NEHEMIYA

1 Lawa i marito ya Nehemiya*+ n’wana wa Hakaliya: Hi n’hweti ya Kislevhe,* hi lembe ra vu-20, a ndzi ri endlwini ya vuhosi eXuxani.*+ 2 Hi nkarhi wolowo Hanane,+ un’wana wa vamakwerhu a fika ni vavanuna van’wana lava humaka eYuda, kutani ndzi va vutisa mayelana ni Vayuda lava vuyeke hi le vuhlongeni+ ni hi muti wa Yerusalema. 3 Kutani va ku: “Lava nga exifundzheni lava vuyeke hi le vuhlongeni va le maxangwini naswona va terisa vusiwana.+ Makhumbi ya Yerusalema ma mbundzumuxiwile+ naswona tigede ta wona ti hisiwile.”+

4 Loko ndzi twa marito lawa, ndzi tshame ehansi ndzi sungula ku rila. Ndzi hete masiku yo tala ndza ha rila, ndzi titsona swakudya+ ni ku khongela eka Xikwembu xa le tilweni, 5 ndzi ku: “Yehovha Xikwembu xa le tilweni, Xikwembu lexikulu ni lexi xiximekaka, lexi hlayisaka ntwanano wa xona naswona xi rhandzaka lava xi rhandzaka va tlhela va yingisa swileriso swa xona,+ 6 ndzi kombela u rhiya ndleve naswona u pfula matihlo, u yingisa xikhongelo lexi mina nandza wa wena ndzi xi endlaka eka wena namuntlha. Ndzi khongela vusiku ni nhlikanhi,+ ndzi khongelela malandza ya wena ku nga Vaisrayele, ndzi phofula swidyoho leswi Vaisrayele va swi endleke. Mina ni varikwerhu* hi dyohile.+ 7 Entiyisweni hi ku dyoherile+ hi ku tshika swileriso, milawu ni swiboho leswi u swi nyikeke Muxe nandza wa wena.+

8 “Ndzi kombela u tsundzuka rito leri u nga ri byela Muxe nandza wa wena, u ku: ‘Loko mi nga tshembeki, ndzi ta mi hangalasa exikarhi ka matiko.+ 9 Kambe loko mi vuya eka mina mi tlhela mi yingisa swileriso swa mina, hambiloko vanhu va wena lava hangalakeke va ri emakumu ka misava, ndzi ta va hlengeleta+ ndzi va veka endhawini leyi ndzi yi hlawuleke leswaku vito ra mina ri dzunisiwa eka yona.’+ 10 Vona i malandza ya wena ni vanhu va wena lava u va poniseke hi ntamu wa wena lowukulu ni hi voko ra wena ra matimba.+ 11 Yehovha, ndzi kombela u rhiya ndleve u yingisa xikhongelo xa nandza wa wena ni swikhongelo swa malandza ya wena lama xiximaka vito ra wena, ndzi kombela u endla leswaku swi ndzi fambela kahle namuntlha, u endla leswaku wanuna loyi a ndzi twela vusiwana.”+

Hi nkarhi wolowo a ndzi ri mucheri wa vhinyo ya hosi.+

2 Hi n’hweti ya Nisani,* hi lembe ra vu-20+ ra ku fuma ka Hosi Atazekiseki,+ a ku vekiwe vhinyo emahlweni ka yona, kutani ndzi teka vhinyo ndzi yi nyika hosi+ hilaha a ndzi tolovele ku endla hakona. Kambe a ndzi nga si tshama ndzi va ni gome emahlweni ka yona. 2 Kutani hosi yi ku eka mina: “Hikwalaho ka yini u languteka u tsanile ku ri hi ku a wu vabyi? Ku fanele ku ri ni lexi ku dyaka embilwini ya wena.” Hiloko ndzi sungula ku chuha.

3 Kutani ndzi hlamula hosi ndzi ku: “Hosi a yi hanye hilaha ku nga heriki! Ndzi ni gome hikuva muti, ndhawu leyi vakokwa wa mina va lahliweke eka yona, yi hundzuke marhumbi naswona tigede ta wona ti hisiwile.”+ 4 Hiloko hosi yi ku: “Xana u lava ndzi ku endlela yini?” Ndzi namba ndzi khongela eka Xikwembu xa le tilweni.+ 5 Endzhaku ka sweswo ndzi hlamula hosi ndzi ku: “Loko hosi yi swi tsakela naswona loko nandza wa wena a kume tintswalo eka wena, ndzi pfumelele ndzi ya eYuda, emutini lowu vakokwa wa mina va lahliweke eka wona, leswaku ndzi ya wu pfuxa.”+ 6 Kutani hosi yi ndzi vutisa yi tshame na nkosikazi yi ku: “Loko u famba u ta ya heta nkarhi wo tanihi kwihi naswona u ta vuya rini?” Hiloko ndzi yi byela leswaku ndzi ta vuya rini,+ kutani hosi yi ndzi tshunxa ndzi famba.+

7 Kutani ndzi byela hosi ndzi ku: “Loko hosi yi swi tsakela, ndzi kombela mapapila lawa ndzi nga ta ma nyika tindhuna ta xifundzha lexi nga eNtsungeni wa Nambu,+ leswaku ti ndzi pfumelela ndzi hundza ndzi ya fika eYuda 8 ni papila leri yaka eka Asafa muhlayisi wa Nsimu ya Hosi, leswaku a ndzi nyika timhandzi ndzi ta aka tinyangwa ta Tempele ni makhumbi ya muti+ ni yindlu leyi ndzi nga ta tshama eka yona.” Kutani hosi yi ndzi nyika wona,+ hikuva Xikwembu a xi ri na mina.*+

9 Hiloko ndzi hetelela ndzi fike eka tindhuna ta xifundzha lexi nga eNtsungeni wa Nambu, ndzi ti nyika mapapila lama humaka eka hosi. Hosi yi tlhela yi ndzi nyika ni tindhuna ta vuthu ni vagadi va tihanci leswaku va ndzi heleketa. 10 Loko Sanibalati+ wa Muhoroni na Tobiya+ nandza loyi a nga Muamoni+ va swi twa, a va nga tsakanga hi ku tiva leswaku ku ni un’wana a nga tela ku ta pfuna Vaisrayele.

11 Hiloko ndzi fika eYerusalema, ndzi tshama masiku manharhu. 12 Kutani ndzi pfuka nivusiku ni vavanuna va nga ri vangani, a ndzi swi byelanga munhu leswi Xikwembu xanga xi nga ndzi byela leswaku ndzi swi endla eYerusalema naswona a ndzi nga ri na xifuwo xin’wana handle ka lexi a ndzi xi gadile ntsena. 13 Hiloko ndzi huma nivusiku hi Gede ya le Nkoveni+ emahlweni ka Xihlovo xa Nyoka Leyikulu ndzi ya eGedeni ya Tinhulu ta Nkuma,+ ndzi kambela makhumbi ya muti wa Yerusalema lama hirimuxiweke ni tigede ta wona leti hisiweke.+ 14 Kutani ndzi hundza ndzi ya eGedeni ya Xihlovo+ ni le Xidziveni xa Hosi, kambe a ku nga ri na ndhawu yo hundza ya xifuwo lexi a ndzi xi gadile. 15 Hambiswiritano ndzi ye emahlweni ndzi khupuka hi nkova+ vusiku byebyo, ndzi ri karhi ndzi kambela khumbi, endzhaku ka sweswo ndzi vuya ndzi nghena hi Gede ya le Nkoveni.

16 Vapfuni va tindhuna+ a va nga ku tivi lomu ndzi nga ya kona ni leswaku ndzi ya endla yini, hikuva a ndzi nga si va byela nchumu Vayuda, vaprista, tindhuna, vapfuni va tindhuna ni hinkwavo lava endlaka ntirho. 17 Eku heteleleni ndzi va byela ndzi ku: “Ma xi vona xiyimo lexi xo biha lexi hi nga eka xona, Yerusalema i marhumbi ni tigede ta wona ti hisiwile. Tanani, a hi pfuxeni makhumbi ya Yerusalema leswaku hi ta wisa ku hlekuriwa.” 18 Kutani ndzi va byela ndlela leyi Xikwembu xanga xi ndzi seketeleke ha yona,+ ni marito lawa hosi yi ndzi byeleke wona.+ Hiloko va ku: “Hi nga ha yimayimi, a hi sunguleni ku aka.” Kutani va khutazana ku endla ntirho lowunene.+

19 Loko Sanibalati wa Muhoroni, Tobiya+ nandza loyi a nga Muamoni+ na Gexemi wa Muarabiya+ va twa mhaka leyi, va sungula ku hi hlekula+ ni ku hi monya va ku: “Mi endla yini? Xana mi xandzukela hosi?”+ 20 Hambiswiritano ndzi va hlamula ndzi ku: “Xikwembu xa le tilweni hi xona lexi nga ta hi pfuna,+ hina malandza ya xona hi ta aka; kambe n’wina a mi na xiavelo, hambi ku ri timfanelo eYerusalema.”+

3 Eliyaxibi+ muprista lonkulu ni vamakwavo lava nga vaprista, va sungula ku aka Gede ya Tinyimpfu.+ Va yi nyikela eka Xikwembu+ va tlhela va hoxa ni mavanti ya yona; va yi nyikele ku ya fika eXihondzweni xa Miya+ ni ku ya fika eXihondzweni xa Hananele.+ 2 Ekusuhi na vona a ku ri ni vavanuna va le Yeriko+ va ri eku akeni; naswona ekusuhi na vona a ku aka Zakuru n’wana wa Imri.

3 Vana va Hasena va ake Gede ya Tihlampfi;+ va yi ake hi timhandzi+ kutani va hoxa mavanti ya yona ni swo goga ha swona. 4 Ekusuhi na vona Meremoto+ n’wana wa Yuriya n’wana wa Hakozi, a a endla ntirho wa ku lunghisa, kasi etlhelo ka vona Mexulama+ n’wana wa Berakiya n’wana wa Mexezabele na yena a a endla ntirho wa ku lunghisa, etlhelo ka vona Sadoki n’wana wa Bana a a endla ntirho wa ku lunghisa. 5 Vanhu va le Tekowa+ na vona a va endla ntirho wa ku lunghisa ekusuhi na vona, kambe lava a va fuwile exikarhi ka vona va ale ku endla ntirho lowu va averiweke wona hi tindhuna.

