Twarisa Mahungu Lamanene Siku Na Siku

1 Mawaku lunghelo leri tsakisaka swonghasi leri ku nga rona ku hlanganyela nkarhi na nkarhi eku twariseni ka rungula ra mfumo! Mayana ndlela leyi hi katekisiweke hi ndlela leyi fuweke swonghasi ha yona ku yisa rungula leri eka van’wana. Loko hi avelana rungula leri ni van’wana, ripfumelo ni ku chivirika ka hina vini swa tiyisiwa. Timbilu ta hina ta tsaka loko hi hlayisa xikhutazo xo ‘yimbelela eka Yehova, hi dzunisa vito ra yena.’—Ps. 96:2-4.

2 Xana u swi endla pakani ya wena ku vula rungula ra ku ponisiwa siku na siku? Lava va nghenelaka ntirho wa vuphayona byo pfuna kumbe bya nkarhi hinkwawo hakanyingi va hlanganyela siku na siku eku vuleni ka mahungu lamanene. Xana u nga swi endla leswi ke? Loko swi nga ri tano, xana u nga va ni ku hlanganyela ko karhi, hambi ku ri ku hlanganyela lokuntsongo ka xitshuketa siku na siku? Mawaku ku dzunisiwa lokunene swonghasi ka Yehova loku a ku ta va kona loko hinkwerhu ka hina a hi kota ku endla leswi! U ta tokota ntsako lowukulu ni mikateko yin’wana leyi fuweke ya Yehova loko u twarisa ntshembo wa Mfumo siku na siku.

3 Loko swirho swa ndyangu swi tirha hi vun’we eku ‘yiseni ka ku dzuneka ni matimba’ eka Yehova, mikateko yo tala leyi fuweke yi nga tsakeriwa. (Ps. 96:7) Swiboho swa ndyangu ni swa moya swa tiyisiwa loko nkarhi wu hleriwa leswaku ku tirhiwa evutirhelini tanihi ndyangu.

TIRHISA BUKU LEYI NGE HANYA HI MASIKU

4 Hi September hi ta va hi nyikela buku leyi nge Hanya Hi Masiku, minkandziyiso leyi tolovelekeke ni leyintsongo. Vanhu va karhateka hi vutomi bya siku na siku kutani va navela vumundzuku lebyi tsakisaka. Vanhu va timbilu leti tshembekaka va tsaka ku dyondza hi ta ntshembo wa vumundzuku wa vutomi lebyo leha lebyi nga hava swiphiqo leswi tolovelekeke ngopfu eka vanhu namuntlha. Vutivi lebyi kongomeke bya ntshembo lowu ni ripfumelo eka ku hetiseka ka wona loku nga ta ta ku nga ri khale, swi fanele swi hi susumetela ku teka goza lerinene eku nyikeleni ka rungula ra Mfumo.

5 Lunghiselela hi vukheta ka ha ri emahlweni leswi u nga ta swi vula ku endla leswaku rungula ra wena ri koka mianakanyo. Endzhaku ko titivisa, u nga ha vula swin’wana swo fana ni leswi: “I vumundzuku bya muxaka muni lebyi a wu ta lava ku va na byona wena ni ndyangu wa wena? [Pfumelela nhlamulo.] Hinkwerhu ka hina hi tsakela vutomi naswona hi navela ku hanya vutomi byo leha hi laha hi nga kotaka ha kona. Hambi swi ri tano, swiphiqo swo tala swinene swa humelela naswona swi vonaka swi xungeta vutomi bya hina vini. Hikwalaho ka leswi u nga tsakela ku dyondza rungula ra Bibele ra vumundzuku lebyi vangamaka ni ndlela yo hlangavetana ni maxangu ya misava.” Eyinhleni leyi u nga ha kandziyisa matsalwa lama nga eka Mhaka Yo Vulavurisana ya sweswi. Tirhisa tinhla leti kongomeke to vulavula ha tona to tanihi leti nga eka tluka 9, 11-13, 161 na 162 ebukwini leyi nge Hanya Hi Masiku, leswaku u kandziyisa vumundzuku lebyi vangamaka lebyi nga emahlweni.

6 Mayana rungula leri tsakisaka ni leri tiyisaka ripfumelo swonghasi leri Yehova a hi nyikeke rona leswaku hi ri twarisa! Nakambe hi ni lunghelo lerikulu ro tirha ekusuhi ni van’wana lava nga ni ku tlangela lokukulu ka switshembiso leswinene swa Yehova. Tanihi leswi ntirho lowu hi wu endlaka sweswi wu nga ta kala wu nga phindhiwi ni leswi wu nga ta fika emakumu ku nga ri khale, xana a hi fanelanga ku tirhisa nkarhi ni rifuwo ra hina leri nga kona leswaku hi vula mahungu lamanene ya ku ponisiwa siku na siku?