Xana Vun’we Bya Vukhongeri Byi Tshinele?

Christian Krause, muungameri wa Lutheran World Federation u te: “Hi vona siku ra nkoka ematin’wini ya tikereke ta hina.” Hilaha ku fanaka, Mupapa John Paul wa Vumbirhi u vulavule hi “yinhla leyi nga rivalekiki endleleni leyi nonon’hwaka ya ku pfuxeta vun’we lebyi teleke exikarhi ka Vakreste.”

Marito lawa lama vuriweke hi ku hiseka ma hlohloteriwe hi ku sayiniwa ka Marito lama Tolovelekeke ya Ximfumo hi October 31, 1999, le Augsburg, eJarimani, ma tiyisekisa Xihlambanyo xa ku Twanana eka Dyondzo ya ku Yimelela. Nkarhi ni ndhawu laha ku nga ta sayineriwa kona a yi hlawuriwe kahle. Ku vuriwa leswaku hi October 31, 1517, Martin Luther u belele 95 wa mavonelo ya yena enyangweni ya kereke leyi nga xigodlho le Wittenberg, xisweswo a sungula Ndzhundzunuko wa Protestente. Ina, eAugsburg a a ku ri laha vangheni va kereke ya Luther hi 1530 va andlaleke dyondzo ya vona ya xisekelo, Dyondzo ya Augsburg, leyi ariweke hi Kereke ya Khatoliki, leswi vangeleke ku avana loku nga ha lulamisekiki exikarhi ka Vuprotestente ni Vukhatoliki.

Xana Xihlambanyo xa ku Twanana xi ta va goza ro hetelela ro hlula ku avana ka kereke, hilaha ku vuriwaka hakona? A hi mintlawa hinkwayo leyi a yi ri ni ntshembo. Vafundhisi vo tlula 250 va Protestente va sayine xikombelo lexi kanetaka, lexi lwisanaka ni ku tekiwa hi Kereke ya Khatoliki. Maprotestente na wona a ma nyangatsekile loko Kereke ya Khatoliki yi twarise ku tipeta ko hlawuleka hi lembe ra 2000, ku nga xona xiendlo lexi vangeleke ku avana kwalomu ka malembe ya 500 lama hundzeke. Naswona loko Dyondzo ya Augsburg ni ku ariwa ka Khatoliki hi Huvo ya Trent swa ha tirha, vun’we a byi nge fikeleriwi.

Ku avana ni ku nga twanani exikarhi ka Vujagana i kukulu swinene naswona a ku nge lulamisiwi hi ku sayiniwa ka ntwanano wihi na wihi wa vun’we. Ku tlula kwalaho, vun’we eripfumelweni byi titshege hi tidyondzo leti sekeriweke swinene eRitweni ra Xikwembu, ku nga Bibele. (Vaefesa 4:3-6) Vun’we bya ntiyiso byi va kona loko ku dyondziwa ku tlhela ku endliwa leswi Xikwembu xi lavaka hi swi endla, ku nga ri eka ku cinca mianakanyo. Muprofeta la tshembekaka Mikiya u te: “Loko ku ri vanhu hinkwavo, un’wana ni un’wana u ta famba hi vito ra xikwembu xakwe; kambe loko ku ri hina, hi ta famba hi vito ra Yehovha Xikwembu xa hina hilaha ku nga riki na makumu, hi masiku.”—Mikiya 4:5.

[Laha Xifaniso Xi Humaka Kona eka tluka 32]

© Ralph Orlowski/REUTERS/Archive Photos