Ku Langutela Ku Rhula Ka Misava—Xivono Lexi Hoxeke

KU LANGUTELA ehenhleni ka mintshembo ya ku rhula ka misava ka kula. Eka nhloko-mhaka ya yena eka The Toronto Star, Carol Goar u tsarile: “Mintwanano ya ku rhula ya andza ku sukela eAfghanistan ku ya eAngola. Madzolonga ya swifundza lama vonakeke ma nga heriseki tin’hweti ti nga ri tingani leti hundzeke ma kombisa swikombiso swo hela. Naswona Nhlangano wa Matiko wu ya wu hundzuka hi ndlela leyi tsakisaka.” Leswi, ku vula Goar, swi vange “ntungu wa misava hinkwayo wa ntshembo.” Mutsari eka USA Today hi ku fanana u twarisile: “Ku rhula ka humelela emisaveni hinkwayo.”

Lexi xiyekaka ngopfu sweswinyana hi leswi UN Chronicle yi swi hlamuseleke tanihi “ku hambeta ka ku tirhisana exikarhi ka Soviet Union na United States.” Ku hunguta mavuthu, swiendlakalo leswi hlamarisaka swa masocha eVuxeni bya Yuropa, mimbulavurisano ya ku hunguta masocha ni matlhari—magoza lawa ma kurise mintshembo ya leswaku mimfumo ya matimba eku heteleleni yi nga yimisa mphikizano wa matlhari. Emisaveni leyi ku vikiwaka leswaku mali leyi tirhiseriwaka tinyimpi yi lahlekeriwa hi ikhonomi leyi tlulaka tibiliyoni ta 2,2 ta tirhandi hi lembe, lowu i ntshembo lowu amukelekaka swinene.

Hambi swi ri tano, xana swi tiye ku fikela kwihi leswaku ku langutela ka munhu ka ku rhula ka misava ku ta va kona? Hambi va ri vaxiyisisi lava nga ni ntshembo va pfumela leswaku i mukhandlu lowukulu ku suka eku hungutiweni ka matlhari ku ya eku herisiweni ka matlhari. Ku tshikiwa ka matlhari ya nyutliya swi ta lava mpimo lowu nga si tshamaka wu va kona wa ku tshembana ka vanhu. Kambe, leswi khomisaka gome, mimfumo ya matimba yi ni matimu yo leha ya ku nga tshembani. Hi laha swi profetiweke ha kona eBibeleni, leyi yi vile nguva leyi eka yona vanhu va tikombiseke va ri “lava nga riki na ku tsetselela [“vatshovi va ntwanano,” King James Version].”—2 Timotiya 3:3.

Handle ka swona, a hi hinkwavo lava khorwisekaka leswaku ku herisiwa ka switlhavani swa nyutliya ku ta tisa ku rhula. Hambi loko matiko ma nga sindzisiwa ku lahla nhlengeleto wa wona wa matlhari ya nyutliya, switlhavani leswi swin’wana swi nga ha dlaya swinene. Nyimpi yo Sungula ni ya Vumbirhi ya Misava ti nyikela vumbhoni bya tihanyi emhakeni leyi. Ku tlula kwalaho, thekinoloji leyi lavekaka ku pfuxa switlhavani swa nyutliya yi ta va ya ha ri kona—yi lulamele no yimela xikombiso xo sungula xa minkwetlembetano ya politiki. Van’wana, tanihi n’wasayense wa politiki Richard Ned Lebow, u vule ni leswaku: “Kumbexana ku tshama ni switlhavani swo talanyana swa va endla vanhu va tshama va xalamukile.”

Kambe tsendze loko switlhavani swa nyutliya swi ri kona, nchavo wa ndzoviso wa nyutliya wu ta endla swihi na swihi leswi vuriwaka ku fikelela ku rhula swi nga khorwisi; kutani swiphiqo leswi nga vangiwiki hi nyimpi leswi koxaka ku rhula ka timiliyoni evuton’wini bya vona bya siku na siku ku ya emahlweni hi ndlela yoleyo. Matsalani-jenerala wa UN Javier Pérez de Cuéllar, u vulavule hi “khombo ra timiliyoni ta vaaki-kulobye lava pfumalaka makaya kumbe lava hi laha ku heleleke va tshamaka eka swiyimo leswi nga hava nsirhelelo. Xiphiqo xi ya xi nyanya.” UN Chronicle yi ya emahlweni yi vika leswaku ku hohloka ka ikhonomi ku xanisa “mbirhi-xa-nharhu xa vanhu, eka timhaka tin’wana hi mpimo wa vusweti ni vusweti lebyi nga hlamuselekiki lebyi humaka eka ku xaniseka loku vangiweke hi nyimpi.” Naswona xana ku vuriwa yini hi xiyimo xa misava xa vahlapfa lava pimanyetiwaka ku va kwalomu ka timiliyoni ta 12? Xana ku hunguteka ka tinyimpi kumbe hambi ku ri ku tshika matlhari hi laha ku heleleke swi ta tisa ku rhula evuton’wini bya vona?

Entiyisweni, ku langutela ka munhu ku rhula ka misava ko va xivono lexi hoxeke—xa le kule, xo lala, lexi hikiweke. Xana ku ni ntshembo wo antswa wa ku rhula? Entiyisweni wu kona. Eka nkandziyiso lowu hundzeke wa magazini lowu, hi vone leswaku Bibele yi nyika ntshembo wa ntiyiso wa ku rhula.a Hi ku hatlisa Yesu Kriste, tanihi Hosi ya Mfumo wa Xikwembu, u ta tisa ku rhula loku tlulaka mintshembo yihi na yihi ya vanhu. Xana ku rhula loku hakunene ku ta vula yini eka vanhu? Xihloko lexi landzelaka xi ta swi hlamusela leswi.

[Nhlamuselo ya le hansi]