Xana Wa Ku Tlangela Ku Lehisa Mbilu Ka Yehovha?
1 Loko Yehovha a a nga lehisanga mbilu eka malembe ya 10, ya 20 kumbe ku tlula lama hundzeke, leswaku ku ta nyikeriwa vumbhoni lebyi engetelekeke, xana a wu ta va u wu tivile ntiyiso? Ha tsaka swonghasi leswi a pfumeleleke vanhu lava engetelekeke leswaku va “hundzuka.” Kambe, siku lerikulu ra Yehovha ra ku avanyisa “ri ta ta ku fana ni khamba.” (2 Pet. 3:9, 10) Hikokwalaho, ku lehisa mbilu ka Xikwembu a ku fanelenga ku tekiwa ku ri ku hlwela ku herisa mafambiselo lawa ya swilo.—Hab. 2:3.
2 Twela Vanhu Vusiwana: Ku lehisa mbilu ka Yehovha ku yi tlula ekule ndlela leyi hi ku twisisaka ha yona. A hi fanelanga hi lahlekeriwa hi xikongomelo xa kona. (Yon. 4:1-4, 11) Yehovha u vona xiyimo lexi terisaka vusiwana xa vanhu naswona u va twela vusiwana. Yesu na yena u titwa hi ndlela leyi fanaka. Leswi a a ri ni ntwela-vusiwana eka vanhu lava a a va chumayela, u lave leswaku ntirho wa ku vula evhangeli wu yisiwa emahlweni leswaku vo tala va ta va ni lunghelo ra ku kuma vutomi lebyi nga heriki.—Mat. 9:35-38.
3 Loko makhombo ni timhangu swi hlasela, xana a hi va tweli vusiwana vanhu lava nga wu tiviki ntiyiso? Loko vanhu namuntlha va ringeta ku langutana ni mpfilumpfilu wa misava leyi ni ku wu twisisa, va fana ni “tinyimpfu leti nga riki na murisi.” (Mar. 6:34) Hi ku hisekela ku chumayela mahungu lamanene, hi chavelela lava nga ni timbilu letinene naswona hi kombisa ku tlangela ka hina ku va Yehovha a lehise mbilu.—Mint. 13:48.
4 Ntirho Wa Hina I Wa Xihatla: N’wexemu, ku khuvuriwe vanhu va 323 439 kasi vo tlula 14 000 000 va ve kona eXitsundzuxweni. Va ha tele vanhu lava nga ponaka ku lovisiwa ka mafambiselo lawa yo biha! Leswaku “ntshungu lowukulu” wu ta va wu kule ku fikela kwihi, a hi swi tivi. (Nhlav. 7:9) Leswaku ntirho wa hina wa ku chumayela wu ta ya emahlweni ku fikela rini, a hi swi tivi. Kambe Yehovha wa swi tiva. Mahungu lamanene ma ta chumayeriwa ku kondza yena a eneriseka, “kutani hi kona makumu ma nga ta fika.”—Mat. 24:14.
5 Nkarhi lowu seleke wu komile naswona siku ra Xikwembu ri kwala nyongeni. (1 Kor. 7:29a; Hev. 10:37) Handle ko kanakana, “ku ponisiwa ka hina ku le kusuhi swinene ku tlula hi nkarhi lowu hi veke vapfumeri ha wona.” (Rhom. 13:11) Hi nga lahlekeriwi hi xikongomelo xa ku lehisa mbilu ka Xikwembu. Ematshan’weni ya sweswo, a hi chumayeleni hi ku hiseka leswaku vo tala lava navelaka ku lulama va kota ku kuma tintswalo letikulu ta Yehovha.