Huvo-nkulu Ya Connecticut Yi Seketela Timfanelo Ta Muvabyi
Hi April 16, 1996, Huvo-nkulu ya Connecticut, eU.S.A., yi seketele mfanelo ya Timbhoni ta Yehovha yo ala mimpompelo ya ngati. Xiboho lexi xi tlherisele nawu lowo sungula wa huvo endzhaku.
Hi August 1994, Nelly Vega, un’wana wa Timbhoni ta Yehovha, u sungule ku huma ngati swinene endzhaku ko veleka n’wana wa yena wa mativula. Matshalatshala lama endliweke yo yimisa ku huma loku ka ngati a ma humelelanga. Loko xiyimo xa Manana Vega xi ye xi nyanya ku biha, xibedlhele xi lave ku tirhisa nawu wa huvo lowu pfumelelaka mpompelo wa ngati. Manana Vega ana se a a sayine tsalwa ro ntshunxa madokodela a lerisa leswaku a ma fanelanga ma n’wi nghenisa ngati kumbe swilo leswi endliweke hi ngati loko a ri exibedlhele, a ntshunxa xibedlhele eka vuyelo byihi na byihi lebyi nga vaka kona hikwalaho ka xiboho xa yena. Hambiswiritano, xibedlhele xi vule leswaku ku sindzisa mpompelo wa ngati ku ta pfuna n’wana la ha ku tswariwaka, loyi xibedlhele a xi vula leswaku a a lava mana wakwe. Huvo-ntsongo na yona a yi karhatekile, hi ku vona leswaku handle ka ku lahlekeriwa ka yena hi ngati, Manana Vega a ha ri ntsongo naswona a a ri wansati la hanyeke khwatsi. Xisweswo, ku nga khathariseki leswi Manana Vega, nuna wakwe ni gqweta ra yena va aleke, huvo yi nyike xileriso naswona mpompelo wa ngati wu tirhisiwile.
Hi ku famba ka nkarhi, nandzu lowu wu yisiwe eka Huvo-nkulu ya Connecticut. Kwalaho, ku endliwe xiboho hi nomo wun’we xa leswaku goza leri tekiweke hi xibedlhele, a ku ri ku tlula timfanelo ta Manana Vega. Xileriso lexi xi te: “Ku tengiwa ka mhaka leyi ehubyeni-tsongo ku endliwe exikarhi ka vusiku, hi xihatla swinene lerova a swi nga ta koteka leswaku lava katsekaka va andlala timhaka khwatsi.”
Xiboho lexi xa Huvo-nkulu ya Connecticut i xa nkoka ni le ka vanhu van’wana lava nga riki Timbhoni ta Yehovha. Donald T. Ridley, gqweta ra Manana Vega u ri: “Leyi i mhaka ya nkoka eka vavabyi hinkwavo lava swi nga ha endlekaka va nga pfumelelani na swona swiboho swa madokodela ya vona. Xiboho lexi xi ta sivela swibedlhele ku sindzisa leswaku ku tluriwa ntikelo wa timfanelo ta vavabyi, ku nga ha va ta swa vukhongeri kumbe tin’wana.”