka yena: “Teka n’wana loyi u ndzi mamisela yena, ndzi ta ku hakela.” Hiloko wansati a teka n’wana a ya n’wi hlayisa. 10 Loko n’wana a kurile, a n’wi yisa eka n’wana wa Faro kutani a va n’wana wa yena.+ Hiloko a n’wi thya vito ra Muxe,* kutani a ku: “Hileswi ndzi n’wi humeseke ematini.”+

11 Hi ku famba ka nkarhi, loko Muxe a kurile,* a ya eka vamakwavo a ya vona mitirho yo tika leyi a va yi endla.+ Hiloko a vona Muegipta a ri karhi a ba Muheveru, loyi a nga un’wana wa vamakwavo. 12 Kutani a languta ematlhelo a nga voni munhu hiloko a dlaya Muegipta a n’wi tumbeta* esaveni.+

13 A tlhela a huma hi siku leri landzelaka naswona a ku ri ni vavanuna vambirhi va Vaheveru lava a va ri eku lweni. Hiloko a vutisa loyi a dyoheke a ku: “Hikwalaho ka yini u ba makwenu?”+ 14 Hiloko a ku: “I mani la ku vekeke ku va hosana ni muavanyisi wa hina? Xana u lava ku ndzi dlaya ku fana ni Muegipta loyi u nga n’wi dlaya?”+ Muxe a sungula ku chava, a ku: “Swi vula leswaku mhaka leyi se ya tiviwa!”

15 Hiloko Faro a twa mhaka leyi, kutani a lava ku dlaya Muxe; kambe Muxe a balekela Faro a ya tshama etikweni ra Midiyani,+ laha a nga fika a tshama exihlobyeni. 16 Muprista wa rixaka ra Vamidiyani+ a a ri ni vana va vanhwanyana va nkombo, kutani vana lava va tile va ta ka mati va tata switsengele* leswaku va nwisa ntlhambi wa tata wa vona. 17 Kambe tanihi ntolovelo varisi va fika va va hlongola. Hiloko Muxe a suka a yima a va pfuna,* a nwisa ntlhambi wa vona. 18 Loko va fika ekaya eka tata wa vona Rhuwele,*+ hi ku hlamala a va vutisa a ku: “Swi tise ku yini leswaku namuntlha mi hatla mi vuya ekaya?” 19 Va n’wi hlamula va ku: “Muegipta un’wana+ u hi lamulerile eka varisi naswona u tlhele a hi kela ni mati a nwisa ntlhambi.” 20 Hiloko a vutisa vana vakwe a ku: “U kwihi? Hikwalaho ka yini mi n’wi siyile? N’wi vitaneni a ta dya na hina.” 21 Endzhaku ka sweswo Muxe a pfumela ku tshama ni wanuna loyi naswona a nyika Muxe n’wana wakwe Zipora+ leswaku a va nsati wakwe. 22 Hi ku famba ka nkarhi, Muxe a va ni n’wana wa jaha, a n’wi thya vito ra Gerixomu*+ hikuva u te, “Ndzi muluveri etikweni rin’wana.”+

23 Endzhaku ka nkarhi wo leha,* hosi ya Egipta yi fa,+ kambe Vaisrayele va ya emahlweni va rila hikwalaho ka vuhlonga. A va rila siku ni siku naswona va ya emahlweni va kombela Xikwembu xa ntiyiso leswaku xi va pfuna.+ 24 Hi ku famba ka nkarhi, Xikwembu xi twa xirilo xa vona+ naswona xi tsundzuka ntwanano lowu xi wu endleke na Abrahama, Isaka na Yakobo.+ 25 Hiloko Xikwembu xi languta Vaisrayele; kutani xi vona xiyimo xa vona.

3 Muxe a va murisi wa ntlhambi wa Yetro tata wa nsati wakwe,+ muprista wa Midiyani. Loko a ri karhi a risa ntlhambi etlhelo ra vupeladyambu bya mananga, u hetelele a fike entshaveni ya Xikwembu xa ntiyiso, eHorebe.+ 2 Hiloko ntsumi ya Yehovha yi humelela eka yena yi ri elangavini ra ndzilo exikarhi ka xihlahla xa mitwa.+ Loko a languta, a vona xihlahla xa mitwa xi ri karhi xi pfurha kambe a xi nga ri eku tshweni. 3 Hiloko Muxe a ku: “Inge ndzi ya vona nchumu lowu, lowu nga tolovelekangiki nileswaku hikwalaho ka yini xihlahla xa mitwa xi nga tshwi.” 4 Loko Yehovha a vona leswaku u tile a ta vona, hiloko a n’wi vitana a ri exihlahleni xa mitwa a ku: “Muxe! Muxe,” yena a ku: “Hi mina loyi.” 5 Kutani a ku: “U nga tshineli la. Hluvula maphaxani ya wena, hikuva ndhawu leyi u yimeke eka yona ya kwetsima.”

6 A ya emahlweni a ku: “Hi mina Xikwembu xa tata wa wena, Xikwembu xa Abrahama,+ Xikwembu xa Isaka+ ni Xikwembu xa Yakobo.”+ Hiloko Muxe a tumbeta xikandza xakwe hikuva a a chava ku languta Xikwembu xa ntiyiso. 7 Yehovha a tlhela a ku: “Ndzi ku vonile ku xaniseka ka vanhu va mina lava nga eEgipta naswona ndzi xi twile xirilo xa vona hikwalaho ka lava va va sindzisaka ku tirha; ndzi ku tiva kahle ku vava loku va ku twaka.+ 8 Ndzi ta ya ndzi ya va ponisa eka Vaegipta,+ ndzi va humesa etikweni rero ndzi va yisa etikweni lerinene ni leri pfulekeke, tiko leri khulukaka ntswamba ni vulombe,+ ndhawu ya Vakanana, Vaheti, Vaamori, Vaperezi, Vahivhi ni Vayebusi.+ 9 Waswivo! Ndzi xi twile xirilo xa Vaisrayele naswona ndzi tlhele ndzi vona ndlela leyi Vaegipta va va tshikilelaka ha yona.+ 10 Tana ndzi ku rhuma eka Faro u ya humesa vanhu va mina ku nga Vaisrayele, eEgipta.”+

11 Hiloko Muxe a byela Xikwembu xa ntiyiso a ku: “Ndzo va mani mina leswaku ndzi ya eka Faro ndzi ya humesa Vaisrayele eEgipta?” 12 Kutani Xikwembu xi ku eka yena: “Ndzi ta va na wena,+ naswona hi lexi xikombiso xa wena xa leswaku hi mina ndzi nga ku rhuma: Loko u humese vanhu va mina eEgipta, mi ta tirhela* Xikwembu xa ntiyiso entshaveni leyi.”+

13 Kambe Muxe a byela Xikwembu xa ntiyiso a ku: “Loko ndzo ya eka Vaisrayele ndzi fika ndzi ku: ‘Xikwembu xa vakokwa wa n’wina xi ndzi rhume eka n’wina,’ kutani va ku eka mina, ‘I mani vito ra xona?’+ Ndzi fanele ndzi ku yini eka vona?” 14 Hiloko Xikwembu xi byela Muxe xi ku: “Ndzi Ta Va Lexi Ndzi Hlawulaka* Ku Va Xona.”*+ Xi tlhela xi ku: “U ta byela Vaisrayele u ku, ‘Ndzi Ta Va Lexi Ndzi Hlawulaka Ku Va Xona u ndzi rhume eka n’wina.’”+ 15 Kutani Xikwembu xi tlhela xi ku eka Muxe:

“U ta byela Vaisrayele u ku, ‘Yehovha Xikwembu xa vakokwa wa n’wina, Xikwembu xa Abrahama,+ Xikwembu xa Isaka+ ni Xikwembu xa Yakobo+ u ndzi rhume eka n’wina.’ Leri i vito ra mina ra hilaha ku nga heriki+ naswona leyi i ndlela leyi ndzi nga ta tiviwa ha yona eka vanhu hinkwavo. 16 Sweswi famba u ya hlengeleta vakulukumba va Israyele kutani u va byela u ku, ‘Yehovha Xikwembu xa vakokwa wa n’wina u humelele eka mina, Xikwembu xa Abrahama, Isaka na Yakobo naswona u te: “Ndzi mi langutile+ naswona ndzi swi vonile leswi mi endliwaka swona eEgipta. 17 Kutani ndzi ri, ndzi ta mi humesa eka Vaegipta lava mi xanisaka+ ndzi mi yisa etikweni ra Vakanana, Vaheti, Vaamori,+ Vaperezi, Vahivhi ni Vayebusi,+ etikweni leri khulukaka ntswamba ni vulombe.”’+

18 “Entiyisweni va ta ku yingisa+ naswona wena ni vakulukumba va Israyele mi ta ya eka hosi ya Egipta, kutani mi fanele mi yi byela mi ku: ‘Yehovha Xikwembu xa Vaheveru+ u vulavule na hina. Kutani hi kombela u hi pfumelela hi teka riendzo ra masiku manharhu hi ya emananga leswaku hi ya endlela Yehovha Xikwembu xa hina gandzelo.’+ 19 Kambe ndzi swi tiva kahle leswaku hosi ya Egipta a yi nge mi pfumeleli leswaku mi famba handle ka loko yo sindzisiwa hi voko ra matimba.+ 20 Kutani ndzi ta boheka ku tirhisa voko ra mina ndzi ba tiko ra Egipta hi swiendlo swa mina hinkwaswo leswi nga tolovelekangiki leswi ndzi nga ta swi endla eka rona, endzhaku ka sweswo yi ta mi tshika mi famba.+ 21 Ndzi ta endla leswaku Vaegipta va komba vanhu lava musa naswona a mi nge fambi mi nga ri na nchumu.+ 22 Wansati un’wana ni un’wana u fanele a kombela swilo leswi endliweke hi silivhere ni nsuku ni swiambalo eka muakelani wakwe ni le ka wansati loyi a tshamaka ekaya kakwe naswona mi fanele mi swi ambexa vana va n’wina va majaha ni va vanhwanyana; mi ta tekela Vaegipta swilo swa vona.”+

4 Hambiswiritano, Muxe a hlamula a ku: “A hi nge a va ndzi tshembi naswona va nga ndzi yingisi,+ va ku, ‘Yehovha a nga humelelanga eka wena.’” 2 Hiloko Yehovha a ku eka yena: “U khome yini?” A hlamula a ku: “Ndzi khome nhonga.” 3 A ku: “Yi lahlele ehansi.” Hiloko a yi lahlela ehansi, kutani yi hundzuka nyoka;+ Muxe a yi baleka. 4 Yehovha a byela Muxe a ku: “Yi khome hi ncila.” Hiloko a yi khoma, kutani yi hundzuka nhonga evokweni rakwe. 5 Kutani Xikwembu xi ku: “Leswi swi ta endla va tshemba leswaku Yehovha Xikwembu xa vakokwa wa vona, Xikwembu xa Abrahama, Xikwembu xa Isaka ni Xikwembu xa Yakobo,+ u humelele eka wena.”+

6 Yehovha a tlhela a ku eka yena: “Ndzi kombela u nghenisa voko endzeni ka xiambalo xa wena.” Hiloko a ri nghenisa. Loko a ri humesa, a ri biwe hi nhlokonho ri fana ni gamboko!+ 7 Kutani a ku: “Tlherisela voko ra wena endzeni ka xiambalo xa wena.” Hiloko a ri tlherisela. Loko a ri humesa, a ri horisiwile ri fana ni miri wakwe hinkwawo! 8 A ku: “Loko va nga ku tshembi kumbe va nga vi na mhaka ni xikombiso xo sungula, va ta tshemba xikombiso xa vumbirhi.+ 9 Loko vo ka va nga swi tshembi swikombiso leswimbirhi naswona va ala ku ku yingisa, u ta ka mati eNambyeni wa Nayili u ma chululela emisaveni leyi omeke, kutani mati wolawo ma ta hundzuka ngati emisaveni leyi omeke.”+

10 Muxe a byela Yehovha a ku: “Ndzi khomele Yehovha, hikuva ndzi ni manghanghamela, hambi ku ri enkarhini lowu hundzeke loko u vulavula ni nandza wa wena, a ndzi vulavula hi ku nonoka naswona ririmi ra mina ra nonoka.”+ 11 Yehovha a ku eka yena: “I mani loyi a endleke nomu wa munhu, kumbe loyi a endlaka leswaku vanhu va nga swi koti ku vulavula, va nga twi, va vona kahle kumbe va nga voni? Xana a hi mina, Yehovha? 12 Kutani famba sweswi, ndzi ta va na wena loko u ri karhi u vulavula naswona ndzi ta ku dyondzisa leswi u faneleke u swi vula.”+ 13 Hiloko a ku: “Ndzi khomele Yehovha, ndzi kombela u rhuma un’wana loyi u lavaka ku n’wi rhuma.” 14 Kutani Yehovha a hlundzukela Muxe swinene, a ku eka yena: “Xana Aroni+ makwenu wa Mulevhi a nga kona ke? Ndza swi tiva leswaku u kota ku vulavula kahle. Naswona u le ku teni a ta ku hlanganisa. Loko a ku vona mbilu yakwe yi ta tsaka.+ 15 Kutani u fanele u vulavula na yena, u n’wi byela leswi a nga ta swi vula,+ ndzi ta va na wena na yena loko mi vulavula+ naswona ndzi ta mi dyondzisa leswi mi nga ta swi endla. 16 U ta ku vulavulela eka vanhu naswona u ta va muvulavuleri wa wena, kutani wena u ta va Xikwembu xa yena.*+ 17 U ta khoma nhonga leyi u endla masingita hi yona.”+

18 Hiloko Muxe a tlhelela eka Yetro tata wa nsati wakwe+ a ku: “Ndzi kombela ku famba ndzi tlhelela eka vamakwerhu lava nga le Egipta leswaku ndzi ya vona loko va ha hanya.” Yetro a ku eka Muxe: “Famba hi ku rhula.” 19 Endzhaku ka sweswo Yehovha a byela Muxe eMidiyani a ku: “Tlhelela eEgipta hikuva vanhu hinkwavo lava a va lava ku ku dlaya va file.”+

20 Hiloko Muxe a teka nsati wakwe ni vana vakwe va majaha a va gadisa mbhongolo kutani a tlhelela etikweni ra Egipta. Muxe a tlhela a famba a khome nhonga ya Xikwembu xa ntiyiso hi voko. 21 Kutani Yehovha a byela Muxe a ku: “Endzhaku ka loko u tlhelele eEgipta, tiyiseka leswaku u endla masingita hinkwawo lawa ndzi ku nyikeke matimba yo ma endla+ emahlweni ka Faro. Kambe ndzi ta nonon’hwisa mbilu yakwe,+ a nge va tshiki vanhu va mina va famba.+ 22 U fanele u byela Faro u ku, ‘Yehovha u ri: “Israyele i n’wana wa mina, mativula ya mina.+ 23 Ndzi ri eka wena, Tshika n’wana wa mina a famba leswaku a ta ndzi tirhela. Kambe loko u ala ku n’wi tshika a famba, ndzi ta dlaya n’wana wa wena wa mativula.”’”+

24 Kutani loko a ri endleleni, endhawini leyi a a etlele eka yona, Yehovha+ a hlangana na yena naswona a a lava ku n’wi dlaya.+ 25 Hiloko Zipora+ a teka ribye ro kariha a yimbisa n’wana wakwe kutani a khumbanisa nsuvu* wakwe ni nenge wakwe kutani a ku: “Hikuva u nuna* wa ngati eka mina.” 26 Hiloko A n’wi tshika. Hi nkarhi wolowo a ku, “nuna* wa ngati,” hikwalaho ka ku yimba.

27 Xisweswo Yehovha a byela Aroni a ku: “Famba u ya hlangana na Muxe emananga.”+ Hiloko a famba kutani a hlangana na yena entshaveni ya Xikwembu xa ntiyiso,+ a n’wi xeweta hi ku n’wi tswontswa. 28 Kutani Muxe a byela Aroni marito hinkwawo ya Yehovha loyi a n’wi rhumeke+ ni masingita hinkwawo lawa A n’wi leriseke ku ma endla.+ 29 Endzhaku ka sweswo Muxe na Aroni va famba kutani va hlengeleta vakulukumba hinkwavo va Vaisrayele.+ 30 Aroni a va byela swilo hinkwaswo leswi Yehovha a swi byeleke Muxe a tlhela a endla masingita+ emahlweni ka vanhu. 31 Hiloko vanhu va tshemba.+ Loko va twa leswaku Yehovha u ta pfuna Vaisrayele+ nileswaku u vone ku xaniseka ka vona,+ va khinsama mimombo ya vona yi khumba ehansi.

5 Endzhaku ka sweswo, Muxe na Aroni va nghena eka Faro va fika va ku: “Yehovha Xikwembu xa Israyele u ri, ‘Tshika vanhu va mina va famba leswaku va ta ndzi endlela nkhuvo emananga.’” 2 Kambe Faro a ku: “I mani Yehovha+ lerova ndzi nga n’wi yingisa ndzi tshika Vaisrayele va famba?+ A ndzi n’wi tivi Yehovha nikatsongo naswona a ndzi nge va tshiki Vaisrayele va famba.”+ 3 Kambe va ku: “Xikwembu xa Vaheveru xi vulavule na hina. Hi kombela ku teka riendzo ra masiku manharhu hi ya emananga hi ya endlela Yehovha Xikwembu xa hina gandzelo;+ loko swi nga ri tano, u ta hi ba hi vuvabyi kumbe a hi dlaya hi banga.” 4 Hosi ya Egipta yi va hlamula yi ku: “Hikwalaho ka yini wena Muxe na Aroni mi tshikisa vanhu mitirho ya vona? Tlhelani mi ya tirha!”+ 5 Faro a tlhela a ku: “Ma swi vona leswaku vanhu va tiko va tele naswona mi lava ku va tshikisa mitirho ya vona.”

6 Hi siku rero Faro a lerisa tindhuna ni valanguteri va vatirhi a ku: 7 “Mi nga ha va nyiki byanyi vanhu lava leswaku va endla switina.+ Va tshikeni va tihlengeletela byona hi voxe. 8 Kambe mi fanele mi va sindzisa ku endla nhlayo ya switina leswi a va swi endla eku sunguleni. Mi nga va hunguteli, hikuva va loloha. Hi yona mhaka leyi va rilaka va ku, ‘Hi lava ku famba, hi lava ku ya endlela Xikwembu xa hina gandzelo!’ 9 Va tirhiseni swinene, mi nga va nyiki nkarhi wo wisa leswaku va nga yingiseli mavunwa.”

10 Hiloko tindhuna+ ni valanguteri va vatirhi va huma va ya byela vanhu va ku: “Faro u te, ‘A ndzi nge he mi nyiki byanyi. 11 Fambani mi ya tilavela byanyi kun’wana ni kun’wana laha mi nga ta byi kuma kona kambe ntirho wa n’wina a wu nge hungutiwi.’” 12 Hiloko vanhu va hangalaka ni tiko hinkwaro ra Egipta leswaku va hlengeleta mahlanga lama saleke emasin’wini leswaku va ma endla byanyi. 13 Kutani tindhuna ti tshamela ku va sindzisa ti ku: “Mi fanele mi heta ntirho wa n’wina siku ni siku, ku fana ni loko ma ha nyikiwa byanyi.” 14 Ni valanguteri va vatirhi lava nga Vaisrayele, lava hlawuriweke hi tindhuna ta Faro va biwile.+ Ti va vutise ti ku: “Hikwalaho ka yini mi nga yi fikelelanga nhlayo ya switina leswi a mi hamba mi swi endla? Leswi swi endleke tolo ni namuntlha.”

15 Hiloko Vaisrayele lava nga valanguteri va vatirhi va ya eka Faro va fika va rila va ku: “Hikwalaho ka yini u khoma malandza ya wena hi ndlela leyi? 16 Malandza ya wena a ma ha nyikiwi byanyi kambe va ri eka hina, ‘Endlani switina!’ Malandza ya wena ma biwa kambe xihoxo xi ni vanhu va wena.” 17 Kambe a ku: “Ma loloha, ma loloha!+ Hi yona mhaka leyi mi nge, ‘Hi lava ku famba, hi lava ku ya endlela Yehovha+ gandzelo.’ 18 Kutani sweswi tlhelani mi ya tirha! A mi nge nyikiwi byanyi kambe mi fanele mi endla nhlayo leyi lavekaka ya switina.”

19 Hiloko valanguteri va vatirhi va Vaisrayele va swi vona leswaku va le khombyeni hikwalaho ka xileriso lexi nge: “Mi nga hunguti nhlayo leyi lavekaka ya switina ya siku ni siku.” 20 Endzhaku ka sweswo va hlangana na Muxe na Aroni, lava a va yime kwalaho leswaku va hlangana na vona loko va huma eka Faro. 21 Hiloko va byela Muxe na Aroni va ku: “Onge Yehovha a nga vona leswi mi nga swi endla kutani a avanyisa, tanihi leswi mi endleke leswaku Faro ni malandza yakwe va hi venga* naswona mi veke banga evokweni ra vona leswaku va hi dlaya.”+ 22 Kutani Muxe a ku eka Yehovha: “Yehovha, hikwalaho ka yini u xanise vanhu lava? Hikwalaho ka yini u rhume mina? 23 Ku sukela loko ndzi ye eka Faro leswaku ndzi ya vulavula hi vito ra wena,+ Faro u va khome hi ndlela yo biha ngopfu vanhu lava+ naswona a wu va ponisanga vanhu va wena.”+

6 Kutani Yehovha a byela Muxe a ku: “Sweswi u ta swi vona leswi ndzi nga ta swi endla eka Faro.+ U ta sindzisiwa hi voko ra mina ra matimba leswaku a va tshika va famba naswona voko ra mina ra matimba ri ta n’wi sindzisa leswaku a va hlongola etikweni rakwe.”+

2 Hiloko Xikwembu xi byela Muxe xi ku: “Hi mina Yehovha. 3 A ndzi hamba ndzi humelela eka Abrahama, Isaka na Yakobo tanihi Xikwembu xa Matimba Hinkwawo,+ kambe a ndzi titivisanga eka vona+ hi vito ra mina ra Yehovha.+ 4 Ndzi tlhele ndzi endla ntwanano na vona wo va nyika tiko ra Kanana, tiko leri va luveleke eka rona.+ 5 Sweswi ndzi ku twile ku konya ka Vaisrayele, lava Vaegipta va va endleke mahlonga naswona ndza wu tsundzuka ntwanano wa mina.+

6 “Hikwalaho byela Vaisrayele u ku: ‘Hi mina Yehovha naswona ndzi ta mi humesa eka mitirho yo tika ya Vaegipta, ndzi mi tshunxa evuhlongeni bya vona,+ kutani ndzi ta mi ponisa hi voko leri tshambulutiweke* ni hi ku xupula lokukulu.+ 7 Ndzi ta mi teka mi va vanhu va mina naswona ndzi ta va Xikwembu xa n’wina,+ entiyisweni mi ta swi tiva leswaku hi mina Yehovha Xikwembu xa n’wina loyi a mi humesaka eka mitirho yo tika ya le Egipta. 8 Ndzi ta mi yisa etikweni leri ndzi hlambanyeke* leswaku ndzi ta ri nyika Abrahama, Isaka na Yakobo; naswona ndzi ta mi nyika rona ri va ra n’wina.+ Hi mina Yehovha.’”+

9 Endzhaku ka sweswo Muxe a byela Vaisrayele mhaka leyi, kambe a va n’wi yingisanga hikwalaho ka ku hela matimba ni hikwalaho ka vuhlonga byo tika.+

10 Hiloko Yehovha a vulavula na Muxe a ku: 11 “Famba u ya byela Faro hosi ya Egipta leswaku u fanele a tshika Vaisrayele va huma etikweni rakwe.” 12 Kambe Muxe a byela Yehovha a ku: “Waswivo! Vaisrayele a va ndzi yingisanga;+ xana Faro u ta ndzi yingisa njhani, leswi swi ndzi tikelaka ku vulavula?”*+ 13 Kambe Yehovha a tlhela a byela Muxe na Aroni swileriso leswi va nga ta swi byela Vaisrayele na Faro, hosi ya Egipta, leswaku a humesa Vaisrayele etikweni ra Egipta.

14 Lava i varhangeri va mindyangu ya vakokwa wa vona: Vana va Rhuveni, mativula ya Israyele,+ a ku ri Hanoko, Palu, Hezroni na Karimi.+ Leyi i mindyangu ya Rhuveni.

15 Vana va Simiyoni a ku ri Yemuwele, Yamini, Ohadi, Yakini, Sohari na Xawulo loyi mana wakwe a a ri Mukanana.+ Leyi i mindyangu ya Simiyoni.

16 Lawa i mavito ya vana va Levhi,+ hi ku ya hi mindyangu ya vatukulu va vona: Gerixoni, Kohata na Merari.+ Levhi u hanye malembe ya 137.

17 Vana va Gerixoni a ku ri Libni na Ximeyi, hi ku ya hi mindyangu ya vona.+

18 Vana va Kohata a ku ri Amirama, Izihara, Hebroni na Uziyele.+ Kohata u hanye malembe ya 133.

19 Vana va Merari a ku ri Maheli na Muxi.

Leyi a ku ri mindyangu ya Valevhi, hi ku ya hi mindyangu ya vatukulu va vona.+

20 Kutani Amirama a teka Yokebedi hahani wakwe a va nsati wakwe.+ A n’wi tswalela Aroni na Muxe.+ Amirama u hanye malembe ya 137.

21 Vana va Izihara a ku ri Kora,+ Nefege na Zikiri.

22 Vana va Uziyele a ku ri Mixayele, Elizafani+ na Sitri.

23 Kutani Aroni a teka Elixeba n’wana wa Aminadaba, makwavo wa xisati wa Nasoni+ a va nsati wakwe. A n’wi tswalela Nadabu, Abihu, Eliyazara na Ithamara.+

24 Vana va Kora a ku ri Asiri, Elkana na Abiyasafa.+ Leyi a ku ri mindyangu ya vana va Kora.+

25 Eliyazara+ n’wana wa Aroni a teka un’wana wa vana va Putiyele a va nsati wakwe. A n’wi tswalela Finiyasi.+

Lava i varhangeri va rixaka ra Valevhi, hi ku ya hi mindyangu ya vona.+

26 Loyi i Aroni na Muxe lava Yehovha a va byeleke a ku: “Humesani Vaisrayele etikweni ra Egipta hi ku ya hi mavuthu ya vona.”+ 27 Hi vona va byeleke Faro hosi ya Egipta leswaku a humesa Vaisrayele eEgipta. A ku ri Muxe loyi na Aroni.+

28 Hi siku rero loko Yehovha a vulavule na Muxe etikweni ra Egipta, 29 Yehovha u byele Muxe a ku: “Hi mina Yehovha. Byela Faro hosi ya Egipta swilo hinkwaswo leswi ndzi ku byelaka swona.” 30 Hiloko Muxe a byela Yehovha a ku: “Waswivo! Swa ndzi tikela ku vulavula,* kutani Faro u ta ndzi yingisa njhani?”+

7 Kutani Yehovha a byela Muxe a ku: “Vona, ndzi ku endle u fana ni Xikwembu* eka Faro naswona Aroni makwenu u ta va muprofeta wa wena.+ 2 U fanele u phindha hinkwaswo leswi ndzi nga ta ku lerisa swona kutani Aroni makwenu u ta vulavula na Faro, yena u ta tshika Vaisrayele va huma etikweni rakwe. 3 Mina ndzi ta nonon’hwisa mbilu ya Faro+ naswona ndzi ta andzisa swikombiso swa mina ni masingita ya mina etikweni ra Egipta.+ 4 Kambe Faro a nge mi yingisi kutani ndzi ta veka voko ra mina ehenhla ka Egipta, ndzi humesa mitshungu* ya vanhu va mina, ku nga Vaisrayele etikweni ra Egipta hi ku xupula lokukulu.+ 5 Entiyisweni Vaegipta va ta swi tiva leswaku hi mina Yehovha+ loko ndzi xupula Egipta kutani ndzi humesa Vaisrayele exikarhi ka vona.” 6 Muxe na Aroni va endle leswi Yehovha a va leriseke swona; va endle tano. 7 Muxe a a ri ni malembe ya 80 kasi Aroni a a ri ni malembe ya 83 loko va ya vulavula na Faro.+

8 Kutani Yehovha a byela Muxe na Aroni a ku: 9 “Loko Faro o mi byela a ku, ‘Endlani singita,’ byela Aroni u ku, ‘Teka nhonga ya wena u yi lahlela ehansi emahlweni ka Faro.’ Yi ta hundzuka nyoka leyikulu.”+ 10 Hiloko Muxe na Aroni va ya eka Faro kutani va endla hilaha Yehovha a leriseke hakona. Aroni a lahlela nhonga yakwe ehansi emahlweni ka Faro ni malandza yakwe kutani yi hundzuka nyoka leyikulu. 11 Kambe, Faro a vitana vavanuna vo tlhariha ni valoyi, kutani vaprista lava endlaka masalamusi va le Egipta+ na vona va endla nchumu lowu fanaka hi masalamusi ya vona.+ 12 Un’wana ni un’wana wa vona a lahlela nhonga yakwe ehansi, kutani ti hundzuka tinyoka letikulu; kambe nyoka* ya Aroni yi mita tinyoka ta vona. 13 Hambiswiritano, mbilu ya Faro yi nonon’hwa,+ a nga va yingisanga hilaha Yehovha a vuleke hakona.

14 Hiloko Yehovha a byela Muxe a ku: “Mbilu ya Faro ya sihalala.+ U arile ku tshika vanhu va famba. 15 Yana eka Faro nimixo. Waswivo! Yena u ya ematini! U fanele u yima etlhelo ka Nambu wa Nayili leswaku u ta hlangana na yena; naswona khoma nhonga leyi hundzukeke nyoka.+ 16 Kutani u ta ku eka yena, ‘Yehovha Xikwembu xa Vaheveru u ndzi rhume eka wena+ naswona u ri: “Tshika vanhu va mina va famba leswaku va ta ndzi tirhela emananga,” kambe a wu yingisanga ku fikela sweswi. 17 Yehovha u ri: “U ta swi tiva leswaku hi mina Yehovha+ hi leswi ndzi nga ta swi endla. Sweswi ndzi ba mati lama nga eNambyeni wa Nayili hi nhonga leyi nga evokweni ra mina, kutani ma ta hundzuka ngati. 18 Kutani tihlampfi leti nga eNayili ti ta fa, Nayili wu ta nun’hwa naswona Vaegipta a va nge swi koti ku nwa mati ya le Nayili.”’”

19 Kutani Yehovha a byela Muxe a ku: “Byela Aroni u ku, ‘Teka nhonga ya wena u yi tlakusela ehenhla ka mati ya tiko ra Egipta,+ ehenhla ka milambu ya rona, ehenhla ka migerho* ya rona, ehenhla ka tinhlangasi ta rona+ ni le henhla ka mativa ya rona hinkwawo, leswaku ma ta hundzuka ngati.’ Ku ta va ni ngati etikweni hinkwaro ra Egipta ni le swibyeni swo vatliwa ni swa ribye.” 20 Hi ku hatlisa Muxe na Aroni va endla hilaha Yehovha a va leriseke hakona. A tlakusa nhonga a ba mati lawa a ma ri eNambyeni wa Nayili emahlweni ka Faro ni malandza yakwe, hiloko mati hinkwawo lawa a ma ri enambyeni ma hundzuka ngati.+ 21 Tihlampfi leti a ti ri enambyeni ti fa+ naswona nambu wu sungula ku nun’hwa, Vaegipta a va nga swi koti ku nwa mati lama humaka eNayili+ naswona a ku ri ni ngati etikweni hinkwaro ra Egipta.

