Rivengo Ra Rixaka Ri Rivariwile

MARIE a a yime etlhelo ka damu ra nkhuvulo a rindzele leswaku n’wana wa hahani wakwe wa xisati a khuvuriwa eka ntsombano wa muganga wa Timbhoni ta Yehova lowu a wu endleriwe eCicero, Illinois. Xikan’we-kan’we, rito leri twalaka etlhelo ka yena ri ku, “A ndzi ku tiveli kun’wana ke?” Loko a hundzuluka a vona xikandza lexi rivariweke, kambe lexi tivekaka—xa wansati loyi a vuriwaka Agerthia.

Mianakanyo ya Marie yi tlhelele endzhaku enkarhini lowu a nga si va un’wana wa Timbhoni ta Yehova, etiholweni ta xikolo xa vona xa le henhla laha va lweke eku pfukelaneni ka tinxaka—kambe va ri lava kanetanaka. Ntlawa wa va Agerthia wa swichudeni swa xisati swa vantima ni genge ya va Marie ya vanhwanyana va valungu a yi rhuketelana. Kutani va sungula ku lwa, ku onheteriwa lokukulu ku endleka ematlhelweni hamambirhi. Marie u tsundzuke hi laha Agerthia a endleke leswaku nhwanyana un’wana a ya exibedlhele! Mintlawa hamimbirhi ya vanhwanyana yi siveriwa ku ya exikolweni, kambe loko va tlhele va amukeriwa, ku duvulelana ni ku lwa swi sungule hi vuntshwa.

Sweswi, malembe lama nga vaka 13 endzhaku, va hlangane etlhelo ka damu ra nkhuvulo—ntsena nkarhi lowu a hi lava va venganaka. A va ha hambanisiwanga hi swihinga swa rixaka, va angarhanile hi rirhandzu tanihi vamakwavo va moya va xisati lava hlanganeke eku pfumeleni ka ntiyiso. Vutivi lebyinene bya Yehova Xikwembu na Yesu Kriste byi va vangele ku hundzuluxa mianakanyo ya vona.—Varhoma 12:1, 2.

Rivengo ra rixaka a ri kona exikarhi ka malandza ya Yehova. Kambe, va rhandzana, ku pfumelelana ni marito ya Yesu lama nge: “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.”—Yohane 13:34, 35.