6 Yoyada n’wana wa Pasiya na Mexulama n’wana wa Besodeya va lunghise Gede ya Muti wa Khale;+ va yi aka hi timhandzi kutani va hoxa mavanti ya yona ni swo goga* swa yona. 7 Melatiya wa le Gibiyoni+ na Yadoni wa le Meronoti a va endla ntirho wa ku lunghisa ekusuhi na vona, vavanuna lava, a va huma eGibiyoni ni le Mizpa+ naswona a va ri ehansi ka ndhuna ya xifundzha lexi nga eNtsungeni wa Nambu.+ 8 Ekusuhi na vona Uziyele n’wana wa Haraya, loyi a kota ku endla swilo swa nsuku, a a endla ntirho wa ku lunghisa, ekusuhi na yena a ku ri na Hananiya un’wana wa lava kotaka ku endla mafurha yo nun’hwela a a endla ntirho wa ku lunghisa; kutani va andlala maribye ya xiphepherhele endzeni ka muti wa Yerusalema ku ya fika eKhumbini ro Anama.+ 9 Ekusuhi na vona, Refaya n’wana wa Huru, hosana ya xiphemu xa muganga wa Yerusalema, a a endla ntirho wa ku lunghisa. 10 Ekusuhi na vona Yedaya n’wana wa Harumafa, a a endla ntirho wa ku lunghisa emahlweni ka yindlu yakwe, ekusuhi na yena Hatuxi n’wana wa Haxabiniya a a endla ntirho wa ku lunghisa.

11 Malikiya n’wana wa Harimi+ na Haxubu n’wana wa Pahata-mowabu,+ va lunghise xiyenge xin’wana xa khumbi ra muti ku katsa ni Xihondzo xa Switiko.+ 12 Ekusuhi na vona Xalumu n’wana wa Halohexe, hosana ya hafu ya muganga wa Yerusalema, a a endla ntirho wa ku lunghisa ni vana vakwe va vanhwanyana.

13 Hanunu ni vanhu va le Zanowa+ va lunghise Gede ya Nkova;+ va yi aka kutani va hoxa mavanti ya yona ni swo goga* swa yona, va tlhela va pfuxa ni khumbi leri a ri lehe kwalomu ka 445 wa timitara* ku fika eGedeni ya Tinhulu ta Nkuma.+ 14 Malikiya n’wana wa Rekabi, hosana ya muganga wa Beta-hakarimi+ u lunghise Gede ya Tinhulu ta Nkuma; a yi aka a tlhela a hoxa mavanti ya yona ni swo goga* swa yona.

15 Xaluni n’wana wa Kolihoze, hosana ya muganga wa Mizpa+ u lunghise Gede ya Xihlovo;+ a yi fulela, a hoxa mavanti ya yona ni swo goga* swa yona, a tlhela a lunghisa ni khumbi ra Xidziva+ xa Musele ku ya fika eNtangeni wa Hosi+ ni ku ya fika eSwitepisini+ leswi humaka eMutini wa Davhida.+

16 Endzhaku ka yena Nehemiya n’wana wa Azibuku, hosana ya hafu ya muganga wa Beta-suru,+ u lunghise ku suka emahlweni ka Swilahlo swa Davhida+ ku ya fika exidziveni+ lexi akiweke ni ku ya fika eNdlwini ya Tinhenha.

17 Endzhaku ka yena Valevhi na vona a va ri karhi va lunghisa: Rehumi n’wana wa Bani; ekusuhi na yena Haxabiya hosana ya hafu ya muganga wa Keyila,+ u endle ntirho wo lunghisa a yimela muganga wa yena. 18 Endzhaku ka yena vamakwavo na vona a va ri eku lunghiseni: A va rhangeriwe hi Bavhayi n’wana wa Henadada, hosana ya hafu ya muganga wa Keyila.

19 Endzhaku ka yena Ezere n’wana wa Yexuwa,+ hosana ya le Mizpa, a a lunghisa xiphemu lexi nga ekusuhi ni Vuhlayiselo bya Matlhari laha ku nga ni Xo Tshega Khumbi ra Muti.+

20 Endzhaku ka yena Baruku n’wana wa Zabayi+ a a tirha hi ku tiyimisela, a lunghisa ku suka eka Xo Tshega Khumbi ra Muti ku ya fika enyangweni ya yindlu ya Eliyaxibi+ muprista lonkulu.

21 Endzhaku ka yena Meremoto+ n’wana wa Yuriya n’wana wa Hakozi, a a lunghisa xiphemu xin’wana ku suka enyangweni ya yindlu ya Eliyaxibi ku ya fika emakumu ka yona.

22 Endzhaku kakwe vaprista, lava a va huma emugangeni wa Yordani,*+ na vona a va endla ntirho wo lunghisa. 23 Endzhaku ka vona Benjamini na Haxubu a va lunghisa emahlweni ka yindlu ya vona. Endzhaku ka vona Azariya n’wana wa Maseya n’wana wa Ananiya a a lunghisa ekusuhi ni yindlu yakwe. 24 Endzhaku ka yena Binuyi n’wana wa Henadada a a lunghisa xiphemu xin’wana ku suka endlwini ya Azariya ku ya fika eka Xo Tshega Khumbi ra Muti.+

25 Endzhaku ka yena Palala n’wana wa Uzayi a a lunghisa emahlweni ka Xo Tshega Khumbi ra Muti ni xihondzo lexi sukaka eNdlwini ya Hosi+ lexi nga ehenhla eXivaveni* xa Varindzi.+ Endzhaku ka yena a ku ri na Pedaya n’wana wa Paroxi.+

26 Vatirhi va le tempeleni*+ lava a va tshama eOfeli+ va lunghise ku ya fika emahlweni ka Gede ya Mati+ evuxeni ni xihondzo lexi hlohlomukeke.

27 Endzhaku ka vona Vatekowa+ va lunghise xiphemu xin’wana ku suka emahlweni ka xihondzo lexikulu lexi hlohlomukeke ku ya fika ekhumbini ra Ofeli.

28 Vaprista a va lunghisa ehenhla ka Gede ya Tihanci,+ un’wana ni un’wana a a lunghisa emahlweni ka yindlu yakwe.

29 Endzhaku ka vona Sadoki+ n’wana wa Imere u lunghise emahlweni ka yindlu yakwe.

Kasi endzhaku ka yena Xemaya n’wana wa Xekaniya, muhlayisi wa Gede ya le Vuxeni+ na yena u lunghisile.

30 Endzhaku ka yena Hananiya n’wana wa Xelemiya na Hanunu n’wana wa vutsevu wa Salafa va lunghise xiphemu xin’wana.

Endzhaku ka yena Mexulama+ n’wana wa Berakiya u lunghise emahlweni ka holo ya yena.

31 Endzhaku ka yena Malikiya, un’wana wa lava kotaka ku endla swilo swa nsuku, u lunghise ku ya fika endlwini ya vatirhi va le tempeleni*+ ni vaxavisi, emahlweni ka Gede yo Kambela ni ku ya fika ekamareni ra le henhla leri nga ekhonweni.

32 Vaxavisi ni lava kotaka ku endla swilo swa nsuku va lunghise ndhawu leyi nga exikarhi ka kamara ra le henhla leri nga ekhonweni ni Gede ya Tinyimpfu.+

4 Loko Sanibalati+ a twa leswaku hi pfuxa khumbi, u hlundzuke ngopfu, kutani a sungula ku hlekula Vayuda. 2 Hiloko a vulavula ni vamakwavo ni masocha ya Samariya, a ku: “Xana vambuyangwana lava va Vayuda va ringeta ku endla yini? Xana va ta wu kota ntirho lowu? Xana va ta endla magandzelo? Xana va ta swi kota ku heta hi siku rin’we? Xana va ta swi kota ku kuma maribye lamanene eka nhulu ya maribye lama nga tshwa?”+

3 Kutani Tobiya+ wa Muamoni+ loyi a a yime kusuhi na yena a ku: “Loko mhungubye yo khandziya khumbi leri va ri akeke hi maribye ri ta wa.”

4 Xikwembu xa hina, hi yingise hikuva hi hundzuke xihlekiso,+ onge leswi va hi endlaka swona swi nga endleka ni le ka vona,+ va nyikete va khomiwa va ya evuhlongeni. 5 Naswona u nga honisi xidyoho xa vona kumbe ku va rivalela,+ hikuva va rhukane lava nga le ku akeni.

6 Hiloko hi ya emahlweni ni ku aka khumbi, kutani ri hlangana kambe a ri nga si hela ku ya ehenhla, lava akaka a va aka hi ku tiyimisela.

7 Loko Sanibalati, Tobiya,+ Vaarabiya,+ Vaamoni ni Vaaxidodo+ va twa leswaku ntirho wo pfuxa makhumbi ya Yerusalema wu ya emahlweni naswona wu le kusuhi ni ku hela, va hlundzuka ngopfu. 8 Hiloko va boha kungu ro ta va ta lwa na Yerusalema ni leswaku va kavanyeta ntirho. 9 Kambe hi khongele eka Xikwembu xa hina hi tlhela hi veka varindzi vusiku ni nhlikanhi leswaku va hi sirhelela.

10 Hambiswiritano, Vayuda a va ku: “Vatirhi va hele matimba naswona tinhulu ta khumbi ra khale ti tele; a hi nge pfuki hi hetile ku aka khumbi leri.”

11 Valala va hina a va ku: “Hi ta ngungumela hi nghena va nga hi voni kutani hi va dlaya hi yimisa ntirho.”

12 Loko Vayuda lava va tshamaka ekusuhi ni valala va fika, va hi byele hi ku phindhaphindha va ku: “Va ta hi hlasela va huma ematlhelo hinkwawo.”

13 Hiloko ndzi veka vavanuna endzhaku ka khumbi leri a ri ri ehansi laha valala va nga nghenaka ha kona, ndzi va veka hi ku ya hi mindyangu ya vona va khome mabanga ya vona, matlhari ya vona ni mavurha* ya vona. 14 Loko ndzi vona leswaku va chava, ndzi suka ndzi yima kutani ndzi vulavula ni tindhuna,+ vapfuni va tindhuna ni vanhu hinkwavo ndzi ku: “Mi nga va chavi.+ Tsundzukani Yehovha hikuva i Xikwembu lexikulu lexi nga ni matimba swinene;+ lwelani vamakwenu, vana va n’wina, vasati va n’wina ni makaya ya n’wina.”

15 Endzhaku ka loko valala va hina va twe leswaku ha ri tiva kungu ra vona ni leswaku Xikwembu xa ntiyiso xi pfilunganye makungu ya vona, hinkwerhu hi tlhelele entirhweni wo aka khumbi. 16 Ku sukela esikwini rero, hafu ya vatirhi va mina a yi aka+ kasi hafu leyin’wana a yi khoma matlhari, switlhangu, mavurha naswona yi ambale swiambalo leswi endliweke hi swinsimbana. Tihosana+ a ti yima endzhaku ka Vayuda hinkwavo 17 lava a va ri eku akeni ka khumbi. Lava a va rhwala nhundzu a va tirha hi voko rin’we kasi lerin’wana a ri khome tlhari. 18 Nakambe muaki un’wana ni un’wana a a aka a tlhome banga enyongeni naswona muchayi wa nanga+ a yime etlhelo ka mina.

