Ku Hanana Loku Nga Ka Risima eMahlweni Ka Yehovha

Papila leri landzelaka ri rhumeriwe ehofisini ya rhavi ya Timbhoni ta Yehovha ya le Mozambhiki:

“Ndzi wandzisanyana wa malembe ya nkombo hi vukhale. Ndza ha ri exikolweni xa le hansi. Ndzi mi rhumela mali leyi ndzi yi kumeke loko ndzi xavise huku leyi a ndzi yi fuwile. Ndzi yi xavise hi 12 000 Meticais [R6,00]. Ndzi nkhensa Yehovha hileswi a endleke leswaku huku ya mina leyi a yi ri yo sungula ku yi fuwa yi kuleke yi va nkuku. Ndzi rhandza leswaku nyiko ya mina yi tirhisiwa entirhweni wa Mfumo wa Yehovha.

“Xiyani: Tatana hi yena a ndzi pfuneke ku tsala papila leri.”

Vanhu van’wana va anakanya leswaku lava faneleke va hanana hi lava va nga na swilo swo tala leswi vonakaka. Kambe loko hi hlaya rungula ra Bibele leri vulavulaka hi noni leyi hoxeke “swimalana swimbirhi swa nsimbi swa ntikelo wa le hansi swinene” ebokisini ra xuma, ha swi vona leswaku moya wa ku hanana a wu kombisiwi hi ku ya hi mpimo wa swilo leswi u nyikelaka ha swona, kambe wu huma embilwini.—Luka 21:1-4.

Yehovha u tlangela nyiko yin’wana ni yin’wana, hambi yi ri yitsongo ku fikela kwihi, leyi nyikeriwaka swi suka embilwini leyi susumetiwaka hi rirhandzu. Naswona u va katekisa swinene lava tekelelaka ku hanana ka yena hi ku nyikela hi nkarhi wa vona, hi ntamu kumbe hi swilo leswi vonakaka, leswaku va seketela Mfumo wa yena.—Matewu 6:33; Vaheveru 6:10.