‘Tirhelani Hosi, Ku Nga Kreste’

EMATIN’WINI hinkwawo, timiliyoni ta vanhu ti tiyisele ndzhwalo wa vuhlonga. Hi xikombiso, hi magidi ya malembe lama hundzeke, Vaisrayele va xanisiwe swinene hi valanguteri va Vaegipta. Hilaha Bibele yi vulaka hakona, va “veke valawuri va mahlonga eka Vaisrayele leswaku va va tshikilela hi mindzhwalo yo tika,” ngopfu-ngopfu hi ku endla switina.—Eksoda 1:11, The Jerusalem Bible.

Ematikweni yo tala namuntlha, vanhu va nga ha va va nga ri mahlonga hi ndlela ya xiviri, kambe vo tala va boheka ku tirha tiawara to tala leti karharisaka ehansi ka swiyimo—minkarhi yin’wana leswi nga tsakisiki—leswi tikaka. Va le hansi ka ndzhwalo lowu tikaka wa leswi nga ha vitaniwaka vuhlonga bya swa timali.

Hambiswiritano, ku ni xivumbeko xin’wana xa vuhlonga lexi nga tikiki. Muapostola Pawulo u khutaze vapfumeri-kulobye a ku: ‘Tirhelani Hosi, ku nga Kreste.’ (Vakolosa 3:24) Lava hlawulaka ku va malandza ya Kreste va ntshunxeka eka mindzhwalo ya vona leyi tikaka. Yesu hi yexe u te: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’wina yi ta kuma ku wisa; hikuva joko ra mina ra olova, ni ndzhwalo wa mina wa vevuka.”—Matewu 11:28-30.

Ku amukela joko ra Kreste a swi n’wi ntshunxi munhu eka ndzhwalo wo hlayisa ndyangu wa yena hi swilo leswi vonakaka. (1 Timotiya 5:8) Hambiswiritano, wa wu kuma ntshunxeko eka yo tala ya mintlhamu ya ku hlongorisa swilo leswi vonakaka. Ematshan’weni yo endla leswaku swilo leswi vonakaka swi va pakani ya vona leyikulu evuton’wini, Vakreste va eneriseka hi swilo leswi nga swilaveko.—1 Timotiya 6:6-10; ringanisa 1 Vakorinto 7:31.

Vakreste va tlhela va phyuphyisiwa hi ku hetisisa vutihlamuleri bya vona byo chumayela “Evhangeli” ya Mfumo wa Xikwembu. (Matewu 24:14) Leswi swi tisa ntsako wa xiviri ni ku eneriseka!

Hi fanele hi nkhensa swinene leswi hi nga “tirhel[aka] . . . Hosi ya hina Kriste”!

[Laha Xifaniso Xi Humaka Kona eka tluka 32]

Pictorial Archive (Near Eastern History) Est.