19 Hiloko ndzi byela tindhuna ni vapfuni va tona ni vanhu hinkwavo ndzi ku: “Ntirho i wukulu naswona wu tele, kasi na hina hi hangalakile ekhumbini hi le kule na le kule. 20 Loko mi twa mpfumawulo wa nanga, tanani laha hi nga kona. Xikwembu xa hina xi ta hi lwela.”+

21 Hiloko hi ya emahlweni hi tirha loko hafu leyin’wana yi khome matlhari, ku sukela hi vurhonga ku ya fika loko tinyeleti ti huma. 22 Hi nkarhi wolowo ndzi byele vanhu ndzi ku: “Vavanuna ni malandza ya vona va nga suki eYerusalema, va ta cincana leswaku va hi rindza nivusiku va tlhela va tirha ninhlikanhi.” 23 Loko ku ri mina ni vamakwerhu, vatirhi+ ni varindzi lava a va ri na mina, a hi nga hluvuli swiambalo swa hina naswona un’wana ni un’wana a a tshama a khome tlhari hi voko rakwe ra xinene.

5 Hambiswiritano, a ku ri ni vavanuna ni vasati va vona lava a va ri ni xirilo lexikulu hikwalaho ka vamakwavo va Vayuda.+ 2 Van’wana a va ku: “Hina ni vana va hina hi tele, hi fanele hi kuma mavele leswaku hi ta dya hi hanya.” 3 Van’wanyana a va ku: “Masimu ya hina ya mavele ni ya madiriva ku katsa ni tiyindlu ta hina hi swi lombisile hi nkarhi lowu a ku kayivela swakudya leswaku hi ta kuma swo dya.” 4 Kasi van’wana a va ku: “Hina hi lombise masimu ya hina ya mavele ni ya madiriva leswaku hi ta kuma mali yo hakela muthelo* wa hosi.+ 5 Hi vana va munhu un’we, hi vamakwerhu, ni vana va hina va fana ni va vona; kambe hi boheka ku endla vana va hina mahlonga, loko ku ri lava vaxisati vona se i mahlonga.+ Kambe a hi koti ku endla nchumu hikuva masimu ya hina ya mavele ni ya madiriva ma le mavokweni ya van’wana.”

6 Ndzi hlundzuke ngopfu loko ndzi twa xirilo xa vona ni marito lawa. 7 Kutani ndzi sungula ku ehleketisisa hi mhaka leyi, hiloko ndzi swi xiya leswaku tindhuna ni vapfuni va tona va ni nandzu, ivi ndzi ku eka vona: “Hinkwenu ka n’wina mi lava ntswalo eka vamakwenu.”+

Hiloko ndzi hlela nhlengeletano yo lunghisa mhaka leyi. 8 Kutani ndzi ku eka vona: “Hi endle hinkwaswo leswaku hi kutsula Vayudakulorhi lava a va xavisiwe eka vamatiko; kambe xana mi lava ku tlhela mi xavisa vamakwenu+ leswaku hi ta tlhela hi va kutsula?” Hiloko va miyela va ku whii! 9 Kutani ndzi ku: “Leswi mi swi endlaka a hi swinene. Hikwalaho ka yini mi nga chavi Xikwembu+ xa hina leswaku va matiko, lava nga valala va hina va ta tshika ku hi hlekula? 10 Ku tlula kwalaho, mina ni vamakwerhu ni vatirhi va mina hi va lomba mali ni mavele. Ndzi kombela hi tshika ku lombisa hi ntswalo.+ 11 Namuntlha ndzi kombela mi va tlherisela masimu ya vona,+ masimu ya vona ya madiriva, ya mitlhwari, tiyindlu ta vona, ku katsa ni ntswalo* wa mali, mavele, vhinyo leyintshwa ni mafurha, leswi mi swi tekeke eka vona tanihi ntswalo.”

12 Hiloko va ku: “Hi ta va tlherisela naswona a hi nge lavi nchumu eka vona. Hi ta endla leswi u swi vulaka.” Kutani ndzi vitana vaprista leswaku vavanuna lava va hlambanya emahlweni ka vona leswaku va ta endla hilaha va tshembiseke hakona. 13 Nakambe ndzi tlhele ndzi dzudza xiambalo xa mina kutani ndzi ku: “Onge Xikwembu xa ntiyiso xi nga n’wi dzudza hi ndlela leyi endlwini yakwe ni le ka leswi a nga na swona, munhu un’wana ni un’wana loyi a nga xi hetisisiki xitshembiso lexi naswona a a dzudziwe hi ndlela leyi a sala a nga ri na nchumu.” Hiloko vanhu hinkwavo va ku: “Amen!”* Kutani va sungula ku dzunisa Yehovha, ni ku endla leswi va swi tshembiseke.

14 Ku sukela esikwini leri hosi yi ndzi vekeke ku va ndhunankulu+ etikweni ra Yuda, hi lembe ra vu-20+ ra ku fuma ka Hosi Atazekiseki+ ku ya eka ra vu-32+ ra ku fuma ka yona, ku nga malembe ya 12, hi nkarhi wolowo mina ni vamakwerhu a hi nga dyi swakudya leswi nyikiwaka tindhunankulu.+ 15 Kambe tindhunankulu leti veke kona ndzi nga si va ndhunankulu, a ti tikisela vanhu, hi siku a ti lava swiphemu swa silivhere* swa 40, swa xinkwa ni vhinyo. Ni vatirhi va tona a va tshikilela vanhu. Kambe mina a ndzi swi endlanga sweswo+ hikwalaho ko chava Xikwembu.+

16 Ku engetela kwalaho, ndzi pfunetile eku akiweni ka khumbi leri naswona a hi tekanga nsimu ya munhu;+ vatirhi va mina hinkwavo na vona a va ri ku akeni. 17 A ku ri ni Vayuda ni vapfuneti va tindhuna va 150 lava a va dya na mina ku katsa ni vanhu lava humaka ematikweni man’wana. 18 Siku ni siku a hi swekeriwa homu, tinyimpfu ta tsevu to nona ni tihuku leswi a ndzi swi hakelela,* kasi endzhaku ka masiku ya khume a hi kuma vhinyo yo tala hi mixaka ya yona. Hambiswiritano, a ndzi swi koxanga swakudya leswi nyikiwaka ndhunankulu hikuva ana se vanhu a va tikeriwa swinene. 19 Ndzi kombela u ndzi tsundzuka Xikwembu xanga, u tsundzuka mitirho ya mina hinkwayo leyinene leyi ndzi yi endleleke vanhu lava.+

6 Loko Sanibalati, Tobiya,+ Gexemi wa Muarabiya+ ni valala va hina hinkwavo va byeriwa leswaku ndzi hete ku pfuxa khumbi+ ni leswaku a ka ha salanga ndhawu leyi nga akiwangiki (hambileswi a ndzi nga si hoxa mavanti etinyangweni),+ 2 hiloko Sanibalati na Gexemi va rhumela rito eka mina va ku: “Tana hi ta hlangana eka yin’wana ya miganga ya Rivala ra Ono+ hi nkarhi lowu hi nga ta twanana ha wona.” Kambe a va bohe xikungu xa ku ndzi vavisa. 3 Hiloko ndzi rhumela vanhu eka vona ndzi ku: “Ndzi khomekile hi ntirho lowukulu, a ndzi nge swi koti ku ta. Xana ntirho wu fanele wu yima hikwalaho ka n’wina?” 4 Va ndzi rhumele rito leri fanaka ka mune, kambe ndzi va hlamule hi ndlela leyi fanaka.

5 Sanibalati a tlhela a rhumela nandza wakwe eka mina ra vuntlhanu ni hungu leri fanaka a tamele papila leri nga lemiwangiki. 6 Eka rona a ku tsariwe leswi: “Se swa tiveka exikarhi ka matiko, na Gexemi+ u vula tano, leswaku wena ni Vayuda mi lava ku xandzuka.+ Hi swona leswi endlaka mi aka khumbi; naswona hi ku ya hi swiviko leswi, wena u ta va hosi ya vona. 7 U tlhele u hlawula vaprofeta leswaku va byela vanhu hi wena eYerusalema hinkwaro va ku, ‘Ku ni hosi eYuda!’ Kutani mhaka leyi yi ta tivisiwa hosi. Tana hi ta kanerisana hi mhaka leyi.”

8 Hambiswiritano, ndzi te: “Swilo leswi u swi vulaka hinkwaswo a swi kona; swo huma enhlokweni ya wena.” 9 Hikuva hinkwavo ka vona a va ringeta ku hi chavisa va ku: “Va ta hela matimba, ntirho a wu nge yi mahlweni.”+ Xikwembu xanga, ndza ku kombela ndzi nyike matimba.+

10 Kutani ndzi ya endlwini ya Xemaya n’wana wa Delaya, n’wana wa Mehetabele hi nkarhi lowu a nga humi endlwini yakwe. U te: “A hi veke nkarhi lowu hi nga ta hlangana ha wona endlwini ya Xikwembu xa ntiyiso etempeleni, hi fika hi goga* tinyangwa ta tempele, hikuva va lava ku ku dlaya. Va ta ta va ta ku dlaya nivusiku.” 11 Kambe ndzi te: “Xana munhu wo fana na mina u fanele a baleka? Xana munhu wo fana na mina a nga nghena etempeleni kutani a hanya?+ A ndzi nge yi!” 12 Hiloko ndzi swi xiya leswaku a a nga rhumiwanga hi Xikwembu, kambe u xaviwe hi Tobiya na Sanibalati+ leswaku a ta ndzi kanganyisa. 13 A a xaviwile ku ta ndzi chavisa leswaku ndzi ta dyoha, leswaku va ta va ni xivangelo xo ndzi onha vito ndzi hundzuka xihlekiso.

14 Xikwembu xanga, u nga rivali Tobiya+ na Sanibalati ni swiendlo leswi na Nowadiya muprofeta wa xisati ni vaprofeta lavan’wana hinkwavo lava a va tshama va ri karhi va ringeta ku ndzi chavisa.

