Leswi Swi Nge Endleki!

“SWI nga olovela kamela ku nghena hi ntuva wa neleta, ku ri ni leswaku mufuwi a nghena eMfun’weni wa [Xikwembu, NW].” (Matewu 19:24) Yesu Kreste u vule leswi leswaku a dyondzisa vadyondzisiwa va yena dyondzo yo karhi. Mufumi un’wana lontsongo la fuweke a ha ku ala xirhambo xo va mulandzeri wa Yesu ni ku hlanganyela eka malunghelo yo tala ya moya. Wanuna yoloye u hlawule ku namarhela nhundzu ya yena yo tala ku ri ni ku landzela Mesiya.

Yesu a nga vuli swona leswaku swi nge koteki hi laha ku heleleke leswaku munhu la fuweke a kuma vutomi lebyi nga heriki elunghiselelweni ra Mfumo, hikuva vafuwi van’wana va ve valandzeri va yena. (Matewu 27:57; Luka 19:2, 9) Kambe, vutomi lebyi nga heriki byi nge kumiwi hi munhu la fuweke la rhandzaka ngopfu nhundzu ya yena ku tlula swilo swa moya. Munhu yoloye a nga ponisiwa hi Xikwembu loko a khathalela swilaveko swa yena swa moya ni loko a lava mpfuno wa Xikwembu.—Matewu 5:3; 19:16-26.

Xifaniso xa kamela ni mbhovo ya neleta a xi fanelanga xi tekiwa hi ku kongoma. Yesu a a tirhisa xifaniso ku kandziyisa ku nonon’hwa loku langutaneke ni vanhu lava fuweke lava ringetaka ku tsakisa Xikwembu hala tlhelo va ri karhi va hlayisa rifuwo, vutomi byo hlongorisa swilo leswi vonakaka.—1 Timotiya 6:17-19.

Van’wana va vula leswaku mbhovo ya neleta a ku ri nyangwa lowutsongo ekhumbini ra muti laha kamela a swi yi nonon’hwela ku hundza loko yi rhwexiwe ndzhwalo. Kambe rito ra Xigriki rha·phisʹ, leri hundzuluxeriweke va ku “neleta” eka Matewu 19:24 na Marka 10:25, ri huma eka riendli leri vulaka “rhunga.” Eka Luka 18:25 rito be·loʹne ri vula neleta yo rhunga, kutani kwalaho New World Translation yi hlayekisa xileswi: “Kahle-kahle, swa olova leswaku kamela yi nghena hi mbhovo ya neleta yo rhunga ku tlula leswaku mufuwi a nghena emfun’weni wa Xikwembu.” Vadyondzi vo hambana-hambana va swi seketela leswi. W. E. Vine u ri: “Mianakanyo yo fananisa ‘mbhovo ya neleta’ ni nyangwa lowutsongo yi tikomba yi ri ya manguva lawa; a byi kona vuthala bya yona.”—An Expository Dictionary of New Testament Words.

Ku va kamela leyikulu yi ringeta ku nghena hi mbhovo wa neleta yo rhunga i “xithathelo xa le Vuxeni,” ku vula buku yin’wana. Naswona malunghana ni van’wana lava tlhariheke swinene lerova va vonaka va endla swilo leswi nga endlekiki, The Babylonian Talmud yi ri: “Va dirowa ndlopfu yi ri karhi yi hundza hi le mbhoveni ya neleta.” Yesu u tirhise xithathelo lexi tolovelekeke ni ku kombisa ku hambana loku xiyekaka ku kandziyisa leswaku swi nge endleki. Swi nge endleki leswaku kamela kumbe ndlopfu yi hundza hi le mbhoveni ya neleta yo rhunga. Hambi swi ri tano, hi mpfuno wa Xikwembu mufuwi a nga tshika vonelo ra ku hlongorisa swilo leswi vonakaka naswona a lava vutomi lebyi nga heriki hakunene. Ni hinkwavo lava nga ni ku navela loku humaka embilwini ko dyondza ni ku endla ku rhandza ka Yehovha Xikwembu xa le Henhla-henhla, va nga endla tano.