Hikwalaho Ka Yini U Nga Vi Na Tona?

NDJAUKUA ULIMBA u ni malembe ya 73 hi vukhale, naswona lembe leri nga hundza u teke riendzo ra kwalomu ka 450 wa tikhilomitara. Mpfhuka lowu hinkwawo u wu fambe hi milenge, naswona u hete masiku ya 16 a ri karhi a famba.

Mukhalabye loyi u teke riendzo leri ro leha leswaku a ya eka wun’wana wa mintsombano ya lembe na lembe ya Timbhoni ta Yehovha. Endzhaku ka ntsombano, a a tsakile naswona a a tiyisiwile hi tlhelo ra moya, nakambe u tlhelele ekaya hi milenge—a heta masiku man’wana ya 16. Xana a swi fanerile leswaku a tikarhata hi ndlela leyi? Ina! Ndjaukua Ulimba i khale a ri karhi a teka riendzo leri lembe na lembe.

Wanuna loyi wa Muntima a a ri un’wana wa lava tlulaka 15 wa timiliyoni, vo huma eka matiko lama tlulaka 230, lava veke kona eka mintsombano ya Timbhoni ta Yehovha n’wexemu. Ina, vo tala va vona, a va nga fambi masiku yo tala ku ya laha ntsombano wu nga kona. Vunyingi byi fike hi mimovha, mabazi, switimela kumbe hi swihaha-mpfhuka. Xana a wu ri un’wana wa vona?

Hi 1998, mintsombano yi ta tlhela yi khomiwa emisaveni hinkwayo, ngopfu-ngopfu hi tin’hweti ta ximumu (kumbe hi nkarhi wo pfumala timpfula). Loko rihanyo ri n’wi pfumelela, Ndjaukua Ulimba kumbexana u ta tlhela a teka riendzo leri fanaka leswaku a ta kota ku va kona. Yena ni van’wana va timiliyoni va ta yingisela nongonoko lowu dyondzisaka, lowu tiyisaka ripfumelo ni lowu phyuphyisaka. Ntsombano lowu wu ta va xiendlakalo lexikulu elembeni, eka hinkwavo lava nga ta va kona. Na wena wa rhambiwa hi malwandla leswaku u va kona. Timbhoni ta Yehovha ta laha u tshamaka kona, ti ta swi tsakela ku ku byela laha ntsombano wa le kusuhi na wena wu nga kona.