“Nchumu Lowu Faneleke Wu Tisela Vanhu Hinkwavo Ntsako”

TUVALU, tiko ro saseka leri nga ni swihlala swa kaye eDzongeni wa Pacific, ri ni vaaki va kwalomu ka 10 500. Hambiswiritano, hi ku xiya leswaku “[ku rhandza ka Xikwembu hi] leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso,” Timbhoni ta Yehovha ta kwalaho a ti navela ku va ni tibuku ta Bibele hi ririmi ra tona. (1 Timotiya 2:4) Leswi swi vange ntlhontlho, tanihi leswi a ku nga ri na xihlamusela-marito xa ririmi rolero. Hi 1979, murhumiwa la nga Mbhoni ya Yehovha la tirhaka eTuvalu u langutane ni ntlhontlho wolowo. Yena ni nsati wa yena a va tshama ni ndyangu wun’wana wa kwalaho, hiloko va dyondza ririmi ra kwalaho ivi hakatsongo-tsongo va hlengeleta marito lama nga ni nhlamuselo ya Xituvalu. Hi 1984, ku kandziyisiwe buku leyi nge U Nga Hanya Hi Masiku aParadeyisini eMisaveni hi Xituvalu, hi Watchtower Bible and Tract Society of New York, Inc.

Dok. T. Puapua, khale ka holobye wa le Tuvalu, u tsale papila a kombisa ku tlangela buku leyi nge Hanya Hi Masiku. U te: “Buku leyi i nchumu wun’wana lowuntshwa eka ‘ndzhaka’ ya le Tuvalu. Mi fanele mi tsaka ngopfu hi ntirho lowu mi wu endleke—ntirho lowunene ngopfu eku akeni ka vutomi bya moya bya vanhu va rixaka leri. Ndzi kholwa leswaku ntirho lowu wu ta tsariwa ematin’wini ya laha Tuvalu malunghana ni ku kandziyisiwa ka tibuku ta ku dyondzisa. . . . [Buku] leyi i nchumu lowu faneleke wu tisa ntsako eka vanhu hinkwavo.”

Marito lama hlengeletiweke ya muhundzuluxeri ma endle leswaku ku kandziyisiwa xihlamusela-marito lexi nga ni marito ya Xituvalu ni ya Xinghezi hi 1993. A ku ri xihlamusela-marito xo sungula lexi nga kumiwaka hi mani na mani hi ririmi rero. Sweswinyana, Ndzawulo ya Ririmi ya Tiko ya le Tuvalu yi kombele mpfumelelo wo yi tirhisa loko yi tsala xihlamusela-marito xa yona xo sungula xa ririmi ra vona.

Ku sukela hi January 1, 1989, magazini wa Xihondzo xo Rindza lowu humaka n’hweti ni n’hweti wu karhi wa kandziyisiwa hi Xituvalu. Loko u hlaya magazini lowu hi ririmi leri nga riki ra wena, ha yini u nga languti eka tluka 2 u vona loko ririmi ra wena ri ri kona eka tindzimi leti Xihondzo xo Rindza xi kandziyisiwaka ha tona? A swi kanakanisi leswaku loko u wu hlaya hi ririmi ra wena swi ta ku tisela ntsako lowu engetelekeke.