Va Nghena Hi Vunyingi
1 Hilaha a swi ri hakona eka lembe-xidzana ro sungula, ku andza loku vandlha ra Vukreste ri vaka na kona namuntlha hi loku hlamarisaka. (Mint. 2:41; 4:4) N’wexemu, vadyondzisiwa lavantshwa vo ringana 366 579 va khuvuriwile, ku nga avhareji ya vanhu lava tlulaka 1000 siku rin’wana ni rin’wana! Vanhu vo tlula miliyoni va khuvuriwile emalembeni manharhu lama nga hundza. Kunene, Yehovha u hambeta a nghenisa vapfumeri hi vunyingi.—Mint. 5:14.
2 Vanhu vo tala lavantshwa lava pfumalaka ntokoto evuton’wini bya Vukreste va lava ku pfuniwa ni ku leteriwa hi lava tiyeke eripfumelweni. (Rhom. 15:1) Exikarhi ka Vakreste vo sungula a ku ri ni van’wana, lava hambiloko ku hundze malembe va khuvuriwile, va tsandzekeke ku “kongoma eku hetisekeni.” (Hev. 5:12; 6:1) Hikwalaho ka xivangelo xexo, epapileni rakwe leri yaka eka Vaheveru, Pawulo u kombise tindhawu leti Vakreste va faneleke va kula emoyeni eka tona. Xana hi tihi tindhawu leti, naswona mpfuno lowu lavekaka wu nga nyikeriwa njhani?
3 Ku Va Ni Mikhuva Leyinene Yo Dyondza: Hi ku pfumelelana ni ndzetelo wa Pawulo, ku va xichudeni lexinene swi lava ku dyondza hi ku chivirika, ku phindha dyondzo, ni ku dya “swakudya leswi tiyeke” leswi nyikeriwaka hi nhlengeletano ya Yehovha. (Hev. 5:13, 14; vona Xihondzo xo Rindza xa August 15, 1993, matluka 12-17.) Hi ku katsa vapfumeri lavantshwa emabulwini ya moya ni ku va pambulela tindzalama ta risima ta ntiyiso leti u ti kumeke hi ku endla ndzavisiso wa wena n’wini, u nga va susumetela ku va ni mikhuva leyinene yo dyondza. Kumbexana minkarhi yin’wana u nga rhamba mupfumeri lontshwa leswaku a hlanganyela na wena eka dyondzo ya wena ya munhu hi xiyexe kumbe ya ndyangu.
4 Ku Va Kona eMinhlanganweni Nkarhi Na Nkarhi: Xikombiso xa wena lexinene ni marito ya wena ya xikhutazo ma nga pfuna swirho leswintshwa swa vandlha leswaku swi papalata ndhawu yin’wana leyi Pawulo a vuleke leswaku wa karhateka ha yona—‘ntolovelo’ lowu van’wana va nga na wona wo xwa eminhlanganweni ya Vukreste. (Hev. 10:24, 25) Va pfune va swi twisisa leswaku minhlangano i mbulavurisano wa vona wa moya evandlheni. Vana wo sungula ku endla leswaku va titwa va amukelekile tanihi xiphemu xa vumakwerhu bya hina.
5 Ku Tshinelela Yehovha Hi Ntshembo: Leswaku hi hlula ku tsana enyameni ni swihoxo swa vumunhu, hi fanele hi tshinelela Yehovha hi xikhongelo, hi n’wi phofulela miehleketo ya hina leyi enteke ni swilo leswi hi karhataka swinene. Vanhu lavantshwa va fanele va swi tiva leswaku a va fanelanga va kanakana ku kombela Yehovha leswaku a va pfuna, hilaha Pawulo a khutazeke hakona. (Hev. 4:15, 16; 10:22) Hi ku hlamusela mintokoto ya wena n’wini malunghana ni mhaka leyi, swi ta tiyisa ripfumelo ra munhu lontshwa hi ku tiva leswaku Yehovha u yingisela swikhongelo leswi humaka embilwini.
6 Ku Hlela Nkarhi Wa Vutirheli: Pawulo u tlhele a vula leswaku loko ‘nkarhi na nkarhi hi humesela Xikwembu magandzelo yo dzunisa,’ swa hi tiyisa emoyeni. (Hev. 13:15) Xana u nga rhamba muhuweleri lontshwa leswaku a famba na wena eka malunghiselelo ya wena ya vhiki na vhiki ya ntirho wa nsimu? Kumbexana havambirhi ka n’wina mi nga lunghiselela swingheniso swa n’wina kumbe mi bula hi xiyenge xin’wana xa vutirheli lexi munhu lontshwa a nga si xi ringetaka.
7 Vanhu lava nghenaka hi vunyingi va hi endla hi tsaka. Ku tikarhata ka hina hi letela ni ku khutaza swirho leswintshwa swa vandlha swi ta swi pfuna leswaku swi va ni ripfumelo leri tiyeke leri lavekaka ‘ku hlayisa mimoya-xiviri ya swona.’—Hev. 3:12, 13; 10:39.