Va Swi Endle Hikwalaho Ka Rirhandzu

NONI ya le Canada, leyi tshembekeke, leyi nga ni malwandla, a yi ri karhi yi kurisa vana va vanhwanyana va mune leswaku va va Vakreste va ntiyiso. Vakulu va le vandlheni va xiye leswaku kaya ra yona a ri lava ku lunghisiwa swinene. A yi ri hava mali hambi ku ri vuswikoti byo tiendlela ntirho lowu hi yoxe. Xisweswo, hi ku pfumelelana ni nsinya wa nawu lowu andlariweke eka 1 Timotiya 5:9, 10, vakulu hi vutlhari va hlele leswaku va n’wi endlela ntirho lowu. Njhani?

Ku endliwe makungu ya leswaku noni leyi ni vana va yona va ya tshama kun’wana ku ringana ntlhanu wa masiku. Vanhu vo tlula 80 evandlheni va nyikele nseketelo wa vona lowu humaka embilwini, hi ku nyikela nhundzu, timali ni nkarhi wa vona. Endzhakunyana ka loko ndyangu lowu wu fambile, vatirhi lava tiyimiseleke va khitikane va ya emutini lowu onge i tinyoxi. Yindlu hinkwayo ehandle yi pfuxetiwile. Makhumbi ma phamiwile ni ku pendiwa. Ehansi ku chukuchiwile ku tlhela ku endliwa hi vuntshwa. Ku nghenisiwa swileti ni khapete leyintshwa ehansi. Fambiselo ra gezi ni swo voninga leswi lavekaka swi lulamisiwile. Hambi ku ri vhanichara leyi hlakaleke yi humesiwile ku nghenisiwa yin’wana. Endzhaku ka masiku ya ntlhanu ntsena yindlu a yi pfuxetiwile hi ku helela!

Moya wa ntsako ni wa migingiriko lowu a wu ri kwalaho wu hlamarise vaakelani swinene. Muakelani un’wana wa malembe ya 80 hi vukhale u tsakisiwe ngopfu hi matshalatshala lawa ya Timbhoni lerova a tisa bulachi yakwe yo penda ha yona ivi a sindzisa leswaku na yena a pfuna. Muthori wa mutirhi un’wana wa ku tirhandzela, u nyikele hi nchumu wo koka moya wa xitofu xa le khixini. Muthori un’wana u nyikele hi tikhaboto letintshwa ta le khixini. Wanuna un’wana a hlamale ngopfu lerova u lave ku tiva swo tala hi Timbhoni ta Yehovha. Hi ku tiyimisela u amukele buku leyi nge U Nga Hanya Hi Masiku aParadeyisini eMisaveni.

Loko noni ni vana va yona va vuya, a swi vonaka emahlweni ya vona leswaku a va hlamarile swinene. Mihloti a yi khapakhapa, ku hlekiwa va tlhela va vukarhana—a ku ri nkarhi lowu nga rivalekiki wo kombisa rirhandzu ni mintlhaveko ya Vukreste. Ina, rirhandzu ra xiviri ni ku khumbeka hi swirho swa vandlha leswi pfumalaka i mfungho wa Vukreste bya ntiyiso, hikuva Pawulo u tsarile: “Hikokwalaho, minkarhi hinkwayo loko swi koteka, a hi endleleni vanhu hinkwavo leswinene, ngopfu-ngopfu va ndyangu wa lava pfumeleke.”—Vagalatiya 6:10.