Swivutiso Swa Vahlayi

Xana Sathana Diyavulosi u na byona vuswikoti byo tiva leswi vanhu va swi anakanyaka?

Hambileswi hi nga tiyisekiki, swi tikomba onge Sathana swin’we ni madimona yakwe a va na byona vuswikoti byo tiva leswi hi swi anakanyaka.

Anakanya hi mavito lawa Sathana a nyikiweke wona, lama hlamuselaka leswi a nga xiswona. U vitaniwa Sathana (Mukaneti), Diyavulosi (Mulumbeti), Nyoka (leswi vulaka Muxisi), Mukanganyisi ni Muhembi. (Yobo 1:6; Matewu 4:3; Yohane 8:44; 2 Vakorinto 11:3; Nhlavutelo 12:9) A ri kona ni rin’we eka mavito lawa hinkwawo ya Sathana, leri kombisaka leswaku u ni vuswikoti byo tiva mianakanyo ya vanhu.

Hambiswiritano, hilaha ku hambaneke, Yehovha Xikwembu u hlamuseriwa tanihi “mukambisisi wa timbilu.” (Swivuriso 17:3; 1 Samuwele 16:7; 1 Tikronika 29:17) Vaheveru 4:13 yi vula leswaku “a xi kona xivumbiwa lexi nga vonakiki emahlweni ka [Yehovha], kambe swilo hinkwaswo swi lo dla, swi paluxeka erivaleni ematihlweni ya loyi hi nga ta tihlamulela eka yena.” A swi hlamarisi leswi Yehovha a nyikeke N’wana wakwe Yesu vuswikoti byo kambisisa timbilu. Yesu la pfuxiweke u te: “Hi mina loyi a lavisisaka tinso ni timbilu, naswona ndzi ta mi nyika ha un’we-un’we hi ku ya hi swiendlo swa n’wina.”—Nhlavutelo 2:23.

Bibele a yi vuli leswaku Sathana wa swi kota ku lavisisa timbilu ni mianakanyo ya vanhu. Leswi i swa nkoka, tanihi leswi muapostola Pawulo a hi tiyisekisaka leswaku Vakreste va “ma tiva makungu yakwe.” (2 Vakorinto 2:11) Hikwalaho a hi fanelanga hi chava leswaku Sathana u ni vuswikoti byin’wana byo hlawuleka swinene lebyi hi nga byi tiviki.

Nilokoswiritano, leswi a swi vuli swona leswaku Nala wa hina a nga ku xiyi ku tsana ka hina. Sathana u ni nkarhi wo leha a ri karhi a dyondza mahanyelo ya vanhu. A swi kali swi lava leswaku a va ni vuswikoti byo vona leswi hi swi anakanyaka, leswaku a vona ndlela leyi hi tikhomaka ha yona, vuhungasi lebyi hi byi rhandzaka, ku twa swilo leswi hi vulavulaka ha swona ni swin’wana. Leswi hi swi endlaka hi xikandza xa hina ni hi miri wa hina swi nga n’wi endla a vona leswi hi swi anakanyaka ni ndlela leyi hi titwaka ha yona.

Hambiswiritano, hakanyingi Sathana u tirhisa marhengu lawa a ma tirhiseke entangeni wa Edeni—ku nga vuxisi ni vukanganyisi. (Genesa 3:1-5) Hambileswi Vakreste va nga fanelangiki va chava leswaku Sathana u tiva mianakanyo ya vona, va fanele va tivonela eka moya lowu Sathana a nga ringetaka ku wu nghenisa emianakanyweni ya vona. U lava leswaku Vakreste va va lava “onhakeke emianakanyweni ni lava tekeriweke ntiyiso.” (1 Timotiya 6:5) Hi yona mhaka leyi misava ya Sathana yi humesaka rungula ni vuhungasi byo tala lebyi onhaka. Leswaku va baleka nhlaselo lowu, Vakreste va fanele va hlayisa mianakanyo ya vona hi ku ambala “xihuku xa ku ponisa.” (Vaefesa 6:17) Va endla tano hi ku tata mianakanyo ya vona hi tidyondzo ta Bibele naswona va papalata minkucetelo yo biha ya misava ya Sathana.

Sathana i nala la nga ni matimba. Kambe yena ni madimona yakwe a hi fanelanga hi va chava ku tlula mpimo. Yakobo 4:7 ya hi tiyisekisa: “Mi kaneta Diyavulosi, kutani u ta mi balekela.” Loko hi yingisa xitsundzuxo lexi, hi ta swi kota ku vula ku fana na Yesu hi ku, Sathana a nge hi endli nchumu.—Yohane 14:30.