Xana Gidi Ra Malembe Lerintshwa Ri Ta Va Ni Ku Rhula?

LEMBE ra Matiko Hinkwawo ra Ndhavuko wa Ku Rhula ri sunguriwe le Paris ni le Dorobeni ra New York hi September 14, 1999. Leswi swi vuriwe eNhlanganweni lowu Tolovelekeke wa Nhlangano wa Matiko leswaku swi ta endleka hi lembe ra 2000. Federico Mayor, khale ka mukongomisi-jenerala wa UNESCO, u endle xikombelo lexikulu “xo vumba nhlangano wa misava hinkwayo wa ndhavuko wa ku rhula ni lowu nga riki na madzolonga.”

UNESCO wu ni xivuriso lexi nge “leswi tinyimpi ti tumbulukaka emianakanyweni ya vanhu, ni ku lweriwa ka ku rhula ku fanele ku akeriwa emianakanyweni ya vanhu.” Hi ku pfumelelana ni leswi, nhlangano lowu wu kunguhate ku kondletela ndhavuko wa ku rhula hi ku tirhisa “dyondzo, mbulavurisano ni ntirhisano.” Nkul. Mayor u vule leswaku a swi enelanga “ku va ni ku rhula, hambi ku ri ku lwisana ni nyimpi, kambe hi fanele hi va vaendli va ku rhula.”

Lexi vavisaka, lembe ra 2000 a ri nga ri na ku rhula nikatsongo. Matimu ya manguva lawa—ku katsa ni swiendlakalo swa lembe ra 2000—ma kandziyise ku tsandzeka ka munhu ku sivela nyimpi ni madzolonga ku nga khathariseki matshalatshala ya mbilu hinkwayo yo lwisana na wona.

Hambiswiritano, i swa nkoka ku xiya leswaku ku rhula hakunene ku fambisana ni dyondzo. Kwalomu ka malembe ya 2 700 lama hundzeke, muprofeta Esaya u profetile a ku: “Vana va wena hinkwavo va ta va vanhu lava dyondzisiwaka hi Yehovha, ku rhula ka vana va wena ku ta tala.” (Esaya 54:13) Muprofeta yoloye u tlhele a wu vona ka ha ri emahlweni nkarhi lowu vanhu va tinxaka hinkwato va nga ta khitikanela evugandzerini lebyi tengeke bya Yehovha Xikwembu leswaku va ta dyondza hi tindlela ta Yena. A ku ta va ni vuyelo byihi? “Va ta fula mabanga ya vona ma va swikomu ni mafumu ya vona ma va swikhutulo. Tiko a ri nge tlakuseli tiko rin’wana banga, naswona a va nge he dyondzi nyimpi.” (Esaya 2:2-4) Hi ku pfumelelana ni vuprofeta lebyi, Timbhoni ta Yehovha ti endla ntirho wo dyondzisa emisaveni hinkwayo lowu ana se wu pfuneke timiliyoni ta vanhu ku hlula rivengo ra vutiko ni ra rixaka leri ku nga rona ri vangaka tinyimpi to tala.

Tinyimpi ti ta nyamalalela makumu ehansi ka Mfumo wa Xikwembu, lowu nga ta tisa ku rhula loku nga heriki ni nsirhelelo emisaveni. (Pisalema 72:7; Daniyele 2:44) Kutani marito ya mupisalema ma ta hetiseka: “Vonani swiendlo swa Yehovha, ndlela leyi a vekeke ha yona swilo leswi hlamarisaka emisaveni. U herisa tinyimpi ku ya fika emakumu ya misava.”—Pisalema 46:8, 9.