22 Hambiswiritano, vaprista lava endlaka masalamusi va le Egipta va endle leswi fanaka hi masalamusi ya vona,+ kutani mbilu ya Faro yi ya emahlweni yi nonon’hwa naswona a nga va yingisanga, hilaha Yehovha a vuleke hakona.+ 23 Hiloko Faro a tlhelela endlwini yakwe naswona a nga vanga na mhaka na swona swilo leswi. 24 Vaegipta hinkwavo a va cela ematlhelweni ya Nayili va lava mati yo nwa, hikuva a va nga swi koti ku nwa mati ya le Nayili. 25 Yehovha u hundzule mati ya le Nayili ma va ngati ku ringana masiku ya nkombo.

8 Kutani Yehovha a byela Muxe a ku: “Yana eka Faro, u fika u n’wi byela u ku, ‘Yehovha u ri: “Tshika vanhu va mina va famba leswaku va ta ndzi tirhela.+ 2 Loko u ya emahlweni u ala ku va tshika va famba, ndzi ta hlasela ndhawu ya wena hinkwayo hi machela.+ 3 Kutani Nambu wa Nayili wu ta tala hi machela, ma ta huma ematini ma nghena endlwini ya wena, ekamareni ra wena ro etlela eka rona, esangwini ra wena, etindlwini ta malandza ya wena ni le ka vanhu va wena, eswitikweni swa wena ni le swibyeni swa wena swo pfuvela eka swona.+ 4 Machela ma ta ta eka wena, eka vanhu va wena ni le ka malandza ya wena hinkwawo.”’”

5 Endzhaku ka sweswo, Yehovha a byela Muxe a ku: “Byela Aroni u ku, ‘Tlakusela voko ra wena leri nga khoma nhonga ehenhla ka milambu, migerho* ya Nayili ni nhlangasi, u endla leswaku ku va ni machela etikweni ra Egipta.’” 6 Hiloko Aroni a tlakusela voko rakwe ehenhla ka mati ya Egipta, kutani machela ma sungula ku huma ma funengeta tiko ra Egipta. 7 Hambiswiritano, vaprista lava endlaka masalamusi va endla leswi fanaka hi masalamusi ya vona, na vona va endla leswaku ku va ni machela etikweni ra Egipta.+ 8 Hiloko Faro a vitana Muxe na Aroni a ku eka vona: “Kombelani Yehovha leswaku a susa machela eka mina ni le ka vanhu va mina,+ hikuva ndzi lava ku tshika vanhu va famba leswaku va ya endlela Yehovha gandzelo.” 9 Kutani Muxe a byela Faro a ku: “Ndzi kombela u ndzi byela leswaku ndzi fanele ndzi ku kombelela rini leswaku machela ma susiwa eka wena, eka malandza ya wena, eka vanhu va wena ni le tindlwini ta wena. Ma ta sala ntsena eNambyeni wa Nayili.” 10 Hiloko a ku: “Mundzuku.” Kutani Muxe a ku: “Swi ta endleka hilaha u vuleke hakona leswaku u ta swi tiva leswaku a ku na munhu loyi a fanaka na Yehovha Xikwembu xa hina.+ 11 Machela ma ta suka eka wena, etindlwini ta wena, eka malandza ya wena ni le ka vanhu va wena. Ma ta sala ntsena eNayili.”+

12 Hiloko Muxe na Aroni va huma eka Faro, kutani Muxe a kombela eka Yehovha mayelana ni machela lawa A ma tise eka Faro.+ 13 Kutani Yehovha a endla hilaha Muxe a n’wi kombeleke hakona, machela ma sungula ku fa etindlwini, eswivaveni* ni le nhoveni. 14 Va ma hlengelete ma va tinhulu to tala swinene kutani tiko ri sungula ku nun’hwa. 15 Loko Faro a vona leswaku u pfuniwile, a nonon’hwisa mbilu yakwe+ naswona a ala ku va yingisa, hilaha Yehovha a vuleke hakona.

16 Kutani Yehovha a byela Muxe a ku: “Byela Aroni u ku, ‘Tlakusela nhonga ya wena ehenhla u ba misava kutani ritshuri ri ta hundzuka tinsuna* etikweni hinkwaro ra Egipta.’” 17 Hiloko va endla tano. Aroni a ba misava hi nhonga leyi a yi khomile, kutani tinsuna ti hlasela vanhu ni swiharhi. Ritshuri hinkwaro ri hundzuka tinsuna etikweni hinkwaro ra Egipta.+ 18 Vaprista lava endlaka masalamusi va ringete ku endla leswi fanaka leswaku va vanga tinsuna hi masalamusi,+ kambe va tsandzekile. Kutani tinsuna ti hlasela vanhu ni swiharhi. 19 Hiloko vaprista lava endlaka masalamusi va byela Faro va ku: “I ritiho ra Xikwembu!”+ Kambe mbilu ya Faro yi ya emahlweni yi nonon’hwa, a nga va yingisanga, hilaha Yehovha a vuleke hakona.

20 Kutani Yehovha a byela Muxe a ku: “Pfuka nimpundzu swinene u ya eka Faro. Waswivo! Yena u ya ematini! Kutani u ta n’wi byela u ku, ‘Yehovha u te: “Tshika vanhu va mina va famba leswaku va ta ndzi tirhela. 21 Kambe loko u nga va tshiki vanhu va mina va famba, ndzi ta rhumela mabawa* eka wena, eka malandza ya wena, eka vanhu va wena ni le tindlwini ta wena; kutani tiyindlu ta le Egipta ti ta tala hi mabawa naswona ma ta funengeta ni misava leyi va* yimeke eka yona. 22 Hi siku rero ndzi ta sirhelela tiko ra Goxeni laha vanhu va mina va tshamaka kona. Kona a ku nge vi ni mabawa,+ kutani sweswo swi ta endla u swi tiva leswaku mina Yehovha ndzi kona laha tikweni.+ 23 Ndzi ta endla leswaku ku va ni ku hambana exikarhi ka vanhu va mina ni vanhu va wena. Xikombiso lexi xi ta endleka mundzuku.”’”

24 Yehovha a endla tano, kutani mabawa yo tala ma sungula ku hlasela yindlu ya Faro, tiyindlu ta malandza yakwe ni tiko hinkwaro ra Egipta.+ Mabawa ma onhe tiko.+ 25 Eku heteleleni Faro a vitana Muxe na Aroni a va byela a ku: “Fambani mi ya endlela Xikwembu xa n’wina gandzelo laha tikweni.” 26 Kambe Muxe a ku: “A hi swinene ku endla tano, hikuva leswi hi nga ta endlela Yehovha Xikwembu xa hina gandzelo hi swona swi ta nyenyetsa Vaegipta.+ Loko ho endla gandzelo leri nyenyetsaka Vaegipta emahlweni ka vona, xana a va nge hi khandli hi maribye? 27 Hi ta teka riendzo ra masiku manharhu hi ya emananga, kutani hi ta fika hi endlela Yehovha Xikwembu xa hina gandzelo, hilaha a hi byeleke hakona.”+

28 Kutani Faro a ku: “Ndzi ta mi tshika mi famba mi ya endlela Yehovha Xikwembu xa n’wina gandzelo emananga. Ntsena mi nga yi ekule ngopfu. Mi ndzi kombelela.”+ 29 Hiloko Muxe a ku: “Sweswi ndza famba kutani ndzi ta ku kombelela eka Yehovha, mabawa ma ta suka eka wena, eka malandza ya wena ni le ka vanhu va wena mundzuku. Kambe u fanele u tshika ku tlanga hi hina hi ku ala ku tshika vanhu va ka hina leswaku va ya endlela Yehovha gandzelo.”+ 30 Kutani Muxe a huma eka Faro a ya kombela eka Yehovha.+ 31 Hiloko Yehovha a endla hi ku ya hi leswi vuriweke hi Muxe kutani mabawa ma suka eka Faro, eka malandza yakwe ni le ka vanhu vakwe. A ku salanga ni rin’we. 32 Hambiswiritano, Faro a tlhela a nonon’hwisa mbilu yakwe, a nga va tshikanga vanhu va famba.

9 Hiloko Yehovha a byela Muxe a ku: “Yana eka Faro, u n’wi byela u ku, ‘Yehovha Xikwembu xa Vaheveru u te: “Tshika vanhu va mina va famba leswaku va ta ndzi tirhela.+ 2 Kambe loko u ala ku va tshika va famba, u hambeta u va khoma, 3 waswivo, mina Yehovha+ ndzi ta dlaya swifuwo swa wena leswi nga enhoveni hi matimba ya mina. Ku ta va ni ntungu lowukulu+ lowu nga ta hlasela tihanci, timbhongolo, tikamela, ntlhambi wa tihomu ni wa tinyimpfu. 4 Mina Yehovha ndzi ta hambanisa swifuwo swa Vaisrayele eka swa Vaegipta, a xi kona ni xin’we xa Vaisrayele lexi nga ta fa.”’”+ 5 Ku tlula kwalaho, Yehovha a veka nkarhi a ku: “Mundzuku mina Yehovha ndzi ta endla nchumu lowu etikweni.”

6 Yehovha a endla nchumu lowu hi siku leri landzelaka, kutani mixaka hinkwayo ya swifuwo swa le Egipta yi sungula ku fa,+ kambe a xi kona ni xin’we xa swifuwo swa Vaisrayele lexi feke. 7 Loko Faro a vutisa, a ku nga fanga ni xin’we xa swifuwo swa Vaisrayele. Nilokoswiritano, mbilu ya Faro yi ye emahlweni yi nonon’hwa, a nga va tshikanga vanhu va famba.+

8 Kutani Yehovha a byela Muxe na Aroni a ku: “Nusani nsiti hi mavoko mambirhi exitikweni, kutani Muxe u fanele a wu haxa emoyeni emahlweni ka Faro. 9 Wu ta va ritshuri etikweni hinkwaro ra Egipta, kutani wu ta hundzuka marhumba lama endlaka swilondza eka vanhu ni swiharhi etikweni hinkwaro ra Egipta.”

10 Hikwalaho va teka nsiti exitikweni va ya yima emahlweni ka Faro, kutani Muxe a wu haxa emoyeni, hiloko wu hundzuka marhumba lama endlaka swilondza eka vanhu ni swiharhi. 11 Vaprista lava endlaka masalamusi a va swi kotanga ku ya eka Muxe hikwalaho ka marhumba, hikuva a ma hume vaprista lava endlaka masalamusi ni Vaegipta hinkwavo.+ 12 Kambe Yehovha a pfumelela mbilu ya Faro leswaku yi nonon’hwa, a nga va yingisanga hilaha Yehovha a byeleke Muxe hakona.+

13 Hiloko Yehovha a byela Muxe a ku: “Pfuka nimpundzu swinene u ya eka Faro, u fika u ku eka yena, ‘Yehovha Xikwembu xa Vaheveru u te: “Tshika vanhu va mina va famba leswaku va ta ndzi tirhela. 14 Hikuva sweswi ndzi rhumela makhombo ya mina hinkwawo eka wena, malandza ya wena ni vanhu va wena, leswaku u ta swi tiva leswaku a nga kona loyi a fanaka na mina emisaveni hinkwayo.+ 15 Hikuva sweswi a ndzi ta va ndzi tlakuse voko ra mina leswaku ndzi ku ba hi ntungu lowukulu, wena ni vanhu va wena, kutani a wu ta va u herisiwile* emisaveni. 16 Kambe ndzi ku tshike u hanya hikwalaho ka xivangelo lexi: leswaku ndzi ku komba matimba ya mina ni leswaku vito ra mina ri twarisiwa emisaveni hinkwayo.+ 17 Xana wa ha titlakusa eka vanhu va mina hi ku ala ku va tshika va famba? 18 Mundzuku hi nkarhi lowu ndzi ta nisa xihangu lexikulu ngopfu, lexi nga si tshamaka xi na eEgipta ku ta fikela sweswi. 19 Hikwalaho, rhuma malandza ya wena leswaku ma landza swifuwo swa wena hinkwaswo ni swilo swa wena hinkwaswo leswi nga enhoveni ma swi tisa endhawini leyi sirhelelekeke. Vanhu ni swifuwo leswi nga ta va swi ri enhoveni swi nga ri endlwini, swi ta fa loko swi neriwa hi xihangu.”’”

20 Nandza un’wana ni un’wana wa Faro loyi a a chava rito ra Yehovha u hatle a tisa malandza yakwe ni swifuwo swakwe etindlwini, 21 kambe loyi a nga ri yingisangiki rito ra Yehovha u tshike malandza yakwe ni swifuwo swakwe enhoveni.

22 Kutani Yehovha a byela Muxe a ku: “Tlakusela voko ra wena ematilweni leswaku ku na xihangu etikweni hinkwaro ra Egipta,+ ehenhla ka munhu ni xiharhi ni le ka swimilana hinkwaswo swa nhova etikweni ra Egipta.”+ 23 Hiloko Muxe a tlakusela nhonga yakwe ematilweni, Yehovha a rhumela ku dzindza, xihangu ni ndzilo* wu wela emisaveni kutani Yehovha a ya emahlweni a nisa xihangu etikweni ra Egipta. 24 A ku ri ni xihangu naswona a ku ri ni ndzilo exikarhi ka xihangu. A xi ri xikulu ngopfu; a ku nga si tshama ku va ni xo fana na xona etikweni hi mpfhuka Egipta ri va tiko.+ 25 Xihangu xi be hinkwaswo leswi a swi ri enhoveni etikweni hinkwaro ra Egipta, ku suka eka munhu ku ya eka xiharhi naswona xi dlaye swimilana hinkwaswo xi tlhela xi tshovelela mirhi hinkwayo.+ 26 Etikweni ra Goxeni laha Vaisrayele a va ri kona, hi kona ntsena laha ku nga vangiki na xihangu.+

27 Hiloko Faro a rhuma vanhu va ya vitana Muxe na Aroni kutani a ku eka vona: “Sweswi ndzi dyohile. Yehovha u lulamile, kambe mina ni vanhu va mina hi hoxile. 28 Kombelani Yehovha leswaku a yimisa ku dzindza ni xihangu. Kutani ndzi ta mi tshika mi famba naswona a mi nge he tshami.” 29 Hiloko Muxe a ku eka yena: “Loko ndzi huma emutini ndzi ta tlakusela mavoko ya mina eka Yehovha. Ku dzindza ku ta yima ni xihangu a xi nge he yi emahlweni, leswaku u ta swi tiva leswaku misava i ya Yehovha.+ 30 Kambe se ndza swi tiva leswaku nilokoswiritano wena ni malandza ya wena a mi nge n’wi chavi Yehovha Xikwembu.”

31 Swimilana swa ntsembyana ni maxalana swi dlayiwe hi xihangu hikuva maxalana a ma lunghekele ku tshoveriwa kasi swimilana swa ntsembyana a swi ri ni swiluva. 32 Kambe koroni leyi tolovelekeke ni koroni yo tshwuka a yi dlayiwanga hi xihangu hikuva a ya ha ri yitsongo.* 33 Muxe a huma emutini a suka eka Faro kutani a tlakusela mavoko eka Yehovha, hiloko ku dzindza ni xihangu swi yima ni mpfula yi yima.+ 34 Loko Faro a vona leswaku mpfula, xihangu ni ku dzindza swi yimile, a tlhela a dyoha a nonon’hwisa mbilu yakwe,+ yena ni malandza yakwe. 35 Mbilu ya Faro yi ya emahlweni yi nonon’hwa, a nga va tshikanga Vaisrayele va famba, hilaha Yehovha a vuleke hakona hi ku tirhisa Muxe.+

10 Kutani Yehovha a byela Muxe a ku: “Yana eka Faro, hikuva mina ndzi pfumelele mbilu yakwe ni timbilu ta malandza yakwe leswaku ti sihalala,+ leswaku ndzi ta endla swikombiso leswi swa mina emahlweni ka yena,+ 2 ni leswaku u ta byela vana va wena ni vatukulu va wena ndlela leyi ndzi xupuleke Vaegipta ha yona ni swikombiso leswi ndzi nga swi endla exikarhi ka vona;+ kutani mi ta swi tiva leswaku hi mina Yehovha.”

3 Hikwalaho Muxe na Aroni va nghena eka Faro va fika va ku: “Yehovha Xikwembu xa Vaheveru u te, ‘Xana u ta ala ku titsongahata eka mina ku fikela rini?+ Tshika vanhu va mina va famba leswaku va ta ndzi tirhela. 4 Hikuva loko u ya emahlweni u ala ku tshika vanhu va mina va famba, mundzuku ndzi ta tisa tinjiya etikweni ra wena. 5 Ti ta funengeta ndhawu hinkwayo ku sala ku nga ha vonaki nchumu. Ti ta dya leswi xihangu xi mi siyeleke swona naswona ti ta dya mirhi hinkwayo ya n’wina leya ha kulaka.+ 6 Tiyindlu ta n’wina ni tiyindlu ta malandza ya n’wina hinkwawo ni tiyindlu hinkwato ta le Egipta ti ta tala hi tinjiya leti vatata wa n’wina ni vakokwa wa n’wina va nga si tshamaka va ti vona hi mpfhuka va va kona etikweni leri ku fikela namuntlha.’”+ Hiloko a hundzuluka a huma eka Faro.

7 Kutani malandza ya Faro ma ku eka yena: “Munhu loyi u ta ya emahlweni a hi vangela khombo* ku fikela rini? Tshika vanhu lava va famba leswaku va ta tirhela Yehovha Xikwembu xa vona. Xana a wu si swi vona leswaku tiko ra Egipta ri onhiwile?” 8 Hikwalaho Muxe na Aroni va tlheriseriwa eka Faro, kutani a ku eka vona: “Fambani mi ya tirhela Yehovha Xikwembu xa n’wina. Kambe ku ta famba vamani?” 9 Kutani Muxe a ku: “Hi ta famba ni vana va hina, vanhu va hina lava kuleke, vana va hina va majaha ni va vanhwanyana, tinyimpfu ta hina ni tihomu ta hina,+ hikuva hi ta endlela Yehovha nkhuvo.”+ 10 A ku eka vona: “Loko ndzo mi tshika mi famba ni vana va n’wina, kutani Yehovha u ta va a ri na n’wina hakunene!+ Swi le rivaleni leswaku mi tiyimisele ku endla swilo swo biha. 11 E-e! Ku ta famba vavanuna ntsena va ya tirhela Yehovha hikuva hi swona leswi mi swi kombeleke.” Hiloko va hlongoriwa emahlweni ka Faro.

12 Kutani Yehovha a byela Muxe a ku: “Tlakusela voko ra wena ehenhla ka tiko ra Egipta leswaku ku va ni tinjiya etikweni ra Egipta ti dya swimilana hinkwaswo swa tiko, hinkwaswo leswi nga siyiwa hi xihangu.” 13 Hiloko Muxe a tlakusela nhonga yakwe ehenhla ka tiko ra Egipta, kutani Yehovha a endla leswaku ku ba moya wa le vuxeni etikweni siku hinkwaro ni vusiku hinkwabyo. Loko ri xa, moya wa le vuxeni a wu tise tinjiya. 14 Hiloko ku sungula ku va ni tinjiya etikweni hinkwaro ra Egipta naswona ti phatsama endhawini hinkwayo ya Egipta.+ A ti nyenyetsa ngopfu;+ a ku nga si tshama ku va ni tinjiya to tala hi ndlela yoleyo naswona a ku nge he pfuki ku ve ni tin’wana. 15 Ti funengeta tiko hinkwaro naswona tiko ri sungula ku phumela hikwalaho ka tona; ti dya swimilana hinkwaswo swa tiko ni mihandzu hinkwayo ya mirhi leyi siyiweke hi xihangu; a ku salanga nchumu wa rihlaza emirhini kumbe eka swimilana etikweni hinkwaro ra Egipta.

16 Hikwalaho Faro a hatla a vitana Muxe na Aroni a va byela a ku: “Ndzi dyohele Yehovha Xikwembu xa n’wina na n’wina. 17 Sweswi, ndzi kombela mi ndzi rivalela ro hetelela kutani mi kombela Yehovha Xikwembu xa n’wina leswaku a susa ntungu lowu, lowu dlayaka eka mina.” 18 Hiloko yena* a huma eka Faro a ya kombela Yehovha.+ 19 Kutani Yehovha a endla leswaku ku ba moya wa matimba swinene ku suka evupeladyambu leswaku wu susa tinjiya wu ti yisa eLwandle ro Tshwuka. A ku na njiya ni yin’we leyi saleke etikweni hinkwaro ra Egipta. 20 Hambiswiritano, Yehovha a pfumelela mbilu ya Faro leswaku yi nonon’hwa,+ a nga va tshikanga Vaisrayele va famba.

21 Hiloko Yehovha a ku eka Muxe: “Tlakusela voko ra wena ematilweni leswaku ku va ni munyama etikweni ra Egipta, munyama lowukulu ngopfu.” 22 Hi ku hatlisa Muxe a tlakusela voko rakwe ematilweni, kutani ku va ni munyama lowukulu etikweni hinkwaro ra Egipta ku ringana masiku manharhu.+ 23 A va nga swi koti ku vonana naswona a nga kona loyi a humeke endhawini yakwe ku ringana masiku manharhu; kambe Vaisrayele hinkwavo a va ri ni ku vonakala laha a va tshama kona.+ 24 Hiloko Faro a vitana Muxe a ku: “Fambani mi ya tirhela Yehovha.+ Kambe mi ta siya tinyimpfu ta n’wina ni tihomu ta n’wina ntsena. Ni vana va n’wina na vona va nga famba na n’wina.” 25 Kambe Muxe a ku: “Wena u ta tlhela u hi nyika magandzelo ni magandzelo yo hisiwa, kutani hi ta nyikela hi wona eka Yehovha Xikwembu xa hina.+ 26 Hi ta famba ni swifuwo swa hina. A ku na xifuwo* lexi nga ta sala hikuva hi ta tirhisa swin’wana swa swona leswaku hi gandzela Yehovha Xikwembu xa hina naswona a hi swi tivi leswaku hi ta nyikela hi yini leswaku hi gandzela Yehovha kukondza hi fika kwale.” 27 Hiloko Yehovha a pfumelela mbilu ya Faro yi nonon’hwa, a nga va tshikanga va famba.+ 28 Faro a ku eka yena: “Suka emahlweni ka mina! U nga ha tlheli u ringeta ku ta u ta ndzi vona, hikuva siku leri u nga ta ndzi vona ha rona, u ta fa.” 29 Hiloko Muxe a ku: “A ndzi nge he tlheli ndzi ringeta ku ta ku vona, hilaha u vuleke hakona.”

11 Hiloko Yehovha a byela Muxe a ku: “Ndzi ta tisa khombo rin’wana ro hetelela eka Faro ni tiko ra Egipta. Endzhaku ka sweswo u ta mi tshika mi famba.+ Loko a mi tshunxa, u ta mi hlongola hi ku kongoma mi huma laha.+ 2 Sweswi byela vanhu leswaku vavanuna ni vavasati hinkwavo va fanele va kombela swilo leswi endliweke hi nsuku ni silivhere eka muakelani wa vona.”+ 3 Kutani Yehovha a endla leswaku vanhu va kombiwa tintswalo hi Vaegipta. Nakambe Muxe u ve munhu loyi a xiximiwaka swinene eEgipta hi malandza ya Faro ni vanhu.

4 Hiloko Muxe a ku: “Yehovha u te, ‘Exikarhi ka vusiku ndzi ta huma ndzi ya exikarhi ka tiko ra Egipta,+ 5 kutani mativula hinkwawo etikweni ra Egipta ma ta fa,+ ku sukela eka n’wana wa mativula wa Faro loyi a tshameke exitulwini xakwe xa vuhosi ku ya eka n’wana wa mativula wa nandza wakwe wa xisati loyi a tirhaka ku sila ni mativula hinkwawo ya swifuwo.+ 6 Ku ta va ni xirilo lexikulu etikweni hinkwaro ra Egipta, lexi nga si tshamaka xi va kona naswona a xi nge he pfuki xi ve kona.+ 7 Kambe hambi ku ri mbyana a yi nge va vukuli Vaisrayele kumbe swifuwo swa vona, leswaku mi ta swi tiva leswaku Yehovha a nga endla leswaku ku va ni ku hambana exikarhi ka Vaegipta ni Vaisrayele.’+ 8 Entiyisweni malandza ya wena hinkwawo ma ta ta eka mina ma tiwisela emahlweni ka mina, ma ku, ‘Famba wena ni vanhu hinkwavo lava ku landzelaka.’+ Endzhaku ka sweswo ndzi ta huma.” Hiloko a huma eka Faro a hlundzuke ngopfu.

9 Kutani Yehovha a byela Muxe a ku: “Faro a nge mi yingisi+ leswaku masingita ya mina ma ta engeteleka etikweni ra Egipta.”+ 10 Muxe na Aroni va endle masingita lawa hinkwawo emahlweni ka Faro+ kambe Yehovha u pfumelele mbilu ya Faro leswaku yi nonon’hwa, a nga va tshikanga Vaisrayele va huma etikweni rakwe.+

12 Kutani Yehovha a byela Muxe na Aroni etikweni ra Egipta a ku: 2 “N’hweti leyi yi ta va yo sungula eka tin’hweti ta n’wina. Yi ta va yo sungula eka tin’hweti ta lembe eka n’wina.+ 3 Vulavulani ni Vaisrayele hinkwavo mi ku, ‘Hi siku ra vukhume ra n’hweti leyi, un’wana ni un’wana wa vona u fanele a tekela ndyangu* wakwe nyimpfu,+ nyimpfu yin’we hi yindlu. 4 Kambe loko ndyangu wu ri wutsongo ngopfu lerova a wu nge swi koti ku heta nyimpfu, wu fanele wu avelana ni muakelani wa le kusuhi hi ku ya hi nhlayo ya vanhu va kona. Loko mi ri karhi mi hlayela leswi lavekaka, kumisisani leswaku un’wana ni un’wana u ta dya mpimo wo tanihi kwihi wa nyimpfu. 5 Nyimpfu ya n’wina yi fanele yi va yi hanye kahle+ naswona yi ri ni lembe rin’we, yi ri ya xinuna. Mi nga ha hlawula eka makhuna lamatsongo kumbe eka timbuti. 6 Mi fanele mi yi hlayisa ku fikela hi siku ra vu-14 ra n’hweti leyi,+ kutani ndyangu wun’wana ni wun’wana wa Vaisrayele wu fanele wu yi tlhava loko dyambu ra ha ku pela.+ 7 Va fanele va teka ngati yin’wana va yi n’wan’wasela* etifuremeni timbirhi ta nyangwa ni le xiphen’wini xa le henhla xa nyangwa ya tiyindlu leti va dyelaka eka tona.+

8 “‘Va fanele va dya nyama hi vusiku lebyi.+ Va fanele va yi oxa hi ndzilo kutani va yi dya ni swinkwa leswi nga riki na comela+ ni matsavu yo bava.+ 9 Mi nga yi dyi yi nga swekiwanga kumbe yi virisiwe hi mati kambe yi oxeni hi ndzilo ku katsa ni nhloko ya yona, manqina ni swa le ndzeni. 10 Mi nga siyi nchumu ku fikela nimixo, kambe leyi nga ta sala ku fikela nimixo mi fanele mi yi hisa hi ndzilo.+ 11 Mi fanele mi yi dya hi ndlela leyi, mi tsimbe mabandhi, mi ambale maphaxani, mi khome tinhonga naswona mi fanele mi yi dya hi ku hatlisa. I Paseka ya Yehovha. 12 Hikuva ndzi ta hundza etikweni ra Egipta hi vusiku byebyo, ndzi ba mativula hinkwawo etikweni ra Egipta, ku sukela eka munhu ku ya eka xifuwo;+ naswona ndzi ta avanyisa swikwembu hinkwaswo swa Egipta.+ Hi mina Yehovha. 13 Ngati yi ta va xikombiso eka tiyindlu leti mi nga eka tona; ndzi ta vona ngati kutani ndzi hundza, a mi nge lovisiwi hi khombo loko ndzi hlasela tiko ra Egipta.+

14 “‘Siku leri ri ta va xitsundzuxo eka n’wina naswona mi fanele mi ri tlangela tanihi nkhuvo wa Yehovha ni le ka vana va n’wina lava nga ta va kona endzhaku ka n’wina. Mi fanele mi ri tlangela tanihi nawu wa hilaha ku nga heriki. 15 Mi ta dya swinkwa leswi nga riki na comela ku ringana masiku ya nkombo.+ Hi siku ro sungula mi fanele mi susa mbila leyi nga vila etindlwini ta n’wina, hikuva un’wana ni un’wana loyi a nga ta dya nchumu lowu nga ni comela ku sukela hi siku ro sungula ku ya eka ra vunkombo, munhu yoloye u fanele a dlayiwa eIsrayele. 16 Hi siku ro sungula mi ta va ni nhlengeletano yo kwetsima nakambe hi siku ra vunkombo mi ta tlhela mi va ni nhlengeletano yin’wana yo kwetsima. A mi fanelanga mi tirha hi masiku lawa.+ Kambe mi ta lunghiselela swakudya leswi munhu ha un’we a nga ta dya swona ntsena.

17 “‘Mi fanele mi tlangela Nkhuvo Wa Swinkwa Leswi Nga Riki Na Comela+ hikuva hi siku leri, ndzi ta humesa mitshungu* ya n’wina etikweni ra Egipta. Mi fanele mi tlangela siku leri n’wina ni vana va n’wina lava nga ta va kona endzhaku ka n’wina tanihi nawu wa hilaha ku nga heriki. 18 Hi n’hweti yo sungula, hi siku ra vu-14 ra n’hweti nimadyambu, mi ta dya swinkwa leswi nga riki na comela ku ya fikela hi siku ra vu-21 ra n’hweti nimadyambu.+ 19 Ku nga tshuki ku kumeka mbila yo vila etindlwini ta n’wina ku ringana masiku ya nkombo, hikuva loko munhu o dya leswi nga ni comela, hambi i munhu wo huma etikweni rin’wana kumbe i Muisrayele,+ munhu yoloye u fanele a dlayiwa enhlengeletanweni ya Israyele.+ 20 A mi fanelanga mi dya nchumu lowu nga ni comela. Mi ta dya swinkwa leswi nga riki na comela emakaya ya n’wina.’”

21 Hi ku hatlisa Muxe a vitana vakulukumba hinkwavo va Vaisrayele+ kutani a ku eka vona: “Fambani mi ya hlawulela mindyangu ya n’wina swifuwo leswitsongo* kutani mi tlhava swifuwo swa gandzelo ra Paseka. 22 Kutani mi fanele mi teka switluka swa hisopa mi swi peta engatini leyi nga enkambaneni ivi mi yi n’wan’wasela ematlhelo hamambirhi ya tifureme ta minyangwa ni le henhla ka yona; a mi fanelanga mi huma hi nyangwa etindlwini ta n’wina ku fikela nimixo. 23 Loko Yehovha a hundza leswaku a hlasela Vaegipta, kutani a vona ngati ehenhla ka nyangwa ni le matlhelo hamambirhi ya tifureme ta minyangwa, Yehovha u ta hundza enyangweni yoleyo, a nge ri pfumeleli khombo leri dlayaka leswaku ri nghena etindlwini ta n’wina.+

24 “Mi fanele mi tsundzuka xiendlakalo lexi tanihi nawu wa hilaha ku nga heriki eka n’wina ni vana va n’wina.+ 25 Loko mi fika etikweni leri Yehovha a nga ta mi nyika rona hilaha a vuleke hakona, mi fanele mi tsundzuka xiendlakalo lexi.+ 26 Loko vana va n’wina va mi vutisa va ku, ‘Xana xiendlakalo lexi xi vula yini eka n’wina?’+ 27 mi fanele mi ku, ‘I gandzelo ra Paseka ya Yehovha, loyi a hundzeke ehenhla ka tiyindlu ta Vaisrayele eEgipta loko a hlasela Vaegipta, kambe a nga ti hlaseli tiyindlu ta hina.’”

