‘Mintirho Yakwe Ya N’wi Landzela’

HI RAVUMUNE, hi July 28, 1994, hi 8:50 nimixo, George D. Gangas u hete pfhumba rakwe ra laha misaveni. A a ri ni malembe ya 98 hi vukhale. George Gangas, un’wana wa vatotiwa, u ve xirho xa Huvo leyi Fumaka ya Timbhoni ta Yehovha ku sukela hi October 15, 1971.

Hinkwavo lava a va tolovelane na Makwerhu Gangas a va tiva ndlela leyi a a rhandza vululami ni ku venga vubihi ha yona. Va yi tsundzuka kahle ndlela leyi ha yona a a hlamusela Sathana hi ku phindha-phindha tanihi muhembi lonkulu, la chavisaka, wo homboloka, la nyenyetsaka ni la solekaka. Hi laha ku hambaneke, a a vulavula hi Yehovha tanihi Tatana wa rirhandzu, la nga ni musa, ntwela-vusiwana, nsovo ni la khathalelaka. Vo tala va tsundzuka ni ku rhandza ka yena ku vutisa swivutiso swa Bibele. Eka bulo rin’wana ni rin’wana, a a vutisa swivutiso—leswi swin’wana swa swona a swi olova, swin’wana swa swona swi tika. Entiyisweni, a a rhandza ntiyiso wa Bibele.

Makwerhu Gangas u khuvuriwe hi July 15, 1921. U sungule ntirho-vutomi wa yena wa vutirheli byo chumayela bya nkarhi hinkwawo (vuphayona) hi March 1928. Hikwalaho, u ve entirhweni wa nkarhi hinkwawo malembe yo ringana 66 loko ma hlanganile. U ve xirho xa vatirhi va yindlu-nkulu ya Brooklyn ya Watch Tower Bible and Tract Society hi October 31, 1928.

Mhaka ya vutomi bya yena yi kumeka enkandziyisweni wa Xihondzo xo Rindza (xa Xinghezi) wa October 15, 1966. Yi hlamusela wanuna wa moya wa ntiyiso wa Xikwembu. Eka xihloko xolexo, u vule marito lama landzelaka lama kufumetaka mbilu: “Ndzi rhandza vutomi naswona ndzi lava leswaku vamakwerhu va kuma vutomi. Ndzi xiya swin’we na muapostola Pawulo, leswaku leswin’wana hinkwaswo a ‘swi pfuni nchumu, loko swi ringanisiwa ni risima leri tlulaka hinkwaswo ra ku tiva Kriste Yesu.’”—Vafilipiya 3:8.

Makwerhu Gangas u kombise hi swiendlo swa yena leswaku hakunene a a rhandza vutomi, naswona hi ku hiseka u byele van’wana hi “ku tiva [ka yena] Kriste Yesu.” U ta tsundzukiwa, kambe swa hi tsakisa swonghasi leswi sweswi a kumeke hakelo ya yena ya le tilweni! Sweswi ‘u ta phyuphya emikarhalweni ya yena, hikuva mintirho ya yena ya n’wi landzela.’—Nhlavutelo 14:13.