Mindyangu Yi Nga Tiya Njhani Hi Tlhelo Ra Moya?

¹ Mindyangu ya Vakreste ya bumabumeriwa hi ‘ku hanya hi ku tinyiketela loku nga ni vukwembu emakaya.’ (1 Tim. 5:4) Hambiswiritano, leswi hi rhendzeriweke hi minkucetelo yo tala yo biha leyi nga tsanisaka ripfumelo ra hina, i swa nkoka leswaku mindyangu yi lwela ku tshama yi tiyile hi tlhelo ra moya. Xana leswi yi nga swi kotisa ku yini?

² Tirhisa Vunhloko Hilaha Kreste A Byi Tirhiseke Hakona: Tinhloko ta mindyangu ti fanele ti tekelela Yesu Kreste hi ndlela leyi ti byarhaka vutihlamuleri bya tona ha yona leswaku ti tiyisa mindyangu ya tona. Ku engetela eka rirhandzu leri a hi kombiseke rona hi ku hi fela, Yesu wa ha ya emahlweni a ‘wundla ni ku khathalela’ vandlha. (Efe. 5:25-29) Vatswari va rirhandzu va landzelela xikombiso lexi hi ku tiyiseka leswaku siku ni siku va wundla mindyangu ya vona hi tlhelo ra moya. Leswi swi katsa ku va ni dyondzo ya Bibele ya ndyangu vhiki ni vhiki, loko swi koteka va vulavula hi timhaka ta nkoka ta moya ni ku tlhantlha swiphiqo leswi tshukaka swi va kona.—Det. 6:6, 7.

³ Ensin’wini: Swirho swa ndyangu hinkwaswo swi fanele swi tsundzuka leswaku ku chumayela van’wana hi Yehovha ni hi swikongomelo swa yena i xiphemu xa nkoka evugandzerini bya vona. (Esa. 43:10-12) Loko n’wina vatswari mi lava leswaku vana va n’wina va va Timbhoni ta Yehovha leti tshembekaka, mi fanele mi sungula ku va pfuna ku rhandza nsimu va ha ri vatsongo swinene. Hlamuselani leswaku hikwalaho ka yini hi fanele hi tinyiketela ku hlanganyela entirhweni wa nsimu vhiki ni vhiki. (Mat. 22:37-39) Kutani endlani malunghiselelo ya leswaku va hlanganyela na n’wina nkarhi ni nkarhi ensin’wini.

⁴ Va pfuneni ku tlangela ntirho wo chumayela hi ku tinyika nkarhi wo lunghiselela ni ku pfuxeta swingheniso swa le nsin’wini, hi nkarhi wa dyondzo ya ndyangu ya vhiki ni vhiki. Vatswari va fanele va letela vana va vona ensin’wini ha un’we-un’we, va va pfuna leswaku va endla nhluvuko hi ku ya hi malembe ni vuswikoti bya vona. Endzhaku ko tirha swin’we ni vana va n’wina ensin’wini, vulavurisanani na vona malunghana ni ndlela leyi va tivoneleke ha yona leswaku Yehovha wa khathala ha vona. Va hlamusele mintokoto leyi tiyisaka ripfumelo. Loko mindyangu yoleyo yi ya emahlweni yi ‘nantswa leswaku Hosi yi ni musa,’ sweswo swi ta endla leswaku yi tshinela ekusuhi na Yehovha,’ naswona yi lwisana ni “vubihi hinkwabyo.”—1 Pet. 2:1-3.

⁵ Eminhlanganweni: I swinene ngopfu loko swirho swa ndyangu swi pfunana leswaku swi va kona eminhlanganweni ya vandlha hinkwayo, ngopfu-ngopfu loko un’wana wa vona a karhele kumbe a hele matimba! Makwerhu un’wana wa xisati la ha riki muntshwa u te: “Loko tata wa mina a vuya hi le ntirhweni u va a karhele. Kambe ndzi n’wi byela yinhla yin’wana leyi ku nga ta vulavuriwa ha yona enhlanganweni wa madyambu wolawo, kutani swi n’wi khutaza leswaku a famba. Kutani loko mina ndzi titwa ndzi karhele, na yena wa ndzi khutaza leswaku ndzi ya.”—Hev. 10:24, 25.

⁶ Ku Endla Swilo Tanihi Ndyangu: Mindyangu yi fanele ku endla swilo swin’we, ku fana ni ku pfunana hi mintirho ya le kaya. Yi fanele yi tinyika ni nkarhi wa vuhungasi lebyinene. Swilo swo fana ni tipikiniki, ku valanga tindhawu, ku tlanga mintlango ni ku endzela maxaka kumbe vanghana swi nga va leswi phyuphyisaka endzhaku loko ku anakanyiwa ha swona.—Ekl. 3:4.

⁷ Mindyangu ya Vakreste leyi tiyeke yi hlula mintlhontlho ya siku ni siku leyi xungetaka vumoya bya yona. Loko yi endla vuxaka lebyikulu na Yehovha, yi kuma matimba lama humaka eka yena.—Efe. 6:10.