Vanhu Va Mixaka Hinkwayo Va Ta Ponisiwa

¹ Yehovha u rhandza “leswaku vanhu hinkwavo va ponisiwa, va fika laha va kotaka ku tiva leswi swi nga ntiyiso.” (1 Tim. 2:4) Hambileswi vanhu va kuceteriweke ngopfu hi ku va ni xitekela, ndlela leyi va kurisiweke ha yona ni ndhawu leyi va tshamaka eka yona, va ni ntshunxeko wo tihlawulela naswona un’wana ni un’wana a nga hlawula ndlela leyi a lavaka ku hanya hi yona evuton’wini. Va nga endla leswi nga swinene ivi va hanya, kumbe va nga endla leswo biha ivi va lova. (Mt. 7:13, 14) Xana tinhla leti ti ri khumba njhani langutelo ra hina hi vanhu lava hi va yiselaka mahungu lamanene ya Mfumo?

² A hi fanelanga hi ehleketa leswaku ku tsakela ka munhu ntiyiso ku lawuriwa hi swilo swo tanihi vutiko kumbe ndhavuko kumbe xikhundlha etikweni. Ntiyiso wu nga tsakeriwa ni hi lava nga dyondzangiki ku ya kule kumbe lava nga ni dyondzo ya le henhla, lava tsakelaka tipolitiki ni lava nga ni swikhundlha leswi tlakukeke, lava nge Xikwembu a xi kona, lava nge Xikwembu a xi tiviwi hambi ku ri hi vadyohi lava dumeke. Vanhu va swiyimo hinkwaswo swa vutomi ni swa ntshamisano va hundzule ndlela ya vona yo sungula ya mahanyelo naswona sweswi va le ndleleni yo kuma vutomi emisaveni leyintshwa ya Xikwembu. (Swiv. 11:19) Hikokwalaho, a hi fanelanga hi kanakana ku yisela vanhu va swiyimo hinkwaswo swa vutomi rungula ra Mfumo.

³ Xiya Swikombiso Leswi: Wanuna un’wana a kunguhate ku dlaya tata wakwe wa muwundli kambe a nga ha n’wi dlayangi. Endzhaku u kunguhate ku tisunga kambe a nga ha tisunganga. Endzhaku ka loko a khotsiwile hikwalaho ko yiva ni ku xavisa swidzidzirisi, vukati byakwe byi file. Namuntlha munhu loyi u hanya hi ku tshembeka naswona u tiphina hi vukati lebyi tsakeke kun’we ni vuxaka lebyinene ni tata wakwe wa muwundli. I yini lexi endleke ku hundzuka loku? U dyondze Bibele ni Timbhoni ta Yehovha naswona u tirhise leswi a swi dyondza. Yehovha a nga n’wi langutanga a ri munhu la nga ponisekiki.

⁴ Ndhuma ya wanhwana un’wana la nga mutlangi wa le ka TV a yi n’wi tiselanga ntsako. Kambe hi ku tsakisiwa hi mahanyelo lamanene ya Timbhoni, u amukele dyondzo ya Bibele, naswona hi ku hatlisa a ri eku pfuneni ka van’wana leswaku va dyondza hi ta mahungu lamanene ya Mfumo. A tiveka hinkwako loko a famba hi yindlu na yindlu, kambe hi ku tsaka u vule leswaku u lava ku tiviwa tanihi un’wana wa Timbhoni ta Yehovha ematshan’wini ya ku va mutlangi wa ndhuma.

⁵ Loko Mbhoni yi endle lunghiselelo ra dyondzo ya Bibele ni la endleke xikhokhelo xa Xihondzo xo Rindza, muakelani u swi twile ivi a ta edyondzweni. Hi ku hatlisa muakelani loyi u vone ntiyiso lowu a ku ri khale a ri karhi a wu lavisisa! Yena ni nuna wakwe va herise papila ra ku dlaya vukati leri va nyikiweke rona ivi va vuyelelana. A a rhandza ngopfu vungoma bya tinyeleti naswona a namarhele vugandzeri bya madimona, kambe hi ku tirhandzela u cukumete tibuku leto durha ni swilo hinkwaswo leswi a ri na swona leswi fambisanaka ni vudimona. Hi ku hatlisa u ve kona eminhlanganweni ni ku byela maxaka ni vanghana malunghana ni ripfumelo rakwe lerintshwa. Sweswi u nyikela vumbhoni hi ku hiseka eka van’wana.

⁶ A hi fanelanga hi hlawula vanhu. Kambe, a hi twariseni mahungu lamanene hi ku hiseka evanhwini kun’wana ni kun’wana. Hi ni xivangelo lexi eneleke xo tshemba leswaku Yehovha, la ‘langutaka leswi nga embilwini,’ u ta va “muponisi wa vanhu hinkwavo.”—1 Sam. 16:7; 1 Tim. 4:10.