Ku Rhula Ka Misava Hinkwayo—Xana Ku Ta Ta Njhani?

XANA ku rhula ka misava hinkwayo ku kwala nyongeni? Vo tala a va ehleketa tano kambe sweswi va kanakana. Hi ku ya hi xiviko lexi hlamuselaka mintlhontlho ya vumundzuku bya hina, lexi kandziyisiweke eka Daily Mail & Guardian ya Afrika Dzonga, “leswi kunguhateriweke fambiselo lerintshwa eka khume ra malembe lama hundzeke sweswi swi tikomba swi nga tshembisi.”

Vatsari va kombetela eka moya wo va ni ntshembo lowu a wu hunga eka malembe ya khume lama hundzeke. Nyimpi ya Vusukumbele a ya ha ku hela, ku lwela ku fuma a ku hundzile. Eka nkarhi lowu a wu vonaka onge i masungulo ya nguva leyintshwa, vo tala a va langutele leswaku munhu u ta sungula ku herisa vusweti, vuvabyi ni ku lunghisa timhaka ta mbango. Xiviko xi ri: “Milorho yoleyo sweswi yi tikomba yi hundze ni moya. Ku tlhekeke hasahasa etindhawini leti a ti nga ehleketeleriwi; vusweti bya misava hinkwayo a byi yimanga ndhawu yin’we. Ku ni matiko mambirhi lama nga ni tibomo ta nyutliya. Ndhuma ya Nhlangano wa Matiko se a ya ha ri yinene hikwalaho ka ku tsandzeka ka yona ku herisa mpfilumpfilu. Milorho ya tiko leri nga ni ku rhula yi hundzuke ya tiko leri nga ni maxangu.”

Swichudeni swa Bibele swi xiye leswaku matshalatshala ya munhu, hambi ma ri manene njhani, a ma nge humeleli hi ku helela. Ha yini ma nga taka ma nga humeleli? Hikuva, hilaha Bibele yi swi vekaka hakona, “misava hinkwayo yi le hansi ka matimba ya lowo homboloka.” (1 Yohane 5:19) Loko misava ya ha ri ehansi ka vulawuri bya Sathana a yi nge vi Paradeyisi leyi Xikwembu a xi lave leswaku yi va yona.

Hi nkarhi lowu fanaka, swi kona swivangelo swa ku va ni ntshembo. Yehovha Xikwembu u tshembisa ku tisa misava yo rhula, ku nga ri hi ku lunghisa mafambiselo lawa ya swilo, kambe hi ku tisa “misava leyintshwa” leyi ‘ku nga ni ku lulama eka yona.’ (2 Petro 3:13) Ina, hi Mfumo wa Xikwembu, misava yerhu yi ta hundzuriwa yi va kaya ra ntsako leri nga ni ku rhula, laha vutomi ni ntirho swi nga ta tsakisa hilaha ku heleleke eka vanhu hinkwavo lava yingisaka. Ku tlula kwalaho, Xikwembu xi tshembisa ku “sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” Switshembiso leswi a swi sekeriwanga eka mianakanyo ya munhu leyi nga tivikaniki. Kambe, swi sekeriweke eRitweni leri nga hoxisiki ra Muvumbi, la nga hembiki.—Nhlavutelo 21:4; Tito 1:2.