Xiviko Xa Vahuweleri Va Mfumo
Ku Tiyisela Ka Wanuna Ku Hlanganisa Ndyangu
A WU ta endla yini loko u amukele ntiyiso kutani munghana wa wena a ku kaneta hi matimba naswona a endla hinkwaswo leswi a nga swi kotaka ku tshova vutshembeki bya wena? Xana a wu ta tiyisiwa hi marito ya Pawulo eka 2 Timotiya 3:12, laha a nge: “Hinkwavo lava navelaka ku hanya vutomi bya vukhongeri eka Kriste Yesu, va ta xanisiwa”? Xana a wu ta tiyisela kumbe a wu ta wa mapa? Wanuna wa Mukriste eltaly u kongomane ni mphikamakaneta yo tano. A nga wanga mapa, naswona Yehova u n’wi katekisile hikwalaho ka swona.
Wanuna loyi ku vulavuriwaka hi yena a a ri mukhomunisi la gingiritekaka swinene, nakambe a a ri Mukhatoliki la hisekaka swinene. A a pfumela eka ku ringana ka vanhu naswona a vone onge mintlawa leyi hamimbirhi a yi chumayela mhaka leyi. Un’wana wa vatirhi-kulobye u vulavule na yena mayelana ni Mfumo wa Xikwembu, naswona xikan’we-kan’we u xiye leswaku leyi a ku ri yona ntsena ndlela leyi ku ringana ku nga fikeleriwaka ha yona. U amukele ntiyiso hi ku hiseka loku fanaka ni loku a ku kombiseke eka vukhomunisi ni le ka Vukhatoliki naswona u khuvuriwile hi 1972. Ku vuriwa yini hi nsati wa yena? U n’wi kanetile swinene. (Wansati) wa hlamusela:
“A ku ri hi 1970 loko nuna wa mina a hlangana ro sungula ni Timbhoni ta Yehova entirhweni wa yena. Hakantsongo-ntsongo, loko a ri karhi a dyondza Bibele, ndzi xiye leswaku a ku ri vukhongeri lebyintshwa naswona a byi ri na tinhla leti a ndzi nga pfumelelani na tona. Nxaniso wu sungurile hi xihatla wu huma eka mina ni swirho swin’wana swa ndyangu.”
Wansati u ya emahlweni: “Vatswari va nuna wa mina va n’wi karhatile, va tirhisa tindlela hinkwato leti va ti kotaka ku ringeta ku n’wi tshikisa. Loko nuna wa mina a kula evutivini bya Bibele, u vone xilaveko xo susa swifaniso ekaya ra hina. Ndzi n’wi byele leswaku loko o endla sweswo, xin’wana lexikulu xi ta endleka. U herise xifaniso xa vukhongeri, ivi ndzi n’wi hlasela swinene hi marito na hi nhlaselo wa miri kutani ndzi handzulela timagazini ta yena to hlayanyana. Loko ndzi ba nkalanga, vingi va mina va tsutsumile ivi na vona va va ehenhla ka yena, kambe a nga rihiselanga.
“Minkwetlembetano yi ye emahlweni ku kondza ndzi n’wi siya loko a lwisane ni ku ya ka n’wana wa hina wa wanhwana eka katekisima ya le kerekeni. Nuna wa mina u ndzi byele leswaku loko ndzi nga tlheleli ekaya, u ta endla xihehlo xa le nawini xo lan’wa. Endzhaku ka vhiki ndzi anakanye ku tlhelela.
“Hi matshalatshala man’wana yo n’wi sivela, ndzi ye eka mungoma ndzi kombela leswaku a n’wi loya. Mungoma u sungule ku ndzi vutisa, kutani ndzi hlamusela xiyimo. Loko a swi twile, u ndzi byerile leswaku ku hava muxaka wa vuloyi lowu tirhaka eka un’wana wa Timbhoni ta Yehova.
“Hi anakanye ku ya eka muprista wa kwalaho. Muprista u hi khutaze ku ya eka qgweta. Lexi ndzi hlamariseke qgweta ri ndzi khutaze ku ya eminhlanganweni ya Timbhoni ta Yehova kun’we ni nuna wa mina. N’wingi wa mina wa xinuna, loyi a a ri na mina, u kanetile, a vula leswaku muti lowu wu tinyikete swinene eka San Rocco, ‘Musirheleli’ wa doroba ra hina. Hambi swi ri tano, qgweta ri hlamusele leswaku ‘mukwetsimi’ loyi, ku fana ni swifaniso swin’wana hinkwaswo, a a hoxile. Kutani a tivula leswaku i mutshami wa xitulu wa Catholic Action ivi a hi byela leswaku a nga si tshama a hlanganyela eminkhubyeni ya vukhongeri hikuva, loko a hlaya Bibele, a a swi tiva leswaku hinkwabyo byi hoxile. Eku heteleleni, u te: ‘Famba ni nuna wa wena u va ni ku rhuia. N’wi yingise, kutani na wena u sungula ku dyondza Bibele.’
“Hi xikhutazo lexi, ndzi tsundzuke hanyelo, ku cinca ni ku tiyisela ka nuna wa mina, kutani ndzi sungule ku ya eminhlanganweni ya Timbhoni ta Yehova kun’we na yena. Hi ku tsakisiwa hi rirhandzu leri kombisiwaka kwalaho, ndzi dyondzile, ndzi tsarisa eXikolweni xa Vutirheli bya le Tilweni, kutani ndzi sungula ntirho wa nsimu. Eku heteleleni, ndzi kombise ku tinyiketa ka mina hi 1977 naswona ndzi tsakile sweswi ku va entiyisweni, ndzi nkhensa Yehova loyi a pfuneke nuna wa mina. ku tiyisela ivi a hlanganisa ndyangu hinkwawo evugandzerini bya Yena.”