Anakanyani Hi Swilo Swa Le Henhla
1 Xihloko lexi nga eka The New York Times ya December 31, 1994, loko xi hlamusela hi xitukulwana lexi hi rhendzeleke sweswi ni mavonelo ya xona hi vumundzuku, xi te: “Va chava vumundzuku. Va byi chava mayelana ni mintirho, mayelana ni vuvabyi, mayelana ni ikhonomi, mayelana ni swiyimo swa misava.” Hinkwako laha hi langutaka kona, a ku tiyisekiwi hi ta vutomi. Vutirheli bya hina tanihi Timbhoni ta Yehovha byi hi hlanganisa ni vanhu lava titwaka hi ndlela leyi siku na siku. Hambi leswi hi langutanaka ni swiphiqo leswi fanaka ni swa vona, ripfumelo ni ntshembo wa hina eka switshembiso leswi nga ta hetiseka swa Rito ra Xikwembu swi hi pfuna ku va ni langutelo leri hambaneke swinene mayelana ni vutomi ni hi vumundzuku bya vanhu.—Esa. 65:13, 14, 17.
2 Ntshembo wa hina ni langutelo ra hina hi xitshembiso lexi tiyeke swi endla leswaku vanhu vo tala va timbilu letinene va yingisela mahungu lawa hi va tiselaka wona. Vanhu vo tala lava titwaka va tshikilelekile ni ku va ni gome va kuma swi chavelela ku vulavula na hina. Hikwalaho ka leswi va tsakelaka leswi va swi twaka, van’wana va pfumela ku dyondza Bibele na hina. Hambi swi ri tano, minkarhi yin’wana vanhu va nga ha lava ku rhanga va phofula swiphiqo swa vona. Hambi loko nkarhi wun’wana hi wu tirhisela ku yingisela swivilelo swa munhu, a hi fanelanga hi rivala xikongomelo xa hina, ku nga ku dyondzisa vanhu ntiyiso wa Rito ra Xikwembu.
3 Ha swi lava ku chavelela lava tikeriwaka. Yesu u veke xikombiso loko a vula leswi rhekhodiweke eka Matewu 11:28: “Tanani ka mina, n’wina hinkwenu lava karheleke, ni lava tikeriwaka.” Hi lava ku khutaza vanhu hi ndlela leyi fanaka. Hambi swi ri tano, xiya leswaku eku heteleleni ka ndzimana 28, Yesu u te: “Ndzi ta mi wisisa.” Xexo xi fanele xi va xikongomelo xa hina. Hi endla tano hi ku avela van’wana switshembiso leswi phyuphyisaka leswi humaka eRitweni ra Xikwembu. Ku va muyingiseri lonene swi kombisa ku tsakela ni ku khathala ka hina, naswona i swa nkoka eku hetisiseni ka ntirho wa hina wo chumayela mahungu lamanene ya Mfumo, hi pfuna van’wana va xiya leswaku Mfumo hi wona ntsena murhi wa swiphiqo hinkwaswo swa vanhu.—Mt. 24:14.
4 Ntirho wa hina a hi wona wa vatshila va ta rihanyo. Ku ri na sweswo, wu hi laha muapostola Pawulo a hlamuseleke ha kona, tanihi laha swi tsariweke ha kona eka 1 Timotiya 4:6, vutirheli lebyi langutanaka ni “tidyondzo letinene,” tidyondzo leti kumekaka eRitweni ra Xikwembu. Lava va nga na swiphiqo swa vona vini ni swa mintlhaveko va nga ha khutaziwa ku titshega hi Yehovha. Va dyondzise ku “[anakanya] swilo leswi nge henhla”—swilo leswi fambisanaka ni ntshembo wa Mfumo. (Kol. 3:2) Loko vanhu va tshama va ri karhi va anakanya hi Rito ra Xikwembu, va akeka hikwalaho ka nkucetelo wa matimba lowu ri nga na wona evuton’wini bya vona.—Hev. 4:12.
5 Kutani ke, pakani ya hina i ku pfuna vanhu leswaku va anakanya hi swilo leswi ‘lulameke, leswi tengeke, leswi tsakisaka ni leswi dzunekaka.’ (Flp. 4:8) Loko va yisa nyingiso wa vona eka ntshembo wa Mfumo, va ta katekisiwa hi laha hi katekisiwaka ha kona. Na vona va ta kuma ntsako lowu kumiwaka hikwalaho ka vutivi bya leswaku eku heteleleni Yehovha u ta tlhantlha swiphiqo swa vona hi ku tirhisa Mfumo wa yena.—Ps. 145:16.