15 Hikwalaho khumbi ri hetiwe hi siku ra vu-25 ra n’hweti ya Elulu,* endzhaku ka masiku ya 52.

16 Loko valala va hina hinkwavo va twa mhaka leyi ni matiko hinkwawo lama hi rhendzeleke ma swi vona, swi va nyumisile swinene,+ hiloko va swi vona leswaku hi endle ntirho lowu hi ku pfuniwa hi Xikwembu xa hina. 17 Emasikwini wolawo tindhuna+ ta le Yuda a ti tsalela Tobiya mapapila yo tala naswona a a ma hlamula. 18 Vanhu vo tala eYuda a va yima na yena hikuva a a ri mukon’wana wa Xekaniya n’wana wa Ara+ naswona Yehohanani n’wana wakwe a a teke n’wana wa Mexulama+ n’wana wa Berakiya. 19 Nakambe, a va tshamela ku ndzi byela leswinene hi Tobiya kutani va ya n’wi byela leswi ndzi swi vuleke. Endzhaku ka sweswo Tobiya a a ndzi tsalela mapapila a ringeta ku ndzi chavisa.+

7 Loko khumbi ri herile+ ndzi nambe ndzi hoxa mavanti;+ hiloko ku hlawuriwa varindzi va tigede,+ vayimbeleri+ ni Valevhi.+ 2 Kutani ndzi veka Hanane+ makwerhu swin’we na Hananiya ndhuna ya Yindlu ya Vuhosi+ leswaku va va tindhuna eYerusalema, hikuva Hananiya a a ri munhu wo tshembeka ni la chavaka Xikwembu+ xa ntiyiso ku tlula vanhu vo tala. 3 Hiloko ndzi ku eka vona: “Tigede ta Yerusalema ti nga pfuriwi kukondza dyambu ri sungula ku hisa naswona varindzi va fanele va rindza va pfale mavanti va tlhela va goga.* Naswona vekani vaaki va Yerusalema va va varindzi, un’wana ni un’wana u ta rindza laha a averiweke kona naswona un’wana ni un’wana emahlweni ka yindlu yakwe.” 4 Muti a wu anamile wu tlhela wu va wukulu naswona a ku ri ni vanhu vatsongo endzeni ka wona+ ni tiyindlu a ti nga si pfuxiwa.

5 Kambe Xikwembu xanga xi ndzi nyika miehleketo ya leswaku ndzi hlengeleta tindhuna ni vapfuneti va tona ni vanhu leswaku va tsarisiwa hi ku ya hi mavito ni swivongo swa vona.+ Hiloko ndzi kuma buku leyi a yi ri ni mavito ni swivongo swa vanhu lava nga fika ku sungula, eka yona ndzi kume ku tsariwe leswi:

6 Lava i vanhu va le xifundzheni* lava a va huma evuhlongeni, lava Hosi Nebukadnetsara+ wa le Babilona a nga va yisa evuhlongeni,+ lava endzhaku va nga vuyela eYerusalema ni le Yuda, un’wana ni un’wana emutini wa ka vona,+ 7 lava va nga ta na Zerubabele,+ Yexuwa,+ Nehemiya, Azariya, Rhamiya, Nahamani, Mordekayi, Bilixani, Misperete, Bigivhayi, Nehumi na Bana.

Nhlayo ya vavanuna va Israyele a yi katsa:+ 8 vana va Paroxi, 2 172; 9 vana va Xefatiya, 372; 10 vana va Ara,+ 652; 11 vana va Pahata-mowabu,+ vana va Yexuwa na Yowabu,+ 2 818; 12 vana va Elami,+ 1 254; 13 vana va Zatu, 845; 14 vana va Zakayi, 760; 15 vana va Binuyi, 648; 16 vana va Bebayi, 628; 17 vana va Azigadi, 2 322; 18 vana va Adonikamu, 667; 19 vana va Bigivhayi, 2 067; 20 vana va Adini, 655; 21 vana va Atere lava nga vatukulu va Hezekiya, 98; 22 vana va Haxumu, 328; 23 vana va Bezayi, 324; 24 vana va Harifi, 112; 25 vana va Gibiyoni,+ 95; 26 vavanuna va le Betlehema ni le Netofa, 188; 27 vavanuna va le Anathoti,+ 128; 28 vavanuna va Beta-azamavhete, 42; 29 vavanuna va le Kiriyati-yeyarimi,+ Kefira ni le Beroti,+ 743; 30 vavanuna va le Rhama ni le Geba,+ 621; 31 vavanuna va le Mikimasi,+ 122; 32 vavanuna va le Bethele+ ni le Ayi,+ 123; 33 vavanuna va le Nebo lowun’wana, 52; 34 vana va Elami lowun’wana, 1 254; 35 vana va Harimi, 320; 36 vana va le Yeriko, 345; 37 vana va Lodi, Hadida na Ono,+ 721; 38 vana va le Sena, 3 930.

39 Vaprista:+ vana va Yedaya va ndyangu wa Yexuwa, 973; 40 vana va Imere, 1 052; 41 vana va Paxahuru,+ 1 247; 42 vana va Harimi,+ 1 017.

43 Valevhi:+ vana va Yexuwa, vandyangu wa Kadimiyele,+ vana va Hodevha, 74. 44 Vayimbeleri:+ vana va Asafa,+ 148. 45 Varindzi va tigede:+ vana va Xalumu, vana va Atere, vana va Talimoni, vana va Akubu,+ vana va Hatita, vana va Xobayi, 138.

46 Vatirhi va le tempeleni:*+ vana va Ziha, vana va Hasufa, vana va Tabawoto, 47 vana va Kerosi, vana va Siya, vana va Padoni, 48 vana va Lebana, vana va Hagaba, vana va Salmayi, 49 vana va Hanani, vana va Gidele, vana va Gahara, 50 vana va Reyaya, vana va Resini, vana va Nekoda, 51 vana va Gazamu, vana va Uza, vana va Pasiya, 52 vana va Besayi, vana va Mewunimi, vana va Nefuxesimi, 53 vana va Bakibuku, vana va Hakufa, vana va Harahuru, 54 vana va Basiliti, vana va Mehida, vana va Harixa, 55 vana va Barikosi, vana va Sisera, vana va Tema, 56 vana va Neziya, vana va Hatifa.

57 Vana va malandza ya Solomoni:+ vana va Sotayi, vana va Sofereti, vana va Perida, 58 vana va Yala, vana va Darikoni, vana va Gidele, 59 vana va Xefatiya, vana va Hatila, vana va Pokereti-hazebayimi, vana va Amoni. 60 Vatirhi va le tempeleni*+ hinkwavo ni vana va malandza ya Solomoni a va ri 392.

61 Vanhu lava humaka eTela-mela, eTela-haraxa, eKeruba, eAdoni ni le Imere, lava nga swi kotangiki ku kumisisa mindyangu ya vatata wa vona hambi ku ri ku tiva loko va ri va rixaka ra Vaisrayele+ kumbe e-e, hi lava: 62 vana va Delaya, vana va Tobiya, vana va Nekoda, 642. 63 Vana va vaprista: vana va Habayiya, vana va Hakozi,+ vana va Barizilayi, loyi a nga teka nsati eka vana va Barizilayi+ wa le Giliyadi, kutani a thyiwa vito ra tata wa nsati wa yena. 64 Lava hi vona va laveke lomu va tsariweke kona eka nxaxamelo wa swivongo leswaku va kuma xivongo xa vona, kambe a va ku kumanga lomu va nga tsariwa kona, kutani va tshikisiwa ntirho wa vuprista.*+ 65 Ndhunankulu*+ yi va byele leswaku a va fanelanga va dya swakudya leswi kwetsimaka ngopfu+ kukondza ku va ni muprista loyi a nga ta vutisa hi ku tirhisa Urimi na Thumimi.+

66 Nhlayo hinkwayo ya vanhu a ku ri 42 360,+ 67 handle ka mahlonga ya vona ya xinuna ni ya xisati+ ya 7 337; a ku ri ni vayimbeleri+ va xinuna ni va xisati va 245. 68 Tihanci ta vona a ti ri 736, timeyila ta vona a ti ri 245, 69 tikamela ta vona a ti ri 435, timbhongolo ta vona a ti ri 6 720.

70 Van’wana va varhangeri va mindyangu va nyikerile eka ntirho lowu a wu endliwa.+ Ndhunankulu* yi nyikela hi 1 000 wa tidrakma* ta nsuku, 50 wa mikambana ni swiambalo+ swa vaprista swa 530. 71 Kasi varhangeri van’wana va mindyangu va nyikele hi tidrakma ta nsuku ta 20 000 ni timayina* ta silivhere ta 2 200 laha ku hlayisiwaka xuma xo pfuxa tempele. 72 Vanhu lavan’wana hinkwavo va nyikele hi tidrakma ta nsuku ta 20 000, timayina ta silivhere ta 2 000 ni swiambalo swa vaprista swa 67.

73 Kutani vaprista, Valevhi, varindzi va tigede, vayimbeleri,+ vanhu van’wana, vatirhi va le tempeleni* ni Vaisrayele lavan’wana hinkwavo va tshamiseka emitini ya vona.+ Loko ku fika n’hweti ya vunkombo+ Vaisrayele a va tshamisekile emitini ya vona.+

8 Hiloko vanhu hinkwavo va hlengeletana erivaleni leri nga exikarhi ka muti emahlweni ka Gede ya Mati+ va ri ni vun’we, kutani va byela Ezra+ matsalana leswaku a tisa buku ya Nawu wa Muxe,+ lowu Yehovha a wu leriseke Vaisrayele.+ 2 Kutani hi siku ro sungula ra n’hweti ya vunkombo,+ muprista Ezra a tisa buku ya Nawu emahlweni ka vavanuna ni vavasati ni hinkwavo+ lava nga ta yingisela va tlhela va twisisa. 3 Hiloko a yi hlayela ehenhla+ erivaleni leri nga exikarhi ka muti emahlweni ka Gede ya Mati, ku sukela nimixo ku ya fikela ninhlikanhi, a yi hlayela vavanuna, vavasati ni hinkwavo lava kotaka ku twisisa; naswona vanhu a va yingiserisisile+ loko buku ya Nawu yi ri karhi yi hlayiwa. 4 Ezra matsalana a a yime ehenhla ka xiteji xa mapulanga, lexi endleriweke xiendlakalo lexi; etlhelweni rakwe ra xinene a ku yime Matitiya, Xema, Anaya, Uriya, Hilkiya na Maseya; kasi eka ra ximatsi a ku ri na Pedaya, Mixayele, Malikiya,+ Haxumu, Haxi-badana, Zakariya na Mexulama.

