Nchumu Wo Antswa Ku Tlula Switolwa

ENDZHAKU ko vulavula hi “swilo swa le handle,” leswi vavasati a va swi tirhisa ku tibombisa ha swona, muapostola Petro u tsundzuxile a ku: “Ku ri na sweswo, vumbhurhi bya n’wina byi fanele byi va bya munhu wa xiviri wa le ndzeni, vumbhurhi lebyi nga dyuhariki bya moya wo olova ni lowu rhuleke, lowu nga wa risima swinene emahlweni ka Xikwembu.”—1 Petro 3:3, 4, Today’s English Version.

Lexi tsakisaka, loko muapostola a tsala hi ku tisasekisa ko tano ka le handle, u tirhise xivumbeko xa rito ra Xigriki leri nge koʹsmos, leri nakambe ri nga rimitsu ra rito ra Xinghezi leri vulaka “switolwa,” leri vulaka “ku tisasekisa [ngopfu-ngopfu] enghoheni.” Xana Petro a a sivela vavasati va Vakreste leswaku va nga swi tirhisi switolwa ni swilo swin’wana swo fana na swona swa ku tisasekisa? A ku na nchumu eRitweni ra Xikwembu lexi ringanyetaka sweswo. Ematshan’weni ya sweswo, ri swi siyela eka munhu ha un’we leswaku a tiendlela xiboho emhakeni yoleyo, xisweswo vanhu va nge tisasekisi ku fana.

Hambiswiritano, loko switolwa swi totiwe ku tlula mpimo, kumbe swi tirhisiwe hi ndlela leyi khunguvanyisaka van’wana, sweswo swi nyika ndhuma ya njhani? Xana a hi yona ndhuma yo kombisa ku pfumala ku wupfa, xichavo, ku hundzeleta ni ku tibombisa ku tlurisa kumbe vutianakanyi? Hakunene, swi nga susa wansati xindzhuti, kumbexana swi nyika mianakanyo leyi hoxeke hi mahanyelo yakwe.—Ringanisa Ezekiyele 23:36-42.

Hikwalaho ka leswi, wansati la ‘chavaka Xikwembu,’ loko a hlawula ku tola switolwa, u ta lwela leswaku xikandza xakwe xi kombisa timfanelo ta mianakanyo yo hluteka, musa ni xichavo. Timfanelo to tano ti ta antswisa vumbhurhi ni vuxongi byakwe. Entiyisweni, hambiloko a hlawula ku tola switolwa kumbe a nga swi toli, u ta kombisa ku xiximeka ni vumbhurhi bya yena bya le ndzeni. Leswi swi ta kombisa leswaku wa swi tiva leswaku ku na nchumu wo antswa ku tlula switolwa, hilaha marito ya Petro lama tshahiweke laha henhla ma kombisaka hakona.—1 Timotiya 2:9, 10.