Hiloko vanhu va khinsama mimombo ya vona yi languta ehansi. 28 Hiloko Vaisrayele va famba va ya endla hilaha Yehovha a leriseke Muxe na Aroni hakona.+ Va endle tano.

29 Kutani exikarhi ka vusiku Yehovha a dlaya mativula hinkwawo etikweni ra Egipta,+ ku sukela eka mativula ya Faro loyi a tshameke exitulwini xa vuhosi ku ya eka mativula ya hlonga leri a ri ri ekhotsweni ni mativula hinkwawo ya swifuwo.+ 30 Faro, malandza yakwe ni Vaegipta hinkwavo va pfuka vusiku byebyo naswona a ku ri ni xirilo lexikulu exikarhi ka Vaegipta hikuva a ku nga ri na muti lowu a ku nga fanga munhu eka wona.+ 31 Hi ku hatlisa a vitana Muxe na Aroni+ nivusiku a ku: “Sukani, humani exikarhi ka vanhu va mina, n’wina ni Vaisrayele lavan’wana. Fambani mi ya tirhela Yehovha hilaha mi vuleke hakona.+ 32 Tekani ni mitlhambi ya n’wina ya tinyimpfu ni ya tihomu mi famba hilaha mi vuleke hakona.+ Kambe na mina mi fanele mi ndzi katekisa.”

33 Kutani Vaegipta va sungula ku kombela vanhu leswaku va huma hi ku hatlisa+ etikweni, va ku, “hikuva swi fana niloko hinkwerhu hi file!”+ 34 Vanhu va rhwala mbila emakatleni ya vona yi nga si cheriwa comela ni swibya swo pfuvela eka swona swi phutseriwe hi swiambalo swa vona. 35 Vaisrayele va endle leswi Muxe a va byeleke swona, va kombele swilo leswi endliweke hi silivhere ni nsuku ni swiambalo eka Vaegipta.+ 36 Yehovha u endle leswaku Vaegipta va komba vanhu musa lerova va va nyika swilo leswi va swi kombeleke, hiloko va tekela Vaegipta swilo swa vona.+

37 Vaisrayele va suka eRamsese+ va ya eSukoti,+ a ku ri ni vavanuna* va kwalomu ka 600 000 ku nga hlayiwi vana.+ 38 Kutani ntlawa lowukulu wa vanhu vo hambanahambana*+ na wona wu famba na vona, ku katsa ni mitlhambi ya tinyimpfu ni ya tihomu, swifuwo swo tala ngopfu. 39 Va sungule ku baka mbila leyi va humeke na yona eEgipta va endla swinkwa leswi nga riki na comela swa swirhendzevutana. A swi nga cheriwanga comela hikuva va hlongoriwe eEgipta hi ku hatlisa lerova a va ha swi kotanga ku tilunghiselela hambi ku ri timbuva.+

40 Vaisrayele va tshame malembe ya 430+ eEgipta.+ 41 Loko ku hela malembe ya 430, hi siku leri, mitshungu* hinkwayo ya Yehovha yi humile etikweni ra Egipta. 42 I vusiku lebyi va nga ta kombisa ku tlangela eka Yehovha hikwalaho ka leswi a va humeseke etikweni ra Egipta. Hi vusiku lebyi, Vaisrayele hinkwavo ni vatukulu va vona hinkwavo va ta tsundzuka Yehovha.+

43 Kutani Yehovha a byela Muxe na Aroni a ku, “Lowu i nawu wa Paseka: A ku na munhu loyi a humaka etikweni rin’wana loyi a nga ta yi dya.+ 44 Kambe loko un’wana a ri ni hlonga ra xinuna leri a ri xaveke hi mali u fanele a ri yimbisa.+ Hi kona ri nga sungulaka ku yi dya. 45 Munhu loyi a humaka etikweni rin’wana ni mutirhi a va fanelanga va yi dya. 46 Yi ta dyeriwa endlwini yin’we. Mi nga teki nyama yin’wana mi yi humesela ehandle naswona a mi fanelanga mi tshova marhambu ya yona.+ 47 Vaisrayele hinkwavo va ta yi tlangela. 48 Loko munhu loyi a humaka etikweni rin’wana loyi a tshamaka na wena, a lava ku tlangela Yehovha Paseka, waxinuna un’wana ni un’wana loyi a tshamaka endyangwini wakwe u fanele a yimbisiwa. Hi kona a nga tshinelaka leswaku a ta yi tlangela naswona u ta fana ni Vaisrayele lavan’wana. Kambe a nga kona munhu loyi a nga yimbangiki loyi a nga ta yi dya.+ 49 Ku ta va ni nawu wun’we lowu tirhaka eka Muisrayele ni munhu loyi a humaka etikweni rin’wana loyi a tshamaka exikarhi ka n’wina.”+

50 Hikwalaho Vaisrayele hinkwavo va endla hilaha Yehovha a leriseke Muxe na Aroni hakona. Va endle tano. 51 Hi siku leri, Yehovha a humesa Vaisrayele swin’we ni mitshungu* ya vona etikweni ra Egipta.

13 Yehovha a tlhela a vulavula na Muxe a ku: 2 “Ndzi hlawuleleni mativula hinkwawo ya xinuna* exikarhi ka Vaisrayele. Mativula ya xinuna ya vanhu ni swiharhi i ya mina.”+

3 Muxe a byela vanhu a ku: “Tsundzukani siku leri, leri mi humeke ha rona eEgipta+ endlwini ya vuhlonga, hikuva mi humesiwe hi voko ra matimba ra Yehovha laha.+ Hikwalaho a ku fanelanga ku dyiwa nchumu lowu cheriweke comela. 4 Ma huma hi siku leri hi n’hweti ya Abibi.*+ 5 Loko Yehovha a mi tise etikweni ra Vakanana, Vaheti, Vaamori, Vahivhi ni Vayebusi,+ leri a hlambanyeleke vakokwa wa n’wina leswaku u ta mi nyika rona,+ tiko leri khulukaka ntswamba ni vulombe,+ mi fanele mi tlangela nkhuvo lowu hi n’hweti leyi. 6 Mi ta dya swinkwa leswi nga riki na comela ku ringana masiku ya nkombo,+ kutani hi siku ra vunkombo ku ta va ni nkhuvo wa Yehovha. 7 Ku ta dyiwa swinkwa leswi nga riki na comela ku ringana masiku ya nkombo;+ ku nga tshuki ku kumiwa nchumu lowu cheriweke comela eka n’wina+ naswona ku nga tshuki ku kumiwa mbila leyi vileke etindhawini* ta n’wina hinkwato. 8 Kutani hi siku rero u ta byela n’wana wa wena u ku, ‘Ndzi endla nkhuvo lowu hikwalaho ka leswi Yehovha a ndzi endleleke swona loko ndzi huma eEgipta.’+ 9 Nkhuvo lowu wu ta va xikombiso lexi tsariweke evokweni ra wena ni le mombyeni wa wena.*+ Wu ta ku tsundzuxa leswaku u vulavula hi nawu wa Yehovha. Nakambe wu ta ku tsundzuxa leswaku i Yehovha loyi a ku humeseke etikweni ra Egipta hi matimba yakwe lamakulu. 10 U fanele u yingisa nawu lowu kutani u endla nkhuvo lowu lembe ni lembe hi nkarhi lowu vekiweke.+

11 “Loko Yehovha a ku tisa etikweni ra Vakanana, leri a hlambanyeke leswaku u ta ri nyika wena ni vakokwa wa wena,+ 12 u fanele u nyika Yehovha n’wana un’wana ni un’wana wa mativula wa xinuna* ni mativula hinkwawo ya xinuna ya swifuwo leswi u swi kumaka. Mativula hinkwawo ya xinuna i ya Yehovha.+ 13 Mbhongolo yin’wana ni yin’wana ya mativula u ta yi kutsula hi nyimpfu, loko u nga yi kutsuli, u ta yi tshova nhamu. Vana va wena hinkwavo vaxinuna va mativula u ta va kutsula.+

14 “Loko n’wana wa wena a ku vutisa hi ku famba ka nkarhi a ku, ‘Leswi swi vula yini?’ kutani u ta ku eka yena, ‘Yehovha u hi humese hi voko ra matimba eEgipta, endlwini ya vuhlonga.+ 15 Loko Faro a tiomise nhloko a ala ku hi tshika hi famba,+ Yehovha u dlaye mativula hinkwawo etikweni ra Egipta, ku sukela eka mativula ya munhu ku ya eka mativula ya xiharhi.+ Hi yona mhaka leyi ndzi nyikaka Yehovha mativula hinkwawo ya xinuna* naswona ndzi kutsulaka mativula hinkwawo ya vana va mina vaxinuna.’ 16 Leswi swi ta va xikombiso evokweni ra wena ni le mombyeni wa wena,*+ hikuva Yehovha u hi humese hi voko ra matimba eEgipta.”

17 Loko Faro a tshika vanhu va famba, Xikwembu a xi va fambisanga hi ndlela ya tiko ra Vafilista hambileswi a yi ri ekusuhi. Hikuva Xikwembu xi te: “Vanhu va nga cinca miehleketo ya vona loko va langutana ni nyimpi kutani va tlhelela eEgipta.” 18 Hikwalaho Xikwembu xi endle leswaku vanhu va famba hi ndlela yo leha leyi nga emananga ya Lwandle ro Tshwuka.+ Kambe Vaisrayele va hume eEgipta va hlelekile, ku fana ni mitlawa ya masocha. 19 Muxe u teke ni marhambu ya Yosefa hikuva Yosefa a a endle leswaku Vaisrayele va hlambanya eka yena leswaku va ta endla tano, a ku: “Xikwembu xi ta mi tsundzuka naswona mi fanele mi teka marhambu ya mina mi huma na wona laha.”+ 20 Hiloko va suka eSukoti va ya dzima matende eEthamu emakumu ka mananga.

21 Yehovha a a famba emahlweni ka vona, ninhlikanhi a va rhangela hi papa+ kasi nivusiku a tirhisa ndzilo leswaku wu va voningela, leswaku va kota ku famba nhlikanhi ni vusiku.+ 22 Papa a ri nga suki emahlweni ka vanhu ninhlikanhi hambi ku ri ndzilo nivusiku.+

14 Kutani Yehovha a vulavula na Muxe a ku: 2 “Byela Vaisrayele leswaku va tlhela va ya dzima matende emahlweni ka Pihahiroto exikarhi ka Migidoli ni lwandle, ku langutana na Bali-sefoni.+ Mi ta dzima matende mi languta Bali-sefoni ekusuhi ni lwandle. 3 Kutani Faro u ta vula leswi hi Vaisrayele, ‘Va tsendzeleka etikweni va pfilunganyekile. Mananga ma va sivelerile.’ 4 Ndzi ta pfumelela mbilu ya Faro yi nonon’hwa+ naswona u ta va hlongorisa, kutani ndzi ta tivangamisa hi Faro ni hi vuthu rakwe hinkwaro;+ entiyisweni Vaegipta va ta swi tiva leswaku hi mina Yehovha.”+ Hiloko va endla tano.

5 Hi ku famba ka nkarhi hosi ya Egipta yi byeriwa leswaku vanhu va balekile. Hi ku hatlisa, Faro ni malandza yakwe va tisola hileswi va tshikeke vanhu va famba+ kutani va ku: “Hikwalaho ka yini hi endle leswi, hi tshike Vaisrayele va nga ha vi mahlonga ya hina?” 6 Hiloko a lunghisa makalichi yakwe ya nyimpi kutani a teka vanhu vakwe a famba na vona.+ 7 A teka makalichi ya 600 ya xiyimo xa le henhla ni makalichi laman’wana hinkwawo ya le Egipta, hinkwawo ma gadiwe hi tinhenha ta nyimpi. 8 Hikwalaho Yehovha a pfumelela mbilu ya Faro hosi ya le Egipta leswaku yi nonon’hwa, hiloko a hlongorisa Vaisrayele lava a va huma etikweni va nga chavi nchumu.+ 9 Vaegipta va va hlongorisile,+ makalichi hinkwawo ya tihanci ta Faro, vagadi vakwe va tihanci ni vuthu rakwe ra nyimpi ri kume va ha dzime mixaxa ya vona ekusuhi ni lwandle, ekusuhi na Pihahiroto laha ku langutaneke na Bali-sefoni.

10 Loko Faro a ri karhi a tshinela, Vaisrayele va vona Vaegipta va va sale endzhaku. Hiloko va chava swinene kutani va sungula ku huwelela eka Yehovha.+ 11 Va byela Muxe va ku: “Xana a ku na swilahlo eEgipta leswi u hi tiseke laha mananga leswaku hi ta fela kona?+ Hikwalaho ka yini u hi endle leswi? Hikwalaho ka yini u hi humese eEgipta? 12 Xana leswi a hi swona leswi hi ku byeleke swona loko ha ha ri eEgipta, loko hi ku, ‘Hi tshike hi tirhela Vaegipta’? Hikuva swa antswa leswaku hi tirhela Vaegipta ku ri ni ku fela emananga.”+ 13 Hiloko Muxe a byela vanhu a ku: “Mi nga chavi.+ Vanani ni xivindzi mi vona loko Yehovha a mi ponisa namuntlha.+ Hikuva Vaegipta lava mi va vonaka namuntlha a mi nge he pfuki mi va vonile.+ 14 Yehovha u ta mi lwela,+ n’wina mi ta miyela.”

15 Kutani Yehovha a byela Muxe a ku: “Hikwalaho ka yini u tshamela ku ndzi rilela? Byela Vaisrayele leswaku va hahlula matende ya vona. 16 Wena tlakusela nhonga ya wena ehenhla ka lwandle, u ri hambanisa hi le xikarhi, leswaku Vaisrayele va ta famba exikarhi ka rona emisaveni leyi omeke. 17 Ndzi pfumelela timbilu ta Vaegipta leswaku ti nonon’hwa, va ta va sala endzhaku; kutani mina ndzi ta tivangamisa hi Faro ni hi vuthu rakwe hinkwaro ra nyimpi, makalichi yakwe ya nyimpi ni vagadi vakwe va tihanci.+ 18 Kutani Vaegipta va ta swi tiva leswaku hi mina Yehovha loko ndzi tivangamisa hi Faro, makalichi yakwe ya nyimpi ni vagadi vakwe va tihanci.”+

19 Hiloko ntsumi ya Xikwembu xa ntiyiso+ leyi a yi famba emahlweni ka Vaisrayele yi suka yi ya endzhaku ka vona, kutani papa leri a ri ri emahlweni ka vona ri suka ri ya yima endzhaku ka vona.+ 20 Kutani ri yima exikarhi ka Vaegipta ni Vaisrayele.+ Eka tlhelo lerin’wana ra papa a ku ri ni munyama. Kasi eka tlhelo lerin’wana a ri voninga vusiku.+ Vaegipta a va tshinelanga eka Vaisrayele vusiku hinkwabyo.

21 Hiloko Muxe a tlakusela voko rakwe ehenhla ka lwandle;+ kutani Yehovha a endla leswaku ku va ni moya wa matimba lowu humaka evuxeni vusiku hinkwabyo, hakatsongotsongo lwandle ri sungula ku avana hi le xikarhi+ naswona misava leyi nga le lwandle yi oma.+ 22 Kutani Vaisrayele va famba exikarhi ka lwandle emisaveni leyi omeke,+ loko mati ma ha endle khumbi eka tlhelo ra vona ra xinene ni ra ximatsi.+ 23 Vaegipta va sungule ku va hlongorisa, tihanci ta Faro hinkwato, makalichi yakwe ya nyimpi ni vagadi vakwe va tihanci va va sale endzhaku exikarhi ka lwandle.+ 24 Loko ri ya eku xeni,* Yehovha a languta ntlawa wa Vaegipta a ri endzilweni ni le papeni,+ kutani a pfilunganya ntlawa wa Vaegipta. 25 A ya emahlweni a hlomula mavhilwa ya makalichi ya vona lerova swi va tikela ku ma fambisa naswona Vaegipta a va ku: “A hi balekeleni Vaisrayele, hikuva Yehovha wa va lwela eka Vaegipta.”+

26 Hiloko Yehovha a byela Muxe a ku: “Tlakusela voko ra wena ehenhla ka lwandle leswaku mati ma tlhelela ehenhla ka Vaegipta, makalichi ya vona ya nyimpi ni vagadi va vona va tihanci.” 27 Hi ku hatlisa Muxe a tlakusela voko rakwe ehenhla ka lwandle, kutani loko ri ya ri xa, lwandle ri tlhelela eka xiyimo xa rona. Loko Vaegipta va ri balekela, Yehovha a wisa Vaegipta exikarhi ka lwandle.+ 28 Mati ma funengeta makalichi ya nyimpi ni vagadi va tihanci ni vuthu hinkwaro ra Faro ra nyimpi leri ngheneke elwandle ri hlongorisa Vaisrayele.+ A ku ponanga ni un’we exikarhi ka vona.+

29 Kambe Vaisrayele va fambe emisaveni leyi omeke exikarhi ka lwandle+ naswona mati a ma ri khumbi eka tlhelo ra vona ra xinene ni ra ximatsi.+ 30 Hikwalaho Yehovha a ponisa Vaisrayele hi siku rero eka Vaegipta+ naswona Vaisrayele va vone Vaegipta va file eribuweni ra lwandle. 31 Vaisrayele va tlhele va vona matimba lamakulu lawa Yehovha a ma tirhiseke ku lwa ni Vaegipta naswona vanhu va sungula ku chava Yehovha ni ku va ni ripfumelo eka Yehovha ni le ka Muxe nandza wakwe.+

15 Hi nkarhi wolowo Muxe ni Vaisrayele va yimbelelele Yehovha risimu leri:+

“Ndzi yimbelelela Yehovha, hikuva u hlule hi ndlela yo hlamarisa.+

U hoxe hanci ni mugadi wa yona elwandle.+

 2 Yehovha* i ntamu wa mina ni matimba ya mina, hikuva u ve muponisi wa mina.+

Lexi i Xikwembu xanga, ndzi ta xi dzunisa;+ i Xikwembu xa tatana,+ ndzi ta xi vangamisa.+

 3 Yehovha i nhenha ya matimba.+ Yehovha i vito rakwe.+

 5 Magandlati ma va funengetile; va mbombomele ku fana ni ribye ematini lama enteke.+

 9 Nala u te: ‘Ndzi ta va hlongorisa! Ndzi ta va kuma!

Ndzi ta ava leswi phangiweke ku fikela loko ndzi eneriseka!

Ndzi ta hlomula banga ra mina! Voko ra mina ri ta va lovisa!’+

11 Yehovha Xikwembu xanga, i mani loyi a fanaka na wena exikarhi ka swikwembu?+

I mani loyi a fanaka na wena, loyi a kombisaka ku kwetsima lokukulu?+

Loyi a faneleke a chaviwa hi tinsimu ta ku dzunisa, Loyi a endlaka swihlamariso.+

12 U tlakuse voko ra wena ra xinene naswona misava yi va mitile.+

Ni vaaki hinkwavo va le Kanana va ta tshoveka timbilu.+

16 Va ta chava, va karhateka.+

18 Yehovha u ta va hosi hilaha ku nga heriki.+

20 Kutani Meriyamu muprofeta wa xisati, makwavo wa Aroni, a khoma xingomana, vavasati hinkwavo va n’wi landzela va khome swingomana va ri karhi va cina. 21 Meriyamu a hlamula vavanuna hi risimu a ku:

“Yimbelelelani Yehovha, hikuva u vangamisiwile swinene.+

Hanci ni mugadi wa yona u swi hoxe elwandle.”+

22 Endzhakunyana Muxe a rhangela Vaisrayele va suka eLwandle ro Tshwuka va ya emananga ya Xure, va fambe masiku manharhu emananga, kambe a va kumanga mati. 23 Va fike eMara*+ kambe a va swi kotanga ku nwa mati ya le Mara hikuva a ma dzunga. Hi yona mhaka leyi yi thyiweke vito ra Mara. 24 Kutani vanhu va sungula ku gungulela Muxe,+ va ku: “Hi ta nwa yini?” 25 A huwelela eka Yehovha,+ kutani Yehovha a n’wi komba murhi. Loko a wu lahlela ematini, mati ma tsokombela.

Kwalaho A va nyika nawu ni xivangelo xa vuavanyisi. A tlhela A va ringa kwalaho.+ 26 A ku: “Loko mo yingisa Yehovha Xikwembu xa n’wina, mi endla leswi lulameke emahlweni ka yena naswona mi yingisa milawu ni swileriso swakwe hinkwaswo,+ vuvabyi lebyi ndzi nga byi tisela Vaegipta a ndzi nge byi tisi eka n’wina,+ hikuva mina Yehovha ndza mi horisa.”+

27 Endzhaku ka sweswo va fika eElimi, laha a ku ri ni swihlovo swa mati swa 12 ni mirhi ya micindzu ya 70. Kutani va dzima matende ya vona kwalaho ekusuhi ni mati.

16 Endzhaku ka loko va suke eElimi, Vaisrayele va hetelele va fike emananga ya Sini,+ lama nga exikarhi ka Elimi na Sinayi, hi siku ra vu-15 ra n’hweti ya vumbirhi endzhaku ka loko va hume etikweni ra Egipta.

2 Kutani Vaisrayele va sungula ku gungulela Muxe na Aroni emananga.+ 3 Vaisrayele a va tshamela ku va byela va ku: “Loko ntsena a hi lo dlayiwa hi voko ra Yehovha etikweni ra Egipta laha a hi tshama emahlweni ka timbita ta nyama,+ laha a hi dya xinkwa hi xurha. Sweswi mi hi tise laha mananga leswaku mi ta dlaya ntshungu lowu hinkwawo hi ndlala.”+

4 Hiloko Yehovha a byela Muxe a ku: “Ndzi ta mi nisela xinkwa xi huma etilweni+ naswona un’wana ni un’wana u fanele a ya rholela mpimo lowu a dyaka wona siku ni siku,+ leswaku ndzi va ringa ndzi vona loko va ta yingisa nawu wa mina kumbe loko va taka va nga wu yingisi.+ 5 Kambe hi siku ra vutsevu+ loko va hlengeleta leswi va nga swi rholela, mpimo wa kona wu fanele wu andzisiwe kambirhi ku tlula mpimo lowu va wu rholelaka masiku man’wana.”+

6 Kutani Muxe na Aroni va byela Vaisrayele hinkwavo va ku: “Nimadyambu mi ta swi tiva leswaku i Yehovha loyi a mi humeseke etikweni ra Egipta.+ 7 Nimixo mi ta vona ku vangama ka Yehovha, hikuva Yehovha u ku twile ku gungula ka n’wina loku mi n’wi gungulelaka hakona. Hina ho va vamani leswi mi hi gungulelaka?” 8 Muxe a tlhela a ku: “Loko Yehovha a mi nyika nyama leswaku mi dya nimadyambu ni xinkwa leswaku mi dya mi xurha nimixo, mi ta swi vona leswaku Yehovha u ku twile ku gungula ka n’wina loku mi n’wi gungulelaka ha kona. Kambe hina ho va vamani? A mi gungulelanga hina, kambe mi gungulele Yehovha.”+

9 Kutani Muxe a byela Aroni a ku: “Byela Vaisrayele u ku, ‘Tshinelani emahlweni ka Yehovha, hikuva u ku twile ku gungula ka n’wina.’”+ 10 Hi ku hatlisa loko Aroni a heta ku vulavula ni Vaisrayele, va hundzuluka va languta etlhelo ra le mananga, kutani ku vangama ka Yehovha ku humelela epapeni.+

11 Yehovha a ya emahlweni a vulavula na Muxe a ku: 12 “Ndzi ku twile ku gungula ka Vaisrayele.+ Va byele u ku, ‘Mi ta dya nyama nimadyambu kasi nimixo mi ta dya xinkwa mi xurha,+ entiyisweni mi ta swi tiva leswaku hi mina Yehovha Xikwembu xa n’wina.’”+

13 Hiloko madyambu wolawo ku ta tin’hwari* ti funengeta nxaxa,+ kasi nimixo a ku ri ni mberha enxaxeni. 14 Loko mberha yi n’oka a ku ri ni swilo swo olova swo fana ni tindzohonyana erivaleni,+ a swi olova ku fana ni gamboko ehenhla ka misava. 15 Loko Vaisrayele va swi vona, va sungula ku vutisana va ku, “I yini leswi?” hikuva a va nga swi tivi leswaku i yini. Muxe a ku eka vona: “I xinkwa lexi Yehovha a mi nyikeke xona leswaku mi xi dya.+ 16 Yehovha u lerise a ku, ‘Un’wana ni un’wana u ta rholela hi ku ya hi leswi a dyaka swona. Mi ta hlengeletela un’wana ni un’wana mpimo wa omere*+ hi ku ya hi nhlayo ya vanhu lava ha un’we wa n’wina a tshamaka na vona etendeni rakwe.’” 17 Vaisrayele va sungula ku endla tano; va xi rholerile, van’wana va hlengeleta xo tala kasi van’wana lexitsongo. 18 Loko va swi pima hi omere, loyi a hlengeleteke swo tala a nga saleriwanga hi nchumu ni loyi a hlengeleteke leswitsongo a nga kayivelanga.+ Hinkwavo va rholele leswi va nga ta swi dya.

19 Hiloko Muxe a ku eka vona: “Ku nga vi na munhu loyi a nga ta swi siya ku fikela nimixo.”+ 20 Kambe a va n’wi yingisanga Muxe. Loko van’wana va swi siya ku fikela nimixo, swi hume swivungu swi nun’hwa kutani Muxe a va hlundzukela. 21 A va swi rholela mixo wun’wana ni wun’wana, un’wana ni un’wana hi ku ya hi leswi a nga swi dyaka. Loko dyambu ri hisa a swi n’oka.

22 Kutani hi siku ra vutsevu, va rholele mpimo wo ringana masiku mambirhi,+ mimpimo yimbirhi ya omere hi munhu. Hiloko tindhuna hinkwato ta Vaisrayele ti ta ti ta vikela Muxe. 23 A ku eka tona: “Hi leswi Yehovha a swi vuleke. Mundzuku ku ta wisiwa,* i savata yo kwetsima eka Yehovha.+ Bakani leswi mi faneleke mi swi baka, mi virisa leswi mi faneleke mi swi virisa;+ kutani leswi saleke mi swi hlayisa ku fikela nimixo.” 24 Hiloko va swi hlayisa ku fikela nimixo hilaha Muxe a va leriseke hakona, a swi nun’hwanga kumbe swi huma swivungu. 25 Kutani Muxe a ku: “Swi dyeneni namuntlha, hikuva namuntlha i savata ya Yehovha. Namuntlha a mi nge swi kumi ehandle ka ndhawu leyi mi dzimeke matende eka yona. 26 Mi ta swi rholela masiku ya tsevu, kambe hi siku ra vunkombo hi Savata,+ a swi nge vi kona.” 27 Hambiswiritano, vanhu van’wana va humile hi siku ra vunkombo leswaku va ya swi rholela, kambe a va kumanga nchumu.

28 Kutani Yehovha a byela Muxe a ku: “Mi ta ala ku fikela rini ku yingisa swileriso swa mina ni milawu ya mina?+ 29 Tsundzukani leswaku Yehovha u mi nyike Savata.+ Hi yona mhaka leyi hi siku ra vutsevu a mi nyikaka xinkwa xa masiku mambirhi. Un’wana ni un’wana u fanele a tshama laha a nga kona; ku nga vi na munhu loyi a sukaka endhawini yakwe hi siku ra vunkombo.” 30 Hiloko vanhu va endla leswi va lerisiweke ku swi endla hi Savata hi siku ra vunkombo.+

31 Vaisrayele va thye xinkwa xexo vito ra “manna.”* A xi base ku fana ni mbewu ya khoriyanda naswona a xi nandziha ku fana ni makhekhe ya swiphepherhele lama nga ni vulombe.+ 32 Hiloko Muxe a ku: “Yehovha u lerise a ku, ‘Tata omere hi manna u yi hlayisa, leswaku vana va wena lava nga ta va kona endzhaku ka wena+ va ta vona xinkwa lexi ndzi mi nyikeke xona leswaku mi xi dya emananga loko ndzi mi humesa etikweni ra Egipta.’” 33 Hiloko Muxe a byela Aroni a ku: “Teka khuwana u chela manna leyi ringanaka ni omere, u ri veka emahlweni ka Yehovha u ri hlayisela vana va wena hinkwavo lava nga ta va kona endzhaku ka wena.”+ 34 Aroni a ri veka emahlweni ka bokisi ra Vumbhoni,*+ hilaha Yehovha a leriseke Muxe hakona leswaku ri ta hlayiseka. 35 Vaisrayele va dye manna malembe ya 40,+ ku fikela loko va fika etikweni leri nga ni vaaki.+ Va dye manna ku fikela loko va fika endzilakaneni wa tiko ra Kanana.+ 36 Efa* yi tatiwa hi tiomere ta khume.

17 Vaisrayele va suke emananga ya Sini+ hi ku ya hi xileriso xa Yehovha,+ va fika va dzima matende eRefidimi.+ Kambe a ku nga ri na mati leswaku vanhu va nwa.

2 Kutani vanhu va sungula ku holovela Muxe+ va ku: “Hi nyike mati hi nwa.” Kambe Muxe a ku eka vona: “Hikwalaho ka yini mi holovela mina? Hikwalaho ka yini mi tshamela ku ringa Yehovha?”+ 3 Kambe vanhu va ye emahlweni va gungulela Muxe+ hikwalaho ka leswi a va khomiwe hi torha ngopfu va ku: “Hikwalaho ka yini u hi humese eEgipta leswaku u ta hi dlaya hi torha, hina ni vana va hina ni swifuwo swa hina?” 4 Eku heteleleni Muxe a huwelela eka Yehovha a ku: “Ndzi ta endla yini hi vanhu lava? Ku nga ri khale va ta ndzi khandla hi maribye!”

5 Hiloko Yehovha a byela Muxe a ku: “Famba emahlweni ka vanhu u teka vakulukumba van’wana va Israyele ni nhonga ya wena leyi u beke Nambu wa Nayili ha yona.+ Yi khome hi voko u famba. 6 Vona! Ndzi ta va ndzi yime emahlweni ka wena kwalaho eribyeni eHorebe. U fanele u ba ribye kutani mati ma ta huma eka rona naswona vanhu va ta nwa.”+ Muxe u endle tano emahlweni ka vakulukumba va Israyele. 7 Hiloko a thya ndhawu yoleyo vito ra Massa*+ na Meriba,*+ hikwalaho ka leswi Vaisrayele va holoveleke Muxe ni leswi va ringeke Yehovha,+ va ku: “Xana Yehovha u kona exikarhi ka hina kumbe a nga kona?”

8 Kutani Vaamaleke+ va ta leswaku va ta lwa ni Vaisrayele eRefidimi.+ 9 Hiloko Muxe a byela Yoxuwa+ a ku: “Hi hlawulele vavanuna kutani u famba na vona mi ya lwa ni Vaamaleke. Mundzuku ndzi ta yima ehenhla ka xintshabyana ndzi khome nhonga ya Xikwembu xa ntiyiso.” 10 Hiloko Yoxuwa a endla hilaha Muxe a n’wi byeleke hakona,+ a lwa ni Vaamaleke. Kutani Muxe, Aroni na Huru+ va tlhandluka va ya ehenhla ka xintshabyana.

