Vhidiyo Leyi Endleriweke Ku Khumba Timbilu Ta Vantshwa

VANTSHWA vo tala va susumeteleke ku ma kambisisa kahle mahanyelo ya vona loko va vone vhidiyo leyi nge Young People Ask—How Can I Make Real Friends?a Vhidiyo leyi yi ni ndzayo leyinene leyi humaka ematsalweni, tinhlamuselo ta vantshwa lava nga Vakreste ni drama leyi khutazaka ya manguva lawa leyi sekeriweke eka mhaka ya le Bibeleni ya Dina. (Genesa, ndzima 34) Tinhlamuselo leti landzelaka mayelana ni vhidiyo leyi ti huma le Mexico.

Martha u ri: “Vhidiyo leyi yi yi khumbe swinene mbilu ya mina. Phela onge a yi lo endleriwa mina. A ndzi ehleketa leswaku loko vadyondzisi va mina ni vadyondzi-kulorhi va swi tiva leswaku ndzi Mbhoni ya Yehovha a ka ha laveki swin’wana. Ndzi tsandzeke ku swi kombisa hi ku va nyikela vumbhoni. Ndzi ri tlangela swinene rungula hinkwaro leri Yehovha a hi nyikaka rona, ngopfu-ngopfu loko ri hi khumba swinene ku fana ni vhidiyo leyi.”

Juan Carlos u ri: “Vhidiyo leyi yi tlhontlha mianakanyo hakunene. Loko ndza ha ri emalembeni ya kondlo-a-ndzi-dyi ndzi endle swihoxo swo tala naswona ndza swi vona leswaku a ndzi fana na vamani edrameni leyi. Emalembeni lama hundzeke a ndzi hanya vutomi bya mikoka mimbirhi, kambe ndzi swi xiyile leswaku vutomi byo tano byi ta ndzi tisela vuyelo byo biha. Endzhaku ko hlalela vhidiyo leyi, ndzi tiyimisele ku va la tshembekeke eka Yehovha.”

Sulem u ri: “Vhidiyo leyi yi khumbe mintlhaveko ya mina loko ndzi ta va ndzi yi hlalerile. Enkarhini lowu hundzeke a ndzi tshike ku hlaya Bibele naswona a ndzi nga ha khongeli ngopfu eka Yehovha. Loko ndzi yingisele tinhlamuselo ta vantshwa lava vulavulaka eka vhidiyo leyi, ndzi susumeteleke ku tlhela ndzi sungula ku dyondza Bibele ni ku khongela eka Yehovha.”

Vantshwa namuntlha va langutane ni swiphiqo swo tala, naswona vanghana lava va hlawulaka hakanyingi va nga ma kucetela swinene mahanyelo ya vona. (Pisalema 26:4; Swivuriso 13:20) Vhidiyo leyi nge Young People Ask—How Can I Make Real Friends? yi pfuna vantshwa vo tala leswaku va endla swiboho leswinene emhakeni leyi.

[Nhlamuselo ya le hansi]