Ku Rhula Ka Misava—Ku Huma Eka Xihlovo Xihi?

XANA dyondzo ni vukhongeri bya misava hinkwayo swi ta tisa ku rhula ka misava? Loku i ku navela lokukulu ka Dok. Robert Muller, khale ka xandla xa matsalana-nkulu wa Nhlangano wa Matiko ni loyi a kumeke Sagwadi ra UNESCO ra Dyondzo ya ku Rhula ra 1989. Hilaha swi vikiweke hakona eka phepha-hungu ra The Vancouver Sun, Dok. Muller u “khorwisekile leswaku swichudeni swa misava hinkwayo swi fanele swi dyondzisiwa mintiyiso ni mimpimanyeto ya vutomi malunghana ni pulanete, vumunhu ni ku papalata madzolonga.” U anakanya hi siku leri emisaveni hinkwayo swikolo hinkwaswo swa dyondzo swi nga ta dyondzisa vana malunghana ni Nhlangano wa Matiko tanihi ntshembo lowunene lowu nga ta tisa ku rhula. Nakambe u anakanya leswaku “vukhongeri hinkwabyo bya misava byi fanele byi va swirho swa nhlangano lowuntshwa lowu fanaka na Nhlangano wa Matiko, lowu vitaniwaka Nhlangano wa Vukhongeri,” ku vike phepha-hungu leri vuriwaka Sun. Kutani “dyondzo hinkwayo ya vukhongeri yi ta khutaza ku papalata madzolonga.”

Xana ku rhula ka misava ku ta pfuka ku ve kona? Hakunene ku ta va kona! Kambe ku nga ri hi ku tirhisa minhlangano ya vanhu. Ku tlula malembe ya 2 700 lama hundzeke, mutsari la huhuteriweke u vulavule hi xihlovo lexi tlakukeke xa dyondzo ya ku rhula loko a vule ka ha ri emahlweni leswaku vanhu vo lulama va ta va “v̌adyonḍisiwa v̌a Yehova,” naswona ku rhula ka vona ku “ta v̌a lo’kukulu.”—Esaya 54:13.

Xikwembu hi xona “lexi nyikaka ku rhula,” ku vula Bibele. (Varhoma 16:20) Hambi ku ri sweswi dyondzo ya nkoka ya misava hinkwayo yi ya emahlweni tanihi leswi Yehovha a letelaka vanhu vakwe leswaku va ‘lava ku rhula, va ku landzelela,’ va ‘fula mabanga ya vona ma va swikomu,’ naswona ‘va nga ha tlheli va dyondza nyimpi.’—1 Petro 3:11; Esaya 2:2-4.

Vugandzeri lebyi sekeriweke entiyisweni, lebyi nga riki na vukanganyisi ni vuxisi, bya amukeriwa ni ku katekisiwa hi Xikwembu. (Matewu 15:7-9; Yohane 4:23, 24) I vugandzeri bya ntiyiso ntsena, lebyi pfumelelanaka hi ku helela ni Rito ra Xikwembu, lebyi nga endlaka leswaku vanhu va hanyisana hi ku rhula ni vun’we ni ku rhandzana hi xiviri.—Yohane 13:35.

Leswaku u dyondza swo tala malunghana ni leswi Rito ra Xikwembu ri swi vulaka malunghana ni ku rhula ka misava, ha ku rhamba leswaku u tihlanganisa ni vakandziyisi va magazini lowu.