11 Loko Muxe a yimisa mavoko yakwe, Vaisrayele a va hlula, kambe loko a yisa mavoko ehansi, Vaamaleke a va hlula. 12 Loko mavoko ya Muxe ma sungula ku karhala, va teke ribye va ri veka ehansi ka yena a tshama ehenhla ka rona. Kutani Aroni na Huru va tshega mavoko yakwe, un’wana a ri eka tlhelo leri kasi lowun’wana a ri eka tlhelo lerin’wana, leswaku mavoko yakwe ma yima ma tiya ku fikela loko dyambu ri pela. 13 Kutani Yoxuwa a hlula Amaleke ni masocha yakwe hi banga.+

14 Hiloko Yehovha a byela Muxe a ku: “Tsala leswi ebukwini swi va xitsundzuxo u tlhela u swi byela Yoxuwa u ku, ‘Ndzi ta endla leswaku Amaleke a nga ha tsundzukiwi ehansi ka matilo.’”+ 15 Kutani Muxe a aka altari ivi a yi thya vito ra Yehovha-nisi,* 16 a ku: “Hikuva voko ra Amaleke ri lwa ni xiluvelo xa Yehovha,*+ Yehovha u ta lwa ni vana vakwe hinkwavo lava nga ta va kona endzhaku ka yena.”+

18 Yetro muprista wa le Midiyani, tata wa nsati wa Muxe+ u twe swilo hinkwaswo leswi Xikwembu xi swi endleleke Muxe ni vanhu vakwe ku nga Vaisrayele ni ndlela leyi Yehovha a humeseke Vaisrayele eEgipta ha yona.+ 2 Yetro, tata wa nsati wa Muxe a amukela Zipora nsati wa Muxe loko a tlheriseriwe eka yena 3 ni vana va yena vambirhi va majaha.+ Vito ra n’wana un’we a ku ri Gerixomu,*+ hikuva Muxe u te, “Ndzi ve muluveri etikweni rin’wana,” 4 kasi vito ra loyi un’wanyana a ku ri Eliyezere,* hikuva u te, “Xikwembu xa tatana i mupfuni wa mina, lexi ndzi poniseke eka banga ra Faro.”+

5 Hiloko Yetro, tata wa nsati wa Muxe a ta eka Muxe ni vana va Muxe ni nsati wakwe emananga laha a a dzime tende rakwe kona entshaveni ya Xikwembu xa ntiyiso.+ 6 Kutani a rhumela rito eka Muxe a ku: “Mina Yetro tata wa nsati wa wena,+ ndzi ta eka wena ni nsati wa wena ni vana vakwe vambirhi.” 7 Hiloko Muxe a huma a ya hlanganisa tata wa nsati wakwe, kutani a khinsama ni ku n’wi tswontswa. Endzhaku ka loko va xewetanile va nghena etendeni.

8 Muxe a rungulela tata wa nsati wakwe swilo hinkwaswo leswi Yehovha a swi endleke eka Faro ni le Egipta hikwalaho ka Vaisrayele,+ swiphiqo hinkwaswo leswi va nga va na swona endleleni+ ni ndlela leyi Yehovha a va poniseke ha yona. 9 Yetro a tsakisiwa hi swilo hinkwaswo leswi Yehovha a swi endleleke Vaisrayele hi ku va ponisa eEgipta. 10 Kutani Yetro a ku: “A ku dzunisiwe Yehovha loyi a ku poniseke eEgipta ni le ka Faro ni loyi a tshunxeke vanhu eku lawuriweni hi Vaegipta. 11 Sweswi ndza swi tiva leswaku Yehovha i nkulu eka swikwembu leswin’wana hinkwaswo,+ hikwalaho ka leswi a swi endleke eka lava tikukumuxeke eka vanhu vakwe.” 12 Hiloko Yetro, tata wa nsati wa Muxe a tisela Xikwembu gandzelo ro hisiwa ni magandzelo man’wana, kutani Aroni ni vakulukumba hinkwavo va Israyele va ta leswaku va ta dya swakudya ni tata wa nsati wa Muxe emahlweni ka Xikwembu xa ntiyiso.

13 Hi siku leri landzelaka, Muxe a tshama ehansi tanihi ntolovelo leswaku a avanyisa vanhu, kutani vanhu va yima emahlweni ka Muxe ku sukela nimixo ku ya fikela nimadyambu. 14 Loko tata wa nsati wa Muxe a vona swilo hinkwaswo leswi Muxe a a swi endlela vanhu, a ku: “U va endlela yini vanhu lava? Hikwalaho ka yini u tshama laha u endla ntirho lowu u ri wexe vanhu lava hinkwavo va yime emahlweni ka wena ku sukela nimixo ku ya fikela nimadyambu?” 15 Muxe a hlamula tata wa nsati wakwe a ku: “Hikuva vanhu va tshamela ku ta eka mina va ta vutisa hi Xikwembu. 16 Loko ku va ni mhaka, yi ta eka mina kutani ndzi fanele ndzi avanyisa exikarhi ka vanhu vambirhi, ndzi va tivisa swiboho swa Xikwembu xa ntiyiso ni milawu ya xona.”+

17 Tata wa nsati wa Muxe a ku eka yena: “Leswi u swi endlaka a hi swinene. 18 U ta karhala, wena ni vanhu lava u nga na vona hikuva ntirho lowu i vutihlamuleri lebyikulu eka wena, a wu nge swi koti ku wu endla u ri wexe. 19 Sweswi ndzi yingise. Ndzi ta ku tsundzuxa naswona Xikwembu xi ta va na wena.+ U muyimeri wa vanhu emahlweni ka Xikwembu xa ntiyiso+ naswona wena u fanele u tisa timhaka eka Xikwembu xa ntiyiso.+ 20 U fanele u va tsundzuxa swiboho ni milawu+ u tlhela u va byela ndlela leyi va faneleke va famba ha yona ni ntirho lowu va faneleke va wu endla. 21 Kambe u fanele u hlawula vavanuna lava nga ni vuswikoti+ lava chavaka Xikwembu, lava tshembekaka, lava vengaka ku bindzula hi ndlela ya vukanganyisi+ u va veka va va tindhuna ta vanhu va magidi, tindhuna ta vanhu va madzana, tindhuna ta vanhu va makumentlhanu ni tindhuna ta vanhu va khume.+ 22 Va fanele va avanyisa vanhu loko ku va ni timhaka* naswona va ta tisa mhaka yin’wana ni yin’wana yo tika eka wena,+ kambe mhaka yin’wana ni yin’wana leyitsongo va ta yi avanyisa. Tivevukisele hi ku va tshika va ku pfuna ku endla ntirho lowu.+ 23 Loko wo endla leswi naswona Xikwembu xi ku lerisa ku endla tano, u ta swi kota ku endla ntirho lowu naswona vanhu hinkwavo va ta muka va enerisekile.”

24 Hiloko Muxe a yingisa tata wa nsati wakwe, a endla hinkwaswo leswi a swi vuleke. 25 Muxe a hlawula vavanuna lava nga ni vuswikoti eIsrayele a va veka va va varhangeri va vanhu, va va tindhuna ta vanhu va magidi, tindhuna ta vanhu va madzana, tindhuna ta vanhu va makumentlhanu ni tindhuna ta vanhu va khume. 26 Kutani a va avanyisa vanhu loko ku va ni timhaka. Mhaka yo tika a va yi tisa eka Muxe,+ kambe mhaka yin’wana ni yin’wana leyitsongo a va yi avanyisa. 27 Endzhaku ka sweswo Muxe a lelana ni tata wa nsati wakwe,+ kutani tata wa nsati wakwe a famba a ya etikweni ra rikwavo.

19 Hi n’hweti ya vunharhu endzhaku ka loko Vaisrayele va humile etikweni ra Egipta, hi siku rero, va fika emananga ya Sinayi. 2 Va suke eRefidimi+ va ya emananga ya Sinayi va fika va dzima mixaxa ya vona kona. Vaisrayele va dzime mixaxa ya vona kwalaho emahlweni ka ntshava.+

3 Muxe a tlhandlukela entshaveni leswaku a humelela emahlweni ka Xikwembu xa ntiyiso, kutani Yehovha a n’wi vitana a ri entshaveni+ a ku: “Leswi u ta swi byela vatukulu va Yakobo ku nga Vaisrayele u ku, 4 ‘Mi swi vonile leswi ndzi swi endleke eka Vaegipta,+ leswaku ndzi mi rhwala hi timpapa ta magama ndzi mi tisa eka mina.+ 5 Kutani loko mo yingisa rito ra mina hi ku tshembeka mi tlhela mi hlayisa ntwanano wa mina, hakunene mi ta va nhundzu ya mina yo hlawuleka exikarhi ka vanhu hinkwavo,+ hikuva misava hinkwayo i ya mina.+ 6 Mi ta va mfumo wa vaprista ni tiko ro kwetsima eka mina.’+ Marito lawa u ta ma byela Vaisrayele.”

7 Hiloko Muxe a famba a ya vitana vakulukumba va vanhu a va byela marito lawa hinkwawo, lawa Yehovha a n’wi leriseke wona.+ 8 Endzhaku ka sweswo vanhu hinkwavo va hlamula hi rito rin’we va ku: “Hinkwaswo leswi Yehovha a swi vuleke hi tiyimisele ku swi endla.”+ Kutani Muxe a byela Yehovha leswi vanhu va swi vuleke. 9 Hiloko Yehovha a byela Muxe a ku: “Vona! Ndzi ta eka wena ndzi ri epapeni ra munyama, leswaku vanhu va ta swi twa loko ndzi vulavula na wena nileswaku va ta va ni ripfumelo ni le ka wena mikarhi hinkwayo.” Kutani Muxe a byela Yehovha leswi vanhu va swi vuleke.

10 Hiloko Yehovha a byela Muxe a ku: “Yana eka vanhu, u va endla va lunghekela nhlengeletano yo kwetsima namuntlha ni mundzuku naswona va fanele va hlantswa swiambalo swa vona. 11 Va fanele va lunghekela siku ra vunharhu, hikuva hi siku ra vunharhu Yehovha u ta rhelela a ya eNtshaveni ya Sinayi emahlweni ka vanhu hinkwavo. 12 U fanele u vekela vanhu mindzilakana ematlhelo hinkwawo ya yona naswona u va byela u ku, ‘Tivoneleni leswaku mi nga khandziyi ntshava kumbe ku khumba makumu ya yona. Un’wana ni un’wana loyi a nga ta khumba ntshava u ta dlayiwa. 13 A ku na voko leri nga ta n’wi khumba, kambe u ta khandliwa hi maribye kumbe a copiwa.* Hambi i xiharhi kumbe i munhu, a nge hanyi.’+ Kambe loko ku twakala nanga ya khuna+ va nga ta entshaveni.”

14 Hiloko Muxe a rhelela entshaveni a ya eka vanhu, a sungula ku endla vanhu va lunghekela nhlengeletano yo kwetsima kutani vona va hlantswa swiambalo swa vona.+ 15 A byela vanhu a ku: “Tilunghiseleleni siku ra vunharhu. Mi nga endli timhaka ta masangu.”*

16 Hi siku ra vunharhu nimixo, a ku ri ni ku dzindza ni rihati ni papa ro dzwihala+ ehenhla ka ntshava naswona a ku twakala mpfumawulo lowukulu ngopfu wa nanga lerova vanhu hinkwavo lava a va ri emixaxeni va sungula ku rhurhumela.+ 17 Muxe a humesa vanhu emixaxeni leswaku va ta hlangana ni Xikwembu xa ntiyiso, hiloko va yima ehansi ka ntshava. 18 Ntshava ya Sinayi a yi tuvika musi hinkwako, hikuva Yehovha u rhelele a ta eka yona a ri endzilweni;+ musi wa yona a wu ya ehenhla ku fana ni musi wa le xitikweni naswona ntshava hinkwayo a yi tsekatseka swinene.+ 19 Loko nanga yi ya yi twala ngopfu, Muxe a vulavula kutani rito ra Xikwembu xa ntiyiso ri n’wi hlamula.

20 Hiloko Yehovha a rhelela a ta ehenhla ka Ntshava ya Sinayi. Kutani Yehovha a vitana Muxe ehenhla ka ntshava, Muxe a tlhandluka.+ 21 Kutani Yehovha a byela Muxe a ku: “Rhelela u ya lemukisa vanhu leswaku va nga ringeti ku tshinela leswaku va ta vona Yehovha, hikuva loko vo endla tano vo tala va vona va ta lova. 22 Vaprista lava nkarhi ni nkarhi va tshinelaka eka Yehovha a va tibasise* leswaku Yehovha a nga va dlayi.”+ 23 Kutani Muxe a byela Yehovha a ku: “Vanhu a va swi koti ku ta eNtshaveni ya Sinayi hikuva se u hi lemukisile u ku, ‘Veka mindzilakana ematlhelo hinkwawo ya ntshava, u endla ntshava yi kwetsima.’”+ 24 Hambiswiritano, Yehovha a ku eka yena: “Famba, rhelela u tlhela u vuya u ri na Aroni kambe u nga va pfumeleli vaprista ni vanhu leswaku va tlhandluka va ta eka Yehovha, leswaku a nga va dlayi.”+ 25 Hiloko Muxe a rhelela a ya eka vanhu a fika a va byela.

20 Hiloko Xikwembu xi vula marito lawa hinkwawo xi ku:+

2 “Hi mina Yehovha Xikwembu xa n’wina, loyi a mi humeseke etikweni ra Egipta endlwini ya vuhlonga.+ 3 Mi nga vi ni swikwembu swin’wana handle ka mina.+

4 “Mi nga tshuki mi tiendlela xifaniso lexi vatliweke kumbe xifaniso xo karhi xa nchumu lowu nga ematilweni, kumbe emisaveni kumbe lowu nga ematini ehansi ka misava.+ 5 Mi nga tshuki mi swi khinsamela kumbe mi yengeka ku swi tirhela,+ hikuva mina Yehovha Xikwembu xa n’wina, ndzi Xikwembu lexi lavaka leswaku ku gandzeriwa xona ntsena,+ lexi xupulaka vana hikwalaho ka xidyoho xa vatata wa vona eka xitukulwana xa vunharhu ni le ka xitukulwana xa vumune eka lava ndzi vengaka, 6 kambe ndzi rhandza lava ndzi rhandzaka va tlhela va yingisa milawu ya mina, ku ya fika eka xitukulwana xa vugidi.+

7 “Mi nga tshuki mi tlanga hi vito ra Yehovha Xikwembu xa n’wina,+ hikuva Yehovha a nge tshiki ku xupula loyi a tlangaka hi vito Rakwe.+

8 “Mi nga rivali ku hlayisa siku ra Savata mi ri teka ri kwetsima.+ 9 Mi fanele ku endla mitirho ya n’wina hinkwayo hi masiku ya tsevu,+ 10 kambe siku ra vunkombo ri ta va savata ya Yehovha Xikwembu xa n’wina. Mi nga tshuki mi endla ntirho wo karhi, n’wina kumbe n’wana wa n’wina wa jaha kumbe wa nhwanyana kumbe hlonga ra n’wina ra xinuna kumbe ra xisati kumbe xifuwo xa n’wina kumbe muluveri loyi mi tshamaka na yena.+ 11 Hikuva Yehovha u endle matilo, misava, lwandle ni swilo hinkwaswo leswi nga eka swona hi masiku ya tsevu kutani a sungula ku wisa hi siku ra vunkombo.+ Hi yona mhaka leyi Yehovha a katekiseke siku ra Savata naswona a ri endleke ri kwetsima.

12 “Xixima tata wa wena ni mana wa wena+ leswaku u ta hanya nkarhi wo leha etikweni leri Yehovha Xikwembu xa wena a ku nyikaka rona.+

13 “U nga tshuki u dlaya.+

14 “U nga tshuki u oswa.+

15 “U nga tshuki u yiva.+

16 “U nga tshuki u hemba loko u nyikela vumbhoni hi munhu un’wana.+

17 “U nga tshuki u navela yindlu ya munhu un’wana. U nga tshuki u navela nsati wa munhu un’wana+ kumbe hlonga rakwe ra xinuna kumbe ra xisati kumbe nkuzi yakwe kumbe mbhongolo yakwe kumbe nchumu wun’wana ni wun’wana lowu nga wa yena.”+

18 Vanhu hinkwavo a va twa ku dzindza va vona ni rihati va tlhela va twa nanga ni ku vona musi lowu humaka entshaveni; loko va vona swilo leswi va rhurhumela kutani va yimela ekule.+ 19 Kutani va byela Muxe va ku: “Wena vulavula na hina, hi ta yingisa, kambe Xikwembu xi nga vulavuli na hina hikuva hi chava leswaku hi ta fa.”+ 20 Hiloko Muxe a byela vanhu a ku: “Mi nga chavi, hikuva Xikwembu xa ntiyiso xi tele ku ta mi ringa+ leswaku mi ya emahlweni mi xi chava mi nga dyohi.”+ 21 Kutani vanhu va hambeta va yimela ekule kambe Muxe a ya ekusuhi ni papa ra ntima laha a ku ri ni Xikwembu xa ntiyiso.+

22 Kutani Yehovha a byela Muxe a ku: “U ta byela Vaisrayele u ku, ‘Mi swi vone hi n’wexe leswaku ndzi vulavule na n’wina ndzi ri etilweni.+ 23 Mi nga tshuki mi endla swikwembu swa silivhere mina ndzi ri kona, naswona mi nga tshuki mi tiendlela swikwembu swa nsuku.+ 24 Mi ta ndzi endlela altari ya misava naswona mi ta endlela eka yona magandzelo ya n’wina yo hisiwa, magandzelo ya n’wina yo kombela ku rhula hi tinyimpfu ni tihomu ta n’wina. Ndzi ta ta eka n’wina ndzi mi katekisa endhawini yin’wana ni yin’wana leyi ndzi endlaka leswaku vito ra mina ri tsundzukiwa eka yona.+ 25 Loko mi ndzi endlela altari ya maribye, mi nga yi aki hi maribye lama tsemiweke.+ A mi fanelanga mi tirhisa chizele eka altari ya maribye, hikuva loko mi endla tano a ndzi nge yi amukeli altari ya kona. 26 Mi nga tshuki mi famba hi switepisi loko mi ya ealtarini ya mina, leswaku swirho swa n’wina swa le xihundleni swi nga vonaki eka yona.’

21 “Leyi i milawu leyi u nga ta va byela yona:+

2 “Loko wo xava hlonga ra Muheveru,+ ri ta va hlonga malembe ya tsevu kambe hi lembe ra vunkombo ri ta tshunxiwa ri nga hakeli nchumu.+ 3 Loko ri te ri ri roxe, ri ta famba ri ri roxe. Loko ri te ni nsati, nsati wa rona u ta famba na rona. 4 Loko n’wini wa rona a ri nyika nsati kutani yena a ri velekela vana va majaha kumbe va vanhwanyana, nsati ni vana va ta va va n’wini wa rona, rona ri ta famba ri ri roxe.+ 5 Kambe loko hlonga ro sindzisa ri ku, ‘Ndzi rhandza n’wini wanga, nsati wanga ni vana vanga; a ndzi lavi ku tshunxiwa,’+ 6 n’wini wa rona u fanele a ri tisa emahlweni ka Xikwembu xa ntiyiso. U ta ri yimisa ri khegetela nyangwa kumbe fureme ya rivanti kutani n’wini wa rona u ta ri boxa ndleve hi nchumu wo boxa ha wona naswona ri ta va hlonga rakwe vutomi bya rona hinkwabyo.

7 “Loko munhu a xavisa n’wana wakwe wa nhwanyana leswaku a va hlonga, n’wana yoloye a nge tshunxiwi hi ndlela leyi hlonga ra xinuna ri tshunxiwaka ha yona. 8 Loko n’wini wakwe a nga n’wi tsakeli naswona a nga n’wi hlawuli leswaku a va nsati lontsongo kambe a n’wi xavisela munhu un’wana, n’wini wakwe a nge pfumeleriwi ku n’wi xavisela vanhu lava humaka ematikweni man’wana hikuva u n’wi kanganyisile. 9 Loko o n’wi hlawulela n’wana wakwe wa jaha, u ta n’wi khoma ku fana ni n’wana wakwe wa nhwanyana. 10 Swakudya, swiambalo ni mfanelo ya vukati*+ u fanele a ya emahlweni a swi kuma loko n’wana* loyi o teka nsati un’wana. 11 Loko yena a nga n’wi endleli swilo leswinharhu, u ta famba hi ku tshunxeka a nga hakeli mali.

12 “Loyi a nga ta ba munhu a fa, u fanele a dlayiwa.+ 13 Kambe loko a nga n’wi dlayanga hi vomu naswona Xikwembu xa ntiyiso xi swi pfumelela leswaku swi endleka, ndzi ta mi hlawulela ndhawu leyi a nga balekelaka eka yona.+ 14 Loko munhu o hlundzukela munhu un’wana swinene kutani a n’wi dlaya hi vomu,+ munhu yoloye u fanele a fa hambiloko a tumbele ealtarini ya mina.+ 15 Loyi a baka tata wakwe kumbe mana wakwe u fanele a dlayiwa.+

16 “Loko munhu o tlhakisa munhu un’wana+ kutani a n’wi xavisa kumbe a kumeka a n’wi khomile,+ u fanele a dlayiwa.+

17 “Loyi a rhukanaka tata wakwe kumbe mana wakwe u fanele a dlayiwa.+

18 “Leswi hi leswi faneleke swi humelela loko vanhu va holova kutani un’wana a ba lowun’wana hi ribye kumbe hi xibakele ivi a nga fi kambe a boheka ku tshama a etlele: 19 Loko a kota ku suka a yima a fambafamba ehandle hi nxongotelo, loyi a nga n’wi ba a nge xupuriwi. U ta hakela munhu la vavisekeke hi nkarhi lowu a nga kotiki ku tirha ku fikela loko a hola hi ku helela.

20 “Loko munhu o ba hlonga rakwe ra xinuna kumbe ra xisati hi nhonga kutani ri fa, ri fanele ri rihiwa.+ 21 Kambe loko ro hanya siku rin’we kumbe mambirhi, a ri nge rihiwi hikuva ri xaviwe hi mali ya n’wini wa rona.

22 “Loko vanhu vo tshuka va lwa kutani va vavisa wansati la tikeke kutani a veleka nkarhi wakwe wu nga si fika*+ kambe ku nga fi munhu, loyi a n’wi vaviseke u fanele a riha nandzu hi ku ya hilaha nuna wa wansati yoloye a nga ta n’wi rihisa hakona; u fanele a riha eka vaavanyisi.+ 23 Kambe loko ko fa munhu, vutomi byi fanele byi rihiwa hi vutomi,*+ 24 tihlo hi tihlo, tino hi tino, voko hi voko, nenge hi nenge,+ 25 ku tshwa hi ku tshwa, mbanga hi mbanga, xibakele hi xibakele.

26 “Loko munhu o ba tihlo ra hlonga rakwe ra xinuna kumbe ra xisati kutani ri nga ha voni, u ta riha tihlo ra rona hi ku ri tshunxa ri famba.+ 27 Loko o gula tino ra hlonga rakwe ra xinuna kumbe ra xisati, u ta riha tino ra rona hi ku ri tshunxa ri famba.

28 “Loko nkuzi yo tlhava wanuna kumbe wansati kutani a fa, nkuzi yoleyo yi fanele yi khandliwa hi maribye yi fa+ naswona nyama ya yona a yi fanelanga yi dyiwa; kambe n’wini wa nkuzi a nge xupuriwi. 29 Kambe loko nkuzi yi tolovele ku tlhava vanhu naswona n’wini wa yona a lemukisiwile kambe a nga yi rindzi kutani yi dlaya wanuna kumbe wansati, nkuzi yoleyo yi ta khandliwa hi maribye yi fa ni n’wini wa yona u ta dlayiwa. 30 Loko o komberiwa ku hakela mali* leswaku a nga dlayiwi, u fanele a hakela mali leyi lavekaka. 31 Hambi yi tlhave n’wana wa jaha kumbe wa nhwanyana, ku ta endliwa leswi nawu wu vulaka swona eka n’wini wa nkuzi. 32 Loko nkuzi yi tlhave hlonga ra xinuna kumbe ra xisati, yena u ta humesa swiphemu* swa silivhere swa 30 a swi nyika n’wini wa rona, kutani nkuzi yi ta khandliwa hi maribye yi fa.

33 “Loko munhu o tshika mugodi wu nga funengetiwanga kumbe a cela mugodi a nga wu seleteli kutani nkuzi kumbe mbhongolo yi wela eka wona, 34 n’wini wa mugodi u ta riha.+ U ta hakela mali ya kona eka n’wini wa xifuwo xa kona, kutani xifuwo lexi feke xi ta va xa yena. 35 Loko nkuzi ya munhu yo vavisa ya un’wana kutani yi fa, va fanele va xavisa nkuzi leyi hanyaka kutani va avelana mali leyi yi xaviweke ha yona; va fanele va tlhela va avelana ni leyi feke. 36 Kumbe loko swi tiviwa leswaku nkuzi a yi tolovele ku tlhava vanhu kambe n’wini wa yona a nga yi rindzi, u fanele a riha nkuzi hi nkuzi, kutani leyi feke yi ta va ya yena.

22 “Loko munhu o yiva nkuzi kumbe nyimpfu kutani a yi tlhava kumbe a yi xavisa, u ta riha nkuzi hi ntlhanu wa tona ni nyimpfu hi mune wa tona.+

2 (“Loko khamba+ ro kumeka ri ri karhi ri tshova endlwini kutani ri biwa ri fa, munhu loyi a ri dlayeke a nga na nandzu wa ngati. 3 Kambe loko o ri dlaya se ri xile, u ta va ni nandzu wa ngati.)

“Khamba ri fanele ri riha. Loko ri nga ri na nchumu, ri fanele ri xavisiwa leswaku ku hakeriwa swilo leswi ri swi yiveke. 4 Loko leswi ri swi yiveke swo kumeka eka rona swa ha hanya, hambi i nkuzi kumbe mbhongolo kumbe nyimpfu, ri ta swi riha kambirhi.

5 “Loko munhu a byisa swifuwo leswaku swi ya dya ensin’wini kumbe ensin’wini ya madiriva kutani a swi tshika swi dya ni le nsin’wini ya munhu un’wana, u ta riha hi leswinene swa nsimu yakwe kumbe hi leswinene swa nsimu yakwe ya madiriva.

6 “Loko ko lumekiwa ndzilo wu hangalaka wu hisa mitwa wu tlhela wu hisa tinyandza ta koroni leyi tshoveriweke kumbe mahlanga ya koroni leyi nga si tshoveriwaka kumbe nsimu, loyi a wu lumekeke u fanele a riha leswi hisiweke.

7 “Loko munhu o nyika munhu un’wana mali kumbe swilo swo karhi leswaku a swi hlayisa, kutani swilo leswi swi yiviwa endlwini ya munhu yoloye, loko khamba ro kumiwa, ri fanele ri swi riha kambirhi.+ 8 Loko khamba ri nga kumiwi, n’wini wa yindlu u fanele a tisiwa emahlweni ka Xikwembu xa ntiyiso+ ku vona loko a nga yi tekanga nhundzu ya munhu yoloye. 9 Etimhakeni ta ku va munhu a kumeka ni swilo leswi yiviweke, ku nga ha va nkuzi, mbhongolo, nyimpfu, nguvu kumbe xin’wana ni xin’wana lexi lahlekeke lexi munhu un’wana a nga vulaka a ku, ‘Lexi i xa mina,’ vanhu lavambirhi va ta tisa mhaka ya vona eka Xikwembu xa ntiyiso.+ Loyi Xikwembu xi nga ta vula leswaku u ni nandzu u ta riha munhu lowun’wana kambirhi.+

10 “Loko munhu o nyika munhu un’wana mbhongolo kumbe nkuzi kumbe nyimpfu kumbe xifuwo xihi ni xihi leswaku a swi hlayisa, kutani xi fa kumbe xi lamala kumbe xi tekiwa xi nga voniwanga hi munhu, 11 loyi a nyikiweke swona leswaku a swi hlayisa u fanele a hlambanya eka loyi un’wana emahlweni ka Yehovha leswaku a nga swi tekanga; kutani n’wini wa swona u fanele a amukela leswi a swi vulaka. Munhu lowun’wana a nge rihi.+ 12 Kambe loko xifuwo xi yiviwe eka yena, u ta riha eka n’wini wa xona. 13 Loko xi handzuleriwe hi xiharhi, u ta xi tisa xi va vumbhoni. A nge wu rihi nchumu lowu handzuleriweke hi xiharhi.

14 “Kambe loko munhu o lomba xifuwo eka munhu un’wana, kutani xi lamala kumbe xi fa xi nga ri eka n’wini wa xona, loyi a xi lombeke u fanele a xi riha. 15 Loko xi ri ni n’wini wa xona, a nge rihi. Loko xi lombiwe hi mali, mali leyi hakeriweke i ya ku riha.

16 “Kutani loko munhu o kanganyisa nhwana loyi a nga si tshembisiwaka a etlela na yena, u fanele a n’wi lovola leswaku a va nsati wa yena.+ 17 Loko tata wakwe a ala ku n’wi nyika yena, u ta hakela mali leyi ku lovoriwaka nhwana ha yona.

18 “Mi nga tshuki mi pfumelela noyi wa xisati a hanya.+

19 “Loyi a etlelaka ni xiharhi u fanele a dlayiwa.+

20 “Loyi a endlelaka swikwembu swin’wana magandzelo handle ka Yehovha ntsena, u ta lovisiwa.+

21 “Mi nga tshuki mi khoma muluveri hi tihanyi kumbe mi n’wi xanisa,+ hikuva n’wina a mi ri valuveri etikweni ra Egipta.+

22 “Mi nga tshuki mi xanisa noni kumbe n’wana la nga riki na tatana.*+ 23 Loko wo n’wi xanisa lerova a huwelela eka mina, ndzi ta twa xirilo xa yena;+ 24 kutani ndzi ta hlundzuka swinene naswona ndzi ta mi dlaya hi banga, vasati va n’wina va ta va tinoni ni vana va n’wina va ta sala va nga ha ri na vatatana.

25 “Loko u lomba un’wana wa vanhu va mina mali la nga xisiwana,* loyi a tshamaka na wena, u nga fani ni munhu la lombisaka leswaku a kuma ntswalo. U nga lavi ntswalo eka yena.+

26 “Loko wo teka nkumba wa munhu un’wana wu va xo khomela xikweleti,+ u ta wu tlherisela eka yena loko dyambu ri pela. 27 Hikuva hi wona ntsena lowu a nga na wona, i nkumba lowu a funengetaka miri* wakwe ha wona; xana u ta funengela yini loko a etlela?+ Loko a huwelela eka mina, ndzi ta n’wi yingisa hikuva ndzi ni ntwelavusiwana.*+

28 “Mi nga tshuki mi rhukana Xikwembu+ kumbe mi rhukana ndhuna* exikarhi ka vanhu va ka n’wina.+

29 “Mi nga kanakani ku endla magandzelo hi ntshovelo wa n’wina wo tala ni leswi khapakhapaka eswikamelweni*+ swa n’wina. Mi ta ndzi nyika mativula ya vana va n’wina va majaha.+ 30 U fanele u endla leswi hi nkuzi ya wena ni nyimpfu ya wena:+ Yi ta tshama ni mana wa yona masiku ya nkombo. Hi siku ra vunhungu u ta ndzi nyika yona.+

31 “Mi fanele mi tikombisa mi ri vanhu lava kwetsimaka eka mina+ naswona a mi fanelanga mi dya nyama ya xifuwo lexi handzuleriweke hi xiharhi.+ Mi fanele mi yi lahlela etimbyaneni.

