Wa Tsundzuka Xana?

Xana u tsakerile ku hlaya minkandziyiso ya sweswinyana ya Xihondzo xo Rindza? Kutani, vona loko u nga hlamula swivutiso leswi landzelaka:

◻ Nhloko-mhaka ya vuevangeli bya Bibele bya manguva lawa hi yini?

Xisekelo xa rungula ra muevangeli wa ntiyiso wa namuntlha i mahungu lamanene ya Mfumo wa Xikwembu emavokweni ya Mufumi wakwe la hlawuriweke, Yesu Kriste. Ri katsa mintiyiso hinkwayo leyi Yesu a vulavuleke ha yona ni leyi vadyondzisiwa vakwe va yi rhekhodeke. (Matewu 24:14; 28:19, 20)—1/1, tluka 4.

◻ Ha yini swi fanela ku hambeta hi chumayela mahungu lamanene etinsin’wini laha ku nga ni ku tsakela kuntsongo?

Yehova, hi Kriste Yesu, u lerise leswaku ‘evangeli yi twarisiwa emisaveni hinkwayo.’ (Matewu 24:14) Loko vanhu va ala ku yingisa, leswi swi hi nyika nkarhi wo kombisa ku enta ka rirhandzu ra hina ni ku gandzela Yehova hi ku phikelela eku endleni ka leswi lulameke. Nakambe, rirhandzu ra hina ri hi susumetela ku tsundzuxa vaakelani va hina hi leswi vumundzuku byi swi khomeleke vanhu. (1 Yohane 5:3; 2 Timotiya 4:2)—1/1, tluka 26.

◻ I mimbuyelo yihi leyi vutirheli bya nkarhi hinkwawo byi yi tisaka eka vahuweleri vo tala va Mfumo?

Byi va pfuna ku hlakulela muhandzu wa moya hi laha ku teleke, ku kombisa rirhandzu leri engetelekeke eka vanhu, ku gingiriteka evutirhelini ni ku tshemba Yehova hi mpimo lowu teleke. Kutani, va tsakela vuxaka bya le kusuhi na Yehova.—1/15, tluka 26.

◻ Hi le ka tlhelo ni xikongomelo xihi xa Xikwembu laha vatsari hinkwavo va Bibele a va kombetela eka swona ku nga khathariseki ku hambana ka vona ko veka mhaka?

Hinkwavo va kombe leswi Yehova Xikwembu a nga ta swi endla ku endlela leswaku vanhu va tsaka ni leswi vanhu hi un’we-un’we va faneleke ku swi endla leswaku va kuma ku amukeriwa hi Xikwembu.—2/1, tluka 7.

◻ Hi yihi mimbuyelo ni mimpfuno yin’wana ya vutshembeki?

Xiyimo xa ku tshemba ni ku tiyiseka xa kula, xi yisa eka malangutelo ni vuxaka lebyinene. Vutshembeki nakambe byi nyika ripfalo leri baseke naswona byi nyika ku rhula ka mianakanyo, leswaku munhu a kongomana ni van’wana handle ko khomiwa hi tingana. (Vaheveru 9:14; 1 Timotiya 1:19)—2/15, tluka 7.

◻ I swikhongelo swa vamani leswi Xikwembu xa matimba hinkwawo xi swi yingisaka ni ku swi hlamula?

Yehova u yingisa swikhongelo leswi vuriwaka eka yena hi ku tirhisa ndlela leyinene, Yesu Kriste; hi ku xixima; na hi xiyimo lexinene xa mianakanyo ni mbilu. Xikwembu xi hlamula swikhongelo swo tano hi ku ya hi ku rhandza ka xona naswona hi nkarhi wa xona lowu xi wu hlawuleke.—3/15, tluka 7.

◻ I xiendlakalo xihi xa nkoka lexi humeleleke hi lembe ra vu-20 ra ku fuma ka Hosi Artakserkses (455 B.C.E.)?

Mpfumelelo a wu nyikiwe Nehemiya wo tlhelela endzhaku ivi a pfuxa Yerusalema ni marhangu ya wona. Xileriso lexi a ku ri ku sungula ka “maviki ya ntlhanu wa makume na makume mambiri” ya malembe ya vuprofeta bya Daniyele, lebyi kombetelaka emahlweni eku humeleleni ka Yesu tanihi “Mesiya Hosi” hi nkarhi lowu faneleke hi lembe ra 29 C.E. (Daniel 9:24, 25; Nehemia 1:1; 2:1-9)—3/15, matluka 28, 29.

◻ Swiphiqo swa ndyangu swi nga khomisiwa ku yini ku antswa?

Hi rirhandzu, hikuva Bibele ya laya, “Hinkwaswo leswi mi swi endlaka, a swi endliwe hi rirhandzu.” Nakambe, “Rirhandzu ri funengeta swidyoho leswo tala.” (1 Vakorinto 16:14; 1 Petro 4:8) Leri ku fanele ku va rirhandzu leri dzimeke timitsu swinene leri tsakelaka ku funengeta ku pfumala ku hetiseka ni mintlhaveko leyi hoxeke ya swirho swa ndyangu leswi nga ha tlhontlhaka kumbe ku hlundzukisa munhu.—4/1, matluka 6, 7.