“Xikombiso Xa Vun’we Ni Vumakwerhu”

Yoleyo i ndlela leyi wansati un’wana a hlamuseleke swiendlo swa Timbhoni ta Yehovha endzhaku ko lahlekeriwa hi xirho xa ndyangu. Wa hlamusela:

“Ndzi rhandza ku nkhensa Timbhoni ta le vandlheni ra Xintariyana ra le Freiburg, eJarimani, ndzi nkhensela ni ndyangu wa ka hina. Va ndyangu wa ka hina a hi Timbhoni ta Yehovha, handle ka buti wa mina Antonio ni nsati wa yena Anna. I khale hi ri karhi hi xopaxopa vukhongeri lebyi va byi hlawuleke, hambileswi a hi byi xixima minkarhi hinkwayo.

“Hambiswiritano, sweswi hi cince mianakanyo ya hina. Kahle-kahle, hi vone xikombiso xa vumakwerhu ni rirhandzu leswi a hi nga swi langutelanga.

“Lexi vavisaka, Anna u fe a ha ri ntsongo emhangwini ya le godzweni. Tanihi leswi hi tshamaka eItaly, a hi swi kotanga ngopfu ku chavelela buti wa mina Antonio ni vana va yena. Vamakwavo va yena va Timbhoni va n’wi pfunile. Va n’wi pfune hi ku va kona ka vona, marito ya vona, ripfumelo ra vona, nseketelo wa vona wa swilo leswi vonakaka, mahanyelo ni wa timali. Tanihi leswi ndzi nga ta ka ndzi nga nkhensi vandlha hi ndzexe, ndzi ta rhandza ku ri nkhensa hi magazini wa n’wina hikwalaho ka xikombiso xa rona xa vun’we ni vumakwerhu leswi hi nga ta ka hi nga swi rivali.”

Marito lawa ya tintswalo ya wansati loyi ma tlangeriwa. Hilaha a hlamuseleke hakona, Timbhoni ta Yehovha ti ni vuxaka bya misava hinkwayo. (1 Petro 2:17) Ti hlakulela xiboho lexi tiyeke xa rirhandzu exikarhi ka tona, hi ku tiva leswaku rirhandzu “i xiboho lexi hetisekeke xa vun’we.” (Vakolosa 3:14) Hambi ku ri eswiyin’weni leswi vavisaka swinene, leswi nga hi welaka hinkwerhu, Timbhoni ta Yehovha ti namarhela swinene eka Xikwembu ni vanhu va xona.—Swivuriso 18:24; Eklesiasta 9:11; Yohane 13:34, 35.