“Ti Tiva Rito Ra Yena”

“YEHOVA i murisi wa mina.” Lawa i marito ya xingheniso ya Pisalema 23. Matsalwa nakambe ma fanisa Yehovha Xikwembu ni murisi eka vuprofeta bya Esaya lebyi nge: “Tani hi murisi, o ta risa ntlhambi wa yena; o ta rola ŝinyimpfana hi mav̌oko, o ta ŝi v̌ukara e rumbini ra yena, o ta fambisa khwaṭi le’ti aṅwisaka.”—Esaya 40:11.

Hi laha ku fanaka, Yesu Kreste u fanisiwa ni murisi. U te: “Hi mina murisi lonene. Murisi lonene ú nyiketa vutomi bya yena a fela tinyimpfu.” (Yohane 10:11) Yesu u vule leswaku “tinyimpfu ti twa rito ra [murisi]; ú vitana tinyimpfu leti nga ta yena hi mavito ya tona, a ti humesela handle.” U tlhele a vula leswaku “tinyimpfu [ti landzelela murisi], hikuva ti tiva rito ra yena. Ti nga ka ti nga landzi munhu loyi ti nga n’wi tiviki; ti ta n’wi balekela, hikuva a ti tivi rito ra vambe.”—Yohane 10:2-5.

Yehovha Xikwembu ni N’wana wa xona, Yesu Kreste, va endle hi ku pfumelelana ni xifaniso lexi hlamuseriweke ematsalweni lama nga laha henhla. Va khome tinyimpfu ta vona to fanekisela hi nsovo ni rirhandzu. Hikwalaho vanhu vo fana ni tinyimpfu va titwa va rhandziwa ni ku tlhela va sirheleleka.

Vuxaka lebyi byi fanisiwa kahle ni lebyiya bya tinyimpfu ta xiviri ni murisi wa tona. Le ndzhaku hi 1831, John Hartley u tsale hi leswi a swi xiyeke emhakeni leyi. U hlamusele leswaku le Greece a ku ri mukhuva wa varisi ku thya tinyimpfu ta vona mavito. Loko ti vitaniwa hi vito, tinyimpfu ti endla leswi rito ra murisi ri ti byelaka swona. Malembe ya 51 endzhakunyana, hi 1882, J. L. Porter u tiyise mhaka leyi fanaka. U vone varisi hi mahlo yakwe va “huwelela . . . hi rito leri tlakukeke,” laha tinyimpfu a ti angula hi ku landzelela varisi. Lembe rolero William M. Thomson u tsale hi minkambisiso leyi phindha-phindhiweke leyi kombiseke leswaku tinyimpfu ti nga dyondzisiwa ku landzelela murisi wa tona ni ku tiva rito ra yena.

Xana vuxaka lebyi byo hlawuleka bya varisi ni tinyimpfu ta vona byi xiyiwile eminkarhininyana leyi hundzeke? Ina. Eka nkandziyiso wa National Geographic wa September 1993, Robyn Davidson mulavisisi wa le Australia u tsale leswi landzelaka mayelana ni mufuwi wa Murabari le n’walungu-vupela-dyambu bya India: “Murisi un’wana ni un’wana u ni mavitanelo lama hambanekenyana. Ku ni mavitanelo ya ni mixo ya leswaku ti huma, mavitanelo yo ti yisa ti ya nwa mati, sweswo-sweswo. Munhu un’wana ni un’wana u tiva tinyimpfu ta yena na tona ti tiva n’wini wa tona, naswona ntlhambi wa yena wa tihlawula eka ntlhambi lowukulu, kutani wu n’wi landza ni mixo.”

Handle ko kanakana, Yesu u tiyise leswi nga hlamuseriwa hi valavisisi va mune lava boxiweke. Marito ya yena ma tiyise xifaniso xakwe xa tinyimpfu leti tivaka rito ra yena. Xana u wun’wana wa tinyimpfu ta Yesu? Wa ri tiva rito ra yena u tlhela u ri yingisa ke? Loko u tiva u tlhela u amukela tidyonzo ta yena tanihi ntiyiso, ni loko u yingisa milawu ya yena ni ku landzelela vukongomisi bya yena loko u gandzela Yehovha, kutani u ta vona vurisi bya rirhandzu ni musa bya Yehovha Xikwembu ni N’wana wa yena, Yesu Kriste.—Yohane 15:10.