23 “Mi nga tshuki mi hangalasa mhaka leyi nga riki ntiyiso.+ Mi nga tirhisani ni munhu wo homboloka hi ku va mbhoni ya mavunwa.+ 2 Mi nga tshuki mi landzelela ntshungu leswaku mi endla swilo swo biha, mi nga tshuki mi soholota vululami hi ku nyikela vumbhoni leswaku mi fambisana ni ntshungu. 3 Mi nga tshuki mi va ni xihlawuhlawu eka mholovo ya xisiwana.+

4 “Loko mi hlangana ni nkuzi ya nala wa n’wina kumbe mbhongolo yakwe yi lahlekile, mi fanele mi yi tlherisela eka yena.+ 5 Loko mi vona mbhongolo ya munhu loyi a mi vengaka yi wile ni ndzhwalo wa yona, mi nga yi tshiki mi famba. Mi fanele mi n’wi pfuna ku yi rhula ndzhwalo.+

6 “A mi fanelanga mi avanyisa xisiwana lexi nga exikarhi ka n’wina hi ndlela yo biha loko mi tenga mhaka ya xona.+

7 “Mi nga katseki eka xihehlo* xa mavunwa, naswona mi nga dlayi loyi a nga riki na nandzu ni loyi a lulameke, hikuva loyi a hombolokeke a ndzi nge vuli leswaku u lulamile.+

8 “Mi nga tshuki mi pfumela ku xaviwa, hikuva swi endla matihlo ya vaavanyisi ma nga swi voni leswi lulameke naswona swi endla vanhu vo tshembeka va cinca swiboho swa vona.+

9 “Mi nga tshuki mi xanisa muluveri. Ma swi tiva leswaku swi njhani ku va muluveri* hikuva na n’wina a mi ri valuveri etikweni ra Egipta.+

10 “Mi ta byala mbewu etikweni ra n’wina ku ringana malembe ya tsevu kutani mi ta hlengeleta ntshovelo wa rona.+ 11 Kambe hi lembe ra vunkombo mi ta ri tshika ri nga rimiwi ri va fusi, swisiwana leswi nga exikarhi ka n’wina swi ta dya eka rona, kutani leswi swi swi siyeke swi ta dyiwa hi swiharhi. Mi ta endlisa sweswo ni le ka nsimu ya n’wina ya madiriva ni mirhi ya n’wina ya mitlhwari.

12 “Mi ta tirha masiku ya tsevu; kambe hi siku ra vunkombo a mi nge tirhi leswaku nkuzi ya n’wina ni mbhongolo ya n’wina swi wisa ni n’wana wa hlonga ra n’wina ra xisati ni muluveri va wisa.+

13 “Tiyisekani leswaku mi endla hinkwaswo leswi ndzi mi byeleke swona,+ mi nga tshuki mi vula mavito ya swikwembu swin’wana; a ma fanelanga ma twiwa emilon’wini ya n’wina.+

14 “Mi ta ndzi endlela nkhuvo kanharhu hi lembe.+ 15 Mi ta tlangela Nkhuvo Wa Swinkwa Leswi Nga Riki Na Comela.+ Mi ta dya swinkwa leswi nga riki na comela masiku ya nkombo hilaha ndzi mi leriseke hakona, hi nkarhi lowu vekiweke hi n’hweti ya Abibi,*+ hikuva mi hume eEgipta hi nkarhi wolowo. A nga kona loyi a nga ta ta eka mina a nga khomanga nchumu.+ 16 Mi ta tlangela ni Nkhuvo wa Ntshovelo* wa mihandzu leyi wupfeke ku sungula emasin’wini ya n’wina;+ ni Nkhuvo wo Hlengeleta* eku heleni ka lembe loko mi hlengeleta leswi mi swi tshoveleke emasin’wini ya n’wina.+ 17 Vavanuna hinkwavo va ta humelela emahlweni ka Yehovha, Hosi ya ntiyiso, kanharhu hi lembe.+

18 “Mi nga tshuki mi nyikela ngati ya gandzelo ra mina ni swilo leswi cheriweke comela. Magandzelo ya mafurha lama nyikeriwaka emikhubyeni ya mina a ma fanelanga ma tshama vusiku hinkwabyo ku fikela nimixo.

19 “Mi ta tisa mihandzu leyinene ngopfu leyi wupfeke ku sungula endlwini ya Yehovha Xikwembu xa n’wina.+

“Mi nga tshuki mi sweka ximbutana hi ntswamba wa mana wa xona.+

20 “Ndzi rhumela ntsumi emahlweni ka n’wina+ leswaku yi mi rindza endleleni ni ku mi yisa endhawini leyi ndzi mi lunghiseleleke yona.+ 21 Yi yingiseleni mi endla leswi yi mi byelaka swona. Mi nga yi xandzukeli hikuva a yi nge mi rivaleli swidyoho swa n’wina,+ hikuva vito ra mina ri le ka yona. 22 Kambe loko mi yingisa leswi yi swi vulaka mi tlhela mi endla hinkwaswo leswi ndzi swi vulaka, ndzi ta venga valala va n’wina ndzi lwisana ni lava va lwisanaka na n’wina. 23 Hikuva ntsumi ya mina yi ta famba emahlweni ka n’wina yi mi yisa eka Vaamori, Vaheti, Vaperezi, Vakanana, Vahivhi ni Vayebusi, kutani ndzi ta va lovisa.+ 24 Mi nga tshuki mi khinsamela swikwembu swa vona kumbe mi yengiwa ku swi tirhela naswona mi nga tshuki mi tekelela mikhuva ya vona.+ Kambe mi fanele mi swi wisetela mi tlhela mi mbundzumuxa tiphuphu leti va ti hundzuleke swikwembu swa vona.+ 25 Mi fanele mi tirhela Yehovha Xikwembu xa n’wina+ kutani u ta katekisa xinkwa xa n’wina ni mati ya n’wina.+ Ndzi ta susa vuvabyi exikarhi ka n’wina.+ 26 Vavasati lava nga etikweni ra n’wina a va nge onhakeriwi hi makhwiri kumbe va va timhika*+ naswona ndzi ta endla leswaku mi hanya nkarhi wo leha.

27 “Ndzi ta endla va mi chava hambiloko mi nga si fika+ naswona ndzi ta pfilunganya vanhu hinkwavo lava mi nga ta hlangana na vona, ndzi ta endla leswaku valala va n’wina hinkwavo va mi baleka.+ 28 Ndzi ta endla leswaku valala va n’wina va hela matimba* mi nga si fika+ naswona ndzi ta hlongola Vahivhi, Vakanana ni Vaheti emahlweni ka n’wina.+ 29 A ndzi nge va hlongoli emahlweni ka n’wina hi lembe rin’we, leswaku tiko ri nga vi rhumbi kutani swiharhi swi andza swi mi hlasela.+ 30 Ndzi ta va hlongola emahlweni ka n’wina hakatsongotsongo kukondza mi tala mi teka tiko ri va ra n’wina.+

31 “Ndzi ta veka ndzilakana wa n’wina wu suka eLwandle ro Tshwuka wu ya fika elwandle ra Vafilista ni ku suka emananga ku ya fika eNambyeni;*+ hikuva ndzi ta nyiketa vaaki va tiko eka n’wina kutani mi ta va hlongola.+ 32 Mi nga tshuki mi endla ntwanano na vona kumbe swikwembu swa vona.+ 33 A va fanelanga va tshama etikweni ra n’wina, leswaku va nga mi endli mi ndzi dyohela. Loko mo tshuka mi tirhela swikwembu swa vona, swi ta va ntlhamu eka n’wina.”+

24 Kutani a byela Muxe a ku: “Tlhandlukela eka Yehovha wena na Aroni, Nadabu na Abihu+ ni vakulukumba va 70 va Vaisrayele, mi khinsama ma ha ri ekule. 2 Muxe u fanele a tshinela a ri yexe eka Yehovha; kambe lavan’wana a va fanelanga va tshinela naswona vanhu a va fanelanga va tlhandluka na yena.”+

3 Hiloko Muxe a fika a byela vanhu marito hinkwawo ya Yehovha ni swiboho hinkwaswo swa vuavanyisi,+ kutani vanhu hinkwavo va hlamula hi rito rin’we va ku: “Marito hinkwawo lawa Yehovha a ma vuleke hi tiyimiserile ku ma endla.”+ 4 Kutani Muxe a ma tsala ehansi marito hinkwawo ya Yehovha.+ Hiloko a pfuka nimpundzu swinene a aka altari ehansi ka ntshava ni tiphuphu ta 12 leti ringaneke tinyimba ta 12 ta vana va Israyele. 5 Endzhaku ka sweswo a rhuma majaha ya Vaisrayele, kutani ma endla magandzelo yo hisiwa ma tlhela ma endla magandzelo hi tinkuzi, ma va magandzelo ya ku kombela ku rhula+ eka Yehovha. 6 Hiloko Muxe a teka hafu ya ngati a yi chela eminkambaneni, kutani hafu leyin’wana ya ngati a yi n’wan’wasela ehenhla ka altari. 7 Kutani a teka buku ya ntwanano a yi hlayela vanhu.+ Vanhu va ku: “Hinkwaswo leswi Yehovha a swi vuleke hi tiyimiserile ku swi endla naswona hi ta n’wi yingisa.”+ 8 Hiloko Muxe a teka ngati a n’wan’wasela vanhu hi yona+ a ku: “Leyi i ngati ya ntwanano lowu Yehovha a wu endleke na n’wina hi ku pfumelelana ni marito lawa hinkwawo.”+

9 Muxe na Aroni, Nadabu na Abihu ni vakulukumba va 70 va Vaisrayele va tlhandluka, 10 kutani va vona Xikwembu xa Israyele.+ Ehansi ka milenge ya xona a ku ri ni leswi a swi fana ni maribye lama vuriwaka safiri, naswona a ma tengile ku fana ni matilo.+ 11 A xi va xupulanga varhangeri lava va Vaisrayele+ naswona va vone xivono xa Xikwembu xa ntiyiso kutani va dya va tlhela va nwa.

12 Yehovha a byela Muxe a ku: “Tlhandlukela eka mina entshaveni u tshama kona. Ndzi ta ku nyika maribye ya swiphepherhele lama nga ni nawu ni xileriso leswi ndzi nga ta swi tsala leswaku ndzi va letela.”+ 13 Hiloko Muxe ni nandza wakwe Yoxuwa va suka va famba+ kutani Muxe a tlhandlukela entshaveni ya Xikwembu xa ntiyiso.+ 14 Kambe a byela vakulukumba a ku: “Hi rindzeni laha ku fikela loko hi vuya.+ Mi ta sala na Aroni na Huru.+ Loyi a nga ni mhaka leyi a lavaka ku pfuniwa hi yona a a ye eka vona.”+ 15 Kutani Muxe a tlhandlukela entshaveni papa ra ha yi funengetile.+

16 Ku vangama ka Yehovha+ ku tshame ehenhla ka Ntshava ya Sinayi+ naswona papa ri yi funengete masiku ya tsevu. Hi siku ra vunkombo a vitana Muxe a ri exikarhi ka papa. 17 Eka Vaisrayele lava a va langutile, ku vangama ka Yehovha a ku fana ni ndzilo lowu pfurhaka ehenhla ka ntshava. 18 Hiloko Muxe a nghena epapeni kutani a tlhandlukela entshaveni.+ Muxe a tshama masiku ya 40 ni vusiku bya 40 entshaveni.+

25 Kutani Yehovha a byela Muxe a ku: 2 “Byela Vaisrayele leswaku va ndzi hlengeletela munyikelo; mi ta amukela munyikelo wa mina eka munhu un’wana ni un’wana loyi a susumetiwaka hi mbilu ya yena.+ 3 Munyikelo lowu mi nga ta wu amukela eka vona hi lowu: nsuku,+ silivhere,+ koporo,+ 4 harhani ya wasi, voya bya phephulu,* lapi ro tshwuka, lapi ra xiyimo xa le henhla, voya bya mbuti, 5 madzovo ya makhuna lama pendiweke ma va yo tshwuka, madzovo ya tintini,* ntsandza wa munga,+ 6 mafurha ya timboni,+ balsama ya mafurha yo kwetsima+ ni ya murhi wo nun’hwela,+ 7 ni maribye ya onikisi ni maribye man’wana lama nga ta vekiwa eka efodi*+ ni le ka xinkwamana xa le xifuveni.+ 8 Va ta ndzi endlela ndhawu yo kwetsima kutani ndzi ta tshama exikarhi ka vona.+ 9 Mi ta endla tabernakela ni swilo hinkwaswo leswi nga eka yona, mi landzela pulani leyi ndzi ku kombaka yona.+

10 “Va ta endla areka* hi ntsandza wa munga, yi leha kwalomu ka 111 wa tisentimitara,* yi anama 67 wa tisentimitara,* yi tlhela yi tlakuka 67 wa tisentimitara.*+ 11 Kutani u ta yi nameka nsuku wo tenga.+ U ta yi nameka endzeni ni le handle naswona u ta yi endlela bandhi ra nsuku ri yi rhendzela.+ 12 U ta yi endlela swingwavila swa mune swa nsuku u swi vekela ehenhla ka milenge ya yona ya mune, swingwavila swimbirhi swi ta va eka tlhelo rin’we kasi swingwavila leswin’wana swimbirhi swi ta va eka tlhelo lerin’wana. 13 U ta endla timhandzi hi ntsandza wa munga kutani u ti nameka nsuku.+ 14 U ta nghenisa timhandzi teto eka swingwavila leswi nga ematlhelo ka Areka leswaku Areka yi rhwariwa hi tona. 15 Timhandzi ti ta tshama eka swingwavila swa Areka; a ti fanelanga ti susiwa eka swona.+ 16 Endzeni ka Areka u ta veka Vumbhoni* lebyi ndzi nga ta ku nyika byona.+

17 “U ta endla xifunengeto* hi nsuku wo tenga, xi leha kwalomu ka 111 wa tisentimitara* xi anama 67 wa tisentimitara.*+ 18 U ta endla makerubu mambirhi hi nsuku; u ta ma endla hi hamula ma va emakumu mambirhi ya xifunengeto.+ 19 Endla makerubu eka makumu hamambirhi, kerubu rin’we ri va etlhelo lerin’wana, kerubu rin’wana ri va eka tlhelo lerin’wana ra xifunengeto. 20 Makerubu ma ta phurumulela timpapa ta wona timbirhi ehenhla, ma funengeta xifunengeto hi timpapa ta wona+ naswona ma ta langutana. Swikandza swa makerubu swi ta languta xifunengeto. 21 U ta veka xifunengeto+ ehenhla ka Areka kutani endzeni ka Areka u veka Vumbhoni lebyi ndzi nga ta ku nyika byona. 22 Ndzi ta tikombisa eka wena kwalaho kutani ndzi vulavula na wena ndzi ri ehenhla ka xifunengeto.+ Ndzi ta ku tivisa hinkwaswo leswi ndzi nga ta ku lerisa swona leswaku u swi byela Vaisrayele ndzi ri exikarhi ka makerubu mambirhi lama nga ehenhla ka areka ya Vumbhoni.

23 “U ta endla ni tafula+ hi ntsandza wa munga, ri leha kwalomu ka 89 wa tisentimitara,* ri anama 44,5 wa tisentimitara* naswona ri tlakuka 67 wa tisentimitara.*+ 24 U ta ri nameka nsuku wo tenga naswona u ta ri endlela bandhi ra nsuku ri ri rhendzela. 25 U ta ri endlela rhimi yi ri rhendzela yi anama kwalomu ka 7,4 wa tisentimitara* ni bandhi ra nsuku leri nga ta rhendzela rhimi. 26 U ta ri endlela swingwavila swa mune hi nsuku kutani u swi veka eka matlhelo ya mune, laha ku nga ni milenge ya mune. 27 Swingwavila swi ta va ekusuhi ni rhimi swi khoma timhandzi to rhwala tafula. 28 U ta endla timhandzi hi ntsandza wa munga kutani u ti nameka nsuku, va ta rhwala tafula hi tona.

29 “U ta tlhela u ri endlela swibya, swinwelo, swilo swo ka ha swona ni minkambana leyi va nga ta chela magandzelo ya swakunwa ha yona. U ta swi endla hi nsuku wo tenga.+ 30 U ta veka xinkwa xo kwetsima etafuleni emahlweni ka mina nkarhi hinkwawo.+

31 “U ta endla xo tlhoma timboni+ hi nsuku wo tenga. Xo tlhoma timboni xi ta endliwa hi hamula. Tshaku ra xona, miri wa xona, marhavi ya xona, switlukana* swa xona, swihluke swa xona ni swiluva swa xona swi ta va nchumu wun’we.+ 32 Xo tlhoma timboni xi ta va ni marhavi ya tsevu, marhavi manharhu ma ta va eka tlhelo rin’we kasi marhavi laman’wana manharhu ma va eka tlhelo lerin’wana. 33 Rhavi ha rin’we eka tlhelo rin’we ri ta va ni switlukana swinharhu leswi fanaka ni swiluva swa almondi naswona exikarhi ka swona ku ta va ni swihluke ni swiluva, swi ta va tano hi marhavi laman’wana eka tlhelo lerin’wana. Leyi hi yona ndlela leyi marhavi ya tsevu lama nga eka miri wa xo tlhoma timboni ma nga ta va ha yona. 34 Eka miri wa xo tlhoma timboni ku ta va ni switlukana swa mune leswi fanaka ni swiluva swa almondi laha exikarhi ka swona ku nga ni xihluke ni xiluva. 35 Ehansi ka ndhawu leyi marhavi mambirhi yo sungula ma hlanganaka eka yona ku ta va ni xihluke naswona ehansi ka ndhawu leyi marhavi mambirhi lama landzelaka ma hlanganaka eka yona ku ta va ni xihluke xin’wana kasi ehansi ka ndhawu leyi marhavi mambirhi lama landzelaka ma hlanganaka eka yona ku ta va ni xihluke. Marhavi ya tsevu lama nga eka miri wa xo tlhoma timboni ma ta va tano. 36 Swihluke ni marhavi swi ta khomana ni xo tlhoma timboni lexi nga ta endliwa hi nsuku wo tenga hi hamula.+ 37 U ta xi endlela timboni ta nkombo, kutani loko timboni ti lumekiwile ti ta voninga endhawini leyi nga emahlweni ka xona.+ 38 Swo khoma ntambhu ya rivoni swa xona ni swo khoma ndzilo swa xona swi fanele swi endliwa hi nsuku wo tenga.+ 39 Xo tlhoma timboni swin’we ni swilo leswin’wana swi fanele swi endliwa hi nsuku wo tenga lowu tikaka 34,2 wa tikhilogiramu.* 40 Tiyiseka leswaku u swi endla hi ku landza pulani leyi u kombiweke yona entshaveni.+

26 “U ta endla tabernakela+ hi malapi ya khume ya xiyimo xa le henhla lama lukiweke, harhani ya wasi, voya bya phephulu* ni lapi ro tshwuka. U ta rhungelela swifaniso+ swa makerubu+ eka wona. 2 Lapi rin’wana ni rin’wana ri ta va ri lehe 12,5 wa timitara* ri anama 1,8 wa timitara.* Malapi hinkwawo ma fanele ma ringana.+ 3 Hlanganisa malapi ya ntlhanu ma va lapi rin’we lerikulu, u endla leswi fanaka hi malapi laman’wana ya ntlhanu. 4 U ta endla swo hulela hi harhani ya wasi laha lapi ha rin’we lerikulu ri helelaka kona leswaku malapi lamambirhi ma ta kota ku hlanganisiwa. 5 U ta endla swo hulela swa 50 eka lapi rin’we ni swo hulela swin’wana swa 50 emakumu ka lapi lerin’wana leswaku ma ta langutana laha ma hlanganaka kona. 6 U ta endla swo haka ha swona swa 50 swa nsuku u hlanganisa malapi ha swona, kutani tabernakela yi ta va nchumu wun’we.+

7 “U ta tlhela u endla malapi yo funengeta tabernakela hi voya bya mbuti.+ U ta endla malapi ya 11.+ 8 Lapi rin’wana ni rin’wana ri ta va ri lehe 13,4 wa timitara* ri anama 1,8 wa timitara. Malapi hinkwawo ya 11 ma fanele ma ringana. 9 U ta hlanganisa malapi ya ntlhanu u tlhela u hlanganisa malapi laman’wana ya tsevu, u ta petsa lapi ra vutsevu emahlweni ka tabernakela. 10 U ta endla swo hulela swa 50 emakumu ka lapi rin’we, leri nga le henhla, ni swo hulela swa 50 emakumu ka lapi lerin’wana laha ma hlanganaka kona. 11 U ta endla swo haka ha swona swa 50 swa koporo kutani u swi haka eka swo hulela ivi u hlanganisa malapi, ma ta va lapi rin’we ehenhla ka tabernakela. 12 Xiphemu lexi saleke xa malapi xi ta tshikiwa xi ncikinya. Hafu ya lapi leri saleke yi ta ncikinya endzhaku ka tabernakela. 13 Xiphemu xa malapi ya tabernakela lexi nga ta sala xi ncikinya lomu matlhelo xi ta va 44,5 wa tisentimitara* matlhelo hinkwawo, leswaku malapi lawa ma yi funengeta.

14 “U ta endla xo funengeta tabernakela hi madzovo ya makhuna lama pendiweke ma va yo tshwuka, ni xo funengeta xa madzovo ya tintini* lexi nga ta funengeta ehenhla.+

15 “U ta endla tifureme+ ta tabernakela hi ntsandza wa munga, ti ta yimisiwa ti ku thwii!+ 16 Fureme ha yin’we yi ta leha 4,5 wa timitara,* yi anama 67 wa tisentimitara.* 17 Fureme ha yin’we yi ni swilo swimbirhi swo hlanganisa ha swona emakumu ka yona. Yoleyo i ndlela leyi u faneleke u endla tifureme hinkwato ta tabernakela ha yona. 18 U ta endla tifureme ta 20 ta tlhelo ra le dzongeni ra tabernakela, ti languta edzongeni.

19 “U ta endla swo tlhoma tifureme swa 40 swa silivhere+ swi va ehansi ka tifureme ta 20. Ehansi ka fureme yin’wana ni yin’wana ku ta va ni swilo swimbirhi leswi nga ta tlhomiwa eka swo tlhoma tifureme swimbirhi swa silivhere. Endla hilaha ku fanaka eka tifureme hinkwato.+ 20 U ta endla tifureme ta 20 ta tlhelo lerin’wana ra tabernakela, tlhelo ra le n’walungwini 21 ni swo tlhoma tifureme swa kona swa 40 swa silivhere, swo tlhoma tifureme swimbirhi ehansi ka fureme yin’we ni swo tlhoma tifureme swimbirhi ehansi ka fureme yin’wana ni yin’wana leyi landzelaka. 22 Eka tlhelo ra le ndzhaku ra tabernakela ku ya evupeladyambu, u ta endla tifureme ta tsevu.+ 23 U ta endla tifureme timbirhi leti nga ta tshega tikhona hatimbirhi endzhaku ka tabernakela. 24 Ti fanele ti famba ti ri timbirhi ku suka ehansi ku ya fika ehenhla, ti ta hlangana eka xingwavila xo sungula. Tifureme letimbirhi ti ta endliwa hi ndlela leyi fanaka. Ti ta va tikhona timbirhi. 25 Ku ta va ni tifureme ta nhungu ni swo tlhoma tifureme swa kona swa 16 swa silivhere, swo tlhoma tifureme swimbirhi ehansi ka fureme yin’we ni swo tlhoma tifureme swimbirhi ehansi ka fureme yin’wana ni yin’wana leyi landzelaka.

26 “U ta endla timhandzi hi ntsandza wa munga, ntlhanu ti ta va ta tifureme ta tlhelo rin’we ra tabernakela+ 27 ni ntlhanu wa timhandzi ta tifureme ta tlhelo lerin’wana ra tabernakela ni ntlhanu wa timhandzi ta tifureme ta tlhelo ra tabernakela ra le vupeladyambu, ta xiphemu xa le ndzhaku. 28 Mhandzi ya le xikarhi leyi fambaka exikarhi ka tifureme yi fanele yi suka emakumu man’wana yi ya emakumu laman’wanyana.

29 “U ta nameka tifureme hi nsuku+ naswona u ta endla swingwavila swa tona swa nsuku swi khoma timhandzi kutani u ta nameka timhandzi hi nsuku. 30 U fanele u endla tabernakela hi ku ya hi pulani ya yona leyi u kombiweke yona entshaveni.+

31 “U ta endla khetheni+ hi harhani ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke. Ri ta rhungeleriwa swifaniso swa makerubu. 32 U ta ri hayeka eka tiphuphu ta mune ta munga leti namekiweke nsuku. Swo hayeka eka swona swi ta endliwa hi nsuku. Tiphuphu ti ta vekiwa ehenhla ka swo tlhoma tiphuphu swa mune swa silivhere. 33 U ta hayeka khetheni eka swo haka ha swona kutani u tisa areka ya Vumbhoni+ kwalaho endzhaku ka khetheni. Khetheni ri ta mi hambanisela Kamara Ro Kwetsima+ eka Kamara Ro Kwetsima Ngopfu.+ 34 U fanele u veka xifunengeto ehenhla ka areka ya Vumbhoni eKamareni Ro Kwetsima Ngopfu.

35 “U ta veka tafula emahlweni ka khetheni,* xo tlhoma timboni+ xi ta langutana ni tafula etlhelweni ra le dzongeni ra tabernakela; kutani tafula u ta ri veka etlhelweni ra le n’walungwini. 36 U ta endla khetheni ro pfala ndhawu yo nghena ha yona etabernakeleni hi harhani ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke ma rhungeleriwe swin’we.+ 37 U ta endla tiphuphu ta ntlhanu hi munga ti va ta khetheni ro pfala kutani u ti nameka nsuku. Swo hayeka eka swona swi ta endliwa hi nsuku naswona u ta endlela tiphuphu swo tlhoma tiphuphu swa ntlhanu swa koporo.

27 “U ta endla altari hi ntsandza wa munga;+ yi ta leha 2,2 wa timitara* yi anama 2,2 wa timitara. Altari yi fanele yi va ni matlhelo ya mune yo ringana, yi leha 1,3 wa timitara.*+ 2 U ta endla timhondzo+ ehenhla ka tikhona ta yona ta mune; timhondzo ti ta va xiphemu xa yona naswona u ta nameka altari hi koporo.+ 3 U ta endla mabakiti yo chela nkuma* wa yona ni mafoxolo, minkambana, tiforoko ni swo khoma ndzilo naswona u ta endla swibya swa yona hinkwaswo hi koporo.+ 4 U ta endlela altari sefo ya koporo, naswona eka sefo leyi u ta endla swingwavila swa mune swa koporo eka tikhona ta yona ta mune. 5 U ta nghenisa sefo ehansi ka bandhi ra altari naswona yi ta va exikarhi ka altari. 6 U ta endlela altari timhandzi hi ntsandza wa munga u ti nameka koporo. 7 Timhandzi ti ta hoxiwa eka swingwavila leswaku ti va eka matlhelo mambirhi ya altari loko yi rhwariwa.+ 8 U ta endla altari hi mapulanga yi va bokisi leri pfulekeke. Yi fanele yi endliwa hilaha ndzi ku kombeke hakona entshaveni.+

9 “U ta endla xivava*+ xa tabernakela. Eka tlhelo ra le dzongeni, leri languteke edzongeni, xivava xi ta biyeriwa hi malapi lama lukiweke ya xiyimo xa le henhla, lama leheke 44,5 wa timitara* eka tlhelo rin’we.+ 10 Xi ta va ni tiphuphu ta 20 ni swo tlhoma tiphuphu swa 20 swa koporo. Swo hayeka eka swona swa tiphuphu ni swingwavila swa tona i swa silivhere. 11 Malapi lama vambiweke etlhelo ra le n’walungwini na wona ma ta leha 44,5 wa timitara ni tiphuphu ta wona ta 20 ni swo tlhoma tiphuphu swa tona swa koporo swa 20 ni swo hayeka eka swona swa silivhere ni swingwavila swa tiphuphu swa silivhere. 12 Ku fanele ku vambiwa malapi etlhelo ra le vupeladyambu bya xivava lama anameke 22 wa timitara,* u ta tlhela u endla tiphuphu ta khume ni swo tlhoma tiphuphu swa khume. 13 Ku anama ka xivava hi le tlhelo ra le vuxeni ku ya evuhumadyambu i 22 wa timitara. 14 Ku ta vambiwa malapi lama leheke 6,7 wa timitara* eka tiphuphu tinharhu ni swo tlhoma tiphuphu swinharhu eka tlhelo rin’we.+ 15 Eka tlhelo lerin’wana ku ta vambiwa malapi lama leheke 6,7 wa timitara eka tiphuphu tinharhu ni swo tlhoma tiphuphu swinharhu.

16 “Enyangweni wa xivava ku fanele ku va ni khetheni ro pfala leri leheke 8,9 wa timitara* leri endliweke hi harhani ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke,+ ku katsa ni tiphuphu ta mune ni swo tlhoma tiphuphu swa kona swa mune.+ 17 Tiphuphu hinkwato leti rhendzelaka xivava ti ta va ni swingwavila swa silivhere ni swo hayeka eka swona swa silivhere, kambe swo tlhoma tiphuphu swa kona swi ta va swa koporo.+ 18 Ku leha ka xivava i 44,5 wa timitara,+ xi anama 22 wa timitara, xi fanele xi vambiwa hi lapi ra xiyimo xa le henhla leri tlakukeke 2,2 wa timitara, xi fanele xi va ni swo tlhoma tiphuphu swa koporo. 19 Swibya ni swilo hinkwaswo leswi nga ta tirhisiwa etabernakeleni ni timhingu ta yona ku katsa ni timhingu ta xivava swi ta va swa koporo.+

20 “U ta lerisa Vaisrayele leswaku va ku tisela mafurha ya mutlhwari lama tengeke yo voninga ha wona, leswaku timboni ti tshama ti ri karhi ti pfurha.+ 21 Etendeni ra nhlengeletano, ehandle ka khetheni* leri nga ekusuhi ni areka ya Vumbhoni,+ Aroni ni vana vakwe va ta tiyiseka leswaku timboni ti tshama ti lumekiwile ku sukela nimadyambu ku fikela nimixo emahlweni ka Yehovha.+ Lowu i nawu wa hilaha ku nga heriki lowu Vaisrayele ni vatukulu va vona hinkwavo va faneleke va wu yingisa.+

28 “U ta vitana Aroni makwenu exikarhi ka Vaisrayele ni vana vakwe leswaku a ta va muprista wa mina,+ Aroni+ swin’we na Nadabu, Abihu,+ Eliyazara na Ithamara+ vana va Aroni.+ 2 U ta endlela Aroni makwenu swiambalo swo kwetsima swi tlhela swi saseka leswaku a xiximeka.+ 3 U ta vulavula ni vanhu hinkwavo lava nga ni vuswikoti,* lava ndzi va nyikeke vutlhari,*+ kutani va ta endlela Aroni swiambalo leswi kombisaka leswaku u hlawuriwile leswaku a va muprista wa mina.

