Swivutiso Swa Vahlayi

◼ Hikwalaho ka yini Davhida a vangele Akimelek muprista lonkulu khombo a ri karhi a swi tiva, leswi yiseke eku feni ka muprista, hi laha Davhida a vuleke ha kona eka 1 Samuel 22:22?

Entiyisweni, 1 Samuel 22:22 a yi kombi leswaku Davhida u swi tive ka ha ri emahlweni leswaku xiendlo xakwe a xi ta yisa eku feni ka Akimelek. Ndzimana yi ri: “Davida a ku ka Abiatar [n’wana Akimelek]: Nḍi ŝi tiv̌ile ŝinene siku leri Doeg wa Edom, l’a ngi a ri kona leŝaku [Doeg] a nga ka a nga ṭhiki ku ya byela Saul e timhaka. Hi mina nḍi nga ni nanḍu wa rifu ra yindlu hikwayo ya tata wa wena [Akimelek].”

Davhida, loko a balekela Hosi Sawulo la kariheke, u ye eNob, laha muprista lonkulu Akimelek a a ri kona. Kumbexana a a nga swi xiyi leswaku muprista lonkulu a a nga ta titwa a bohekile ku vika laha Davhida a a ri kona eka hosi, Davhida a nga xi boxanga xivangelo lexi kongomeke xa ku huma ka yena eYerusalema. Kambe ku va ka yena eNob a ku xiyiwile. Muedom la vuriwaka Doeg u vone Davhida ivi endzhaku a vika mhaka leyi eka Sawulo la kariheke.

Hambi swi ri tano, ku hava nchumu eka nhlamuselo leyi lowu kombaka leswaku Davhida u tive ku va kona ka Doeg ka ha ri emahlweni. Doeg “a a ri kona siku lero, a hlwerisiwe mahlweni ka Yehova.” (1 Samuel 21:7) Hi ku fanana, Davhida a a hlamarisiwile, hambi ku ri ku tshukisiwa, leswaku Doeg la nga hava nawu u n’wi vone a ri na Akimelek. Hambi swi ri tano, loko swi kala swi endliwa, a swi endliwile. Davhida a a nga ta swi hundzula sweswo, kumbe ku sivela vuyelo lebyi chavisaka lebyi vukari lebyo leva bya Sawulo byi byi tiseke eka muprista lonkulu ni mimbuyelo ya vaprista van’wana, kun’we ni ya vavasati, vana ni swiharhi eNob.—1 Samuel 22:9-19.

U ri karhi u tsundzuka leswi, nakambe xiya marito lawa ya hlomulaka mbilu ya Davhida eka Abiatar, loyi a poneke ku dlayiwa: “Nḍi ŝi tiv̌ile ŝinene siku leri Doeg wa Edom, l’a ngi a ri kona . . .” Hi nga twisisa yinhla ya Davhida yi ri leyi, ‘Ndzi swi tive siku rero, hi ku hatlisa loko ndzi vone leswaku Doeg u ndzi vone ndzi ri na Akimelek . . .’ Kambe nkarhi a wu nga ha ri kona. Doeg a a ri kwalaho swi nga languteriwanga ivi a xiya ku hlangana ka Davhida ni muprista lonkulu. Kutani hi ku hatlisa Davhida u hete hi leswaku Doeg a a ta vika mhaka leyi eka Sawulo. Hi yona mhaka leyi endzhaku Davhida a amukeleke ku tivona nandzu eka Abiatar, hambi loko Davhida a seketele hi laha ku nga kongomangiki eka ku dlaya loku landzeleke. U khongotele Abiatar ku sala na yena, hikuva Davhida a a tshemba vukongomisi ni nsirhelelowa Yehova.—1 Samuel 22:22, 23.

◼ Xana swa fanela leswaku vamakwerhu vambirhi kumbe vanharhu va hlanganyela eku khuvuleni ka munhu hi nkarhi wa nkhuvulo wa Vukriste?

Hi ntolovelo i mutirheli un’we ntsena wa xinuna loyi a lavekaka leswaku a khuvula un’wana.

Hambi leswi Bibele yi nga xaxametiki milawu yo yi landzela malunghana ni nkhuvulo wa Vukriste, hi nga dyondza eka rhekhodo ya Bibele. Nkhuvulo wa mati wa Yesu wa dyondzisa swinene.

Bibele ya vika; “Enkarhini wolowo Yesu a huma eGaleliya, a ta eYordani eka Yohane [Mukhuvuri] ku ta khuvuriwa hi yena.” (Matewu 3:13) Xiya leswaku yi ri “hi yena,” hayi hi vona. Timhaka ta Evhangeli a ti nyiki xikombiso xa leswaku un’wana u hlanganyele na Yohane eku khuvuleni ka Yesu. Entiyisweni, kahle-kahle a ku ri hava vahlaleri enkhuvulweni wolowo, hikuva i Yohane ntsena loyi eku sunguleni a tiviseke Yesu tanihi “Xinyimpfana xa Xikwembu lexi susaka swidyoho swa misava.” (Yohane 1:29, 33, 34) Kutani, nkhuvulo wa Yesu, wu veka ntila wa ku nghenisiwa hi laha ku heleleke ematini, kambe wu tlhela wu ringanyeta leswaku nandza un’we wa Xikwembu wa xinuna u fanele ku endla nkhuvulo.

Ku nga ha va ku ve ni mbhoni yin’we kumbe timbirhi loko Filipi a khuvula ndhuna ya Muetopiya “laha a ku ri ni mati,” kambe Filipi a a ri swakwe loko a endla nkhuvu lo. (Mintirho 8:36-39) Ku tlula kwalaho, tirhekhodo ta Bibele ta minkhuvulo yin’wana a ti kombi leswaku vamakwerhu vambirhi kumbe vanharhu va hlanganyerile eku ngheniseni ka munhu ehansi ka mati ivi va tlhela va humesa makwerhu yoleyo lontshwa wa xinuna kumbe wa xisati eka wona. Hambi swi ri tano, eka timhaka to tala, kahle-kahle a ku ri ni vahlaleri, kumbe timbhoni ta minkhuvulo.

Kavula, emalembeni yo tala ku ve ni swiyimo swo karhi swo hlawuleka leswi swi laveke ku xiyiwa loko ku endliwa minkhuvulo yin’wana. Hi xikombiso, loko ku ri leswaku mati lama nga kona ya khuluka naswona i xinambyana lexi chavisaka xa matimba ntsena, hi ku xixima vuhlayiseki ku nga ha bumabumeriwa leswaku vamakwerhu vambirhi va tirha swin’we. Kumbe xiyimo xa miri xa loyi a khuvuriwaka, ku fana ni ku lamala kumbe ku dyuhala ngopfu, swi nga ha lava leswaku lava tlulaka makwerhu un’we wa xinuna va endla nkhuvulo. Hambi swi ri tano, leti i timhaka leti nga tolovelekangiki leti faneleke ku tameriwa hi laha vutlhari byi vulaka ha kona. Lexi tolovelekeke exikarhi ka Timbhoni ta Yehova hi leswaku wanuna un’we ntsena a nyuperisa la khuvuriwaka.