Xana U Fanele U Nga Khathali?

UMBEXANA vanhu vo tala va nga vona ku ri mhaka yikulu loko munhu a tekiwa a ri la nga khathaliki, la nga tikarhatiki hi nchumu, la rhuleke, la amukelaka hinkwaswo. Hambiswiritano, ku na mhaka yin’wana mayelana ni ku va munhu la nga khathaliki. Bibele yi ri: “Ku nga khathali ka xihunguki hi kona ku nga ta va lovisa.” (Swivuriso 1:32) Xana sweswo swi vula yini?

Vuhundzuluxeri byin’wana bya Bibele byi hundzuluxela rito ra Xiheveru xo sungula hi marito yo fana na “ku nga tikarhati hi nchumu” (American Standard Version), “ku eneriseka ku tlula mpimo” (The New American Bible), ni “ku eneriseka u nga xalamukeli khombo.” (The New English Bible) Emhakeni leyi, ku nga khathali ku fanisiwa ni vulolo ni ku nga karhateki hi nchumu naswona ku nga vuhunguki kumbe vuphukuphuku.

Eka lembe-xidzana ro sungula, Vakreste va le vandlheni va le Lawodikiya hi vuphukuphuku a va nga ku xalamukeli ku vabya ka vona hi tlhelo ra moya. A va enerisekile va vula leswaku ‘a va nga ha lavi nchumu nikatsongo.’ Yesu Kreste u va lulamisile, a va komba leswaku va fanele va pfuxeta ku hiseka ka vona ka Vukreste.—Nhlavutelo 3:14-19.

Ni vanhu va le sikwini ra Nowa a va enerisekile va nga ri xalamukeli khombo. A va khomekile hi swilo swa misava, a ‘va dya, va nwa, vavanuna va teka ni vavasati va hlomisiwa va nga lemuki nchumu ku fikela loko ndhambi yi fika yi va kukula hinkwavo.’ Yesu u engetele a ku: “Swi ta va tano ni hi vukona bya N’wana wa munhu.”—Matewu 24:37-39.

Vuprofeta bya Bibele lebyi hetisekeke byi kombisa leswaku hi hanya enkarhini wa “vukona bya N’wana wa munhu,” ku nga Yesu Kreste. Hi nga vi vanhu lava enerisekaka hi nga ri xalamukeli khombo, hi nga karhateki hi nchumu, hi eneriseka ku tlula mpimo—ku va munhu la nga khathaliki a hi swinene.—Luka 21:29-36.