4 “Swiambalo leswi va nga ta swi endla hi leswi: xinkwamana xa le xifuveni,+ efodi,*+ xiambalo xo pfumala mavoko,+ xiambalo xo leha xa swibokisana, duku+ ni bandhi;+ va ta endlela Aroni makwenu ni vana vakwe swiambalo leswi swo kwetsima, leswaku a va muprista wa mina. 5 Vatirhi lava nga ni vuswikoti va ta tirhisa nsuku, harhani ya wasi, voya bya phephulu,* lapi ro tshwuka ni lapi ra xiyimo xa le henhla.

6 “Va ta rhunga efodi hi harhani ya nsuku ni ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke.+ 7 Yi ta va ni swiphemu swimbirhi swa le makatleni leswi hlanganisiweke eka swiphemu swa yona swimbirhi swa le henhla. 8 Bandhi leri nga eka efodi+ leri nga ta yi tsimba yi tiya, ri fanele ri endliwa hi swilo leswi efodi yi endliweke hi swona: harhani ya nsuku ni ya wasi, voya bya phephulu,* lapi ro tshwuka ni lapi leri lukiweke ra xiyimo xa le henhla.

9 “U ta teka maribye mambirhi ya onikisi+ u kovotla mavito ya vana va Israyele ehenhla ka wona,+ 10 mavito ya tsevu ehenhla ka ribye rin’we ni mavito ya tsevu lama saleke ehenhla ka ribye lerin’wana, hi ku ya hi ku tlhandlamana ka vona. 11 Munhu loyi a tirhaka ku kovotla maribye u ta kovotla mavito ya vana va Israyele eka maribye lawa mambirhi hilaha mfungho a nga wu kovotlaka hakona.+ Kutani u ta chela nsuku etlhelo ka maribye leswaku wu ma khoma. 12 U ta veka maribye mambirhi ehenhla ka swiphemu swa efodi swa le makatleni, swi va maribye ya xitsundzuxo eka vana va Israyele,+ kutani Aroni u fanele a rhwala mavito ya vona ehenhla ka swiphemu swakwe swimbirhi swa le makatleni swi va xitsundzuxo loko a ya eka Yehovha. 13 U ta endla swilo swo ma khoma swa nsuku 14 ni tinketana timbirhi ta nsuku wo tenga leti lukiweke ku fana ni ntambhu,+ u fanele u ti khomisa eka swilo swo khoma maribye swa nsuku.+

15 “U ta kuma munhu loyi a nga ni vuswikoti byo rhunga, u ta endla xinkwamana xa le xifuveni xa vuavanyisi.+ Xi fanele xi endliwa ku fana ni efodi hi harhani ya nsuku ni ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke.+ 16 Matlhelo ya xona ya mune ma fanele ma ringana loko xi petsiwe hi le xikarhi, xi leha ku ringana ni ku anama ka xandla* naswona xi anama ku ringana ni ku anama ka xandla. 17 U fanele u veka maribye eka xona, ma ta va tilayini ta mune. Layini yo sungula ku va rhubi, topazi ni emeralda. 18 Layini ya vumbirhi ku va tukoyisi, safiri ni yaspere. 19 Layini ya vunharhu ku va ribye ra lexemu,* agata ni ametisita. 20 Layini ya vumune ku va krisolita, onikisi ni jeyida. Ma fanele ma vekiwa eka swilo swo khoma maribye swa nsuku. 21 Maribye ma ta fambisana ni mavito ya vana va Israyele va 12. Ribye ha rin’we ri fanele ri kovotliwa ku fana ni mfungho, vito ha rin’we ri yimela nyimba ha yin’we eka leta 12.

22 “U ta endla tinketana leti lukiweke eka xinkwamana xa le xifuveni ku fana ni tintambhu ta nsuku wo tenga.+ 23 U ta endla swingwavila swimbirhi swa nsuku swa xinkwamana xa le xifuveni kutani u swi veka ehenhla ka makumu mambirhi ya xinkwamana xa le xifuveni. 24 U ta nghenisa tintambhu timbirhi ta nsuku eka swingwavila swimbirhi leswi nga emakumu ka xinkwamana xa le xifuveni. 25 U ta nghenisa makumu mambirhi ya tintambhu timbirhi eka swilo swimbirhi swo khoma maribye naswona u fanele u swi veka emakatleni ya swiphemu swimbirhi swa efodi, emahlweni ka yona. 26 U ta endla swingwavila swimbirhi swa nsuku u swi veka emakumu mambirhi ya le hansi lama langutaneke ni efodi endzeni ka xinkwamana xa le xifuveni.+ 27 U fanele u endla swingwavila swin’wana swimbirhi swa nsuku hi le mahlweni ka efodi, ehansi ka swiphemu swimbirhi swa makatla ekusuhi ni laha yi hlanganisiweke kona, ehenhla ka bandhi ra efodi.+ 28 Xinkwamana xa le xifuveni xi fanele xi bohiwa hi ntambhu ya wasi, ku bohiwa swingwavila swa xona eka swingwavila swa efodi. Leswi swi ta endla leswaku xinkwamana xa le xifuveni xi tshama xi ri eka efodi ehenhla ka bandhi.

29 “Aroni u fanele a rhwala mavito ya vana va Israyele exinkwamaneni xa le xifuveni xa vuavanyisi ehenhla ka mbilu yakwe loko a nghena eKamareni Ro Kwetsima leswaku xi va xitsundzuxo emahlweni ka Yehovha nkarhi hinkwawo. 30 U ta veka Urimi na Thumimi*+ exinkwamaneni xa le xifuveni xa vuavanyisi, swi ta va ehenhla ka mbilu ya Aroni loko a ya eka Yehovha, kutani Aroni u fanele a rhwala swilo swo avanyisa Vaisrayele exifuveni xakwe emahlweni ka Yehovha nkarhi hinkwawo.

31 “U ta endla xiambalo xo pfumala mavoko lexi ambariwaka ehansi ka efodi hi harhani ya wasi.+ 32 Ku ta va ni mbhovo ehenhla ka xona* hi le xikarhi ka xona. Mbhovo wa xona wu fanele wu rhungiwa hi muluki wa malapi. Wu fanele wu fana ni mbhovo wa xiambalo lexi endliweke hi swinsimbhana, leswaku xi nga handzuki. 33 U fanele u endla magrenada hi harhani ya wasi, voya bya phephulu* ni lapi ro tshwuka ehansi, emakumu ka xiambalo lexi ni swingelengele swa nsuku exikarhi ka wona. 34 U fanele u vekela xingelengele xa nsuku xi landzeriwa hi grenada, u endlisa sweswo emakumu hinkwawo ya xiambalo xo pfumala mavoko. 35 Xi fanele xi ambariwa hi Aroni loko a ri karhi a tirha naswona mpfumawulo wa xona wu fanele wu twala loko a ya endhawini yo kwetsima emahlweni ka Yehovha niloko a huma, leswaku a nga fi.+

36 “U ta endla xiphepherhele xo hatima xa nsuku wo tenga kutani eka xona u kovotla mfungho lowu nge: ‘Yehovha wa Kwetsima.’+ 37 U fanele u xi bohelela hi ntambhu ya wasi edukwini;+ xi fanele xi tshama emahlweni ka duku. 38 Xi ta va emombyeni wa Aroni naswona Aroni u ta tihlamulela loko vanhu va khoma swilo swo kwetsima hi ndlela leyi nga fanelangiki,+ leswi Vaisrayele va swi hlawulekiseke loko va swi nyikela swi va tinyiko to kwetsima. Xi fanele xi tshama xi ri emombyeni wakwe leswaku Yehovha a ta va amukela.

39 “U ta endla xiambalo xo leha xa swibokisana, u endla duku hi lapi ra xiyimo xa le henhla ni bandhi.+

40 “U ta tlhela u endlela vana va Aroni swiambalo swo leha, mabandhi ni maduku,+ swi saseka leswaku va xiximeka.+ 41 U ta swi ambexa Aroni makwenu ni vana vakwe, u ta va chela mafurha etinhlokweni+ u va veka ku va vaprista+ ivi u va hlawulekisa, kutani va ta va vaprista va mina. 42 Nakambe u ta va endlela swiburukwana swo pfala miri ha swona hi lapi.+ Swi ta sukela emasengeni swi ya fika emindzhumbini. 43 Swi fanele swi ambariwa hi Aroni ni vana vakwe loko va ya etendeni ra nhlengeletano kumbe loko va ya ealtarini va ya tirha endhawini yo kwetsima leswaku va nga endli xidyoho, kutani va fa. I nawu wa hilaha ku nga heriki eka yena ni vatukulu* vakwe.

29 “U ta endla leswi leswaku u va hlawulekisa va va vaprista va mina: Teka nkuzi leyitsongo, makhuna mambirhi lama hanyeke kahle,+ 2 swinkwa leswi nga riki na comela, swinkwa leswi nga riki na comela leswi endliweke ku fana ni swingwavila swi hlanganisiwe ni mafurha ni swinkwa leswi nga riki na comela swo oma leswi totiweke mafurha.+ U ta swi endla hi mapa lama silekeke kahle, 3 u ta swi hoxa ebasikitini+ u swi nyikela swi ri eka xona swin’we ni nkuzi ni makhuna mambirhi.

4 “U ta tisa Aroni ni vana vakwe enyangweni ya tende ra nhlengeletano+ kutani u va hlambisa hi mati.+ 5 U teka swiambalo+ u ambexa Aroni xiambalo xo leha, xiambalo xo pfumala mavoko lexi ambariwaka ehansi ka efodi, efodi* ni xinkwamana xa le xifuveni naswona u ta n’wi tsimba bandhi ra efodi ri tiya emasengeni yakwe.+ 6 U ta n’wi ambexa duku kutani u veka mfungho wo kwetsima wa ku tinyiketela* edukwini;+ 7 u teka mafurha yo kwetsima*+ u ma chela enhlokweni yakwe u n’wi hlawula.+

8 “Endzhaku ka sweswo tisa vana vakwe u va ambexa swiambalo swo leha+ 9 u boha Aroni swin’we ni vana vakwe mabandhi naswona u va tsondzela maduku; vona ni vatukulu va vona va ta va vaprista, lowu i nawu wa hilaha ku nga heriki.+ Leyi i ndlela leyi u faneleke u veka Aroni swin’we ni vana vakwe ha yona leswaku va va vaprista.+

10 “U ta tisa nkuzi emahlweni ka tende ra nhlengeletano kutani Aroni ni vana vakwe va ta tlhandleka mavoko ehenhla ka nhloko ya nkuzi.+ 11 Tlhava nkuzi emahlweni ka Yehovha, enyangweni ya tende ra nhlengeletano.+ 12 Teka ngati yin’wana ya nkuzi u yi tota hi ritiho ehenhla ka timhondzo ta altari,+ kutani ngati leyin’wana hinkwayo u yi chululela etshakwini ra altari.+ 13 Kutani teka mafurha hinkwawo+ lama funengeteke marhumbu ni xivindzi ni tinso timbirhi ku katsa ni mafurha lama nga eka tona, u swi hisa leswaku musi wa swona wu ta tuvika ehenhla ka altari.+ 14 Kambe nyama ya nkuzi, dzovo ra yona ni vulongo bya yona u ta swi hisa hi ndzilo ehandle ka nxaxa. I gandzelo ra xidyoho.

15 “Teka khuna kutani Aroni ni vana vakwe va ta tlhandleka mavoko enhlokweni ya rona.+ 16 Tlhava khuna kutani u teka ngati ya rona u yi n’wan’wasela ematlhelo hinkwawo ya altari.+ 17 Tsemelela khuna kutani u hlantswa marhumbu ya rona+ ni manqina ya rona, u veka nyama yoleyo swin’we ni nhloko ya rona. 18 U fanele u hisa khuna hinkwaro leswaku musi wa rona wu tuvika ealtarini. I gandzelo ro hisiwa ra Yehovha, nun’hwelo lowu tsakisaka.+ I gandzelo leri endleriweke Yehovha hi ndzilo.

19 “Endzhaku ka sweswo u ta teka khuna lerin’wana, kutani Aroni ni vana vakwe va ta tlhandleka mavoko enhlokweni ya rona.+ 20 Tlhava khuna kutani u teka ngati yin’wana ya rona u yi tota emakumu ka ndleve ya xinene ya Aroni ni le makumu ka tindleve ta xinene ta vana vakwe ni le khudzwini ra voko ra vona ra xinene ni le khudzwini ra nenge wa vona wa xinene, u n’wan’wasela ngati ematlhelo hinkwawo ya altari. 21 Kutani teka ngati yin’wana leyi nga ehenhla ka altari ni mafurha man’wana yo kwetsima+ u swi n’wan’wasela Aroni ni le ka swiambalo swakwe ni le ka vana vakwe ni le ka swiambalo swa vana vakwe, leswaku yena ni vana vakwe va ta va vo kwetsima ni swiambalo swakwe ni swa vana vakwe swi va swo kwetsima.+

22 “Kutani eka khuna teka mafurha, ncila wo nona, mafurha lama funengetaka marhumbu ni xivindzi, tinso timbirhi ni mafurha lama nga eka tona+ ni nenge wa xinene, hikuva i khuna leri nyikeriweke loko ku vekiwa vaprista.+ 23 Teka ni xinkwa xa xirhendzevutana ni xinkwa lexi hlanganisiweke ni mafurha lexi endliweke ku fana ni swingwavila ni xinkwa xo oma ebasikitini ya swinkwa leswi nga riki na comela leyi nga emahlweni ka Yehovha. 24 U fanele u swi veka emavokweni ya Aroni ni le mavokweni ya vana vakwe, kutani u ta swi ndziwita swi va gandzelo leri ndziwitiwaka emahlweni ka Yehovha. 25 Kutani u ta swi teka emavokweni ya vona u swi hisa ealtarini ehenhla ka gandzelo ro hisiwa swi va nun’hwelo lowu tsakisaka eka Yehovha. I gandzelo leri endleriweke Yehovha hi ndzilo.

26 “Kutani teka xifuva xa khuna leri nyikeriweke+ loko Aroni a vekiwa ku va muprista, u ri ndziwita ri va gandzelo leri ndziwitiwaka eka Yehovha, kutani ri ta va xiphemu xa wena. 27 U ta hlawulekisa xifuva xa gandzelo leri ndziwitiwaka ni nenge wa xiphemu xo kwetsima lexi ndziwitiweke ni lexi tekiweke eka khuna leri nyikeriweke+ loko Aroni ni vana vakwe va vekiwa ku va vaprista. 28 Swi ta va swa Aroni ni vana vakwe hi ku ya hi xileriso xa hilaha ku nga heriki lexi Vaisrayele va faneleke va xi yingisa, hikuva i xiphemu xo kwetsima naswona xi ta va xiphemu xo kwetsima lexi Vaisrayele va faneleke va xi nyikela.+ I xiphemu xa vona xo kwetsima lexi va xi nyikelaka eka Yehovha lexi humaka eka magandzelo ya vona yo kombela ku rhula.+

29 “Swiambalo swo kwetsima+ swa Aroni swi ta tirhisiwa hi vana vakwe+ endzhaku ka yena loko va hlawuriwa ni ku vekiwa ku va vaprista. 30 Muprista loyi a nga ta n’wi tlhandlama exikarhi ka vana vakwe ni loyi a nghenaka etendeni ra nhlengeletano leswaku a ta tirha endhawini yo kwetsima, u ta swi ambala masiku ya nkombo.+

31 “U ta teka khuna leri nyikeriweke loko ku vekiwa vaprista kutani u sweka nyama ya rona endhawini yo kwetsima.+ 32 Aroni ni vana vakwe va ta dya+ nyama ya khuna ni xinkwa lexi nga ebasikitini enyangweni ya tende ra nhlengeletano. 33 Va ta dya swilo leswi nyikeriweke swi va gandzelo ro kombela ku rivaleriwa loko va vekiwa ku va vaprista ni ku hlawulekisiwa. Kambe munhu loyi a nga riki muprista* a nga fanelanga a swi dya hikuva swa kwetsima.+ 34 Loko nyama ya khuna leri ku endliweke gandzelo ha rona ni xinkwa swo sala ku fikela nimixo, u ta swi hisa hi ndzilo.+ A swi fanelanga swi dyiwa hikuva swa kwetsima.

35 “U ta endla hi ndlela yoleyo eka Aroni ni vana vakwe hi ku ya hi leswi ndzi ku leriseke swona hinkwaswo. U ta heta masiku ya nkombo u ri karhi u va veka ku va vaprista.+ 36 Siku ni siku u ta nyikela nkuzi ya gandzelo ra xidyoho ra ku kombela ku rivaleriwa naswona u ta basisa altari exidyohweni hi ku yi kombelela ku rivaleriwa, kutani u fanele u yi chela hi mafurha leswaku u yi kwetsimisa.+ 37 U ta heta masiku ya nkombo u ri karhi u kombelela altari ku rivaleriwa naswona u fanele u yi hlawulekisa leswaku yi va altari yo kwetsima ngopfu.+ Un’wana ni un’wana loyi a tirhaka ealtarini u fanele a kwetsima.

38 “U ta nyikela hi leswi ealtarini: makhuna mambirhi lama nga ni lembe rin’we hi siku, nkarhi hinkwawo.+ 39 Nyikela khuna rin’we leritsongo nimixo u tlhela u nyikela khuna rin’wana leritsongo nimadyambu.+ 40 Mapa lama silekeke kahle lama ringanaka ni omere* yin’we ma hlanganisiwe ni kotara ya hini* ya mafurha ya mutlhwari lama tengeke ni vhinyo leyi ringanaka ni kotara ya hini ya gandzelo ra swakunwa, swi ta nyikeriwa ni khuna leritsongo ro sungula. 41 U ta nyikela khuna leritsongo ra vumbirhi nimadyambu swin’we ni gandzelo ra mavele ni ra swakunwa ku fana ni leri u nyikeleke hi rona nimixo. U ta ri nyikela ri va nun’hwelo lowu tsakisaka, gandzelo leri endleriweke Yehovha hi ndzilo. 42 Ri ta va gandzelo ro hisiwa ra nkarhi hinkwawo eka vatukulu va n’wina, enyangweni ya tende ra nhlengeletano emahlweni ka Yehovha, laha ndzi nga ta humelela eka n’wina leswaku ndzi vulavula na wena kona.+

43 “Ndzi ta humelela kwalaho eka Vaisrayele naswona ndhawu yoleyo yi ta hlawulekisiwa hi ku vangama ka mina.+ 44 Ndzi ta hlawulekisa tende ra nhlengeletano ni altari naswona ndzi ta hlawulekisa Aroni ni vana vakwe+ leswaku va va vaprista va mina. 45 Ndzi ta tshama exikarhi ka Vaisrayele naswona ndzi ta va Xikwembu xa vona.+ 46 Kutani va ta swi tiva leswaku hi mina Yehovha Xikwembu xa vona, loyi a va humeseke etikweni ra Egipta, leswaku ndzi ta tshama exikarhi ka vona.+ Hi mina Yehovha Xikwembu xa vona.

30 “U ta endla altari yi va ndhawu yo hisela murhi wo nun’hwela;+ u ta yi endla hi ntsandza wa munga.+ 2 Yi fanele yi ringana matlhelo hinkwawo, yi leha kwalomu ka 45 wa tisentimitara,* yi anama 44,5 wa tisentimitara naswona yi tlakuka 89 wa tisentimitara.* Timhondzo ta yona ti ta khomana na yona.+ 3 U ta yi nameka nsuku wo tenga: ehenhla ka yona, ematlhelo ka yona ni le timhondzweni ta yona; naswona u ta yi endlela bandhi ra nsuku ri yi rhendzela. 4 U ta tlhela u yi endlela swingwavila swimbirhi swa nsuku ehansi ka bandhi ra yona ematlhelo hamambirhi ya yona, timhandzi to yi rhwala ti ta hoxiwa eka swona. 5 Endla timhandzi hi ntsandza wa munga kutani u ti nameka nsuku. 6 U ta yi veka emahlweni ka khetheni leri nga ekusuhi ni areka ya Vumbhoni,+ emahlweni ka xifunengeto lexi nga ehenhla ka Vumbhoni, laha ndzi nga ta tikombisa kona eka wena.+

7 “Aroni+ u ta hisa murhi wo nun’hwela+ eka yona,+ a wu tuvikisa ealtarini loko a khathalela timboni+ mixo wun’wana ni wun’wana. 8 Nakambe, loko Aroni a lumeka timboni nimadyambu, u ta hisa murhi wo nun’hwela. Vatukulu va n’wina va ta hisa murhi wo nun’hwela nkarhi ni nkarhi emahlweni ka Yehovha. 9 Mi nga tshuki mi nyikela eka yona murhi wo nun’hwela lowu ndzi nga mi lerisangiki+ kumbe gandzelo ro hisiwa kumbe gandzelo ra mavele naswona mi nga tshuki mi chela gandzelo ra swakunwa ehenhla ka yona. 10 Aroni u fanele a kombela ku rivaleriwa ehenhla ka timhondzo ta yona kan’we hi lembe.+ U ta yi kombelela ku rivaleriwa kan’we hi lembe eka vatukulu va n’wina hinkwavo hi ku tota ngati yin’wana ya xifuwo xa gandzelo ra xidyoho ra ku kombela ku rivaleriwa.+ Ya kwetsima swinene eka Yehovha.”

11 Kutani Yehovha a vulavula na Muxe a ku: 12 “Loko u hlaya Vaisrayele leswaku u kuma nhlayo ya vona,+ un’wana ni un’wana wa vona u fanele a nyikela leswaku a ponisa vutomi byakwe eka Yehovha loko va hlayiwa. Sweswo swi ta endla leswaku va nga weriwi hi khombo loko va tsarisiwa. 13 Hinkwavo lava tsarisiweke va ta nyikela hi leswi: hafu ya xikele* hi ku ya hi xikele ya ndhawu yo kwetsima.*+ Tigera* ta 20 ti ringana ni xikele. Munyikelo wa Yehovha i hafu ya xikele.+ 14 Un’wana ni un’wana loyi a tsariseke loyi a nga ni malembe ya 20 ni ku tlula u ta humesa munyikelo wa Yehovha.+ 15 Loyi a fuweke a nga fanelanga a humesa swo tala ni xisiwana a xi fanelanga xi humesa munyikelo wa Yehovha lowu nga ehansi ka tigiramu ta tsevu ta silivhere* leswaku mi ponisa vutomi bya n’wina. 16 U ta teka mali ya silivhere ya ku ponisa vutomi eka Vaisrayele kutani u yi nyikela hikwalaho ka ntirho wa tende ra nhlengeletano, leswaku yi va xitsundzuxo emahlweni ka Yehovha eka Vaisrayele, leswaku yi ponisa vutomi bya n’wina.”

17 Yehovha a ya emahlweni a vulavula na Muxe a ku: 18 “Endla xihlambelo xa koporo ni lexi nga ta tshama ehenhla ka xona;+ kutani u xi veka exikarhi ka tende ra nhlengeletano ni altari, ivi u chela mati eka xona.+ 19 Aroni ni vana vakwe va ta hlamba mavoko ni milenge eka xona.+ 20 Loko va nghena etendeni ra nhlengeletano kumbe loko va ya ealtarini leswaku va ya tirha ni ku endlela Yehovha magandzelo leswaku musi wa wona wu tlhandluka, va ta hlamba hi mati leswaku va nga fi. 21 Va fanele va hlamba mavoko ni milenge leswaku va nga fi, kutani wu ta va nawu wa hilaha ku nga heriki eka vona, eka yena ni le ka vana vakwe ni le ka vatukulu va vona hinkwavo.”+

22 Yehovha a ya emahlweni a vulavula na Muxe a ku: 23 “Teka swinun’hweriso swo hlawuleka: mimpimo ya 500 ya mira leyi tiyeke ni hafu ya mimpimo yoleyo, mimpimo ya 250 ya sinamoni yo nun’hwela, mimpimo ya 250 ya khalamasi yo nun’hwela 24 ni mimpimo ya 500 ya khasiya leyi pimiweke hi ku ya hi mpimo wa ndhawu yo kwetsima,*+ swin’we ni tilitara tinharhu ni hafu* ta mafurha ya mutlhwari. 25 Kutani u ta endla mafurha yo kwetsima hi swona; swi fanele swi pfanganisiwa kahle.*+ Ma ta va mafurha yo kwetsima.

26 “U ta tota tende ra nhlengeletano+ ni areka ya Vumbhoni ha wona 27 ni tafula ni swibya swa rona hinkwaswo, xo tlhoma timboni ni switirhisiwa swa xona, altari ya murhi wo nun’hwela, 28 altari ya gandzelo ro hisiwa ni swibya swa yona hinkwaswo, xihlambelo ni xilo lexi xi tshameke ehenhla ka xona. 29 U fanele u swi hlawulekisa leswaku swi va swo kwetsima ngopfu.+ Un’wana ni un’wana loyi a swi khumbaka u fanele a kwetsima.+ 30 Kutani u ta hlawula Aroni+ ni vana vakwe,+ u va hlawulekisa leswaku va va vaprista va mina.+

31 “U ta byela Vaisrayele u ku, ‘Lawa ma ta tshama ma ri mafurha yo kwetsima eka mina ni le ka n’wina swin’we ni vatukulu va n’wina.+ 32 A ma fanelanga ma toriwa hi vanhu naswona a mi fanelanga mi endla yo fana na wona. Ma kwetsima. Ma ta tshama ma ri nchumu wo kwetsima eka n’wina. 33 Un’wana ni un’wana loyi a endlaka mafurha yo fana na wona ni loyi a totaka munhu loyi a nga riki muprista* hi wona u fanele a dlayiwa eka varikwavo.’”+

34 Kutani Yehovha a byela Muxe a ku: “Teka mimpimo leyi ringanaka ya swinun’hweriso leswi:+ mathonsi ya sitakita, onika, xinun’hweriso xa galibanumi ni murhi wa risuna lowu tengeke. 35 Endla murhi wo nun’hwela hi swona;+ swi fanele swi pfanganisiwa kahle,* swi lungiwa hi munyu,+ swi va swo tenga naswona swi va nchumu wo kwetsima. 36 Swin’wana swa swona u ta swi kandza swi va mapa lama silekeke kahle, kutani u veka swin’wana swa swona emahlweni ka areka ya Vumbhoni leyi nga etendeni ra nhlengeletano, laha ndzi nga ta tikombisa kona eka wena. Swi fanele swi va swo kwetsima ngopfu eka n’wina. 37 Murhi wo nun’hwela lowu mi nga ta wu endla hi swilo leswi a mi fanelanga mi wu endlela ku wu tirhisa.+ Mi ta wu teka wu ri nchumu wo kwetsima wa Yehovha. 38 Loyi a nga ta endla lowu fanaka na wona leswaku a tiphina hi nun’hwelo wa wona u fanele a dlayiwa eka varikwavo.”

31 Yehovha a ya emahlweni a vulavula na Muxe a ku: 2 “Waswivo, ndzi hlawule Bezalele+ n’wana wa Uri, n’wana wa Huru wa nyimba ya Yuda.+ 3 Ndzi ta n’wi nyika matimba hi ku tirhisa moya wa mina, ndzi n’wi nyika vutlhari, ku twisisa ni vutivi bya ntirho wun’wana ni wun’wana wa mavoko, 4 leswaku a sasekisa swilo, a tirha hi nsuku, silivhere ni koporo, 5 a tsema maribye ni ku endla swilo swo ma khoma+ ni ku endla swilo swo hambanahambana hi ntsandza.+ 6 Ku tlula kwalaho, ndzi hlawule Oholiyabu+ n’wana wa Ahisamaki wa nyimba ya Dani leswaku a n’wi pfuna naswona ndzi nghenisa vutlhari etimbilwini ta hinkwavo lava nga ni vuswikoti,* leswaku va endla hinkwaswo leswi ndzi ku leriseke swona:+ 7 tende ra nhlengeletano,+ areka ya Vumbhoni+ ni xifunengeto+ lexi nga ehenhla ka yona, swilo hinkwaswo leswi tirhisiwaka etendeni, 8 tafula+ ni swibya swa rona, xo tlhoma timboni xa nsuku wo tenga ni switirhisiwa swa xona hinkwaswo,+ altari ya murhi wo nun’hwela,+ 9 altari ya gandzelo ro hisiwa+ ni swibya swa yona hinkwaswo, xihlambelo ni xilo lexi xi tshameke ehenhla ka xona,+ 10 swiambalo leswi lukiweke kahle, swiambalo swo kwetsima swa muprista Aroni, swiambalo swa vana vakwe lava nga ta va vaprista,+ 11 mafurha yo kwetsima, murhi wo nun’hwela wa ndhawu yo kwetsima.+ Va ta endla hinkwaswo leswi ndzi ku leriseke swona.”

