Musamariya Lonene Wa Manguva Lawa
HI MUTSARI WA XALAMUKA! EMEXICO
Vo tala va hina hi tshame hi twa hi ta xitori xa le Bibeleni xa muakelani lonene lexi hakanyingi xi vuriwaka xa Musamariya Lonene. (Luka 10:29-37) Exifanisweni lexi, Yesu Kreste u kombise ndlela leyi Musamariya a kombiseke ha yona rirhandzu lerikulu eka muakelani loyi a a lava mpfuno. Xana va ha kumeka vanhu vo fana ni Musamariya loyi lonene namuntlha? Xiya mhaka leyi landzelaka leyi humeleleke eMexico.
A ku sele tikhilomitara ti nga ri tingani leswaku Betuel ni ndyangu wakwe va fika ekaya loko va vona mhangu leyi chavisaka epatwini lerikulu. Va yimile leswaku va pfuneta. Muchayeri un’wana la katsekeke emhangwini yoleyo a ku ri dokodela, u kombele leswaku va yisa nsati ni vana vakwe vambirhi va vanhwanyana exibedlhele lexi nga ekusuhi. Va endle tano, kutani Betuel u tlhelele laha a ku ri ni mhangu a ya vona loko ku ri ni laha a nga pfunaka kona.
Betuel u ri: “Phorisa ra le gondzweni a se ri fikile, kutani a ku fanele ku kambisisiwa leswaku dokodela u ni nandzu kumbe e-e tanihi leswi a ku ri ni munhu la feke. Loko dokodela a ndzi vutise leswaku hikwalaho ka yini ndzi n’wi pfuna, ndzi hlamusele leswaku hi Timbhoni ta Yehovha naswona hi dyondze eBibeleni leswaku hi fanele hi rhandza vaakelani va hina. Ndzi n’wi byele leswaku a nga vileli hi nsati ni vana hikuva hi ta va khathalela. A ri karhi a xiririka mihloti, u ndzi nyike swilo swa yena swa nkoka leswaku ndzi n’wi hlayisela swona.”
Betuel ni nsati va fambe ni ndyangu lowu ekaya ra vona kutani va wu khathalela ku ringana masiku yo hlayanyana. Betuel u tirhise nkarhi lowu ku sungula dyondzo ya Bibele na vona. Loko dokodela loyi a humesiwile ekhotsweni, u nkhensile a tlhela a bumabumela Timbhoni ta Yehovha. U tshembise leswaku u ta ya emahlweni a dyondza Bibele laha a tshamaka kona naswona u vule leswaku loko nsati wakwe a veleka n’wana, u ta n’wi thya vito ra Betuel. Betuel u ya emahlweni: “Endzhaku ka malembe mambirhi, hi ve ni lunghelo ro va endzela. Lexi ndzi hlamariseke, a va dyondza Bibele naswona xifanyetana xa vona a xi thyiwe vito ra Betuel!”
[Xifaniso lexi nga eka tluka 15]
Betuel