Dyondzo Leyi Kumekaka Eka Murhi Wa Ncindzu

“XIVUMBEKO lexi kokaka mahlo xa vuxongi byo hlawuleka.” Hi yona ndlela leyi nsonga-vutivi wun’wana wa Bibele wu wu hlamuselaka ha yona murhi wa ncindzu lowu vekaka mihandzu leyi vuriwaka ti-date. Eminkarhini ya Bibele ni namuntlha, mirhi leyi yi sasekisa Nkova wa Nayili aEgipta naswona yi endla mindzhuti leyi phyuphyisaka eswihlobyeni swa Kwandzasi ra Negebu.

Ku fana ni tinxaka to tala ta murhi wa ncindzu, muxaka lowu wu leha wu ku thwii! Yin’wana yi leha timitara ta 30 naswona yi hambeta yi tswala mihandzu ku ringana malembe ya 150. Hakunene, muxaka lowu wa murhi wa ncindzu wu koka mahlo, wu tlhela wu tswala mihandzu hi ndlela leyi hlamarisaka. Lembe ni lembe wu humesa swichocho swo tala swa mihandzu. Xichocho xin’we xi nga ha tamela mihandzu leyi tlulaka 1 000. Malunghana ni mihandzu leyi, mutsari un’wana u te: “Lava va . . . nga tshama va dya mihandzu leyi omisiweke leyi xavisiwaka eswitolo, swi nga ha va tikela ku anakanya ndlela leyi yi nandzihaka ha yona loko ya ha ku khiwa.”

Swi fanerile leswaku Bibele yi fanisa vanhu van’wana ni mirhi ya ncindzu. Leswaku munhu a va la tsakisaka ematihlweni ya Xikwembu ku fana ni murhi wa ncindzu lowu vekaka mihandzu, u fanele a va ni mahanyelo lamanene a tlhela a hambeta a endla mintirho leyinene. (Matewu 7:17-20) Hikwalaho ka sweswo, tempele ya Solomoni ni ya le xivonweni xa Ezekiyele a ti khavisiwe hi swifaniso leswi kovotliweke swa mirhi ya ncindzu. (1 Tihosi 6:29, 32, 35; Ezekiyele 40:14-16, 20, 22) Kutani, leswaku vugandzeri bya munhu byi amukeleka eka Xikwembu, u fanele a va ni swihlawulekisi leswi navelekaka swa murhi wa ncindzu. Rito ra Xikwembu ri ri: “Lowo lulama u ta rhumbuka ku fana ni murhi wa ncindzu.”—Pisalema 92:12