Xiviko Xa Vahuweleri Va Mfumo

Valavi Va Ntiyiso Va Angula Eka Vumbhoni Bya Xitshuketa

BIBELE yi hi tivisa leswaku vanhu lava fanaka ni tinyimpfu va ta angula eka rito ra Murisi Lonene. (Yohane 10:27) Leswi swi ve tano eka matiko yo tala, ku katsa na Britain.

◻ Hi xikombiso, hi 1988, emahlweninyana ka Khisimusi, Pamela, un’wana wa Timbhoni ta Yehova, u hlamule riqingho ehofisini leyi a tirhaka eka yona kutani a vulavula ni muxavisi loyi a tirhelaka feme yoleyo eka xiphemu xin’wana xa Nghilandi. Emakumu ka mbulavurisano, wanuna u vutisile: “Xana u lunghekele Khisimusi ke?” Pamela u te: “E-e!” “Xana a wu hlwelanga?” ku vutisa mubi wa riqingho. “A ndzi yi tlangeli Khisimusi,” ku hlamula Pamela. Wanuna yoloye u vule leswaku sweswo a swi nga tolovelekanga ivi a vutisa leswaku ha yini. Pamela u n’wi byele leswaku i un’wana wa Timbhoni ta Yehova, a tlhela a hlamusela leswaku ku hava xileriso eBibeleni xo tlangela siku ra ku velekiwa ka Yesu, naswona handle ka sweswo, Yesu a nga velekiwangi hi ti-25 ta December. Ku tlula kwalaho, Khisimusi eku sunguleni a a wu ri nkhuvo wa vahedeni. Mubi wa riqingho u te hinkwaswo swi twala swi tsakisa ngopfu.

Endzhaku ka tin’hweti tinharhu Pamela u hlamule riqingho, mubi wa riqingho a ku: “Wa ha tsundzuka loko u vulavula na mina emahlweni ka Khisimusi u ndzi byela leswaku a wu tlangeli Khisimusi? Ndzi wu kumile ntiyiso!” A a ku ri wanuna loyi a fanaka, naswona u hlamusele leswaku mavhiki mambirhi endzhaku ka Khisimusi, Timbhoni timbirhi ti tile ekaya ka yena. U va amukerile, naswona dyondzo ya Bibele yi sunguriwile. U hlamusele leswaku u endle nhluvuko hi xihatla eka tidyondzo ta yena. U byele xigangu xa yena lexi a a tshama na xona leswaku vutomi bya vona a byi nga tsakisi eka Yehova, kutani va hambanile, naswona sweswi havambirhi a va va kona eminhlanganweni eHolweni ya Mfumo.

Eku heleni ka lembe, va amukeriwile tanihi vahuweleri lava nga khuvuriwangiki, naswona eku sunguleni ka 1990 va tekanile. Kutani va khuvuriwe swin’we. Vuyelo lebyi tsakisaka bya vumbhoni byo koma, bya xitshuketa hi riqingho!

◻ Yehova u katekise makwerhu un’wana wa xisati loyi a nyikeleke vumbhoni hi xitshuketa eNghilandi. Loko wanuna wa ndzindza-khombo a tile enyangweni wa yena, makwerhu wa xisati u n’wi vutisile loko a ta swi tsakela ku tiyisekisiwa hi rihanyo lerinene, ntsako, ni vutomi lebyi nga heriki. U pfumerile ivi a n’wi vutisa leswaku i ndzindza-khombo wihi lowu a a vulavula ha wona. Loko a kombiwa eBibeleni xitshembiso xa Xikwembu xa vutomi lebyi nga heriki eParadeyisini emisaveni, u amukele kopi ya buku leyi nge U Nga Hanya Hi Masiku aParadeyini eMisaveni ivi a hlaya buku hinkwayo hi madyambu man’we. Loko a endzela makwerhu loyi wa xisati nakambe, u n’wi byele leswaku rungula a a ri ri lerinene—loko ntsena a a ri na ripfumelo ro swi tshemba. Makwerhu wa xisati u hlamusele leswaku a a fanele ku va ni dyondzo ya Bibele naswona a va kona eminhlanganweni eHolweni ya Mfumo. Dyondzo ya Bibele yi hleriwile, ivi a sungula ku va kona eminhlanganweni. U khuvuriwile eku heleni ka rona lembe rero. Endzhaku ka lembe rin’we u tekane ni n’wana wa makwerhu loyi a n’wi nyikeleke vumbhoni ro sungula. “Kutani ke,” ku vula makwerhu wa xisati, “ndzi kume makwerhu ni mukon’wana hi vumbhoni bya mina bya xitshuketa!”

I ntiyiso leswaku valavi va ntiyiso va angula loko ntiyiso wa Bibele wu nyikeriwa hi vumbhoni bya xitshuketa. Hi laha Yesu a vuleke ha kona, tinyimpfu ta yena ti yingisa rito ra yena.