Xiendlakalo Xo Hlawuleka—Xana U Ta Va Kona?

ESIKWINI leri nga rivalekiki, ku tlula malembe ya 3 500 lama hundzeke, Yehovha Xikwembu u lerise ndyangu wun’wana ni wun’wana wa Vaisrayele lava a va ri evuhlongeni le Egipta leswaku va dlaya xinyimpfana kumbe mbuti, ivi va xuva hi ngati ya xona emarimbeni ya tindlu ta vona. Evusikwini byebyo, ntsumi ya Xikwembu yi hundze tindlu leti funghiweke hi ndlela leyi, kambe yi dlaye vana va mativula emakaya ya Vaegipta hinkwavo. Kutani Vaisrayele va ntshunxiwile. Loko ku fika nkarhi wa ku tsundzuka xiendlakalo xexo, Vayuda a va tlangela Paseka.

Xikan’we-kan’we endzhaku ka loko Yesu Kreste a hete ku tlangela Paseka yakwe yo hetelela ni vaapostola vakwe, u sungule swakudya leswi a swi ta tsundzuxa vanhu hi rifu rakwe ra gandzelo. U nyike vaapostola vakwe xinkwa xo kala comela ivi a ku: “Tekani, mi dya. Leswi swi vula miri wa mina.” Endzhaku ka sweswo u va nyike xinwelo xa vhinyo, a ku: “Nwanani eka xona, hinkwenu ka n’wina; hikuva leswi swi vula ‘ngati ya ntwanano’ ya mina, leyi nga ta halateriwa vo tala leswaku va rivaleriwa swidyoho.” Nakambe Yesu u te: “Tshamani mi ri karhi mi endla leswi leswaku mi ndzi tsundzuka.” (Matewu 26:26-28; Luka 22:19, 20) Hi ndlela leyi, Yesu u lerise valandzeri vakwe leswaku va endla nkhuvo lowu wa ku tsundzuka rifu rakwe.

Nan’waka, rifu ra Yesu ri ta tlangeriwa hi Ravunharhu, April 19, endzhaku ka ku pela ka dyambu. Timbhoni ta Yehovha emisaveni hinkwayo ti ta va ti hlanganile hi vusiku lebyi byo hlawuleka leswaku ti tlangela Xitsundzuxo lexi hi ndlela leyi Yesu a leriseke ha yona. Wa rhambiwa hi mbilu hinkwayo leswaku u ta hlanganyela na hina. Hi kombela u vutisa Timbhoni ta Yehovha ta ndhawu ya ka n’wina mayelana ni nkarhi lowu kongomeke ni ndhawu ya nhlangano lowu.