Yi N’wi Susumetele Ku Teka Goza!

Wanuna wa le Caracas, ntsindza wa Venezuela, u endzele Rufino, tata wakwe la dyuhaleke. Tatana loyi a a tshama eLa Loma, ku nga ximutana xa le kule lexi nga etiko-xikaya. Jaha leri ri heleketele Rufino buku leyi nge U Nga Hanya Hi Masiku aParadeyisini eMisaveni.

Endzhakunyana, Timbhoni ta Yehovha leti humaka eLos Humocaros ti yile eLa Loma leswaku ti ya chumayela kona. Lexi va hlamariseke, vanhu a va tshamela ku vula leswaku ana se Mbhoni yin’wana a yi va endzela. Timbhoni a ti pfilunganyekile hikwalaho ka leswi a ti tiva leswaku a ku na Timbhoni leti tshamaka endhawini leyi. Kutani un’wana u va kombe yindlu ya loyi a vuriwaka Mbhoni—a ku ri yindlu ya Rufino!

Rufino a tsake ngopfu ku va a hlangane ni vaendzi va yena. Ha yini vanhu lava tshamaka eximutanini xa ka vona va n’wi teke tanihi un’wana wa Timbhoni ta Yehovha? Phela, Rufino a a sungule ku hlaya buku leyi nge Hanya Hi Masiku, naswona loko a fike eka ndzima 13, u vone xifaniso xa Yesu loko a rhuma vadyondzisiwa va yena entirhweni wo chumayela. Rufino u fikelele xiboho xa leswaku Vakreste namuntlha va fanele va endla ntirho lowu fanaka. Hikwalaho u sungule ku avelana ni vaakelani va yena mintiyiso ya Bibele leyi a ri karhi a yi dyondza.

Dyondzo ya Bibele ya nkarhi na nkarhi yi sunguriwile na Rufino, kutani u byeriwe leswaku ku ni minhlangano ya vandlha. Hi Sonto leyi landzeleke a ri kona eHolweni ya Mfumo. Hambileswi Rufino a ri ni malembe ya 80 hi vukhale, u fambe tiawara tinharhu leswaku a kota ku va kona! Ku sukela siku rero ku ya emahlweni, a nga kalanga a xwa eka nhlangano ni wun’we handle ka loko a vabya ngopfu. U tlhele a tsarisa eXikolweni xa Vutirheli bya le Tilweni ivi a nyikela nkulumo ya kahle. Rufino u sungule ku vabya n’wexemu, naswona u fe hi July 1996, a ri ni ntshembo lowu tiyeke wa ku pfuxeriwa emisaveni ya paradeyisi.

Ha tshemba leswaku na wena u ta pfuneka hi ku hlaya buku leyi nga ni swifaniso swo saseka, leyi nga ni matluka ya 256, leyi nge U Nga Hanya Hi Masiku aParadeyisini eMisaveni. Loko u tsakela ku kuma rungula leri engetelekeke mayelana ni ndlela yo kuma kopi ya yona kumbe loko u tsakela ku va ni dyondzo ya le kaya ya Bibele ya mahala, hi kombela u tsalela eka Watch Tower, Private Bag X2067, Krugersdorp, 1740, South Africa, kumbe eka adirese leyi faneleke eka leti nga eka tluka 5.