12 Yehovha a ya emahlweni a byela Muxe a ku: 13 “Vulavula ni Vaisrayele u va byela u ku, ‘Ngopfungopfu mi fanele mi hlayisa tisavata ta mina,+ hikuva i xikombiso exikarhi ka mina na n’wina ni le ka vanhu va n’wina hinkwavo ni lava nga ta landzela, mi ta swi tiva leswaku mina Yehovha ndza mi kwetsimisa. 14 Mi fanele mi xixima Savata, hikuva i nchumu wo kwetsima eka n’wina.+ Loyi a nga ta tlula nawu wa savata u ta dlayiwa. Loko munhu o tirha hi savata, u fanele a dlayiwa exikarhi ka vanhu va ka vona.+ 15 Ntirho wu nga endliwa hi masiku ya tsevu, kambe hi siku ra vunkombo i savata, ku nga siku ro hlawuleka ro wisa.+ I nchumu wo kwetsima eka Yehovha. Loyi a tirhaka hi siku ra Savata u fanele a dlayiwa. 16 Vaisrayele va fanele va hlayisa Savata; vona swin’we ni vatukulu va vona hinkwavo va fanele va xixima Savata. I ntwanano wa hilaha ku nga heriki. 17 I xikombiso xa hilaha ku nga heriki exikarhi ka mina ni Vaisrayele,+ hikuva Yehovha u endle matilo ni misava hi masiku ya tsevu, kambe hi siku ra vunkombo u tshike ku tirha a wisa.’”+

18 Loko a heta ku vulavula na Muxe eNtshaveni ya Sinayi, u n’wi nyike maribye mambirhi ya swiphepherhele swa Vumbhoni,+ maribye ya swiphepherhele lama tsariweke hi ritiho ra Xikwembu.+

32 Vanhu va vona leswaku Muxe wa hlwela ku rhelela entshaveni.+ Hiloko va hlengeletana eka Aroni va ku: “Hi endlele xikwembu lexi nga ta hi rhangela,+ hikuva a hi swi tivi leswaku ku humelele yini hi Muxe wa kona, wanuna loyi a hi rhangeleke hi huma etikweni ra Egipta.” 2 Hiloko Aroni a ku eka vona: “Susani swingwavila swa nsuku+ leswi nga etindleveni ta vasati va n’wina, vana va n’wina va majaha ni va vanhwanyana, mi swi tisa eka mina.” 3 Kutani vanhu hinkwavo va sungula ku susa swingwavila swa nsuku leswi a swi ri etindleveni ta vona va swi yisa eka Aroni. 4 Hiloko a teka nsuku eka vona, a tirhisa xo kovotla hi xona a endla xifaniso xa rhole.+ Va sungula ku vula va ku: “Hi lexi Xikwembu xa wena, wena Israyele, lexi ku rhangeleke xi ku humesa etikweni ra Egipta.”+

5 Loko Aroni a vona leswi, a aka altari emahlweni ka rona. Kutani a huwelela a ku: “Ku ni nkhuvo wa Yehovha mundzuku.” 6 Hiloko va pfuka nimixo hi siku leri landzelaka kutani va sungula ku humesa magandzelo yo hisiwa ni ku nyikela magandzelo yo kombela ku rhula. Endzhaku ka sweswo vanhu va tshama ehansi leswaku va dya va tlhela va nwa. Kutani va suka va yima leswaku va titsakisa.+

7 Kutani Yehovha a byela Muxe a ku: “Rhelela, hikuva vanhu va wena lava u va humeseke etikweni ra Egipta va endle swilo swo homboloka.+ 8 Va hatle va rivala swileriso leswi ndzi va byeleke swona.+ Va tiendlele xifaniso xa rhole naswona va ya emahlweni va xi khinsamela ni ku xi endlela magandzelo va ku, ‘Hi lexi Xikwembu xa wena, wena Israyele, lexi ku humeseke etikweni ra Egipta.’” 9 Yehovha a ya emahlweni a byela Muxe a ku: “Ndzi swi xiyile leswaku vanhu lava va sihalala.*+ 10 Sweswi ndzi tshike, ndzi va lovisa ndza ha hlundzukile, kutani wena ndzi ta ku endla tiko lerikulu.”+

11 Kutani Muxe a kombela Yehovha Xikwembu xakwe+ a ku: “Yehovha, hikwalaho ka yini u fanele u hlundzukela vanhu va wena endzhaku ka loko u va humese etikweni ra Egipta hi matimba lamakulu ni hi voko ra matimba?+ 12 Hikwalaho ka yini Vaegipta va fanele va ku, ‘U va humese hi xikongomelo xo biha. A a lava ku va dlaya etintshaveni ni ku va lovisa emisaveni’?+ Tshika ku hlundzuka u cinca xiboho xa wena xo tisela vanhu va wena khombo leri. 13 Tsundzuka Abrahama, Isaka na Israyele malandza ya wena lawa u ma hlambanyeleke u ku: ‘Ndzi ta endla leswaku vana* va n’wina va tala ku fana ni tinyeleti ta matilo+ naswona ndzi ta va nyika tiko leri hinkwaro leri ndzi ri hlawuleleke vana* va n’wina, leswaku va ta ri teka ri va ra vona hilaha ku nga heriki.’”+

14 Hiloko Yehovha a cinca xiboho xakwe mayelana ni khombo leri a a lava ku ri tisela vanhu vakwe.+

15 Kutani Muxe a hundzuluka a rhelela entshaveni a khome maribye mambirhi ya swiphepherhele swa Vumbhoni+ hi voko.+ Maribye ya swiphepherhele a ma tsariwe matlhelo hamambirhi; a ma tsariwe emahlweni ni le ndzhaku. 16 Maribye ya swiphepherhele a ma endliwe hi Xikwembu naswona leswi tsariweke a swi tsariwe hi Xikwembu swi kovotliwe emaribyeni ya swiphepherhele.+ 17 Loko Yoxuwa a twa huwa ya vanhu lava a va ri ku huweleleni, a byela Muxe a ku: “Swi twala onge vanhu va le ku lweni enxaxeni.” 18 Kambe Muxe a ku:

19 Loko Muxe a fika ekusuhi ni nxaxa naswona a vona rhole+ ni ku cina, a sungula ku hlundzuka ngopfu, kutani a cukumeta maribye ya swiphepherhele lawa a a ma khomile a ma faya ehansi ka ntshava.+ 20 A teka rhole leri va ri endleke a ri hisa hi ndzilo kutani a ri sila ri va mapa;+ endzhaku ka sweswo a ma haxa ehenhla ka mati kutani a lerisa Vaisrayele leswaku va ma nwa.+ 21 Kutani Muxe a ku eka Aroni: “Vanhu lava va ku endle yini leswi u va tiseleke xidyoho lexikulu?” 22 Aroni a ku: “U nga hlundzuki hosi ya mina. U swi tiva kahle leswaku vanhu lava va rhandza ku endla swilo swo biha.+ 23 Va te, ‘Hi endlele xikwembu lexi nga ta hi rhangela, hikuva a hi swi tivi leswaku ku humelele yini hi Muxe wa kona, wanuna loyi a hi rhangeleke hi huma etikweni ra Egipta.’+ 24 Kutani ndzi ku, ‘Loyi a nga ni nsuku u fanele a wu susa a ndzi nyika wona.’ Hiloko ndzi wu lahlela endzilweni ivi ku huma rhole leri.”

25 Kutani Muxe a swi vona leswaku vanhu a va nga ha lawuleki hikuva Aroni u va tshikile va tihundzula xihlekiso eka valala va vona. 26 Hiloko Muxe a yima enyangweni wa nxaxa a ku: “I vamani lava yimaka na Yehovha? A va te eka mina!”+ Kutani Valevhi hinkwavo va ya eka yena. 27 Kutani a va byela a ku: “Yehovha Xikwembu xa Israyele u te, ‘Un’wana ni un’wana wa n’wina a a hlome hi banga a nghena enxaxeni a dlaya makwavo, munhukulobye ni munghana wakwe lonkulu.’”+ 28 Valevhi va endla leswi Muxe a swi vuleke. Kutani hi siku rero ku dlayiwa vavanuna va kwalomu ka 3 000. 29 Kutani Muxe a ku: “Tihlawulekiseleni Yehovha namuntlha hikuva un’wana ni un’wana wa n’wina u lwe ni n’wana wakwe ni makwavo;+ namuntlha Xikwembu xi ta mi katekisa.”+

30 Hi siku leri landzelaka Muxe a byela vanhu a ku: “Mi endle xidyoho lexikulu ngopfu, kutani sweswi ndzi ta tlhandlukela eka Yehovha ku vona loko ndzi nga kombela leswaku a mi rivalela xidyoho xa n’wina.”+ 31 Hiloko Muxe a tlhelela eka Yehovha a ku: “Vanhu lava va endle xidyoho lexikulu! Va tiendlele xikwembu xa nsuku!+ 32 Kambe sweswi loko u swi tsakela, va rivalele xidyoho xa vona;+ loko swi nga ri tano, ndzi kombela u ndzi sula ebukwini ya wena leyi u yi tsaleke.”+ 33 Kambe, Yehovha a byela Muxe a ku: “Munhu loyi a ndzi dyoheleke ndzi ta n’wi sula ebukwini ya mina. 34 Sweswi famba, u rhangela vanhu u va yisa endhawini leyi ndzi ku byeleke ha yona. Waswivo! U ta rhangeriwa hi ntsumi ya mina+ naswona hi siku leri ndzi nga ta va avanyisa, ndzi ta va xupula hikwalaho ka xidyoho xa vona.” 35 Hiloko Yehovha a tisela vanhu khombo hikuva va endle rhole, leri nga endliwa hi Aroni.

33 Yehovha a ya emahlweni a byela Muxe a ku: “Famba wena swin’we ni vanhu lava u va rhangeleke u va humesa etikweni ra Egipta. Yanani etikweni leri ndzi hlambanyeleke Abrahama, Isaka na Yakobo ndzi ku, ‘Ndzi ta ri nyika vana* va n’wina.’+ 2 Ndzi ta rhuma ntsumi leyi nga ta mi rhangela+ yi hlongola Vakanana, Vaamori, Vaheti, Vaperezi, Vahivhi ni Vayebusi.+ 3 Yanani etikweni leri khulukaka ntswamba ni vulombe.+ Kambe a ndzi nge fambi na n’wina, hikuva mi vanhu vo sihalala*+ kutani ndzi nga mi lovisa endleleni.”+

4 Loko vanhu va twa timhaka leti to biha, va sungula ku rila, a nga kona ni un’we wa vona loyi a ambaleke swin’wetsin’wetsi swakwe. 5 Yehovha a byela Muxe a ku: “Byela Vaisrayele u ku, ‘Mi vanhu vo sihalala.*+ Ndzi nga ta eka n’wina hi xinkarhana ndzi ta mi lovisa.+ Kutani sweswi susani swin’wetsin’wetsi swa n’wina loko ndzi ri karhi ndzi ehleketa hi leswi ndzi nga ta mi endla swona.’” 6 Vaisrayele a va ha swi ambalanga swin’wetsin’wetsi swa vona ku sukela eNtshaveni ya Horebe ku ya emahlweni.

7 Hiloko Muxe a teka tende rakwe a ri dzima ehandle ka nxaxa, ekulenyana ni nxaxa, kutani a ri vitana tende ra nhlengeletano. Un’wana ni un’wana loyi a a lava ku vutisa swo karhi eka Yehovha+ a a huma a ya etendeni ra nhlengeletano leri a ri ri ehandle ka nxaxa. 8 Loko Muxe a ya etendeni, vanhu hinkwavo a va yima etinyangweni ta matende ya vona, va n’wi languta kukondza a nghena etendeni. 9 Loko Muxe a nghena etendeni, papa lerikulu+ a ri rhelela ri yima enyangweni ya tende loko Xikwembu xi ri karhi xi vulavula na Muxe.+ 10 Loko vanhu hinkwavo va vona papa lerikulu ri yime enyangweni ya tende, un’wana ni un’wana wa vona a a yima kutani a khinsama a ri enyangweni ya tende rakwe. 11 Yehovha a a vulavula na Muxe hi ku kongoma,+ ku fana niloko munhu a vulavula ni munhukulobye. Loko a tlhelela enxaxeni, Yoxuwa+ n’wana wa Nuni loyi a a ri nandza wakwe+ a a nga humi etendeni.

12 Kutani Muxe a byela Yehovha a ku: “Vona, u ri eka mina, ‘Rhangela vanhu lava,’ kambe a wu ndzi byelanga loyi ndzi nga ta famba na yena. Ku tlula kwalaho u te, ‘Ndzi ku tiva hi vito* naswona ndza ku tsakela.’ 13 Ndza ku kombela, loko u ndzi tsakela ndzi tivise tindlela ta wena+ leswaku ndzi ta ku tiva kutani ndzi ya emahlweni ndzi tsakeriwa hi wena. Nakambe tsundzuka leswaku tiko leri i vanhu va wena.”+ 14 Kutani Xikwembu xi ku: “Ndzi ta famba na wena+ naswona ndzi ta ku wisisa.”+ 15 Hiloko Muxe a ku eka xona: “Loko u nga fambi na hina, u nga hi susi laha. 16 Xana swi ta tiviwa njhani leswaku mina ni vanhu va wena wa hi tsakela? Xana a swi nge tiviwi hi loko u famba na hina,+ leswaku mina ni vanhu va wena hi hlawulekile eka vanhu lavan’wana hinkwavo emisaveni?”+

17 Yehovha a ya emahlweni a byela Muxe a ku: “Ndzi ta endla ni leswi u swi kombelaka hikuva ndza ku tsakela naswona ndzi ku tiva hi vito.” 18 Hiloko Muxe a ku: “Ndzi kombela u ndzi komba ku vangama ka wena.” 19 Kambe Xikwembu xi ku: “Ndzi ta endla leswaku u vona vunene bya mina hinkwabyo naswona ndzi ta ku tivisa vito ra mina, ku nga Yehovha;+ ndzi ta tsakela loyi ndzi n’wi tsakelaka naswona loyi ndzi lavaka ku n’wi komba tintswalo ndzi ta n’wi komba tintswalo.”+ 20 Kambe xi tlhela xi ku: “A wu nge xi voni xikandza xa mina hikuva a ku na munhu la nga ndzi vonaka ivi a hanya.”

21 Yehovha a ya emahlweni a ku: “Hi leyi ndhawu ekusuhi na mina. Yima ehenhla ka ribye. 22 Loko ku vangama ka mina ku hundza, ndzi ta ku nghenisa embhoveni wa ribye naswona ndzi ta ku pfala hi voko ra mina kukondza ndzi hundza. 23 Endzhaku ka sweswo ndzi ta susa voko ra mina, kutani u ta vona nhlana wa mina. Kambe xikandza xa mina a xi nge voniwi.”+

34 Hiloko Yehovha a byela Muxe a ku: “Tikovotlele maribye mambirhi ma va swiphepherhele ma fana ni lawa yo sungula+ kutani ndzi ta tsala marito lawa a ma ri emaribyeni yo sungula+ lawa u ma fayeke.+ 2 Lungheka hikuva nimixo u ta ya eNtshaveni ya Sinayi, u yima emahlweni ka mina kwalaho ehenhla ka ntshava.+ 3 Kambe u nga fambi na munhu naswona ku nga vi ni munhu loyi a nga ta voniwa entshaveni yoleyo. Ntlhambi wa tinyimpfu kumbe wa tihomu na wona a wu fanelanga wu dyela emahlweni ka ntshava yoleyo.”+

4 Hiloko Muxe a kovotla maribye mambirhi ya swiphepherhele ku fana ni lawa yo sungula, kutani a pfuka nimixo a ya eNtshaveni ya Sinayi hilaha Yehovha a n’wi leriseke hakona ivi a teka maribye mambirhi ya swiphepherhele. 5 Kutani Yehovha a rhelela+ a ri epapeni a yima na Muxe kwalaho ivi a n’wi byela hi vito leri nge Yehovha.+ 6 Yehovha a hundza emahlweni ka Muxe a ku: “Yehovha, Yehovha, Xikwembu xa tintswalo+ ni ntwelavusiwana,*+ loyi a hlwelaka ku hlundzuka+ naswona a nga ni rirhandzu+ ni ntiyiso,*+ 7 loyi a rhandzaka vanhu va magidi,+ loyi a rivalelaka xidyoho ni ku tlula nawu+ kambe a nge tshiki ku xupula loyi a dyoheke,+ u ta xupula vana ni vatukulu hikwalaho ka swidyoho swa vatata wa vona eka xitukulwana xa vunharhu ni le ka xitukulwana xa vumune.”+

8 Hiloko Muxe a khinsama kutani a khumba ehansi hi mombo. 9 Kutani a ku: “Yehovha loko u ndzi tsakela ndzi kombela leswaku wena Yehovha u famba na hina+ hambileswi hi nga vanhu vo sihalala,*+ hi rivalele xidyoho xa hina+ u hi teka tanihi vanhu va wena.” 10 Hiloko a ku: “Ndzi endla ntwanano: Ndzi ta endla swilo swo hlamarisa emahlweni ka vanhu va wena hinkwavo leswi nga si tshamaka swi endleka emisaveni hinkwayo kumbe ematikweni hinkwawo,+ vanhu hinkwavo lava u tshamaka na vona va ta vona ntirho wa Yehovha, hikuva ndzi endla nchumu wo hlamarisa na wena.+

11 “Yingisani leswi ndzi mi lerisaka swona namuntlha.+ Ndzi hlongola Vaamori, Vakanana, Vaheti, Vaperezi, Vahivhi ni Vayebusi emahlweni ka n’wina.+ 12 Tivoneleni leswaku mi nga endli ntwanano ni vanhu va tiko leri mi yaka eka rona,+ hikuva va nga va ntlhamu eka n’wina.+ 13 Kambe mi ta hirimuxa tialtari ta vona, tiphuphu leti va ti hundzuleke swikwembu swa vona naswona mi ta tsema ni timhandzi ta vona ta Axera.*+ 14 A mi fanelanga mi khinsamela xikwembu xin’wana+ hikuva Yehovha u lava leswaku ku gandzeriwa yena ntsena. I Xikwembu lexi lavaka leswaku ku gandzeriwa xona ntsena.+ 15 Tivoneleni leswaku mi nga endli ntwanano ni vanhu va tiko rero, hikuva loko va tinyiketela eka swikwembu swa vona ni ku swi endlela magandzelo,+ mi ta dya swakudya leswi va endleke magandzelo ya vona ha swona.+ 16 Mi ta teka vana va vona va vanhwanyana va va vasati va vana va n’wina va majaha,+ vana va vona va vanhwanyana va ta tinyiketela eka swikwembu swa vona kutani va endla leswaku vana va n’wina va tinyiketela eka swikwembu swa vona.+

17 “Mi nga tiendleli swikwembu leswi n’okisiweke.+

18 “Mi ta tlangela Nkhuvo Wa Swinkwa Leswi Nga Riki Na Comela.+ Mi ta dya swinkwa leswi nga riki na comela hilaha ndzi mi leriseke hakona; mi ta endla leswi masiku ya nkombo hi nkarhi lowu vekiweke hi n’hweti ya Abibi,*+ hikuva mi hume eEgipta hi n’hweti ya Abibi.

19 “Mativula hinkwawo ya xinuna i ya mina+ ku katsa ni swifuwo swa n’wina hinkwaswo, hambi i mativula ya nkuzi kumbe ya nyimpfu.+ 20 Mbhongolo ya mativula mi ta yi kutsula hi nyimpfu. Kambe loko mi nga yi kutsuli, mi ta yi tshova nhamu. Vana va n’wina hinkwavo vaxinuna va mativula mi ta va kutsula.+ A nga kona loyi a nga ta ta eka mina a nga khomanga nchumu.

21 “Mi ta tirha masiku ya tsevu kambe hi siku ra vunkombo mi ta wisa.*+ Hambi ku ri nkarhi wa ku rima ni wa ntshovelo, mi ta wisa.

22 “Mi ta tlangela Nkhuvo wa Mavhiki hi koroni leyi tshoveriwaka ku sungula ni Nkhuvo wo Hlengeleta* eku heleni ka lembe.+

23 “Vavanuna hinkwavo va ta humelela emahlweni ka Yehovha, Hosi ya ntiyiso, Xikwembu xa Israyele kanharhu hi lembe.+ 24 Hikuva ndzi ta hlongola matiko emahlweni ka wena+ naswona ndzi ta kurisa ndhawu ya wena, a ku na munhu loyi a nga ta navela tiko ra wena loko wa ha ye eka Yehovha Xikwembu xa wena, kanharhu hi lembe.

25 “Mi nga tshuki mi nyikela ngati ya gandzelo ra mina ni swilo leswi cheriweke comela.+ Gandzelo ra nkhuvo wa Paseka a ri fanelanga ri tshikiwa vusiku hinkwabyo ku fikela nimixo.+

26 “Mi ta tisa mihandzu leyinene ngopfu leyi wupfeke ku sungula endlwini ya Yehovha Xikwembu xa n’wina.+

“Mi nga tshuki mi sweka ximbutana hi ntswamba wa mana wa xona.”+

27 Yehovha a ya emahlweni a byela Muxe a ku: “U ta tsala marito lawa ehansi+ hikuva ndzi endla ntwanano na wena ni Vaisrayele hi ku pfumelelana na wona.”+ 28 U tshame kwalaho na Yehovha masiku ya 40 ni vusiku bya 40. A nga dyanga xinkwa naswona a nga nwanga mati.+ U* tsale marito ya ntwanano emaribyeni ya swiphepherhele, Milawu ya Khume.+

29 Kutani Muxe a rhelela eNtshaveni ya Sinayi a khome maribye mambirhi ya swiphepherhele swa Vumbhoni.+ Loko a rhelela entshaveni, a a nga swi xiyi leswaku xikandza xakwe a xi hatima hikwalaho ka leswi a a vulavula ni Xikwembu. 30 Loko Aroni ni Vaisrayele hinkwavo va vona Muxe va xiye leswaku xikandza xakwe xa hatima, hiloko va chava ku tshinela ekusuhi na yena.+

31 Kambe Muxe a va vitana kutani Aroni ni tindhuna hinkwato va ya eka yena, hiloko Muxe a vulavula na vona. 32 Endzhaku ka sweswo, Vaisrayele hinkwavo va tshinela ekusuhi na yena kutani a va byela hinkwaswo leswi Yehovha a n’wi leriseke swona eNtshaveni ya Sinayi.+ 33 Loko Muxe a heta ku vulavula na vona a a tifunengeta xikandza hi lapi.+ 34 Kambe loko Muxe a ya vulavula na Yehovha a a susa lapi kukondza a huma.+ Kutani a a huma a ya byela Vaisrayele swileriso leswi a nyikiweke swona.+ 35 Hiloko Vaisrayele va vona leswaku xikandza xa Muxe xa hatima; kutani Muxe a tifunengeta xikandza hi lapi kukondza a nghena leswaku a ya vulavula ni Xikwembu.+

35 Endzhakunyana Muxe a hlengeleta Vaisrayele hinkwavo a ku eka vona: “Hi leswi swilo leswi Yehovha a leriseke leswaku swi endliwa:+ 2 Ntirho wu nga endliwa hi masiku ya tsevu, kambe siku ra vunkombo ra kwetsima eka n’wina, i savata, ku nga siku ro hlawuleka ro wisa eka Yehovha.+ Loyi a tirhaka hi siku rero u ta dlayiwa.+ 3 Mi nga tshuki mi tshivela ndzilo etindhawini leti mi tshamaka eka tona hi siku ra Savata.”

4 Kutani Muxe a byela Vaisrayele hinkwavo a ku: “Hi leswi swilo leswi Yehovha a leriseke leswaku swi endliwa, 5 ‘Hlengeletelani Yehovha munyikelo.+ Un’wana ni un’wana loyi a swi tsakelaka+ a a tise munyikelo wa Yehovha: nsuku, silivhere, koporo, 6 harhani ya wasi, voya bya phephulu,* lapi ro tshwuka, lapi ra xiyimo xa le henhla, voya bya mbuti,+ 7 madzovo ya makhuna lama pendiweke ma va yo tshwuka, madzovo ya tintini,* ntsandza wa munga, 8 mafurha ya timboni, balsama ya mafurha yo kwetsima ni ya murhi wo nun’hwela,+ 9 maribye ya onikisi ni maribye man’wana lama nga ta vekiwa eka efodi*+ ni le ka xinkwamana xa le xifuveni.+

10 “‘Hinkwavo lava nga ni vuswikoti*+ byo endla swilo a va te va ta endla swilo hinkwaswo leswi Yehovha a swi leriseke, 11 ku nga tabernakela ni tende ra yona swin’we ni xifunengeto xa yona, swo haka ha swona ni tifureme ta yona, swigogo swa yona, tiphuphu ta yona ni swo tlhoma tifureme swa yona; 12 Areka+ ni timhandzi ta yona,+ xifunengeto+ ni khetheni+ leri hambanisaka; 13 tafula+ ni timhandzi ta rona ni swibya swa rona hinkwaswo ku katsa ni xinkwa xo kwetsima;+ 14 xo tlhoma timboni+ xo voninga hi xona ni switirhisiwa swa xona ni timboni ta xona ni mafurha ya ku voninga;+ 15 altari ya murhi wo nun’hwela+ ni timhandzi ta yona; mafurha yo kwetsima ni murhi wo nun’hwela;+ khetheni leri nga ta va enyangweni ya tabernakela; 16 altari ya gandzelo ro hisiwa+ ni sefo ya yona ya koporo, timhandzi ta yona ni swibya swa yona hinkwaswo; xo hlambela ni lexi nga ta tshama ehenhla ka xona;+ 17 malapi yo biyela xivava,*+ tiphuphu ta yona ni swo tlhoma tifureme swa yona; khetheni ra nyangwa yo nghena exivaveni; 18 timhingu ta tabernakela ni timhingu ta xivava ni tintambhu ta kona;+ 19 swiambalo leswi lukiweke kahle+ swa ku tirha ha swona endhawini yo kwetsima, swiambalo swo kwetsima swa muprista Aroni+ ni swiambalo swa vana vakwe lava nga ta va vaprista.’”

20 Hiloko Vaisrayele hinkwavo va suka emahlweni ka Muxe va famba. 21 Kutani un’wana ni un’wana loyi mbilu yakwe yi n’wi susumeteke+ ni un’wana ni un’wana loyi moya wakwe wu n’wi khutazeke u tise munyikelo wa yena eka Yehovha leswaku wu tirhisiwa eka tende ra nhlengeletano, eka mitirho hinkwayo ya rona ni le ka swiambalo swo kwetsima. 22 Vavanuna ni vavasati hinkwavo lava swi tsakelaka va ya emahlweni va tisa swipereta, swingwavila swa tindleve, swingwavila ni swin’wetsin’wetsi swin’wana swin’we ni mixaka hinkwayo ya swilo swa nsuku. Hinkwavo va tisa magandzelo* ya vona ya nsuku eka Yehovha.+ 23 Kutani hinkwavo lava a va ri ni harhani ya wasi, voya bya phephulu,* lapi ro tshwuka, lapi ra xiyimo xa le henhla, voya bya mbuti, madzovo ya makhuna lama pendiweke ma va yo tshwuka ni madzovo ya tintini,* va swi tisa. 24 Hinkwavo lava a va nyikela hi silivhere ni hi koporo va tise munyikelo wa Yehovha ni hinkwavo lava a va ri ni ntsandza wa munga lowu nga endlaka ntirho wun’wana ni wun’wana va wu tisile.

25 Vavasati hinkwavo lava nga ni vuswikoti+ va luka swilo hi mavoko kutani va tisa swilo leswi va swi lukeke: harani ya wasi, voya bya phephulu,* lapi ro tshwuka ni lapi ra xiyimo xa le henhla. 26 Kutani vavasati hinkwavo lava nga ni vuswikoti lava timbilu ta vona ti va susumeteke va luke voya bya mbuti.

27 Tindhuna ti tisa maribye ya onikisi ni maribye man’wana lama nga ta vekiwa eka efodi ni le ka xinkwamana xa le xifuveni+ 28 ni balsama ni mafurha ya ku voninga ni mafurha yo kwetsima+ ni murhi wo nun’hwela.+ 29 Vavanuna ni vavasati hinkwavo lava swi tsakelaka, va tisa swilo leswaku ku endliwa ntirho lowu Yehovha a leriseke leswaku wu endliwa hi ku tirhisa Muxe; Vaisrayele va tise swilo sweswo tanihi gandzelo ra ku tirhandzela eka Yehovha.+

30 Hiloko Muxe a byela Vaisrayele a ku: “Vonani, Yehovha u hlawule Bezalele n’wana wa Uri, n’wana wa Huru wa nyimba ya Yuda.+ 31 Xikwembu xi nyike Bezalele matimba hi ku tirhisa moya wa xona, xi n’wi nyike vutlhari, ku twisisa ni vutivi bya ntirho wun’wana ni wun’wana wa mavoko 32 leswaku a sasekisa swilo, a tirha hi nsuku, silivhere ni koporo, 33 a tsema maribye ni ku endla swilo swo ma khoma ni ku endla swilo swo hambanahambana hi ntsandza. 34 Kutani u swi veke embilwini yakwe leswaku yena na Oholiyabu+ n’wana wa Ahisamaki wa nyimba ya Dani va ta dyondzisa. 35 U va nyike vuswikoti+ byo endla mitirho hinkwayo ya mavoko, ntirho wo endla malapi ni wo rhunga hi harhani ya wasi, voya bya phephulu,* lapi ro tshwuka, lapi ra xiyimo xa le henhla ni ntirho wa muluki. Vavanuna lava va ta endla mitirho hinkwayo ku katsa ni ku endla swilo swo hambanahambana.

36 “Bezalele u ta tirha na Oholiyabu ni vavanuna hinkwavo lava nga ni vuswikoti* lava Yehovha a va nyikeke vutlhari ni ku twisisa leswaku va tiva ndlela yo endla ntirho hinkwawo wo kwetsima, hilaha Yehovha a leriseke hakona.”+

2 Hiloko Muxe a vitana Bezalele na Oholiyabu ni vavanuna hinkwavo lava nga ni vuswikoti lava Yehovha a va nyikeke vutlhari,+ hinkwavo lava timbilu ta vona ti va susumeteke leswaku va endla ntirho hi ku swi rhandza.+ 3 Kutani va teka munyikelo hinkwawo eka Muxe+ lowu Vaisrayele va wu tiseke leswaku ku endliwa ntirho wo kwetsima. Hambiswiritano, vanhu va ye emahlweni va tisa magandzelo ya ku tirhandzela eka yena mixo wun’wana ni wun’wana.

4 Endzhaku ka loko vatirhi hinkwavo lava nga ni vuswikoti va sungule ku endla ntirho wo kwetsima, va ta ha un’weun’we, 5 va fika va byela Muxe va ku: “Vanhu va tisa swilo swo tala ku tlula leswi lavekaka leswaku ku endliwa ntirho lowu Yehovha a leriseke leswaku wu endliwa.” 6 Kutani Muxe a lerisa leswaku ku endliwa xitiviso enxaxeni lexi nge: “Vavanuna ni vavasati, mi nga ha humesi swilo leswi engetelekeke leswaku swi va munyikelo wo kwetsima.” Hiloko vanhu va siveriwa ku tisa swilo leswi engetelekeke. 7 Swilo leswi tisiweke a swi ringene ku endla ntirho hinkwawo lowu a wu fanele wu endliwa naswona a swi tele ngopfu.

8 Kutani vatirhi hinkwavo lava nga ni vuswikoti+ va endla tabernakela+ hi malapi ya khume ya xiyimo xa le henhla lama lukiweke, harhani ya wasi, voya bya phephulu* ni lapi ro tshwuka; a* rhungelela swifaniso swa makerubu eka wona.+ 9 Lapi rin’wana ni rin’wana a ri lehe 12,5 wa timitara* ri anama 1,8 wa timitara.* Malapi hinkwawo a ma ringana. 10 Hiloko a hlanganisa malapi ya ntlhanu ma va nchumu wun’we ni malapi laman’wana ya ntlhanu a ma hlanganisa ma va nchumu wun’we. 11 Endzhaku ka sweswo a endla swo hulela hi harhani ya wasi emakumu ka lapi laha ri nga ta hlanganisiwa kona. A endla leswi fanaka emakumu ka lapi ra le handle ra tende, emakumu laha a ri ta hlanganisiwa kona. 12 A endla swo hulela swa 50 eka lapi rin’we ni swo hulela swin’wana swa 50 emakumu ka lapi lerin’wana laha a ma ta hlangana kona leswaku swo hulela swi ta langutana. 13 Eku heteleleni, a endla swo haka ha swona swa 50 swa nsuku kutani a hlanganisa malapi ha swona, lerova tabernakela yi va nchumu wun’we.

14 Kutani a endla malapi yo funengeta tabernakela hi voya bya mbuti. A endla malapi ya 11.+ 15 Lapi rin’wana ni rin’wana a ri lehe 13,4 wa timitara* ri anama 1,8 wa timitara. Malapi lawa ya 11 a ma ringana. 16 Hiloko a hlanganisa malapi ya ntlhanu a tlhela a hlanganisa malapi laman’wana ya tsevu. 17 Endzhaku ka sweswo a endla swo hulela swa 50 emakumu ka lapi leri nga le henhla laha ma hlanganaka kona, naswona a endla swo hulela swa 50 emakumu ka lapi lerin’wana leri hlanganaka na rona. 18 Kutani a endla swo haka ha swona swa 50 swa koporo leswaku a hlanganisa tende ri va nchumu wun’we.

19 A endla xo funengeta tabernakela hi madzovo ya makhuna lama pendiweke ma va yo tshwuka ni xo funengeta hi madzovo ya tintini* lexi nga ta va ehenhla ka xona.+

20 Hiloko a endla tifureme ta tabernakela hi ntsandza wa munga,+ leti a ti yimisiwile.+ 21 Fureme ha yin’we a yi lehe 4,5 wa timitara* yi anama 67 wa tisentimitara.* 22 Fureme ha yin’we a yi ri ni swilo swimbirhi swo hlanganisa ha swona emakumu ka yona. Yoleyo i ndlela leyi a endleke tifureme hinkwato ta tabernakela ha yona. 23 Hiloko a endla tifureme ta tlhelo ra le dzongeni ra tabernakela, tifureme ta 20, ti languta edzongeni. 24 Kutani a endla swo tlhoma tifureme swa 40 swa silivhere ehansi ka tifureme ta 20. Ehansi ka fureme yin’wana ni yin’wana a ku ri ni swilo swimbirhi leswi nga ta tlhomiwa eka swo tlhoma tifureme swimbirhi swa silivhere. U endle hilaha ku fanaka eka tifureme hinkwato.+ 25 U endle tifureme ta 20 ta tlhelo lerin’wana ra tabernakela, tlhelo ra le n’walungwini 26 ni swo tlhoma tifureme swa kona swa 40 swa silivhere, swo tlhoma tifureme swimbirhi ehansi ka fureme yin’we ni swo tlhoma tifureme swimbirhi ehansi ka fureme yin’wana ni yin’wana.

