Xana U Ni Ndhuma Ya Njhani?

EBIBELENI, minkarhi yin’wana ‘vito’ ri kombetela eka ndhuma ya munhu. Hi xikombiso, Hosi yo tlhariha Solomoni u tsarile a ku: “Vito ra antswa ku ri ni mafurha lamanene, ni siku ra ku fa ku ri ni siku leri munhu a velekiweke ha rona.” (Eklesiasta 7:1, NW; ringanisa Swivuriso 22:1.) Hi ku ya hi marito ya Solomoni, munhu a nga velekiwi ni ndhuma leyinene. Ematshan’weni ya sweswo, u kuma ndhuma leyinene leyi nga ni nhlamuselo ya xiviri loko a ri karhi a hanya. Ndhuma ya yena yi n’wi hlawula eka timfanelo ta yena n’wini, hambi wa hanana kumbe u ni vuciva, u ni ntwela-vusiwana kumbe u ni nsele, wa titsongahata kumbe wa tikukumuxa, hambi u lulamile kumbe u hombolokile.

Anakanya hi Davhida. Hi nkarhi wa ku fuma ka yena, u tikombe a ri ni matimba naswona a nga tsekatseki. Hi nkarhi lowu fanaka, hi ku titsongahata Davhida u swi pfumerile swihoxo swa yena ivi a hundzuka eswidyohweni swa yena leswikulu. Hi xivangelo lexi twalaka, muprofeta wa Yehovha u kombise leswaku Davhida a a ri “wanuna la amukelekaka embilwini [ya Xikwembu].” (1 Samuwele 13:14, NW) Davhida lontsongo ana se a ri ni ndhuma leyinene eka Xikwembu.

Ku hambana ni sweswo, Yehoramu Hosi ya le Yudiya u tiendlele ndhuma yo biha. U endle leswaku vanhu lava a va fumiwa hi yena va fularhela vugandzeri bya Yehovha naswona u endle leswaku vamakwavo va yena va tsevu ni tihosana tin’wana ta le Yuda va dlayiwa. Eku heteleleni, Yehovha u be Yehoramu hi vuvabyi lebyi vavisaka swinene lebyi n’wi yiseke eku feni. Bibele yi vula leswaku Yehoramu “a famba a nga ha tsakeriwi hi munhu,” kumbe hilaha Today’s English Version yi swi vekaka hakona, “ku hava loyi a tweke ku vava hi rifu ra yena.”—2 Tikronika 21:20.

Vutomi bya Davhida na Yehoramu byi kombisa ntiyiso wa xivuriso xa Bibele lexi nge: “Ku ṭunḍukiwa ka l’a lulameke i ku kateka, kambe v̌ito ra lo’wo biha ri ta bola.” (Swivuriso 10:7) Hikwalaho, un’wana ni un’wana wa hina u fanele a anakanyisisa hi xivutiso lexi hi vukheta, ‘Xana ndzi ni ndhuma ya muxaka muni ni Xikwembu ni vanhu-kulorhi?’