Xana Wa Swi Lava Ku Va Munghana Wa Xikwembu?

● U nga xi hlamula njhani xivutiso lexi nga laha henhla? Xinhwanyetana xin’wana xa le xifundzheni lexi nga ekule xa Guerrero le Mexico, xi vule leswaku a xi ehleketa leswaku a swi koteki ku va munghana wa Xikwembu. Vanhwanyana vambirhi lava nga Timbhoni ta Yehovha a va xi komba broxara leyi nge U Nga Va Munghana Wa Xikwembu! hi ririmi ra xona. Xi hlamale ngopfu ku tiva leswaku ya kumeka hi ririmi ra Xitlapanec, tanihi leswi a xi nga si tshama xi vona tibuku tin’wana hi ririmi ra xona handle ka tibuku ta mfumo ntsena.

Vanhwanyana volavo vambirhi va vule leswaku ku va broxara yoleyo yi kandziyisiwile i vumbhoni bya leswaku Muvumbi wa xi rhandza xinhwanyetana xexo hikuva xi nga wu tirhisa leswaku xi kota ku n’wi tiva. Xi sungule ku hlaya xihloko xa wona xo sungula lexi nge “Xikwembu Xi Lava Leswaku U Va Munghana Wa Xona.” Loko xi hete ku hlaya xihloko xexo xi te: “Ndzi lava ku va munghana wa Xikwembu. Xana mi nga ndzi kumela Bibele?” Loko Timbhoni teto ti tlhele ti vuya ti xi khomele Bibele, mana wa xona u ti kombele leswaku ti tshama ti va dyondzisa leswi engetelekeke.

Xitlapanec ko va rin’wana ra tindzimi ta 17 ntsena ta Maindiya leri vulavuriwaka eMexico leri broxara leyi nge U Nga Va Munghana Wa Xikwembu! yi kandziyisiwaka ha rona. Broxara leyi yi kumeka hi tindzimi ta 278 emisaveni hinkwayo (ku katsa ni ya Braille). Loko u tsakela ku kuma kopi ya yona, u nga ha yi kombela hi ku tata xiphephana lexi nga laha hansi kutani u xi rhumela eka adirese leyi kombisiweke laha kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi rhumelela kopi ya broxara leyi kombisiweke laha.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.