“Loko Munyu Wu Heleriwa Hi Ntamu Wa Wona”

KU LWETANIWE ha wona. A ku xaviwa ha wona swilo. Le China wa khale ntikelo wa wona a wu tlhandlama wa nsuku. Ina, i khale vanhu va teka munyu tanihi nchumu wa nkoka swinene. Ku fikela namuntlha, ku vuriwa leswaku wa hanyisa, naswona wu dlaya switsongwatsongwana, kasi wu tirhisiwa emisaveni hinkwayo tanihi xinandzihisi, naswona wu sivela ku bola.

Hikwalaho ka timfanelo to tala letinene ni ku pfuna ka munyu, a swi hlamarisi leswi wu tirhisiwaka hi ndlela yo fanekisela eBibeleni. Hi xikombiso, Nawu wa Muxe a wu lava leswaku nchumu wun’wana ni wun’wana lowu a wu nyikeriwa eka Yehovha ealitarini wu lungiwa hi munyu. (Levhitika 2:13) Leswi a swi nga endleriwi ku antswisa nantswo wa magandzelo, kambe swi nga endleka sweswo swi endliwe hikwalaho ka leswi munyu a wu fanekisela ku nga onhaki kumbe ku nga boli.

EDyondzweni ya yena leyi dumeke ya le Ntshaveni, Yesu Kreste u byele valandzeri va yena a ku: “N’wina mi munyu wa misava.” (Matewu 5:13) Hi marito lawa, Yesu a a vula leswaku ku chumayela van’wana hi Mfumo wa Xikwembu a ku ta hlayisa kumbe ku ponisa vutomi bya lava va va yingisaka. Hakunene, lava va tirhiseke marito ya Yesu a va ta sirheleriwa leswaku va nga onhaki emahanyelweni ni le moyeni etindhawini leti a va tshama eka tona ni ku tirha eka tona.—1 Petro 4:1-3.

Hambiswiritano, Yesu u ye emahlweni a nyikela xitsundzuxo lexi: “Kambe loko munyu wu heleriwa hi ntamu wa wona, . . . a wu nge he tirhi nchumu kambe wu ta cukumetiwa ehandle wu kandziyeriwa hi vanhu.” Loko xi vulavula hi mhaka leyi, xidyondzi xa Bibele Albert Barnes u vule leswaku munyu lowu Yesu ni vaapostola va yena a va tiva wona “a wu pfangane ni swimilana ni misava.” Kutani loko munyu wu heleriwa hi ku dzunga ka wona, ku nga ha sala “misava yo karhi.” Barnes u te: “Munyu lowu a wu nga ha pfuni nchumu handle ko . . . wu chululela etindleleni ku fambiwa ehenhla ka wona.”

Vakreste va fanele va yingisa xitsundzuxo lexi, va nga tshiki ku chumayela erivaleni kumbe va wela eku tikhomeni loku nga kombisiki ku chava Xikwembu. Loko va nga endli tano va ta fa emoyeni naswona a va nge he pfuni nchumu, ku fana ni ‘munyu lowu heleriweke hi ntamu wa wona.’