Vito Ra Xikwembu

“Loko Yehovha a nga aki yindlu, vaaki va tirhela swa hava.” Tsalwa ra Xilatini ri hlayeka hi ndlela yoleyo. Marito ma sekeriwe eka Pisalema 127:1 eBibeleni, naswona ma ni ntiyiso lowo enta: Matshalatshala wahi ni wahi lama nga katekisiwiki hi Yehovha ma ta va ya hava.

Tsalwa leri tsariweke hi 1780 ri kumeka emuakweni wa le Colombo, le Sri Lanka, naswona ra xiyiwa hi ku va ri ri na vito ra Xikwembu, Yehovha. (Vona xifaniso.) Eka malembe xidzana yo sungula vito rero a ri tirhisiwa swinene. Hakanyingi a ri tsariwa emiakweni ya tiko, etikerekeni, hambi ku ri emalini. Varhumiwa va tirhise vito ra Xikwembu loko va yisa Bibele emakun’wini ya misava, leswi handle ko kanakana swi vangaka leswaku tsalwa leri ri voniwa le Sri Lanka.

Vona ndlela leyi swilo swi hambaneke ha yona namuntlha! Vakreste va nga ri vangani va nomu va ri tirhisa vito ra Xikwembu. Vadyondzi van’wana va sola na Timbhoni ta Yehovha hikwalaho ka ku ri kandziyisa. Ha yini? Hi ku ya hi van’wana, hi leswaku mavitanelo ya rona ya Xiheveru a ma tiveki hi ku kongoma. Kambe i vangani lava tivaka mavitanelo yo sungula ya vito ra Yesu hi Xiheveru? Kambe, vito rakwe ri tirhisiwa emisaveni hinkwayo naswona ra xiximiwa.

Eka Yesu, vito ra Xikwembu a ri ri ra nkoka swinene. U hi dyondzise ku khongela hi ku: “Vito ra wena a ri hlawuleke.” (Matewu 6:9) Naswona a nga si fa, u te eka Xikwembu: “V̌ito ra wena, nḍi ri tiv̌isile v̌anhu lav̌a u nḍi nyikeke v̌ona e misav̌eni.” (Yohane 17:6, BX) Vakreste va ntiyiso, i valandzeri va minkondzo ya Yesu. Xana na vona a va fanelanga ku ‘hlawulekisa vito ra Xikwembu’? Timbhoni ta Yehovha ti endla tano, naswona Yehovha u katekisa “yindlu” ya tona hi laha ku fuweke. Eka vona pisalema leyi yi tiyisile: “Ku katekile tiko leri Yehova a nga Šikwembu ša rona!”—Pisalema 144:15.