5 Ezra a pfula buku emahlweni ka vanhu hinkwavo naswona a va n’wi vona hikuva a a ri exitejini. Loko a yi pfula, hinkwavo ka vona va suka va yima. 6 Hiloko Ezra a dzunisa Yehovha Xikwembu xa ntiyiso, Hosi leyi nga ni matimba, vanhu hinkwavo va hlamula va ku, “Amen!* Amen!,”+ va tlakusela mavoko ehenhla. Kutani va khinsama emahlweni ka Yehovha swikandza swa vona swi languta ehansi. 7 Yexuwa, Bani, Xerebiya,+ Yamini, Akubu, Xabetayi, Hodiya, Maseya, Kelita, Azariya, Yozabadi,+ Hanani na Pelaya lava a va ri Valevhi, a va hlamusela Nawu eka vanhu,+ vanhu va yimile. 8 Kutani va ya emahlweni va hlaya Nawu wa Xikwembu xa ntiyiso, va wu hlamusela kahle, va wu endla wu twisiseka; hi ndlela yoleyo va pfuna vanhu ku twisisa leswi a swi hlayiwa.+

9 Hiloko Nehemiya loyi a a ri ndhunankulu,* muprista Ezra+ loyi a a ri matsalana ni Valevhi lava a va dyondzisa vanhu, va byela vanhu hinkwavo va ku: “Siku leri ra kwetsima eka Yehovha Xikwembu xa n’wina.+ Mi nga tshuki mi va ni gome kumbe mi rila.” Hikuva vanhu hinkwavo a va rila loko va twa leswi hlayiwaka ebukwini ya Nawu. 10 Nehemiya a ku: “Fambani mi ya dya swakudya swo nona mi nwa swo tsokombela, mi tlhela mi nyika+ lava nga riki na swona hikuva siku leri ra kwetsima eka Hosi ya hina, mi nga karhateki hikuva ntsako lowu Yehovha a mi nyikaka wona i khokholo ra n’wina.” 11 Valevhi a va khongotela vanhu hinkwavo va ku: “Miyelani, hikuva siku leri ra kwetsima, mi nga vi na gome.” 12 Kutani vanhu hinkwavo va famba va ya dya, va nwa ni ku nyika van’wana swakudya, va tsakile swinene+ hikuva va twisise marito lawa va byeriweke wona.+

13 Hi siku ra vumbirhi, varhangeri hinkwavo va mindyangu, vaprista ni Valevhi, va hlengeletana eka Ezra matsalana leswaku a ta va dyondzisa swo tala hi Nawu. 14 Kutani va kuma ku tsariwe ebukwini ya Nawu leswaku Yehovha hi ku tirhisa Muxe u lerise Vaisrayele ku tshama emitsongeni* hi nkarhi wa nkhuvo hi n’hweti ya vunkombo,+ 15 nileswaku va fanele va byela vanhu hinkwavo+ emitini ni le Yerusalema, va ku: “Yanani etintshaveni, mi ya lava marhavi ya mirhi ya mitlhwari, ya mirhi ya muphayini, ya mirhi ya mirta, ya micindzu ni ya mirhi leyi nga ni matluka yo tala leswaku hi ta aka mitsonga, hi ku ya hileswi tsariweke.”

16 Hiloko vanhu va famba va ya vuya na wona leswaku va tiakela mitsonga, un’wana ni un’wana elwangwini rakwe kasi van’wana eswivaveni* swa vona, eswivaveni swa yindlu ya Xikwembu xa ntiyiso,+ emahlweni ka Gede ya Mati+ ni le mahlweni ka Gede ya Efrayimi.+ 17 Kutani hinkwavo lava vuyeke hi le vuhlongeni va aka mitsonga va tshama eka yona, Vaisrayele a va nga si tshama va endla sweswo ku sukela enkarhini wa Yoxuwa+ n’wana wa Nuni, xisweswo ku va ni ntsako lowukulu.+ 18 Naswona siku ni siku a ku hlayiwa buku ya Nawu wa Xikwembu xa ntiyiso,+ ku sukela esikwini ro sungula ku fikela esikwini ro hetelela. Va endle nkhuvo wolowo ku ringana masiku ya nkombo, kutani hi siku ra vunhungu ku ve ni nhlengeletano yo hlawuleka, hi ku ya hileswi tsariweke.+

9 Hi siku ra vu-24 ra n’hweti ya vunkombo, Vaisrayele va hlengeletanile; va titsona swakudya va ambale swiambalo swo khwaxa, va ticheletela misava etinhlokweni.+ 2 Hiloko Vaisrayele va tihambanisa ni valuveri hinkwavo+ kutani va yima va phofula swidyoho swa vona ni swa vatata wa vona.+ 3 Kutani va suka va yima endhawini leyi a va ri eka yona va hlaya buku ya Nawu+ wa Yehovha Xikwembu xa vona hi rito leri tlakukeke, ku ringana tiawara tinharhu; kasi tiawara letin’wana tinharhu, a va tiphofula va tisola ni ku khinsamela Yehovha Xikwembu xa vona.

4 Kutani Yexuwa, Bani, Kadimiyele, Xebaniya, Buni, Xerebiya,+ Bani na Kenani va yima ehenhla ka xiteji+ xa Valevhi, va khongela Yehovha Xikwembu xa vona hi rito leri twalaka. 5 Hiloko Yexuwa, Kadimiyele, Bani, Haxabiniya, Xerebiya, Hodiya, Xebaniya na Petahiya lava nga Valevhi va ku: “Sukani mi yima, dzunisani Yehovha Xikwembu xa n’wina hilaha ku nga heriki.+ A va dzunise vito ra wena leri vangamaka, leri tlakukeke ku tlula swidzuniso hinkwaswo.

6 “Hi wena Yehovha u ri wexe;+ u endle matilo, tilo ra matilo ni hinkwaswo leswi nga eka wona, misava ni hinkwaswo leswi nga eka yona, lwandle ni hinkwaswo leswi nga eka rona. Hinkwaswo ka swona swi hlayisiwa hi wena, hinkwaswo leswi nga etilweni swa ku khinsamela. 7 Hi wena Yehovha Xikwembu xa ntiyiso, loyi a hlawuleke Abrama+ kutani u n’wi humesa eUra+ le Kalidiya, u n’wi thya vito ra Abrahama.+ 8 U swi vonile leswaku i munhu la tshembekaka,+ kutani u endle ntwanano na yena wa ku n’wi nyika tiko ra Vakanana, Vaheti, Vaamori, Vaperezi, Vayebusi ni Vagirgaxa leswaku a ta ri siyela vana*+ vakwe naswona u hetisise switshembiso swa wena hikuva wena u lulamile.

9 “U vone maxangu ya vakokwa wa hina le Egipta,+ u tlhela u twa xirilo xa vona eLwandle ro Tshwuka. 10 U endle swikombiso ni masingita leswaku u xupula Faro ni malandza yakwe hinkwawo ni vanhu va tiko rakwe hinkwavo,+ hikuva u swi vonile leswaku a va xanisa vanhu va wena.+ U tiendlele vito ku sukela esikwini rero ku fikela sweswi.+ 11 U endle lwandle ri avana hi le xikarhi, leswaku va tsemakanya lwandle laha ku omeke,+ u lahlele lava a va va hlongorisa endzeni ka rona ku fana ni ribye leri lahleriwaka elwandle leri kariheke.+ 12 Ninhlikanhi a wu va rhangela hi papa lerikulu, kasi nivusiku hi ndzilo lowukulu leswaku u va komba ndlela leyi va faneleke va famba ha yona.+ 13 U vulavule na vona eNtshaveni ya Sinayi+ u ri etilweni+ u va nyika switsundzuxo leswinene, milawu yo tshembeka, swileriso ni swiletelo leswi pfunaka.+ 14 U va dyondzise ku xixima siku ra wena ro kwetsima ra Savata,+ naswona u va nyike swileriso ni milawu hi ku tirhisa Muxe nandza wa wena. 15 Loko va ri ni ndlala u va nyike xinkwa lexi humaka etilweni,+ naswona u va nyike mati lama humaka eribyeni leswaku va tima torha,+ u tlhele u va byela leswaku va nghena va teka tiko leri u hlambanyeke leswaku u ta va nyika rona.

16 “Kambe vakokwa wa hina va tiomise tinhloko,+ va sihalarile+ a va swi yingisanga swileriso swa wena. 17 Va ale ku yingisa+ naswona a va swi tsundzukanga swiendlo swa wena leswi hlamarisaka leswi u va endleleke swona, kambe va sihalarile kutani va tihlawulela murhangeri leswaku va tlhelela evuhlongeni le Egipta.+ Kambe wena u Xikwembu lexi tiyimiseleke ku rivalela, u ni ntwelavusiwana ni tintswalo, u hlwela ku hlundzuka naswona u ni rirhandzu lerikulu,+ a wu va lahlanga.+ 18 Hambiloko va tiendlele xifaniso xa rhole, va tlhela va ku, ‘Lexi i Xikwembu xa wena lexi ku humeseke eEgipta,’+ va endla swilo swo tala leswi nga kombisiki xichavo, 19 nilokoswiritano wena, hikwalaho ka tintswalo letikulu ta wena a wu va lahlanga emananga.+ Papa lerikulu a ri sukanga ehenhla ka vona ninhlikanhi leswaku u va rhangela endleleni hambi ku ri ndzilo lowukulu nivusiku leswaku u va voningela ndlela leyi va faneleke va famba ha yona.+ 20 U va nyike moya wa wena lowunene leswaku va va ni vutlhari,+ a wu va tsonanga manna ya wena+ naswona u va nyike mati loko va ri ni torha.+ 21 U va nyike swakudya emananga ku ringana malembe ya 40.+ A va pfumalanga nchumu. Swiambalo swa vona a swi hlakalanga+ ni milenge ya vona a yi pfimbanga.

22 “U va nyike mifumo ni vanhu, va yi teka yi va ya vona,+ kutani va teka ni tiko ra Sihoni,+ tiko ra hosi ya Hexiboni+ ni tiko ra Ogo+ hosi ya Baxani. 23 U endle leswaku va va ni vana vo tala ku fana ni tinyeleti ta le tilweni.+ Kutani u va nyika tiko leri u tshembiseke vakokwa wa vona leswaku va tshama eka rona.+ 24 Kutani vana va vona va nghena va teka tiko,+ u hlule vaakatiko va rona ku nga Vakanana,+ hi ku va nyiketa evokweni ra vona, u nyiketa tihosi ni vanhu va tiko rero, leswaku va va endla leswi va swi rhandzaka. 25 Hiloko va teka miti leyi biyeriweke,+ masimu lamo nona,+ tiyindlu leti teleke hi swilo hinkwaswo leswinene, swihlovo leswi va kumeke swi ceriwile, masimu ya madiriva, masimu ya mitlhwari+ ni mirhi ya mihandzu ya mixakaxaka. Kutani va dya va xurha, va tlhela va nyuhela va tiphina swinene hi vunene bya wena lebyikulu.

