“Xana Hi Nga Va Xalamukisa Njhani Vangheni Va Kereke Ya Hina?”

XIVUTISO xolexo, lexa ha ku vutisiwaka hi magazini wa Khatoliki wa le Furwa lowu nge Famille Chrétienne (Ndyangu wa Vukreste), a xi va hlamarisi vo tala. Khadinali wa le Britain, ku nga Hume, u tlhele a vitana vangheni va kereke a ku i “tinhenha leti etleleke.” Leswaku ku yimisiwa ku khudzehela koloko, ku sunguriwe mintlawa ya vangheni va kereke leyi chumayelaka van’wana. Mufundhisi wa le Italiya u ku vitana “ku chumayela hi ku kongoma hi maendlelo lamantshwa.” Hambileswi mupapa a ha ku khutazaka hi magoza wolawo, a hi hinkwavo lava vonaka xilaveko xa ku bula ni van’wana hi ripfumelo ra vona.

Pigi Perini, mufundhisi wa le Milan, wa ha ku endzela eAfrika, laha nani yi n’wi byeleke leswi: “Se ndzi ni malembe ya 40 ndzi ri laha, naswona a ndzi vulavuli hi vito ra Yesu, leswaku ndzi nga herisi ndhavuko wa Vantima.” Mufundhisi loyi u gimeta hi ku: “A ha ha vulavuli hi Yesu, a ha ha ri na xiphemu na Yesu, a ha ha chumayeli evhangeli!” Kambe, eka vanhu van’wana vo tala, ku chumayela i xiphemu xa nkoka evuton’wini bya vona naswona ku va pfuna ku tshama va xalamukile hi tlhelo ra moya. Pigi Perini u ri: “Loko u hlangana ni vanhu vambirhi va vulavula hi Kreste emakete, kumbe va manye Bibele hi makehele ya vona, wa tibyela u ku: Vona Timbhoni ta Yehovha!”

Vanhu va timiliyoni va tsakela ku bula ni Timbhoni ta Yehovha hi Rito ra Xikwembu. A swi kanakanisi leswaku Timbhoni ti hlele ku va ni mabulo ya Bibele endhawini ya ka n’wina. Ku fana ni le ka lembe-xidzana ro sungula, Vakreste lava, lava hisekaka va khutazana leswaku va byela van’wana hi ripfumelo ra vona. Tindhawu leti va hlanganyelaka eka tona (leti vitaniwaka Tiholo ta Mfumo) i tindhawu leti va kombanaka tintswalo ni vunghana eka tona. Ha yini u nga yi eka yin’wana ya minhlangano leyi hleriweke hi Timbhoni ta Yehovha ivi u vona ndlela leyi u nga lwisanaka ha yona ni ku khudzehela ka moya?