Mudyondzisi Wa Le Moscow U Pfuniwe Hi Xalamuka!

Mudyondzisi un’wana u tsalele hofisi ya rhavi ya Timbhoni ta Yehovha eRussia ivi a hlamusela leswaku u kunguhata ku tirhisa swihloko swa Xalamuka! eka tidyondzo ta yena ta xikolo. U te:

“Ndzi vona onge Xalamuka! ya ndzi pfuna ku kuma matimba lamantshwa ya ku ya emahlweni ni vutomi, yi pfuxeta ntsako wa mina naswona ya ndzi ntshunxa eka mianakanyo leyi vangaka ntshikilelo. Ndza mi nkhensa hikwalaho ka swihloko swa n’wina leswinene leswi a swi vulavula hi nyimpi ya munhu ni switsongwatsongwana [nkandziyiso wa March 8, 1996]. Ndza tshemba leswaku timagazini ta n’wina ti pfuna muti wun’wana ni wun’wana lowu nga na tona.” U engeterile: “Ndzi swi tsakela ngopfu ku kuma Xalamuka! . . . A ndzi kanakani leswaku timagazini ta n’wina ti ta ndzi pfuna.”

Papila rin’wana leri fanaka, leri a ri huma eStavropol, doroba leri nga ni vaaki va kwalomu ka kotara ya miliyoni, leri akiweke endhawini leyi nga kwalomu 1000 wa tikhilomitara ku suka edzonga-vuxa bya Moscow, ri ri: “Ndzi navela ku oda Xalamuka! Sweswinyana ndzi kume tikopi timbirhi ta magazini lowu. Swihloko leswi a swi kombisa ku twisisa swiphiqo leswi vanhu va nga na swona. Swin’wana a swi hlamusela tinhla leti a ti ri tintshwa eka mina. A ku ri ro sungula laha ndzi kumeke nhlamuselo leyi pakanisaka malunghana ni swilo swin’wana swo tala.”

Loko u swi tsakela ku kuma rungula leri engetelekeke malunghana ni ndlela leyi u nga kumaka ha yona kopi ya Xalamuka! kumbe loko u swi tsakela leswaku un’wana a ku endzela leswaku a ta burisana na wena hi Bibele, hi kombela u tsalela eka Watch Tower, Private Bag X2067, Krugersdorp, 1740, South Africa, kumbe eka adirese leyi faneleke eka leti nga eka tluka 5.