26 “Hambiswiritano a va ku yingisanga, va ku xandzukerile,+ Nawu wa wena va wu be hi makatla. Va dlaye vaprofeta va wena lava a va va tsundzuxa ku tlhelela eka wena, va endle swilo swo tala leswi nga kombisiki xichavo.+ 27 Hikwalaho ka leswi, u va nyikete eka valala va vona+ lava a va va tikisela vutomi.+ Kambe a va khongela eka wena loko va ri emaxangwini naswona a wu va twa u ri etilweni; leswi u nga ni tintswalo letikulu a wu va rhumela lava nga ta va ponisa eka valala va vona.+

28 “Kambe hi ku hatlisa loko se u va pfunile, a va tlhela va dyoha,+ kutani u va nyiketa evokweni ra valala va vona, lava a va va tshikilela.*+ Endzhaku ka sweswo a va tlhelela eka wena va kombela leswaku u va pfuna+ naswona a wu va twa u ri etilweni, u va ponisa hi ku phindhaphindha hikwalaho ka tintswalo ta wena letikulu.+ 29 Hambiloko u va tsundzuxa leswaku va yingisa Nawu wa wena va tiomise tinhloko, a va swi yingisanga swileriso swa wena;+ va dyohile hi ku ka va nga yingisi milawu ya wena, leyi loyi a yi yingisaka a nga ta kuma vutomi.+ Kambe va sihalarile, va ale ku yingisa. 30 U va lehisele mbilu+ malembe yo tala ni ku va tsundzuxa hi moya wa wena hi ku tirhisa vaprofeta, kambe va ale ku yingisa. U hetelele u va nyikete eka vanhu va matiko.+ 31 Leswi u nga ni tintswalo letikulu a wu va herisanga+ kumbe ku va lahla, hikuva u Xikwembu xa ntwelavusiwana ni tintswalo.+

32 “Wena Xikwembu xa hina, Xikwembu lexikulu xa matimba ni lexi chavisekaka, lexi hlayiseke ntwanano wa xona naswona xi nga ni rirhandzu lerikulu,+ hi pfune eka maxangu hinkwawo lawa hi nga eka wona, swin’we ni tihosi ta hina, tindhuna ta hina,+ vaprista va hina,+ vaprofeta va hina,+ vakokwa wa hina ni vanhu va wena hinkwavo ku sukela enkarhini wa tihosi ta Asiriya+ ku fikela sweswi. 33 U ve lonene eka hinkwaswo leswi hi weleke hikuva u tshembekile; kambe hi hina lava endleke swo homboloka.+ 34 Tihosi ta hina, tindhuna ta hina, vaprista va hina ni vakokwa wa hina, a va wu yingisanga Nawu wa wena hambi ku ri ku yingisa swileriso kumbe switsundzuxo swa wena leswi u va lemukiseke ha swona. 35 A va ku tirhelanga+ naswona a va tshikanga swiendlo swa vona swo biha, hambi ku ri hi nkarhi lowu a ku fuma tihosi ta vona ni hi nkarhi lowu a swi va fambela kahle hikwalaho ka swilo leswinene leswi u va nyikeke swona swin’we ni tiko lerikulu ro nona. 36 Hikwalaho namuntlha hi mahlonga,+ hi mahlonga etikweni leri u ri nyikeke vakokwa wa hina leswaku va dya mihandzu ya rona ni swilo swa rona leswinene. 37 Swakudya swo tala leswi tshoveriwaka eka rona swi dyiwa hi tihosi leti hi fumaka hikwalaho ka swidyoho swa hina.+ Ta hi* fuma ti tlhela ti tirhisa swifuwo swa hina hilaha ti rhandzaka hakona, ha xaniseka swinene.

38 “Hikwalaho ka swilo leswi hinkwaswo, hi endla ntwanano lowu nga tsariwa ehansi+ naswona tindhuna ta hina, Valevhi va hina ni vaprista+ va hina va wu funghile ku komba leswaku i wa ntiyiso.”

10 Lava wu fungheke ku wu tiyisekisa+ a ku ri:

9 Ni Valevhi: Yexuwa n’wana wa Azaniya, Binuyi un’wana wa vana va Henadada, Kadimiyele+ 10 ni vamakwavo Xebaniya, Hodiya, Kelita, Pelaya, Hanani, 11 Mika, Rehobo, Haxabiya, 12 Zakuru, Xerebiya,+ Xebaniya, 13 Hodiya, Bani na Beninu.

14 Tindhuna: Paroxi, Pahata-mowabu,+ Elami, Zatu, Bani, 15 Buni, Azigadi, Bebayi, 16 Adoniya, Bigivhayi, Adini, 17 Atere, Hezekiya, Azuri, 18 Hodiya, Haxumu, Bezayi, 19 Harifi, Anathoti, Nebayi, 20 Magipiyaxi, Mexulama, Heziri, 21 Mexezabele, Sadoki, Yaduwa, 22 Pelatiya, Hanani, Anaya, 23 Hoxeya, Hananiya, Haxubu, 24 Halohexe, Piliha, Xobeki, 25 Rehumi, Haxabina, Maseya, 26 Ahiya, Hanani, Anani, 27 Maluka, Harimi na Bana.

28 Loko ku ri vanhu lavan’wana hinkwavo, vaprista, Valevhi, varindzi va tigede, vayimbeleri, vatirhi va le tempeleni* ni hinkwavo lava tihambaniseke ni vanhu va matiko leswaku va yingisa Nawu wa Xikwembu xa ntiyiso,+ swin’we ni vasati va vona ni vana va vona, hinkwavo lava nga ni vutivi ni ku twisisa, 29 va seketela vamakwavo ni tindhuna ta vona, va tiboha hi xihlambanyo leswaku a va rhukaniwe loko va nga yingisi Nawu wa Xikwembu xa ntiyiso lowu xi va nyikeke wona hi ku tirhisa Muxe nandza wa Xikwembu xa ntiyiso, ni ku yingisa swileriso hinkwaswo swa Yehovha Hosi ya hina, swiboho swa yena ni milawu ya yena. 30 A hi nge pfumeli leswaku vana va hina va vanhwanyana va tekiwa hi vanhu va tiko leri ni vana va vona va vanhwanyana a hi nge pfumeli leswaku va tekiwa hi vana va hina.+

31 Loko vanhu va tiko leri va tisa swixavisiwa ni mixaka hinkwayo ya mavele leswaku va ta xavisa hi siku ra Savata, a hi nge xavi nchumu eka vona hi siku ra Savata+ kumbe hi siku rin’wana ro hlawuleka.+ Hi lembe rin’wana ni rin’wana ra vunkombo+ hi ta tshika ku rima masimu ya hina hi tlhela hi sula swikweleti leswi hi kolotiwaka swona.+

32 Nakambe, hinkwerhu ka hina hi tibohe leswaku lembe ni lembe hi ta nyikela hi silivhere ya tigiramu ta mune leswaku yi pfuneta entirhweni wa yindlu* ya Xikwembu xa hina,+ 33 yi va ya xinkwa xo hlawuleka,*+ gandzelo ra mavele leri endliwaka siku ni siku,+ gandzelo ro hisiwa ra Tisavata+ leri endliwaka siku ni siku ni ra ku thwasa ka n’weti,+ ni mikhuvo leyi a yi endliwa hi masiku yo karhi,+ magandzelo yo kwetsima, magandzelo ya xidyoho+ leswaku Israyele a ta rivaleriwa ni mitirho yin’wana leyi endliwaka endlwini ya Xikwembu xa hina.

34 Hi tlhele hi hoxa vuhlolotwana* leswaku hi tiva mpimo wa tihunyi leti vaprista, Valevhi ni vanhu va faneleke va ti tisa endlwini ya Xikwembu xa hina, hi mikarhi leyi vekiweke lembe ni lembe, va ti tisa hi ku ya hi mindyangu leswaku ti tirha ealtarini ya Yehovha Xikwembu xa hina, hi ku ya hi leswi tsariweke eNawini.+ 35 Hi ta tlhela hi tisa mihandzu leyi wupfeke ku sungula ya masimu ya hina ni mihandzu hinkwayo leyi wupfeke ku sungula ya mirhi ya mixakaxaka, endlwini ya Yehovha+ lembe ni lembe 36 ni mativula ya vana va hina ni ya swifuwo swa hina,+ hi ku ya hi leswi tsariweke eNawini, ni mativula ya mitlhambi ya tihomu ta hina ni ya tinyimpfu ta hina. Hi ta swi tisa endlwini ya Xikwembu xa hina, eka vaprista lava tirhaka endlwini ya Xikwembu xa hina.+ 37 Ni mapa ya leswi hi swi tshoveleke ku sungula,+ minyikelo ya hina, mihandzu ya mirhi ya mixakaxaka,+ vhinyo leyintshwa ni mafurha,+ hi fanele hi swi tisa eka vaprista laha ku hlayisiwaka kona swakudya* endlwini ya Xikwembu xa hina,+ ni vukhume lebyi humaka eka masimu ya hina byi nyikiwa Valevhi+ hikuva hi vona va amukelaka vukhume bya masimu ya miti hinkwayo leyi hi rimaka eka yona.

38 Kutani muprista n’wana wa Aroni, u fanele a va ni Valevhi loko va amukela vukhume; naswona Valevhi va fanele va nyikela vukhume bya swilo leswi nyikeriweke endlwini ya Xikwembu xa hina+ laha ku hlayisiwaka kona swakudya.* 39 Hikuva Vaisrayele ni vana va Valevhi va fanele va tisa munyikelo+ wa mavele, vhinyo leyintshwa ni mafurha+ emakamareni yo veka swakudya,* kwalaho hi laha ku nga ni swibya swa le tempeleni ni vaprista lava tirhaka kwalaho, varindzi va tigede ni vayimbeleri. A hi nge yi tshiki yindlu ya Xikwembu xa hina.+

11 Tihosana ta vanhu a ti tshama eYerusalema;+ kasi vanhu lavan’wana hinkwavo va hoxe vuhlolotwana*+ leswaku va hlawula munhu un’we eka va khume leswaku a ya tshama eYerusalema, muti wo kwetsima, lava kaye va tshame emitini leyin’wana. 2 Kutani vanhu va va navelela mikateko hinkwavo lava tihlawuleleke ku ya tshama eYerusalema.

3 Leti i tindhuna ta xifundzha leti a ti tshama eYerusalema. (Vaisrayele hinkwavo, vaprista, Valevhi, vatirhi va le tempeleni*+ ni vana va malandza ya Solomoni+ a va tshama emitini yin’wana eYuda, un’wana ni un’wana endhawini yakwe emutini wakwe.+

4 Ni le Yerusalema a ku tshama vanhu van’wana va Yuda ni va Benjamini.) Eka vanhu va Yuda a ku ri Ataya n’wana wa Uziya, n’wana wa Zakariya, n’wana wa Amariya, n’wana wa Xefatiya, n’wana wa Mahalalele wa vana va Faresi+ 5 na Maseya n’wana wa Baruku, n’wana wa Kolihoze, n’wana wa Hazaya, n’wana wa Adaya, n’wana wa Yowaribi, n’wana wa Zakariya, n’wana wa Musala. 6 Vana va Faresi hinkwavo lava a va tshama eYerusalema a va ri 468, vavanuna va matimba.

7 Lava a ku ri vanhu va Benjamini: Sallu+ n’wana wa Mexulama, n’wana wa Yowede, n’wana wa Pedaya, n’wana wa Kolaya, n’wana wa Maseya, n’wana wa Itiyele, n’wana wa Yexaya, 8 endzhaku ka yena a ku ri na Gabayi na Salayi, a va ri 928; 9 murhangeri wa vona a ku ri Yuwele n’wana wa Zikiri, mupfuni wakwe eku languteleni ka muti a ku ri Yuda n’wana wa Hasenuwa.