27 Eka tlhelo ra le ndzhaku ra tabernakela ku ya evupeladyambu, u endle tifureme ta tsevu.+ 28 U endle tifureme timbirhi leti a ti seketela tikhona hatimbirhi endzhaku ka tabernakela. 29 Tifureme leti a ti famba ti ri timbirhi ku suka ehansi ku ya fika ehenhla, ti hlangana eka xingwavila xo sungula. U endle tano hi tifureme letimbirhi ta le khoneni. 30 A ku ri tifureme ta nhungu ni swo tlhoma tifureme swa kona swa 16 swa silivhere, ehansi ka fureme yin’wana ni yin’wana a ku ri ni swo tlhoma tifureme swimbirhi.

31 Kutani a endla timhandzi ta ntsandza wa munga, ntlhanu wa tona ti va ta tifureme ta tlhelo rin’we ra tabernakela+ 32 ni ntlhanu wa timhandzi ta tifureme ta tlhelo lerin’wana ra tabernakela ni ntlhanu wa timhandzi ta tifureme ta tlhelo ra tabernakela ra xiphemu xa le ndzhaku hi le vupeladyambu. 33 A endla mhandzi ya le xikarhi a yi hingakanyisa hi le xikarhi ka tifureme ku suka emakumu man’wana ku ya emakumu laman’wana. 34 A nameka tifureme hi nsuku naswona a endla swingwavila swa tona swa nsuku swi khoma timhandzi kutani a nameka timhandzi hi nsuku.+

35 Hiloko a endla khetheni+ hi harhani ya wasi, voya bya phephulu,* lapi ro tshwuka ni hi lapi ra xiyimo xa le henhla leri lukiweke. A rhungelela swifaniso swa makerubu+ eka rona.+ 36 Kutani a ri endlela tiphuphu ta munga ta mune a ti nameka nsuku swin’we ni swo hayeka eka swona swa nsuku, a endlela tiphuphu swo tlhoma tiphuphu swa mune swa silivhere. 37 Endzhaku ka sweswo a endla khetheni ro pfala ndhawu yo nghena ha yona etabernakeleni hi harhani ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke ma rhungeleriwe swin’we+ 38 ni tiphuphu ta rona ta ntlhanu ni swo hayeka eka swona. U nameke nsuku ehenhla ka tiphuphu ni swingwavila swa tona kambe swo tlhoma tiphuphu swa tona swa ntlhanu a swi ri swa koporo.

37 Kutani Bezalele+ a endla Areka+ hi ntsandza wa munga. A yi lehe kwalomu ka 111 wa tisentimitara,* yi anama 67 wa tisentimitara,* yi tlhela yi tlakuka 67 wa tisentimitara.+ 2 A yi nameka nsuku wo tenga endzeni ni le handle naswona a yi endlela bandhi ra nsuku ri yi rhendzela.+ 3 Endzhaku ka sweswo a yi endlela swingwavila swa mune swa nsuku, swi ri swa ku swi vekela ehenhla ka milenge ya yona ya mune, swingwavila swimbirhi swi va eka tlhelo rin’we ra yona kasi swingwavila leswin’wana swimbirhi swi va eka tlhelo lerin’wana ra yona. 4 A tlhela a endla timhandzi hi ntsandza wa munga kutani a ti nameka nsuku.+ 5 Hiloko a nghenisa timhandzi eka swingwavila leswi nga ematlhelo ka Areka leswaku Areka yi rhwariwa hi tona.+

6 A endla xifunengeto* hi nsuku wo tenga.+ A xi lehe kwalomu ka 111 wa tisentimitara, xi anama 67 wa tisentimitara.+ 7 Kutani a endla makerubu mambirhi+ ya nsuku hi hamula emakumu mambirhi ya xifunengeto.+ 8 Kerubu rin’we a ri ri emakumu man’wana kasi kerubu lerin’wana a ri ri emakumu laman’wana. U endle makerubu emakumu mambirhi ya xifunengeto. 9 Makerubu lamambirhi ma phurumulele timpapa ta wona ehenhla, ma funengeta xifunengeto hi timpapa ta wona.+ A ma langutanile naswona swikandza swa wona a swi langute xifunengeto.+

10 Kutani a endla tafula hi ntsandza wa munga.+ A ri lehe kwalomu ka 89 wa tisentimitara,* ri anama 44,5 wa tisentimitara* naswona a ri tlakuke 67 wa tisentimitara.+ 11 Hiloko a ri nameka nsuku wo tenga naswona a ri endlela bandhi ra nsuku ri ri rhendzela. 12 Endzhaku ka sweswo, a ri endlela rhimi leyi anameke kwalomu ka 7,4 wa tisentimitara* yi ri rhendzela ni bandhi ra nsuku leri nga ta rhendzela rhimi. 13 Ku tlula kwalaho, a ri endlela swingwavila swa mune swa nsuku kutani a swi veka ematlhelo ya mune laha a ku ri ni milenge ya mune. 14 Swingwavila a swi ri ekusuhi ni rhimi naswona a swi khoma timhandzi leti a ti tirhisiwa ku rhwala tafula. 15 Hiloko a endla timhandzi hi ntsandza wa munga kutani a ti nameka nsuku leswaku ku rhwariwa tafula hi tona. 16 Endzhaku ka sweswo a endla swilo leswi a swi ta tirhisiwa etafuleni hi nsuku wo tenga, swibya, swinwelo, minkambana ni swilo swo chela magandzelo ya swakunwa.+

17 Kutani a endla xo tlhoma timboni+ hi nsuku wo tenga. A endla xo tlhoma timboni hi hamula. Tshaku ra xona, miri wa xona, switlukana* swa xona, swihluke swa xona ni swiluva swa xona a swi ri nchumu wun’we.+ 18 Miri wa xona a wu ri ni marhavi ya tsevu, marhavi manharhu a ma ri eka tlhelo rin’we ra xo tlhoma timboni kasi marhavi laman’wana manharhu a ma ri eka tlhelo lerin’wana ra xona. 19 Rhavi ha rin’we eka tlhelo rin’we a ri ri ni switlukana swinharhu leswi fanaka ni swiluva swa almondi naswona exikarhi ka swona a ku ri ni swihluke ni swiluva, a swi ri tano ni hi marhavi laman’wana eka tlhelo lerin’wana. Ku endliwe tano eka marhavi ya tsevu lama nga eka miri wa xo tlhoma timboni. 20 Eka miri wa xo tlhoma timboni a ku ri ni switlukana swa mune leswi fanaka ni swiluva swa almondi, laha exikarhi ka swona ku nga ni xihluke ni xiluva. 21 A ku ri ni xihluke ehansi ka ndhawu leyi marhavi mambirhi yo sungula ma hlanganaka eka yona naswona ehansi ka ndhawu leyi marhavi mambirhi lama landzelaka ma hlanganaka eka yona a ku ri ni xihluke xin’wana kasi ehansi ka ndhawu leyi marhavi mambirhi lama landzelaka ma hlanganaka eka yona a ku ri ni xihluke. Marhavi ya tsevu lama humaka eka miri wa xo tlhoma timboni a ma ri tano. 22 Swihluke ni marhavi a swi khomanile ni xo tlhoma timboni lexi a xi endliwe hi hamula hi nsuku wo tenga. 23 Hiloko a endla timboni ta xona ta nkombo+ ni swo khoma ntambhu swa xona ni swo khoma ndzilo swa xona hi nsuku wo tenga. 24 A endla xo tlhoma timboni swin’we ni swilo leswin’wana hi nsuku wo tenga lowu tikaka 34,2 wa tikhilogiramu.*

25 Kutani a endla altari ya murhi wo nun’hwela+ hi ntsandza wa munga. A yi ringana matlhelo hinkwawo, a yi lehe 44,5 wa tisentimitara, yi anama 44,5 wa tisentimitara, yi tlakuka 89 wa tisentimitara. Timhondzo ta yona a ti khomanile na yona.+ 26 A yi nameka nsuku wo tenga, ehenhla ka yona, ematlhelo ka yona ni le timhondzweni ta yona, kutani a yi endlela bandhi ra nsuku ri yi rhendzela. 27 A yi endlela swingwavila swimbirhi swa nsuku ehansi ka bandhi ra yona ematlhelo hamambirhi ya yona leswaku ku ta hoxiwa timhandzi to yi rhwala. 28 Endzhaku ka sweswo a endla timhandzi hi ntsandza wa munga kutani a ti nameka nsuku. 29 A tlhela a endla mafurha yo kwetsima+ ni murhi wo nun’hwela wo tenga,+ lowu pfanganisiweke kahle.*

38 A endla altari ya gandzelo ro hisiwa hi ntsandza wa munga. A yi ri ni matlhelo ya mune yo ringana, yi leha 2,2 wa timitara* yi anama 2,2 wa timitara, yi leha 1,3 wa timitara.*+ 2 Hiloko a endla timhondzo ta yona ehenhla ka tikhona ta yona ta mune. Timhondzo ta yona a ti khomanile na yona. Endzhaku ka sweswo, a yi nameka koporo.+ 3 Endzhaku ka sweswo a endla swilo hinkwaswo leswi a swi ta tirhisiwa ealtarini, mabakiti yo chela nkuma, mafoxolo, tiforoko ni swo khoma ndzilo. A endla swilo sweswo hinkwaswo hi koporo. 4 A tlhela a endla sefo ya koporo ya altari, ehansi ka bandhi ra yona, ehansi ku ya exikarhi ka yona. 5 A endla swingwavila swa mune ematlhelo ya mune ekusuhi ni sefo ya koporo leswaku ku tlhomiwa timhandzi eka swona. 6 Endzhaku ka sweswo a endla timhandzi hi ntsandza wa munga a ti nameka koporo. 7 A nghenisa timhandzi eka swingwavila leswi a swi ri ematlhelo ka altari leswaku yi rhwariwa hi tona. A endla altari hi mapulanga yi va bokisi leri pfulekeke.

8 Kutani a endla xo hlambela xa koporo+ ni lexi nga ta tshama ehenhla ka xona; a tirhisa swivoni* swa vavasati lava a va hlawuriwile leswaku va tirha enyangweni ya tende ra nhlengeletano.

9 Kutani a endla xivava.*+ Eka tlhelo ra le dzongeni ra rivala leri languteke edzongeni, a biyela hi malapi lama lukiweke ya xiyimo xa le henhla lama leheke 44,5 wa timitara.*+ 10 A ku ri ni tiphuphu ta 20 ni swo tlhoma tiphuphu swa 20 swa koporo naswona swo hayeka eka swona swa tiphuphu ni swingwavila swa tona a swi ri swa silivhere. 11 Nakambe, eka tlhelo ra le n’walungwini a ku vambiwe malapi lama leheke 44,5 wa timitara. Tiphuphu ta rona ta 20 ni swo tlhoma tiphuphu swa tona swa 20 a swi ri swa koporo. Swo hayeka eka swona ni swingwavila swa swona a swi ri swa silivhere. 12 Kambe eka tlhelo ra le vupeladyambu, a ku ncikinya malapi lama leheke 22 wa timitara.* A ku ri ni tiphuphu ta khume ni swo tlhoma tiphuphu swa khume, swo hayeka eka swona swa tiphuphu ni swingwavila swa tona a swi ri swa silivhere. 13 Ku anama ka tlhelo ra le vuxeni ku ya evuhumadyambu a ku ri 22 wa timitara. 14 A ku vambiwe malapi lama leheke 6,7 wa timitara* eka tiphuphu tinharhu ni swo tlhoma tiphuphu swinharhu eka tlhelo rin’we. 15 Kutani eka tlhelo lerin’wana ra nyangwa ya xivava a ku vambiwe malapi lama leheke 6,7 wa timitara eka tiphuphu tinharhu ni swo tlhoma tiphuphu swinharhu. 16 Malapi hinkwawo lawa a ma rhendzele xivava a ma endliwe hi lapi ra xiyimo xa le henhla leri lukiweke. 17 Swo tlhoma tiphuphu a swi ri swa koporo, swo hayeka eka swona swa tiphuphu ni swingwavila swa tona a swi ri swa silivhere, ehenhla ka tona a ti namekiwe silivhere naswona a ku ri ni swingwavila swa silivhere swa tiphuphu hinkwato ta xivava.+

18 Khetheni ro pfala nyangwa ya xivava a ri lukiwe hi harhani ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke. A ri lehe 8,9 wa timitara* ri tlakuka 2,2 wa timitara, a ri ringana ni malapi lama vambiweke ya xivava.+ 19 Tiphuphu ta wona ta mune ni swo tlhoma tiphuphu swa tona swa mune a swi endliwe hi koporo. Swo hayeka eka swona ni swingwavila swa tona a swi ri swa silivhere naswona ehenhla ka tona a ku namekiwe silivhere. 20 Timhingu hinkwato ta tabernakela ni leti a ti rhendzele xivava a ti ri ta koporo.+

21 Leswi landzelaka i nxaxamelo wa swilo leswi tirhisiweke ku aka tabernakela, tabernakela ya Vumbhoni,+ leswi endliweke hi ku ya hi xileriso xa Muxe, ku ri vutihlamuleri bya Valevhi+ lava a va kongomisiwa hi Ithamara+ n’wana wa muprista Aroni. 22 Bezalele+ n’wana wa Uri, n’wana wa Huru wa nyimba ya Yuda u endle hinkwaswo leswi Yehovha a swi leriseke Muxe. 23 A a ri na Oholiyabu+ n’wana wa Ahisamaki wa nyimba ya Dani, loyi a a ri ni vuswikoti byo endla ntirho wa mavoko, ntirho wo endla malapi ni wo rhunga hi harhani ya wasi, voya bya phephulu,* lapi ro tshwuka ni lapi ra xiyimo xa le henhla.

24 Nsuku hinkwawo lowu tirhisiweke entirhweni hinkwawo wa ndhawu yo kwetsima a wu ringana ni ntsengo wa nsuku wa gandzelo leri ndziwitiwaka,+ ku nga 1 000 wa tikhilogiramu* hi ku ya hi mpimo wa ndhawu yo kwetsima.* 25 Kutani silivhere leyi tisiweke hi vavanuna lava tsariseke mavito ya vona a yi ri 3 440 wa tikhilogiramu* hi ku ya hi mpimo wa ndhawu yo kwetsima.* 26 Munhu un’wana ni un’wana eka vavanuna hinkwavo lava tsarisiweke ku sukela eka malembe ya 20 ku ya ehenhla,+ a tisa silivhere leyi nga tsevu wa tigiramu* hi ku ya hi mpimo wa ndhawu yo kwetsima,* vavanuna lava a va ri 603 550.+

27 Ku tirhisiwe 3 420 wa tikhilogiramu* ta silivhere leswaku ku endliwa swo tlhoma tiphuphu swa ndhawu yo kwetsima ni leswi nga ekusuhi ni khetheni; swo tlhoma tiphuphu swa 100 a swi ringana ni 3 420 wa tikhilogiramu ta silivhere, xo tlhoma phuphu ha xin’we a xi ri 34,2 wa tikhilogiramu.*+ 28 A endla swo hayeka eka swona swa tiphuphu hi 20 wa tikhilogiramu* ta silivhere kutani a nameka tinhloko ta tona ivi a ti hlanganisa.

29 Koporo ya gandzelo* a yi ri 2 420 wa tikhilogiramu.* 30 U tirhise yona ku endla swo tlhoma tiphuphu leti a ti ri enyangweni ya tende ra nhlengeletano, altari ya koporo ni sefo ya yona ya koporo, swilo hinkwaswo leswi a swi ta tirhisiwa ealtarini, 31 swo tlhoma tiphuphu leti a ti rhendzele xivava, swo tlhoma tiphuphu leti nga enyangweni ya xivava ni timhingu hinkwato ta tabernakela ni timhingu hinkwato+ leti a ti rhendzele xivava.

39 Va endla swiambalo leswi lukiweke kahle swa ku tirha ha swona endhawini yo kwetsima hi harhani ya wasi, voya bya phephulu,* swiambalo swa lapi leri lukiweke kahle.+ Va endla swiambalo swo kwetsima leswi a swi ri swa Aroni+ hilaha Yehovha a leriseke Muxe hakona.

2 A endla efodi*+ hi harhani ya nsuku ni ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke. 3 Va endla swiphepherhele swa nsuku swi va swo lala, kutani a swi tsemelela swi va tiharhani leswaku a swi rhunga ni harhani ya wasi, voya bya phephulu,* lapi ro tshwuka ni lapi ra xiyimo xa le henhla. 4 Va yi endlela swiphemu swa le makatleni leswi hlanganisiweke eka swiphemu swa yona swimbirhi swa le henhla. 5 Bandhi leri a ri ri eka efodi leri nga ta yi tsimba yi tiya,+ a ri endliwe hi swilo leswi efodi a yi endliwe hi swona, ku nga harhani ya nsuku ni ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke, hilaha Yehovha a leriseke Muxe hakona.

6 Kutani va veka maribye ya onikisi eka swilo swo khoma maribye swa nsuku, va kovotla mavito ya vana va Israyele eka wona ku fana niloko ku kovotliwa mfungho.+ 7 A ma veka ehenhla ka swiphemu swa le makatleni swa efodi, ma va maribye ya xitsundzuxo eka vana va Israyele,+ hilaha Yehovha a leriseke Muxe hakona. 8 Kutani munhu la nga ni vuswikoti byo rhunga a endla xinkwamana xa le xifuveni,+ a xi endla ku fana ni efodi hi harhani ya nsuku ni ya wasi, voya bya phephulu,* lapi ro tshwuka ni lapi ra xiyimo xa le henhla leri lukiweke.+ 9 Matlhelo ya xona ya mune a ma ringana loko xi petsiwe hi le xikarhi. Va endla xinkwamana xa le xifuveni lexi loko xi petsiwile, ku leha ka xona ni ku anama ka xona a ku ringana ni ku anama ka xandla.* 10 Va veka tilayini ta mune ta maribye eka xona. Layini yo sungula a ku ri rhubi, topazi ni emeralda. 11 Layini ya vumbirhi a ku ri tukoyisi, safiri ni yaspere. 12 Layini ya vunharhu a ku ri ribye ra lexemu,* agata ni ametisita. 13 Layini ya vumune a ku ri krisolita, onikisi ni jeyida. A ma vekiwe eka swilo swo khoma maribye swa nsuku. 14 Maribye a ma fambisana ni mavito ya vana va Israyele va 12 naswona mavito a ma kovotliwe ku fana ni mfungho, vito ha rin’we ri yimela nyimba ha yin’we eka leta 12.

15 Kutani va endla tinketana leti lukiweke eka xinkwamana xa le xifuveni ku fana ni tintambhu ta nsuku wo tenga.+ 16 Hiloko va endla swilo swimbirhi swo khoma maribye swa nsuku ni swingwavila swimbirhi swa nsuku kutani va swi veka ehenhla ka tikhona timbirhi ta xinkwamana xa le xifuveni. 17 Endzhaku ka sweswo va nghenisa tintambhu timbirhi ta nsuku eka swingwavila swimbirhi leswi nga eka tikhona ta xinkwamana xa le xifuveni. 18 Kutani va nghenisa makumu mambirhi ya tintambhu timbirhi eka swilo swimbirhi swo khoma maribye naswona va swi veka emakatleni ya swiphemu swimbirhi emahlweni ka efodi. 19 Endzhaku ka sweswo, va endla swingwavila swimbirhi swa nsuku va swi veka emakumu mambirhi ya le hansi lama langutaneke ni efodi endzeni ka xinkwamana xa le xifuveni.+ 20 Kutani va endla swingwavila swin’wana swimbirhi swa nsuku va swi veka hi le mahlweni ka efodi, ehansi ka swiphemu swimbirhi swa makatla, ekusuhi ni laha ri hlanganisiweke kona, ehenhla ka bandhi ra efodi. 21 Eku heteleleni va bohelela xinkwamana xa le xifuveni hi ntambhu ya wasi eka swingwavila swa xona ni le ka swingwavila swa efodi leswaku xinkwamana xa le xifuveni xi tshama xi ri eka efodi ehenhla ka bandhi, hilaha Yehovha a leriseke Muxe hakona.

22 Hiloko a endla xiambalo xo pfumala mavoko lexi ambariwaka ehansi ka efodi, xi rhungiwe hi muluki wa malapi, hinkwaxo a xi endla hi harhani ya wasi.+ 23 Mbhovo wa xiambalo xo pfumala mavoko a wu ri exikarhi ka xona, ku fana ni mbhovo wa xiambalo lexi endliweke hi swinsimbhana. Mbhovo wa xona a wu rhungiwile leswaku xi nga handzuki. 24 Endzhaku ka sweswo va endla magrenada hi harhani ya wasi, voya bya phephulu* ni lapi ro tshwuka emakumu ka xiambalo xo pfumala mavoko, swi lukiwe swin’we. 25 Kutani va endla swingelengele hi nsuku wo tenga ivi va swi vekela exikarhi ka magrenada lama nga emakumu ka xiambalo xo pfumala mavoko, swi va exikarhi ka magrenada; 26 va vekela xingelengele xi landzeriwa hi grenada, va endlise sweswo emakumu hinkwawo ya xiambalo xo pfumala mavoko, swi ri swa ku tirha ha swona, hilaha Yehovha a leriseke Muxe hakona.

27 Va endla swiambalo swo leha hi lapi ra xiyimo xa le henhla swi rhungiwa hi muluki wa malapi, swi ri swa Aroni ni vana vakwe,+ 28 duku+ hi lapi ra xiyimo xa le henhla, maduku lama khavisiweke+ lama endliweke hi lapi ra xiyimo xa le henhla, swiburukwana+ leswi endliweke hi lapi leri lukiweke ra xiyimo xa le henhla, 29 bandhi leri endliweke hi malapi ya xiyimo xa le henhla lama lukiweke, harhani ya wasi, voya bya phephulu* ni lapi ro tshwuka swi lukiwe swin’we, hilaha Yehovha a leriseke Muxe hakona.

30 Eku heteleleni va endle xiphepherhele xo hatima, mfungho lowu kwetsimaka wa ku tinyiketela,* va xi endle hi nsuku wo tenga kutani eka xona va kovotla mfungho lowu nge: “Yehovha wa Kwetsima.”+ 31 Va vekela ntambhu leyi endliweke hi harhani ya wasi eka xona leswaku va ta yi tsimba eka duku, hilaha Yehovha a leriseke Muxe hakona.

32 Kutani ntirho hinkwawo wa tabernakela, ku nga tende ra nhlengeletano wu hela naswona Vaisrayele va endla hinkwaswo leswi Yehovha a swi leriseke Muxe.+ Va endle tano.

33 Hiloko va tisa tabernakela,+ tende+ ni swilo swa yona hinkwaswo eka Muxe: swo haka ha swona,+ tifureme ta yona,+ timhandzi ta yona,+ tiphuphu ta yona ni swo tlhoma tiphuphu swa yona;+ 34 swifunengeto swa yona swa madzovo ya makhuna lama pendiweke ma va yo tshwuka,+ swifunengeto swa yona swa madzovo ya tintini,* khetheni leri hambanisaka;+ 35 areka ya Vumbhoni ni timhandzi ta yona+ ni xifunengeto xa yona;+ 36 tafula, swibya swa rona hinkwaswo+ ni xinkwa xo kwetsima; 37 xo tlhoma timboni xa nsuku wo tenga, timboni ta xona,+ timboni ta xona leti longoloxiweke hi layini ni switirhisiwa swa xona hinkwaswo+ ni mafurha ya ku voninga;+ 38 altari+ ya nsuku, mafurha yo kwetsima,+ murhi wo nun’hwela+ ni khetheni+ ro pfala ndhawu yo nghena ha yona etendeni; 39 altari ya koporo+ ni sefo ya yona ya koporo, timhandzi ta yona,+ swibya swa yona hinkwaswo,+ xo hlambela ni xilo lexi xi tshamaka ehenhla ka xona;+ 40 malapi yo biyela xivava,* tiphuphu ta xona ni swo tlhoma tiphuphu swa xona,+ khetheni+ ro pfala nyangwa ya xivava, tintambhu ta tende ni timhingu ta rona+ ni swilo hinkwaswo leswi a swi ta tirhisiwa etabernakeleni, ku nga tende ra nhlengeletano; 41 swiambalo leswi lukiweke kahle swa ku tirha ha swona endhawini yo kwetsima, swiambalo swo kwetsima swa muprista Aroni+ ni swiambalo swa vana vakwe lava nga ta va vaprista.

42 Vaisrayele va endle ntirho hinkwawo hilaha Yehovha a leriseke Muxe hakona.+ 43 Loko Muxe a kambela ntirho wa vona hinkwawo, u vone leswaku va wu endle hilaha Yehovha a leriseke hakona; hiloko Muxe a va katekisa.

40 Kutani Yehovha a ku eka Muxe: 2 “Hi siku ro sungula ra n’hweti yo sungula, u ta yimisa tabernakela, ku nga tende ra nhlengeletano.+ 3 Eka yona veka areka ya Vumbhoni+ kutani u pfala laha Areka yi nga kona hi khetheni.+ 4 U ta nghenisa tafula,+ u lulamisa swilo leswi vekiwaka eka rona kutani u nghenisa xo tlhoma timboni+ kutani u lumeka timboni ta xona.+ 5 Kutani veka altari ya nsuku ya murhi wo nun’hwela+ emahlweni ka areka ya Vumbhoni, u veka khetheni ro pfala ndhawu yo nghena ha yona etabernakeleni.+

6 “U ta veka altari ya gandzelo ro hisiwa+ emahlweni ka nyangwa ya tabernakela, ku nga tende ra nhlengeletano 7 naswona u veka xo hlambela exikarhi ka tende ra nhlengeletano ni altari ivi u chela mati eka xona.+ 8 Kutani u endla xivava*+ xi ri rhendzela, u endla nyangwa ya xivava hi khetheni.+ 9 Endzhaku ka sweswo u ta teka mafurha yo kwetsima+ kutani u chela tabernakela ni swilo hinkwaswo leswi nga eka yona,+ u yi hlawulekisa ni swibya swa yona hinkwaswo leswaku yi va nchumu wo kwetsima. 10 U ta chela altari ya gandzelo ro hisiwa hi mafurha ni swilo hinkwaswo leswi nga eka yona kutani u yi hlawulekisa, leswaku yi va altari yo kwetsima ngopfu.+ 11 Endzhaku ka sweswo u chela xo hlambela ni lexi nga ta tshama ehenhla ka xona hi mafurha kutani u xi hlawulekisa.

12 “Kutani u tisa Aroni ni vana vakwe ekusuhi ni nyangwa ya tende ra nhlengeletano u va hlambisa hi mati.+ 13 U ta ambexa Aroni swiambalo swo kwetsima+ u n’wi chela hi mafurha+ kutani u n’wi hlawulekisa, u ta va muprista wa mina. 14 Endzhaku ka sweswo tshineta vana vakwe ekusuhi, u va ambexa swiambalo swo leha.+ 15 U ta va chela hi mafurha hilaha u endleke hakona eka tata wa vona+ leswaku va va vaprista va mina naswona va ta va vaprista va mina, vona swin’we ni vatukulu va vona hilaha ku nga heriki.”+

16 Muxe a endla hinkwaswo leswi Yehovha a n’wi leriseke swona.+ U endle tano.

17 Hi n’hweti yo sungula, hi lembe ra vumbirhi, hi siku ro sungula ra n’hweti tabernakela yi yimisiwile.+ 18 Loko Muxe a yimisa tabernakela, u veke swo tlhoma tifureme ta yona+ ehansi, a veka tifureme,+ a nghenisa timhandzi ta yona+ kutani a yimisa tiphuphu ta yona. 19 U andlale tende+ ehenhla ka tabernakela kutani a veka xo funengeta+ tende ehenhla ka rona, hilaha Yehovha a n’wi leriseke hakona.

20 Endzhaku ka sweswo a teka maribye ya swiphepherhele swa Vumbhoni+ a ma veka endzeni ka Areka+ hiloko a veka timhandzi+ eka Areka kutani a veka xifunengeto+ ehenhla ka Areka.+ 21 U nghenise Areka etabernakeleni kutani a hayeka khetheni+ a pfala laha areka ya Vumbhoni a yi ri kona,+ hilaha Yehovha a n’wi leriseke hakona.

22 Endzhaku ka sweswo, a veka tafula+ etendeni ra nhlengeletano hi le n’walungwini wa tabernakela ehandle ka khetheni,* 23 kutani a xaxameta xinkwa+ etafuleni hi ndlela ya kona emahlweni ka Yehovha, hilaha Yehovha a n’wi leriseke hakona.

24 A veka xo tlhoma timboni+ etendeni ra nhlengeletano emahlweni ka tafula, etlhelweni ra le dzongeni ra tabernakela. 25 A lumeka timboni+ emahlweni ka Yehovha, hilaha Yehovha a n’wi leriseke hakona.

26 Endzhaku ka sweswo, a veka altari ya nsuku+ etendeni ra nhlengeletano emahlweni ka khetheni, 27 leswaku musi wa murhi wo nun’hwela+ wu ta tuvika eka yona+ hilaha Yehovha a n’wi leriseke hakona.

28 Kutani a veka khetheni+ ro pfala ndhawu yo nghena ha yona etabernakeleni.

29 A veka altari ya gandzelo ro hisiwa+ enyangweni ya tabernakela, ku nga tende ra nhlengeletano, leswaku a ta endla gandzelo ro hisiwa+ ni gandzelo ra mavele eka yona hilaha Yehovha a n’wi leriseke hakona.

30 Hiloko a veka xo hlambela exikarhi ka tende ra nhlengeletano ni altari ivi a chela mati yo hlamba eka xona.+ 31 Muxe na Aroni ni vana vakwe a va hlamba mavoko ni milenge eka xona. 32 Nkarhi hinkwawo loko va ya etendeni ra nhlengeletano kumbe va tshinela ekusuhi ni altari a va hlamba,+ hilaha Yehovha a leriseke Muxe hakona.

33 Eku heteleleni a endla xivava+ xi rhendzela tabernakela ni altari kutani a endla nyangwa wa xivava+ hi khetheni.

Hiloko Muxe a heta ntirho. 34 Papa ri sungula ku funengeta tende ra nhlengeletano kutani ku vangama ka Yehovha ku tata tabernakela.+ 35 Muxe a a nga swi koti ku nghena etendeni ra nhlengeletano hikuva papa a ri tshame ehenhla ka tende naswona ku vangama ka Yehovha a ku tate tabernakela.+

36 Loko papa ri suka ehenhla ka tabernakela, Vaisrayele a va hahlula mixaxa hinkwako lomu a va famba va yima kona.+ 37 Kambe loko papa ri nga suki, a va nga yi hahluli mixaxa ku fikela siku leri papa ri nga ta suka ha rona.+ 38 Hikuva papa ra Yehovha a ri ri ehenhla ka tabernakela ninhlikanhi, kasi nivusiku ndzilo a wu va ehenhla ka yona naswona vanhu hinkwavo va Israyele a va vona swilo leswi hinkwaswo lomu a va famba va yima kona.+