“Hi Nkhensa Ndlela Leyi Mi Va Rhandzaka Ha Yona Vanhu”

HI MUTSARI WA XALAMUKA! LE RHAXIYA

◼ Edorobeni ra Chita le vuxeni bya Siberia, vandlha ra Timbhoni ta Yehovha a ri khomela minhlangano ya Vukreste etlilasini ya xikolo ku kondza ri rhurhela eHolweni ya rona ya Mfumo leyintshwa. Leswi Timbhoni a ti basisa tlilasi yoleyo ni ku lunghisa swilo leswi onhakeke, naswona ti ri ni musa ni mahanyelo lamanene, vafambisi va xikolo va tsalele vandlha rolero papila ro nkhensa.

Swin’wana swa leswi va swi tsaleke hi leswi: “Hi nkhensa ndlela leyi mi va rhandzaka ha yona vanhu, hikuva mi kombisa rirhandzu eka munhu un’wana ni un’wana loyi mi hlanganaka na yena, hi nkhensa ni ntirho wa n’wina wo chumayela ni ndlela leyi mi va pfunaka ha yona vaaki. A hi nge swi rivali leswi hi swi dyondzeke eka n’wina eka malembe lawa hinkwawo loko hi ri karhi hi tirhisana na n’wina, leswi kombisaka leswaku lava va pfumelaka eka Xikwembu va ni mahanyelo lamanene, vuxiyaxiya, musa naswona ku tlula hinkwaswo, va tivekela tipakani, va ni ripfumelo ni xikongomelo evuton’wini.” Timbhoni ta Yehovha ta swi tlangela swibumabumelo sweswo.

◼ Kwalomu ka 5 500 wa tikhilomitara le vupela-dyambu bya Chita, muyimeri wa hofisi ya Timbhoni ta Yehovha ya le Rhaxiya u rhambiwe enkhubyeni wo hlawuleka lowu a wu hleriwe hi valawuri va muganga wa St. Petersburg. A xi ri xihi xikongomelo xa kona? Endzhaku ka loko gamboko yi n’okile lembe ni lembe, Timbhoni ta kwalaho a ti pfuneta ku basisa gondzo ku ringana mpfhuka wa tikhilomitara ta 60 ku suka ehofisini ya tona. Valawuri va kombise ku tlangela ka vona ntirho lowu a wu vuyerisa vaaki, hi ku nyika muyimeri wa hofisi ya Timbhoni ta Yehovha xitifiketi xo nkhensa. Vayingiseri va be mavoko swinene. Lexi tsakisaka, loko mufambisi wa nkhuvo a nga ri vitani kahle vito ra Xikwembu, ku nga Yehovha, vanhu vo hlayanyana lava a va nga ri Timbhoni lava a va ri kwalaho va hatle va n’wi lulamisa, leswi kombaka leswaku a va ri toloverile vito ra Xikwembu ni Timbhoni ta Yehovha.

Lexi endlaka leswaku va ti tiva, hi leswi ti chumayelaka erivaleni, naswona eRhaxiya sweswi ku ni Timbhoni ta Yehovha ta kwalomu ka 150 000. Pakani ya tona i ku hambeta ti kombisa ‘vanhu rirhandzu’ hi ku byela vanhu hinkwavo lava tsakelaka rungula ra le Bibeleni leri chavelelaka.—Matewu 22:39.

[Xifaniso lexi nga eka tluka 29]

Hofisi ya le Rhaxiya yi kume xitifiketi xo nkhensa