Ku Bumabumeriwa Ka Ntsombano “Wo Hlawuleka”

MUHAXI eka xiya-ni-moya le Lima, ePeru a a ti kanakana swinene Timbhoni ta Yehovha. Hambiswiritano, endzhaku ko va kona eka wun’wana wa mintsombano ya tona, langutelo ra yena ri hundzuke hi ndlela leyi hlamarisaka. Entiyisweni, u khumbeke swinene lerova a vulavula hi tona hi ndlela leyinene eka vayingiseri va yena va xiya-ni-moya. Leswi landzelaka i xiphemu xa leswi a swi vuleke:

“Ntsombano a wu ri wo hlawuleka hakunene. A ku nga ri na xiphephana ehansi hambi ku ri muxavisi. Mimovha a yi famba hi ku ntshunxeka. Vanhu va 5200 va tihakelerile va ya etimbaleni ta ntsombano, un’wana ni un’wana a khome bakiti, lapi, nchumu wo susa ritshuri, xibye xo olela thyaka, nkukulu, burachi ya voko, maglilavhu ni mirhi yo hlantswa ni ku koropa ndhawu. Laha a ku lava ku pendiwa va ku pendile. Xana mali ya kona va yi kume kwihi? Hi vona va yi nyikeleke! Loko va byeriwa hi nchumu wo karhi lowu lavaka ku endliwa, hinkwavo va nyikela hi ku hatlisa. Ku vula ntiyiso, Kereke ya Khatoliki a yi tikarhati hi timhaka to tano. Ndzi lava ku bumabumela Timbhoni ta Yehovha ni vafambisi va xiendlakalo lexi. Naswona ndzi lava ku va byela swi huma embilwini leswaku, Onge Xikwembu xi nga mi pfuna ni ku mi katekisa.”

Emadorobeni ya misava hinkwayo nan’waka, Timbhoni ta Yehovha ti ta tiphina hi Ntsombano wa Muganga lowu nge, “Ndlela Ya Xikwembu Ya Ku Hanya.” Xana u ta va u ri kona?

[Marito lama tshahiweke exihlokweni lama nga eka tluka 32]

“A ku nga ri na xiphephana ehansi”