From the Publishers

“Hikokwalaho ke, tshikani vunwa; un’wana ni un’wana a a vule ntiyiso eka munhu-kulobye.”—Ef. 4:25.

Tinhloko-mhaka leti to vulavurisana ti endleriwe ku hlamula swivutiso swa Bibele leswi hakanyingi swi vutisiwaka emisaveni hinkwayo. Leswaku ti olova ku ti tirhisa, ti hlengeletiwe ehansi ka swihlokwana swa 44. Xivulwa xo sungula xa nhloko-mhaka yin’wana ni yin’wana, leyi tsariweke hi marito lamakulu yo voyama, i xihloko xa kona. Swihloko swa kona swi vekiwe hi ndlela yoleyo leswaku xivutiso lexi nhloko-mhaka yi endleriweke ku xi hlamula xi ta voniwa hi ku olova. Hi xikombiso, a hi nge ku vutisiwa xivutiso lexi nge: “Ha yini Xikwembu xi pfumelele vubihi nkarhi wo leha swonghasi?” Languta ehansi ka “Nxaxamelo Wa Tinhloko-mhaka” lowu nga laha hansi. Languta nhloko-mhaka “34. Vubihi, Maxangu Ya Misava.” Pfula eka tluka 11. Sweswi lava xihloko ehansi ka nhloko-mhaka leyi, lexi fanelaka ku xi hlamula. Xiya nhloko-mhaka “B. Xivangelo xa ku pfumeleriwa ka vubihi.” Nhloko-mhaka ya Bibele leyi nga eka xihloko lexi yi ta hlamula xivutiso.

Swi le rivaleni leswaku tinhloko-mhaka hinkwato ti helerile hi toxe, naswona nhloko-mhaka yihi na yihi ya swihloko leswi swa 44 yi nga tirhisiwa hi yoxe handle ka nhloko-mhaka yin’wana. Nhloko-mhaka yi nga hlamuseriwa hi ku tirhisa ntsena Tsalwa ro sungula leri kombisiweke, kambe mintshaho yin’wana yi kona leswaku u yi tirhisa loko swiyimo swi pfumela. Ntlhandlamano wa tinhla leti nga ta hlamuseriwa eka xihloko xin’wana ni xin’wana wu nga ha hundzuriwa loko swiyimo swi lava sweswo.