“Xikombiso Xa Vun’we”

LEYI a ku ri nhloko-mhaka ya xihloko xa mutsari lexi humesiweke eka phepha-hungu eIndaiatuba, le São Paulo, eBrazil. I vamani lava a va ri xikombiso xa vun’we? Mutsari wa hlamusela: “I Timbhoni ta Yehovha, leti kunguhateke ku aka ‘Holo ya Mfumo’ leyintshwa, hilaha titempele ta vona kumbe tiholo ta vona ti vitaniwaka hakona, vona i xikombiso lexinene ni lexi tiyeke xa ntirhisano lexi nga honisekiki.”

Vun’we bya Timbhoni ta Yehovha bya vonaka etindhawini to tano. Xisweswo, xihloko xexo xi te: “Swa tsakisa ku vona vavanuna, vavasati ni vantshwa lava tirhaka hi ku tirhandzela va ri karhi va tirha swin’we eku akeni ka ndhawu leyi va nga ta hlanganela eka yona va gandzela Xikwembu.”

Timbhoni ta Yehovha ti veka xikombiso lexinene ni le ka timhaka tin’wana. Mutsari wa engetela: “Ku tlhandleka eka ku dyondza ni ku khongela, xikongomelo xa tona i ku hundzula swindzendzele ni lava godzomberiweke hi swidzidzirisi ni ku kombisa vanhu ndlela yo va ni vun’we ni rirhandzu.” Ti swi kotisa ku yini sweswo? Timbhoni ta swi tiva leswaku ku dyondza Bibele ni ku tirhisa ndzayo ya yona swi pfuna munhu leswaku a tintshunxa evubihini. Hi swona swi va endlaka va lwela ku dyondzisa van’wana leswi va swi dyondzeke eBibeleni. Mutsari u gimeta hi ku vula leswaku “a swi kanakanisi leswaku xikombiso xa tona xi fanele ku tekeleriwa, sweswi.”

Mani na mani wa amukeleka eminhlanganweni ya Timbhoni ta Yehovha naswona a ku humesiwi nhlengo. Wa rhambiwa hi malwandla leswaku u endzela Holo ya tona ya Mfumo leyi nga ekusuhi ni laha u tshamaka kona.