Va Nga Dyondza Eka Tinyoxi

“Emalembeni ya sweswinyana, vanjhiniyara ni vaendli va swilo hi laha ku engetelekeke va xiye swin’wana leswi tinyoxi handle ko kanakana a ti swi tive khale: ku vumba swilo swo lala swinene leswaku ti endla xihlenge xa matlhelo ya tsevu swi xi endla lexi tiyeke ku tlula hi laha a xi ta va ha kona eka xivumbeko xin’wana.”—The New York Times, October 6, 1991.

A SWI hlamarisi leswi vanhu va nga pfunekaka hi dyondzo ya vukheta ya switsotswana. Wanuna wa khale wa ripfumelo, Yobo, u tshame a ku: “Wa nga v̌utisa tihomu, ti ta ku dyonḍisa, ni tinyanyana ta le tilweni, ti ta ku byela. . . . I mani l’a nga alaka ku v̌ona leŝaku v̌oko ra Yehova ri endlile ŝilo hikwaŝo?” (Yobo 12:7-9) Ina, vutlhari bya Muvumbi bya vonaka eka swilo leswi tolovelekeke swo tanihi xivumbeko xa matlhelo ya tsevu xa tisele leti u nga ti vonaka eka xihlenge.

Hambi leswi makhumbi ya mhula ya tisele leti ma nga kwalomu ka n’we xa nharhu xa milimitara hi ku bumbula, ma tiye ngopfu. Entiyisweni, ma nga rhwala ntiko wa tona ku ringana minkarhi ya 30.

Matimba lawa ya nga ha tirhisiwa hi ndlela ya xiviri, tanihi ku sivela ku himiwa ka swilo. Nakambe swi nga ha sirhelela swingolongondzwana swa nyimpi loko swi hahisiwa swi ta emisaveni. The New York Times yi hlamusela ha swona yi ku: “Swilo swo tika swo tanihi tijipi swi boheleriwa eka tiplatifomo hi timhandzi ta swihlenge hala hansi leswaku ti ta hunguta huwa loko ti yima.”

Swilo leswi endliweke hi munhu swo fana ni leswi swi nga ha endliwa hi swilo swo tala. Lexi vonakaka xi toloveleke ngopfu i phepha. Maphepha ya nayiloni lama endliweke hi njara ni nhlaka swi tirhisiwa ku vumba swihlenge leswi nghenisiwaka endzeni ka swihaha-mpfhuka leswikulu. Swi ni matimba kambe swi ri ni ntiko lowuntsongo. Hikwalaho ka yini? Ndhawu yo tala leyi nga exikarhi ka timhandzi i moya, kutani ku ni ntikelo wuntsongo. Moya na wona wu ni ku hambanisa lokunene.

Nyoxi a yi swi “tivi” hinkwaswo leswi, hikuva a yi na vuswikoti bya vunjhiniyere. Hambi swi ri tano, siku rin’wana ni rin’wana yi hambeta ni ntirho wa yona hi vutlhari lebyikulu lebyi yi byi nyikiweke hi Muvumbi, Yehova.