10 Eka vaprista a ku ri na Yedaya n’wana wa Yowaribi, Yakini,+ 11 Seraya n’wana wa Hilkiya, n’wana wa Mexulama, n’wana wa Sadoki, n’wana wa Merayoto, n’wana wa Ahithuba,+ murhangeri wa yindlu* ya Xikwembu xa ntiyiso 12 ni vamakwavo lava a va tirha etempeleni a va ri 822; na Adaya n’wana wa Yerohamu, n’wana wa Pelaliya, n’wana wa Amuzi, n’wana wa Zakariya, n’wana wa Paxahuru,+ n’wana wa Malikiya 13 ni vamakwavo lava a va ri varhangeri va mindyangu a va ri 242; na Amaxayi n’wana wa Azarele, n’wana wa Ahazayi, n’wana wa Mexilemoti, n’wana wa Imere 14 ni vamakwavo lava a va ri tinhenha ta matimba, hinkwavo ka vona a va ri 128; murhangeri wa vona a ku ri Zabadiyele loyi a huma endyangwini lowu fuweke.

15 Eka Valevhi: Xemaya+ n’wana wa Haxubu, n’wana wa Azirikamu, n’wana wa Haxabiya, n’wana wa Buni, 16 na Xabetayi+ na Yozabadi+ tindhuna ta Valevhi, lava a va endla mitirho ya le handle ka yindlu ya Xikwembu xa ntiyiso; 17 na Mataniya+ n’wana wa Mikiya, n’wana wa Zabidi, n’wana wa Asafa,+ mufambisi wa vuyimbeleri loyi a a rhangela eku dzuniseni hi nkarhi wa xikhongelo+ na Bakibukiya mupfuni wakwe eka vamakwavo na Abida n’wana wa Xamuwa, n’wana wa Galala, n’wana wa Yedutani.+ 18 Valevhi hinkwavo lava a va ri emutini wo kwetsima a va ri 284.

19 Varindzi va tigede a ku ri Akubu, Talimoni+ ni vamakwavo lava a va rindza tigede, a va ri 172.

20 Vaisrayele lavan’wana hinkwavo, vaprista ni Valevhi a va tshama emitini leyin’wana hinkwayo ya Yuda, un’wana ni un’wana ekaya rakwe leri nga ndzhaka. 21 Vatirhi va le tempeleni*+ a va tshama eOfeli,+ varhangeri va vona a ku ri Ziha na Gixipa.

22 Murhangeri wa Valevhi eYerusalema a ku ri Uzi n’wana wa Bani, n’wana wa Haxabiya, n’wana wa Mataniya,+ n’wana wa Mika, wa vana va Asafa lava a ku ri vayimbeleri; a a ri mulanguteri wa ntirho lowu endliwaka endlwini ya Xikwembu xa ntiyiso. 23 Hikuva a ku ri ni xileriso lexi humaka eka hosi+ xa leswaku swilaveko swa vayimbeleri swa siku ni siku swi fanele swi khathaleriwa. 24 Kutani Petahiya n’wana wa Mexezabele un’wana wa vana va Zara n’wana wa Yuda, a a ri mutsundzuxi wa hosi eka timhaka hinkwato leti khumbaka vanhu.

25 Loko ku ri tindhawu tin’wana ni masimu ya tona, Vayuda van’wana a va tshama eKiriyati-araba+ ni le swimitanini leswi nga ekusuhi, eDiboni ni le swimitanini leswi nga ekusuhi, eYekabusiyele+ ni le swimitanini swa wona, 26 eYexuwa, eMulada,+ eBeta-pelete,+ 27 eHasara-xuwala,+ eBera-xeba ni le swimitanini leswi nga ekusuhi, 28 eSikilaga,+ eMikona ni le swimitanini leswi nga ekusuhi, 29 eEni-rimoni,+ eSora+ ni le Yaramutu, 30 eZanowa,+ eAdulamu ni le swimitanini swa wona, eLakixi+ ni masimu ya wona, eAzeka+ ni le swimitanini leswi nga ekusuhi. A va tshama eBera-xeba ku ya fika eNkoveni wa Hinomu.+

31 Vanhu va Benjamini a va tshama eGeba,+ eMikimaxi, eAyiya, eBethele+ ni le swimitanini leswi nga ekusuhi, 32 eAnathoti,+ eNobo,+ eAnaniya, 33 eHasora, eRhama,+ eGitayimi, 34 eHadida, eSeboyimi, eNebalata, 35 eLodi ni le Ono,+ laha ku nga ni vanhu lava tivaka mitirho ya mavoko. 36 Van’wana va Valevhi lava humaka eYuda a va tshama eBenjamini.

12 Lava a ku ri vaprista ni Valevhi lava vuyeke hi le vuhlongeni na Zerubabele+ n’wana wa Salatiyele+ na Yexuwa:+ Seraya, Yeremiya, Ezra, 2 Amariya, Maluka, Hatuxi, 3 Xekaniya, Rehumi, Meremoto, 4 Ido, Ginetoyi, Abiya, 5 Miyamini, Maadiya, Biliga, 6 Xemaya, Yowaribi, Yedaya, 7 Sallu, Amoko, Hilkiya na Yedaya. Lava a ku ri varhangeri va vaprista ni vamakwavo enkarhini wa Yexuwa.

8 Valevhi a ku ri Yexuwa, Binuyi, Kadimiyele,+ Xerebiya, Yuda na Mataniya+ loyi a a rhangela loko ku yimbeleriwa tinsimu to khensa swin’we ni vamakwavo. 9 Vamakwavo ku nga Bakibukiya na Uni a va yima etlhelo ka vona va endla ntirho wa ku rindza. 10 Yexuwa a va tata wa Yowakimi, Yowakimi a va tata wa Eliyaxibi,+ Eliyaxibi yena a va tata wa Yoyada.+ 11 Yoyada a va tata wa Yonathani, Yonathani yena a va tata wa Yaduwa.

12 Vaprista lava a va ri varhangeri va mindyangu lava a va ri kona emasikwini ya Yowakimi hi lava: eka ndyangu wa Seraya,+ Meraya; wa Yeremiya, Hananiya; 13 wa Ezra,+ Mexulama; wa Amariya, Yehohanani; 14 wa Maluki, Yonathani; wa Xebaniya, Yosefa; 15 wa Harimi,+ Adina; wa Merayoto, Helikayi; 16 wa Ido, Zakariya; wa Ginetoni, Mexulama; 17 wa Abiya,+ Zikiri; wa Miniyamini, . . . ;* wa Mowadiya, Pilitayi; 18 wa Biliga,+ Xamuwa; wa Xemaya, Yonatani; 19 wa Yowaribi, Matenayi; wa Yedaya,+ Uzi; 20 wa Salayi, Kalayi; wa Amoko, Ebere; 21 wa Hilkiya, Haxabiya; wa Yedaya, Nethanele.

22 Varhangeri va mindyangu ya Valevhi ni ya vaprista va tsariwile emasikwini ya Eliyaxibi, Yoyada, Yohanani na Yaduwa,+ ku ya fikela eku fumeni ka hosi Dariyosi wa Muperesiya.

23 Valevhi lava a va ri varhangeri va mindyangu va tsariwile ebukwini ya matimu ya nkarhi wolowo, ku ya fikela emasikwini ya Yohanani n’wana wa Eliyaxibi. 24 Varhangeri va mindyangu ya Valevhi a ku ri Haxabiya, Xerebiya na Yexuwa+ n’wana wa Kadimiyele+ naswona vamakwavo lava a va ri varindzi, a va yima etlhelo ka vona hi mitlawa va dzunisa ni ku khensa hi ku ya hi xileriso xa Davhida+ nandza wa Xikwembu xa ntiyiso. 25 Mataniya,+ Bakibukiya, Obadiya, Mexulama, Talimoni na Akubu+ a va rindza tigede,+ va rindza makamara yo veka nhundzu lama nga ekusuhi ni tigede. 26 A va tirha emasikwini ya Yowakimi n’wana wa Yexuwa,+ n’wana wa Yozadaki ni le masikwini ya ndhunankulu Nehemiya na muprista Ezra+ loyi a ri matsalana.

27 Loko ku khanguriwa* khumbi ra Yerusalema va lave Valevhi va va tisa eYerusalema va huma etindhawini hinkwato leti a va tshama eka tona leswaku va ya tlangela ku khangula* va tsakile, hi tinsimu to khensa,+ hi swiphambati, switende ni hi tiharipa. 28 Vana va vayimbeleri* va hlengeletanile ku suka exifundzheni* ni le tindhawini hinkwato leti nga ekusuhi na Yerusalema ni le swimitanini swa Vanetofa,+ 29 eBeta-giligala,+ eGeba+ ni le Azamavhete,+ hikuva vayimbeleri a va tshama eswimitanini leswi nga ekusuhi na Yerusalema. 30 Kutani vaprista ni Valevhi va tibasisa, va basisa vanhu,+ tigede+ ni khumbi.+

31 Hiloko ndzi vitana tihosana ta Yuda ti ta ehenhla ka khumbi. Ndzi tlhela ndzi hlawula mitlawa yimbirhi leyikulu ya vayimbeleri va longoloka va ri karhi va yimbelela va dzunisa Xikwembu, ntlawa wo sungula wu kongoma exineneni ehenhla ka khumbi wu ya eGedeni ya Tinhulu ta Nkuma.+ 32 Hoxaya ni hafu ya tihosana ta Yuda va va sala endzhaku, 33 swin’we na Azariya, Ezra, Mexulama, 34 Yuda, Benjamini, Xemaya na Yeremiya. 35 A va ri ni van’wana va vana va vaprista lava a va khome timhalamhala,+ ku nga: Zakariya n’wana wa Yonathani, n’wana wa Xemaya, n’wana wa Mataniya, n’wana wa Mikaya, n’wana wa Zakuru, n’wana wa Asafa,+ 36 ku katsa ni vamakwavo ku nga Xemaya, Azarele, Milalayi, Gilalayi, Mayi, Nethanele, Yuda na Hanane va khome swichayachayana swa Davhida,+ nandza wa Xikwembu xa ntiyiso; a va rhangeriwe hi Ezra+ loyi a nga matsalana. 37 Loko va fika eGedeni ya Xihlovo+ va famba va ya fika eSwitepisini+ swa Muti wa Davhida+ laha khumbi ri tlakukaka kona ehenhla ka Yindlu ya Davhida ku ya fika eGedeni ya Mati,+ evuxeni.

38 Ntlawa lowun’wana wo khensa lowu yimbelelaka a wu ya eximatsini* naswona a ndzi wu sale endzhaku ni hafu ya vanhu lavan’wana, ehenhla ka khumbi ku ya fika eXihondzweni xa Switiko+ ni ku ya fika eka Khumbi ro Anama,+ 39 wu hundza hi le Gedeni ya Efrayimi,+ wu ya eka Gede ya Muti wa Khale+ ku ya fika eGedeni ya Tihlampfi,+ Xihondzo xa Hananele,+ Xihondzo xa Miya ku ya fika eGedeni ya Tinyimpfu;+ kutani wu fika wu yima eGedeni ya Varindzi.

40 Endzhaku ka nkarhi mitlawa leyimbirhi yo khensa leyi yimbelelaka yi fika yi yima emahlweni ka yindlu ya Xikwembu xa ntiyiso; na mina ni hafu ya vapfuneti va tindhuna hi fika hi yima kwalaho, 41 ni vaprista lava a va khome timhalamhala ku nga Eliyakimi, Maseya, Miniyamini, Mikaya, Eliwenayi, Zakariya na Hananiya, 42 na Maseya, Xemaya, Eliyazara, Uzi, Yehohanani, Malikiya, Elami na Ezere. Vayimbeleri lava va ya emahlweni va yimbelela hi marito lama tlakukeke va kongomisiwa hi Iziraha.

43 Hi siku rero va endla magandzelo yo tala swinene va tlhela va tsaka,+ hikuva Xikwembu xa ntiyiso xi endle leswaku va tiphina swinene. Vavasati ni vana na vona va tiphinile+ lerova ntsako lowu nga eYerusalema wu twiwa ni le kule.+

44 Hi siku rero, ku hlawuriwe vavanuna leswaku va khathalela makamara+ yo veka minyikelo,+ mihandzu leyi wupfaka ku sungula+ ni vukhume.+ Eka wona a ku ta vekiwa leswi humaka emasin’wini, leswi a swi laveka hi ku ya hi Nawu,+ leswaku swi nyikiwa vaprista ni Valevhi+ hikuva ntsako a wu ri wukulu eYuda hikwalaho ka ntirho wa vaprista ni Valevhi. 45 Hiloko va sungula ku endla ntirho wa Xikwembu xa vona ni ntirho wo basisa, hilaha vayimbeleri ni varindzi va tigede na vona a va endla mitirho ya vona hakona, hi ku landza xileriso xa Davhida na Solomoni n’wana wakwe. 46 Hikuva emasikwini ya khale hi nkarhi wa Davhida na Asafa, a ku ri ni vafambisi va vayimbeleri ni va tinsimu to dzunisa ni to khensa Xikwembu.+ 47 Naswona enkarhini wa Zerubabele+ ni le nkarhini wa Nehemiya, Vaisrayele hinkwavo a va humesa leswi a swi fanele swi kumiwa hi vayimbeleri+ ni varindzi va tigede,+ hi ku ya hi swilaveko swa vona swa siku ni siku. A va tlhela va humesa leswi a swi fanele swi kumiwa hi Valevhi,+ kasi Valevhi a va humesa leswi a swi fanele swi kumiwa hi vatukulu va Aroni.

13 Hi siku rero vanhu va hlayeriwe buku ya Muxe+ naswona ku kumiwe ku tsariwe leswaku Vaamoni kumbe Vamowabu+ a va fanelanga va nghena laha vanhu va Xikwembu xa ntiyiso+ va hlengeletaneke kona, 2 hikuva a va va nyikanga Vaisrayele xinkwa ni mati, kambe va thole Balama leswaku a va rhukana.+ Hambiswiritano, Xikwembu xa hina xi hundzule ndzhukano wolowo wu va nkateko.+ 3 Loko va twa Nawu lowu, hinkwavo lava humaka eka matiko man’wana va suka exikarhi ka Vaisrayele.+

4 Ku nga si endleka mhaka leyi, muprista loyi a a langutela makamara yo veka swakudya* endlwini* ya Xikwembu xa hina+ a ku ri Eliyaxibi,+ xaka ra Tobiya.+ 5 A a rhurhele Tobiya ekamareni lerikulu ro veka swakudya* leri khale a ku vekiwa gandzelo ra mavele, murhi wa risuna, swibya, vukhume bya mavele, vhinyo leyintshwa ni mafurha+ leswi Valevhi,+ vayimbeleri ni varindzi va tigede a va ri ni mfanelo yo swi tirhisa ku katsa ni minyikelo ya vaprista.+

6 Nkarhi lowu hinkwawo a ndzi nga ri kona eYerusalema, hikuva a ndzi ye eka hosi hi lembe ra vu-32+ ra ku fuma ka Hosi Atazekiseki+ wa le Babilona; kutani endzhakunyana ndzi kombela hosi yi ndzi pfumelela ku famba. 7 Kutani ndzi fike eYerusalema ndzi vona vukungundzwana lebyi Eliyaxibi+ a nga byi endla, hi ku nyika Tobiya+ kamara ro veka nhundzu exivaveni* xa yindlu ya Xikwembu xa ntiyiso. 8 Mhaka leyi yi ndzi nyangatse ngopfu, hiloko ndzi humesa nhundzu hinkwayo ya Tobiya ndzi yi lahlela ehandle. 9 Endzhaku ka sweswo ndzi lerisa leswaku ku basisiwa makamara yo veka swakudya;* kutani ndzi tlherisela swibya swa yindlu ya Xikwembu xa ntiyiso eka yona,+ swin’we ni gandzelo ra mavele ni mirhi ya risuna.+

10 Ndzi tlhele ndzi kuma leswaku Valevhi+ a va nga ha nyikiwi leswi a va fanele va swi kuma,+ leswi nga endla leswaku Valevhi ni vayimbeleri va tlhelela emasin’wini ya vona.+ 11 Ndzi holovele vapfuneti va tihosi+ ndzi ku: “Hikwalaho ka yini mi tshike ku khathalela yindlu ya Xikwembu xa ntiyiso?”+ Hiloko ndzi tlherisela Valevhi entirhweni wa vona. 12 Kutani vaaki hinkwavo va Yuda, va tisa vukhume+ bya mavele, bya vhinyo leyintshwa ni bya mafurha emakamareni yo veka nhundzu.+ 13 Ndzi tlhela ndzi hlawula muprista Xelemiya, Sadoki loyi a nga matsalana na Pedaya wa Mulevhi leswaku va hlayisa leswi vekiwaka emakamareni yo veka nhundzu naswona a va pfuniwa hi Hanani n’wana wa Zakuru, ntukulu wa Mataniya, hikuva a va ri vavanuna vo tshembeka. A va tirha ku phakela vamakwavo.

14 Ndzi tsundzuke+ Xikwembu xanga, naswona u nga rivali mitirho ya mina ya rirhandzu leyi ndzi yi endleleke yindlu ya wena ni lava tirhaka eka yona.+

15 Emasikwini wolawo ndzi vone vanhu eYuda va ri eku endleni ka vhinyo* hi Savata,+ va tisa mavele yo tala hi timbhongolo, vhinyo, madiriva, makuwa ni swilo swo hambanahambana eYerusalema hi siku ra Savata.+ Hiloko ndzi va lemukisa hi khombo ro xavisa hi siku rero.* 16 Vanhu va le Tiri lava a va tshama emutini, a va ta ni tihlampfi ni swilo swin’wana swo xavisa, va swi xavisela vanhu va le Yuda na Yerusalema hi Savata.+ 17 Kutani ndzi holovele tindhuna ta le Yuda, ndzi ku: “Hikwalaho ka yini mi endla swilo swo biha hi ndlela leyi, xana a mi swi voni leswaku mi nyamisa siku ra Savata? 18 Xana leswi a hi swona leswi endliweke hi vakokwa wa n’wina, lerova Xikwembu xi kala xi tisa khombo eka hina ni le mutini lowu? Kambe sweswi mi nyanyisela Israyele timhaka hi ku nyamisa Savata.”+

19 Hiloko ndzi lerisa leswaku ku pfariwa tigede eYerusalema, loko ku sungula ku phumela Savata yi nga si sungula. Ndzi tlhela ndzi lerisa leswaku ti nga pfuriwi kukondza ku hundza Savata, ndzi veka van’wana va vatirhi va mina leswaku va rindza tigede va tiyiseka leswaku a ku ngheni vaxavisi hi siku ra Savata. 20 Hikwalaho vaxavi ni vaxavisi va swilo swo hambanahambana va etlele ehandle ka muti wa Yerusalema kan’we kumbe kambirhi. 21 Kutani ndzi va holovela ndzi ku: “Hikwalaho ka yini mi etlela emahlweni ka khumbi ra muti? Loko mo tlhela mi etlela laha ndzi ta mi susa hi nkani.” Ku sukela esikwini rero a va ha vuyanga hi Savata.

22 Hiloko ndzi byela Valevhi leswaku va fanele va tibasisa nkarhi ni nkarhi va ta va ta rindza tigede leswaku siku ra Savata ri tshama ri ri karhi ri kwetsima.+ Ni le mhakeni leyi ndzi kombela u ndzi tsundzuka Xikwembu xanga, u ndzi twela vusiwana hikwalaho ka rirhandzu ra wena.+

23 Emasikwini wolawo ndzi tlhele ndzi vona Vayuda lava nga teka vasati+ va le Axidodo,+ Amoni na Mowabu.+ 24 Hafu ya vana va vona a va vulavula Xiaxidodo naswona hafu leyin’wana a yi vulavula ririmi ra vanhu van’wana, kambe a a nga ri kona ni un’we loyi a a tiva ririmi ra Vayuda. 25 Kutani ndzi va holoverile, ndzi tlhela ndzi va rhukana, van’wana va vona ndzi va ba+ ndzi va tsuvula ni misisi, ndzi va endla va hlambanya hi Xikwembu, ndzi ku: “Mi nga tshuki mi pfumela leswaku vana va n’wina va vanhwanyana va tekiwa hi vana va vona, ni vana va vona va vanhwanyana mi nga tshuki mi va teka kumbe va tekiwa hi vana va n’wina.+ 26 Xana leswi a hi swona leswi dyohiseke Hosi Solomoni wa Israyele? Exikarhi ka matiko yo tala a ku nga ri na hosi leyi a yi fana na yena;+ naswona a a rhandziwa hi Xikwembu xakwe,+ lerova Xikwembu xi n’wi endla hosi ya tiko hinkwaro ra Israyele. Kambe vavasati va matiko va n’wi dyohisile.+ 27 A swi tshembisi leswaku hi n’wina mi endlaka nchumu lowu wo biha hi ndlela leyi wa ku nga tshembeki eka Xikwembu xa hina, hi ku teka vasati va matiko.”+

28 Un’wana wa vana va Yoyada+ n’wana wa Eliyaxibi+ muprista lonkulu a a ri mukon’wana wa Sanibalati+ wa Muhoroni. Kutani ndzi n’wi hlongorile.

29 Xikwembu xanga, va tsundzuke u va xupula hikwalaho ka leswi va nyamiseke vuprista ni ntwanano wa vuprista+ ni Valevhi.+

30 Hiloko ndzi va basisa hi ku va tshikisa mikhuva hinkwayo ya vamatiko, kutani ndzi avela vaprista ni Valevhi mitirho ya vona,+ 31 ndzi tlhela ndzi hlela leswaku tihunyi+ ni mihandzu leyi wupfaka ku sungula swi tisiwa hi mikarhi leyi vekiweke.

Xikwembu xanga, ndzi tsundzuke, u ndzi katekisa.+